Read koho Mathiơ 5 Bible Online

Mathiơ 5 - koho bible

Mathiơ 5

¹Yàng Jesu gŏ mpồl làng bol, gen guh hơđang mơnơm. Tòm tŭ Kơnràñ nggui, gen ală cau bơtê tus rềp.

²Kơnràñ pò bơr mơ bơto bol khai lah:

³“Lơngai ală cau gơs nùs rƀah bòl glar in, bơh lơgar đang trồ la bal mơ ală cau hơ̆!

⁴Lơngai ală cau moat jrùng in, bơh rơp geh pơndòm pơniang!

⁵Lơngai ală cau gơs nùs niam lơnhơn in, bơh rơp geh pơrdòn ù.

⁶Lơngai ală cau in jơgloh tơhìr bơh bơta song ring, bơh rơp geh hòm!

⁷Lơngai ală cau gơs nùs kòñ nđàc in, bơh rơp geh kòñ nđàc!

⁸Lơngai ală cau gơs nùs sàng goh in, bơh rơp gŏ Yàng Tom Trồ!

⁹Lơngai ală cau lơh gơtòmsòr in, bơh rơp geh sơnđan la kòn Yàng Tom Trồ!

¹⁰Lơngai ală cau in kong cau kup kơryan bơh bơta song ring, bơh lơgar đang trồ la bal mơ ală cau hơ̆!

¹¹Lơngai bol mê in tài bơh Añ mơ gơkòl cau bơtat bơtròh, kup kơryan, mơ yă blac jơh ală bơta iơh.

¹²Hòn chò hừh hơh tĕ, bơh phan ƀàn bol mê dê la dờng hơđang trồ; bơh ală cau gơnoar hwơr lài mơ bol mê kung neh kong cau kup kơryan behơ̆ sơl.”

¹³“Bol mê la boh ù dê, mơya dilah roh ƀă, gen ai ñchi nàng lơh gơ in bă wơl taih? Gơ ò diơng ngui tai, mìng sang hơ bơdìh mơ cau jă dê gơ.

¹⁴Bol mê la bơta àng dunnia dê. Dô nơm ƀòn dờng bơt hơđang mơnơm gen ò rgơi ndơp.

¹⁵Kung ò gơs cau lơi chu đèng mơ ơn tòm thùng, mơya ơn hơđang jơng đèng, gen gơ sòl pơnđàng kòp nă cau in tòm hìu.

¹⁶Behơ̆, bơta àng bol mê dê pơnđàng tĕ di đap ală cau, nàng bol khai in gŏ ală broă niam bol mê dê, mơ jòng ro Bèp bol mê ơm hơđang trồ.”

¹⁷“Bañ tồnlah Añ tus nàng lơh roh bơta boh lam hala jơnau gơnoar hwơr; Añ tus ò di nàng lơh roh ò, mơya nàng lơh wil tơl.

¹⁸Bơh di ngan Añ đơs mơ bol mê, trồ tiah rơp roh, mơya dô tềl dềt dô cik tòm bơta boh lam kung ò gơs tŭ lơi roh, jơl tus di tŭ jơh ală bơta gơlik wil tơl.

¹⁹Behơ̆ dilah cau lơi lơh tìs dô bơta dềt rlau jơh tòm ală bơta sồr lam do mơ bơto cau lơh behơ̆, gen khai rơp geh sơnđan la dềt rlau jơh tòm lơgar đang trồ. Ai dilah cau lơi lơh jat mơ bơto sồr ală bơta sồr lam hơ̆, gen rơp geh sơnđan la dờng tòm lơgar đang trồ.

²⁰Bơh Añ đơs mơ bol mê, dilah bơta song ring bol mê dê ò lin rlau mơ bơta song ring ală cau bơto bơta boh lam mơ ală cau Pharisi dê, gen bol mê ò gơs tŭ lơi geh mut tòm lơgar đang trồ.”

²¹“Bol mê neh kơno jơnau bơto ală cau rài yau in lah: ‘Bañ tơnchơt cau,’ mơ ‘cau lơi tơnchơt cau gen ò rgơi pleh dê bơta cahrña.’

²²Mơya Añ đơs mơ bol mê: Dilah cau lơi gơjrañ dê oh mi he, gen ò rgơi pleh dê bơta cahrña; cau lơi wàc oh mi he, gen ò rgơi pleh di Mpồl Kwang Tơrña; ai cau lơi lah sơrpah oh mi he, gen ò rgơi pleh di ồs brah tìng.

²³Behơ̆, tòm tŭ mê ơn phan di cơnòng duh khoai, mơ kah wơl oh mi he gơs bơta gơtòmsò mơ he,

²⁴gen lòi tĕ phan ơn di đap cơnòng duh khoai, mơ rê wơl lơh gơtòmsòr mơ oh mi he lài, gen sồng tus ơn phan mê dê.

