Read koho Mathiơ 6 Bible Online

Mathiơ 6 - koho bible

Mathiơ 6

¹“Kơrhia tĕ, tòm tŭ lơh broă niam, bañ lơh di đap cau nàng bol khai in gŏ. Dilah ò behơ̆, gen bol mê ò geh phan ƀàn lơi bơh dê Bèp bol mê ơm hơđang trồ.

²Behơ̆ tòm tŭ mê pà gòi, bañ uh kơlwòk di đap he, be ală cau ma blac lơh tòm ală hìu jum mơ tòm ală gùng me, nàng geh cau jòng ro. Di ngan Añ đơs mơ bol mê, bol khai neh geh phan ƀàn bol khai dê rau.

³Mơya tòm tŭ mê pà gòi, bañ lòi tê kiau mê git broă tê ma mê lơh,

⁴tồ bơta pà gòi mê dê geh ndơp ndơr, mơ Bèp mê la Bơtau gŏ tòm tiah ndơp ndơr, rơp ai wơl mê in.”

⁵“Tòm tŭ bol mê hòi dan, bañ lơh be ală cau ma blac, bơh bol khai kòñ ntào hòi dan tòm ală hìu jum mơ di ală mum gùng, nàng cau in gŏ. Di ngan Añ đơs mơ bol mê, bol khai neh geh phan ƀàn bol khai dê rau.

⁶Mơya tòm tŭ mê hòi dan, mut tĕ tòm ơdŭ, til mpồng, gen hòi dan mơ Bèp mê la Bơtau ơm tòm tiah ndơp ndơr; mơ Bèp mê la Bơtau gŏ tòm tiah ndơp ndơr, rơp ai wơl mê in.

⁷Tòm tŭ bol mê hòi dan, bañ đơs ală jơnau rsĭ ò kwơ be làng bol bơdìh, bơh bol khai tồnlah jơnau đơs oă gen geh dòp.

⁸Bañ đòm bol khai, bơh Bèp bol mê git ală bơta bol mê pal càng lài mơ tŭ bol mê dan mơ Kơnràñ.

⁹Behơ̆ bol mê hòi dan tĕ be do: ‘Khoai Bèp bol hi ơm hơđang trồ; sơnđan Bèp gơs sàng goh;

¹⁰Lơgar Bèp gơs tus; Nùs kòñ Bèp gơs di, tòm ù be trồ!

¹¹Dan ai bol hi in ngai do phan sa tơl ngai.

¹²Dan toh glài bol hi in, be bol hi kung toh cau tìs glài mơ bol hi;

¹³Dan bañ tơmut bol hi tòm bơta ơniai, mơya dong bol hi klàs bơh bơta iơh. [Bơh lơgar, gơnap gơnoar, gơklŏ gơrê bal mơ Bèp sùm sùm. Amen.’]

¹⁴Bơh dilah bol mê toh bơta tìs glài cau in, gen Bèp bol mê hơđang trồ kung rơp toh bol mê in sơl.

¹⁵Mơya dilah bol mê ò toh bơta tìs glài cau in, gen Bèp bol mê kung ò toh bơta tìs glài bol mê in sơl.”

¹⁶“Tòm tŭ bol mê ơt sa, bañ lơh bơthĭ moat jrùng be cau ma blac, bơh bol khai lơh ñòp muh ñòp mat nàng cau in git bol khai ơt sa. Di ngan Añ đơs mơ bol mê, bol khai neh geh phan ƀàn bol khai dê rau.

¹⁷Mơya tòm tŭ mê ơt sa, bong tĕ mơñà di bồ mơ tuh muh mat,

¹⁸nàng cau in ò git mê ơt sa, mơya mìng Bèp mê la Bơtau ơm tòm tiah ndơp ndơr git. Mơ Bèp mê la Bơtau gŏ tòm tiah ndơp ndơr, rơp ai wơl mê in.”

¹⁹“Bol mê bañ prap lòi phan màng tòm ù, la tiah gơs mŏ tu mơ è sa siar roh, mơ cau blơ̆ tò ƀlong mut kơñau.

²⁰Mơya pal prap lòi phan màng he in hơđang trồ, la tiah ò gơs mŏ tu mơ ò gơs è sa siar roh, kung ò gơs cau blơ̆ tò ƀlong mut kơñau.

²¹Bơh phan màng mê dê ơm tiah lơi, gen nùs mê kung ơm tềng hơ̆ sơl.”

²²“Đèng să jan dê la mat. Dilah mat mê niam, gen jơh să jan geh bềng bơta àng.

²³Mơya dilah mat mê ò niam, gen jơh să jan mê gơs klam jơngo. Behơ̆ dilah bơta àng tòm mê la klam jơngo, gen bơta klam jơngo do la dờng ò git nđò.”

²⁴“Ò gơs cau lơi rgơi duh broă bàr nă cau tòm, bơh rơp gơjrañ kơuềng di cau do mơ kòñ gơboh di cau ne, hala sền dờng màng di cau do mơ sền òsơp di cau ne. Ală bol mê ò rgơi duh broă Yàng Tom Trồ ndang mơ duh broă jền priă ndang.

²⁵Behơ̆ tàng Añ đơs mơ bol mê: Bañ kơlôi rcang bơh bơta kis he dê, ñchi ai sa, ñchi ai ñô, hala bơh să jan he dê, ñchi ai soh. Bơta kis ò di la màng rlau mơ phan sa, mơ să jan ò di la màng rlau mơ phan soh ò ơ?

²⁶Sền tĕ ală sềm hơđang trồ; gơ ò sih, ò toès, kung ò prap tòm đam, mơ Bèp bol mê hơđang trồ kung ròng siam gơ. Bol mê ò di la màng rlau mơ gơ ò ơ?

²⁷Gơs cau lơi tòm bol mê bơh kơlôi rcang mơ rgơi bơtơl rài kis he dô êt phuk sơl ơ?

²⁸Ñchi bơh tài bol mê kơlôi rcang bơh phan soh taih? Sền kơlôi tĕ di ală bơkào gun tòm ƀlàng hòn be lơi; gơ ò gơs bòl glar, ò rồi brài.

²⁹Mơya Añ đơs mơ bol mê, bulah Salômôn tòm jơh bơta gơklŏ khai dê, kung ò gơs soh be dô nơm tòm ală bơkào hơ̆.

³⁰Behơ̆ dilah ñhơt tòm ƀlàng la jơi ngai do gam mơ ngai hìng sơrbì tòm bơnhă, mơ Yàng Tom Trồ tơnsoh gơ in behơ̆ sơl, tơ ài lah bol mê, ơ ală cau gơs dô êt bơta dòn ne!

³¹Behơ̆ gen, bañ kơlôi rcang lah: ‘Ñchi bol he ai sa taih?’ ‘Ñchi ai ñô taih?’ ‘Ñchi ai soh taih?’

³²Bơh jơh ală bơta hơ̆ ală làng bol Bơdìh òs jòi jat; mơya Bèp bol mê hơđang trồ git bol mê pal ngui sa ală bơta hơ̆ rau.

³³Mơya lài ngan, jòi jat tĕ lơgar Yàng Tom Trồ mơ bơta song ring Kơnràñ dê, gen Kơnràñ rơp ai bơtơl jơh ală bơta hơ̆ bol mê in.

³⁴Behơ̆ gen, bañ kơlôi rcang bơh ngai hìng, bơh ngai hìng rơp kơlôi rcang ngai hìng in. Bơta bòl glar ngai lơi la tơl ngai hơ̆ in.”