Read koho Mathiơ 4 Bible Online

Mathiơ 4 - koho bible

Mathiơ 4

¹Tŭ hơ̆, Yàng Hwềng lam Yàng Jesu tus tòm ƀlàng ngềt ngơt, nàng kong cà ràk ơniai.

²Tòm tŭ neh ơt sa poan jơt ngai mơ poan jơt mơnang, gen Kơnràñ jơgloh.

³Gen cà ràk la cau ơniai tus đơs mơ Kơnràñ lah: “Dilah Kơnràñ la Kòn Yàng Tom Trồ dê, gen sồr tĕ ală lŭ do gơlik gơs piang lă.”

⁴Kơnràñ ho lah: “Gơs jơnau cih lah: ‘Kòn mơnus kis ò di mìng kơnòm di piang lă lơm ò, mơya kung kơnòm di ală jơnau đơs lik bơh di bơr Yàng Tom Trồ sơl.’”

⁵Gen cà ràk cèng Kơnràñ tus hơ ƀòn dờng sàng goh, ơn Kơnràñ hơđang bồ rkàng hìu duh khoai,

⁶mơ đơs lah: “Dilah Kơnràñ la Kòn Yàng Tom Trồ dê, ntruñ tĕ. Bơh gơs jơnau cih lah: ‘Bơh mê Yàng rơp ai gơnoar sồr ală cau gơnrơh Kơnràñ dê, Bol khai rơp đo mê tòm mpàng tê, Rngòt jơng mê gơtup di lŭ mòn.’”

⁷Yàng Jesu đơs lah: “Kung gơs jơnau cih lah: ‘Mê bañ lòng Yàng la Yàng Tom Trồ mê dê.’”

⁸Cà ràk cèng tai Kơnràñ guh hơđang mơnơm jơnhoa ngan, sơnio Kơnràñ in jơh ală lơgar tòm dunnia, mơ bơta gơklŏ gơ dê,

⁹mơ đơs lah: “Dilah Kơnràñ tơmbic să di đap añ mơ duh khoai añ, gen añ rơp ai Kơnràñ in jơh ală bơta do.”

¹⁰Gen Yàng Jesu đơs mơ gơ lah: “Ơ cà Satan, ruc tĕ. Bơh gơs jơnau cih lah: ‘Mê duh khoai tĕ Yàng la Yàng Tom Trồ mê dê, mơ duh broă mìng dô nă Kơnràñ lơm.’”

¹¹Gen cà ràk lòi Kơnràñ. Ne, gơs ală cau gơnrơh tus duh broă Kơnràñ.

¹²Mơ tai, tòm tŭ Yàng Jesu kơno Jang neh kòl kup jàm, gen Kơnràñ pleh lòt hơ Galile.

¹³Kơnràñ lik bơh Nasaret mơ tus ơm tòm Kapenaum di gah dàlềng, tòm nhàr tiah Jebulun mơ Neptali,

¹⁴nàng gơlik di ngan be jơnau cau gơnoar hwơr Esai neh đơs:

¹⁵“Tiah Jebulun mơ Neptali, Tiah rò gah dàlềng, đah ne Jordan, Hơ̆ la Galile ală làng bol Bơdìh dê!

¹⁶Làng bol nggui tòm tiah klam jơngo Neh gŏ bơta àng dờng; Mơ bơta àng neh pơnđàng hơđang ală cau nggui hơđơm mƀur bơta chơt.”

¹⁷Bơh tŭ hơ̆, Yàng Jesu sơntòm bơto yal lah: “Bol mê gơjrañ sang glài tĕ, bơh lơgar đang trồ neh tus rềp.”

¹⁸Tòm tŭ lòt rò gah dàlềng Galile, Yàng Jesu gŏ bàr nă oh mi. Dô nă la Simôn kung sơnđan la Pier, mơ oh khai la Andre, ơm dang bơtơng tòm dàlềng, bơh bol khai la cau kup ka.

¹⁹Kơnràñ đơs mơ bol khai lah: “Jat tĕ Añ; Añ rơp lơh bol mê in gơlik gơs cau dang bơtơng cau.”

²⁰Bol khai lòi bơtơng mo mơ jat Kơnràñ.

²¹Bơh tềng hơ̆ lòt tai, Kơnràñ gŏ bàr nă oh mi ndai, la Jakơ kòn Sebede, mơ oh khai la Jang, ơm srồt bơtơng tòm ơhò bal mơ Sebede bèp bol khai. Gen Kơnràñ hòi bol khai.

²²Tŭ hơ̆ mo bol khai lòi ơhò mơ bèp bol khai dê mơ jat Kơnràñ.

²³Yàng Jesu lòt làm Galile, bơto sồr tòm ală hìu jum, bơto yal Jơnau Niam lơgar đang trồ dê, mơ sơmbòi tơl ală bơta kòp jê tòm làng bol.

²⁴Sơnđan Kơnràñ pơnro làm jơh lơgar Siri. Cau cèng jơh ală cau kòp, gơs tơl ală bơta kòp tê jê să, cau kòl cà lơh, cau kroă sơnrang, cau gơlte tus hơ Kơnràñ, mơ Kơnràñ sơm bol khai in bòi jơh.

²⁵Kung gơs mpồl làng bol oă bơh Galile, bơh Dekapôl, Jude, mơ đah ne Jordan lòt jat Kơnràñ sơl.