²⁵Tòm tŭ mê lòt gùng bal mơ cau yă wơn di mê, gen lơh gơtòmsòr mhar tĕ mơ khai, rngòt khai jào mê di đap cau kwang cahrña, mơ cau kwang cahrña jào mê tòm tê cau ling, mơ mê gơkòl ơm jàm mòn.

²⁶Di ngan Añ đơs mơ mê, mê gam siơ̆u dô su, kung ò geh lik klàs bơh hơ̆ sơl.”

²⁷“Bol mê neh kơno bơto lah: ‘Bañ tìs glài rềs àr bơrnàn.’

²⁸Mơya Añ đơs mơ bol mê, dilah cau lơi sền cau ùr mơ gơs nùs hàm kòñ di khai, gen tòm nùs neh tìs glài rềs àr bơrnàn mơ khai rau.

²⁹Behơ̆ dilah mat đah ma mê lơh mê in gơtup tìs, gen kơlwĕ tĕ mơ sang gơ; chan dô pơnah să mê kong roh rui la niam rlau mơ jơh să jan mê kong sơrbì tòm brah tìng.

³⁰Mơ dilah tê ma mê lơh mê in gơtup tìs, gen koh tĕ mơ sơrbì gơ; chan dô pơnah să mê kong roh rui la niam rlau mơ jơh să jan mê kong sơrbì tòm brah tìng.”

³¹“Kung gơs jơnau đơs lah: ‘Dilah cau lơi lòi bau ùr he, gen ai tĕ khai in sră tòmlòi.’

³²Mơya Añ đơs mơ bol mê, dilah cau lơi lòi bau ùr he, ò di bơh glài rềs àr bơrnàn, gen lơh bau he in gơlik gơs cau bơrnàn; ai cau lơi bau mơ cau ùr neh cau lòi hơ̆, gen kung tìs glài bơrnàn sơl.”

³³“Mơ tai, bol mê neh kơno đơs ală cau yau in lah: ‘Bañ sang jơnau srat să, mơya lơh sir tĕ jơnau srat să mê dê gơwèt mơ Yàng.’

³⁴Mơya Añ đơs mơ bol mê: Bañ srat să bơh bơta lơi; bañ sơnio trồ, tài bơh gơ la sơbàn Yàng Tom Trồ dê;

³⁵bañ sơnio tiah, bơh gơ la kơrnòl jơng Yàng Tom Trồ dê; bañ sơnio Jerusalem, bơh gơ la ƀòn dờng Bơtau dờng dê.

³⁶Kung bañ sơnio bồ mê mơ srat să, bơh mê ò rgơi lơh dô dang sŏ in gơlik kò hala jù.

³⁷Mơya bol mê pal đơs: ‘Di, di’ hala ‘Ò, ò’ la tơl rau. Đơs rlau mơ ală jơnau do la gơlik bơh cà iơh.”

³⁸“Bol mê neh kơno đơs lah: ‘Mat sal mat, sề sal sề.’

³⁹Mơya Añ đơs mơ bol mê: Bañ tòmdră mơ cau iơh bơsak. Dilah cau lơi pah tơrmồ ma mê, gen ai tơn đah ne tai khai in.

⁴⁰Hala cau lơi kòñ yă mê, mơ ai ào dơlam mê dê, gen lòi khai ai tơn ào bơdìh tai.

⁴¹Hala cau lơi kòñ kup mê lòt dô kơsồ, gen lòt tĕ bàr kơsồ bal mơ khai.

⁴²Cau lơi dan mơ mê, gen ai tĕ; cau lơi kòñ càn mơ mê, gen bañ lơh sềt.”

⁴³“Bol mê neh kơno đơs lah: ‘Kòñ gơboh tĕ di cau gơp he, mơ gơjrañ kơuềng tĕ di cau sò tơm.’

⁴⁴Mơya Añ đơs mơ bol mê: Kòñ gơboh tĕ di cau sò tơm di bol mê, mơ hòi dan tĕ cau lơi in kup kơryan bol mê,

⁴⁵nàng bol mê in lơh gơs kòn Bèp bol mê dê ơm hơđang trồ, bơh Kơnràñ sồr mattơngai lik pơnđàng cau iơh bơsak in mơ cau lơbơn niam in sơl, ai mìu cau song ring in mơ cau ò song ring in sơl.

⁴⁶Dilah bol mê kòñ gơboh di ală cau kòñ gơboh di he, gen gơs phan ƀàn lơi taih? Ală cau dar dia ò di lơh behơ̆ ò ơ?

⁴⁷Mơ dilah bol mê mìng lùp còp să oh mi he lơm, gen gơs ñchi krơi mơ cau ndai taih? Ală làng bol bơdìh ò di lơh behơ̆ ò ơ?

⁴⁸Behơ̆ bol mê gơlik gơs tĕ wil tơl, be Bèp bol mê hơđang trồ la wil tơl.”