Read koho Mathiơ 7 Bible Online

Mathiơ 7 - koho bible

Mathiơ 7

¹“Bañ cahrña cau lơi, nàng bol mê ò kòl cahrña.

²Bơh bol mê cahrña cau ndai be lơi, gen cau kung rơp cahrña di bol mê behơ̆ sơl; mơ bol mê was cau in mơ rnoas lơi, gen cau kung was wơl bol mê in mơ rnoas hơ̆.

³Ñchi bơh tài mê sền gŏ thul tòm mat oh mi he mơ ò gŏ ròc dra tòm mat tòm he taih?

⁴Mbe mê rgơi đơs mơ oh mi he lah: ‘Ai añ in tă thul bơh di mat bi,’ tòm tŭ mat tòm mê gam gơs ròc dra be gen taih?

⁵Ơ cau ma blac, lài ngan tă tĕ ròc dra bơh di mat mê, gen sồng gŏ loh làng nàng tă thul bơh di mat oh mi mê dê.

⁶Bañ ai so in phan sàng goh, kung bañ sơrbì lŭ kràng màng he dê sur in, rngòt gơ jă mơ jơng mơ gơ wơl kap crè bol mê mòn.”

⁷“Dan tĕ, rơp ai; jòi tĕ, rơp bàn; teh tĕ, rơp geh pò bol mê in.

⁸Bơh dilah cau lơi dan gen geh, cau lơi jòi gen bàn, mơ cau lơi teh gen geh pò khai in.

⁹Gơs ñcau tòm bol mê, dilah kòn klau dan piang lă mơ ai lŭ ơ?

¹⁰Hala dilah kòn dan ka mơ ai bơs khai in ơ?

¹¹Behơ̆ dilah bol mê la cau iơh, mơ git ai kòn he in ală phan niam, tơ ài lah Bèp bol mê ơm hơđang trồ, ò ai phan niam ală cau in dan mơ Kơnràñ ò ơ?

¹²Behơ̆ bơta lơi mê kòñ cau lơh he in, gen lơh tĕ bơta hơ̆ bol khai in, bơh hơ̆ la tơnggume bơta boh lam mơ jơnau gơnoar hwơr dê.”

¹³“Mut tĕ mpồng wềt, bơh mpồng ơnàng mơ gùng dờng lam tus hơ bơta roh rui, mơ oă cau mut tềng hơ̆.

¹⁴Ai mpồng wềt mơ gùng hat lam tus hơ bơta kis, mơ dô êt cau jòi geh.”

¹⁵“Kơrhia tĕ di ală cau gơnoar hwơr ma blac, la ală cau soh gơltau belàt lòt tus hơ bol mê, mơya tòm dơlam la so rhau jak kap crè.

¹⁶Bol mê rơp đal git bol khai bơh plai bol khai dê. Gơs cau pic plai ño di tòm lò hala plai chi ƀal di rlau lò mrơt sơl?

¹⁷Behơ̆ chi niam gen gơlik plai niam, mơ chi iơh gen gơlik plai iơh.

¹⁸Chi niam ò rgơi gơlik plai iơh, mơ chi iơh kung ò rgơi gơlik plai niam.

¹⁹Chi lơi ò gơlik plai niam, gen kơl mơ sang tòm ồs.

²⁰Behơ̆ bol mê rơp đal git bol khai bơh plai bol khai dê.”

²¹“Ò di kòp nă cau đơs mơ Añ lah: ‘Khoai Yàng, khoai Yàng,’ gen geh mut tòm lơgar đang trồ ò, mơya mìng cau lơi lơh jat nùs kòñ Bèp Añ jê ơm hơđang trồ.

²²Tòm ngai hơ̆ rơp gơs oă cau đơs mơ Añ lah: ‘Khoai Yàng, khoai Yàng, bol hi ò di neh ai sơnđan Kơnràñ mơ đơs hwơr, ai sơnđan Kơnràñ mơ bơtrơh ală cà, ai sơnđan Kơnràñ mơ lơh oă broă gơnap gơnoar ò ơ?’

²³Tŭ hơ̆ Añ rơp yal loh bol khai in git lah: ‘Ơ ală cau lơh bơta tồi glài iơh bơsak, Añ ò tŭ lơi git bol mê ò, lik lòt tĕ bơh di Añ.’”

²⁴“Behơ̆ cau lơi kơno ală jơnau Añ bơto do mơ lơh jat, gen kung be dô nă cau jak chài bơt hìu khai hơđang lŭ klềr.

²⁵Dùh mìu, dà tih, càl khồm druh dê hìu hơ̆, mơ hìu ò tơrlah bơh neh bơt hơđang lŭ klềr.

²⁶Ai cau lơi kơno ală jơnau Añ bơto do mơ ò lơh jat, gen kung be dô nă cau bơrngơl gơla bơt hìu khai hơđang bràs.

²⁷Dùh mìu, dà tih, càl khồm druh di hìu hơ̆, gen hìu tơrlah, tơrlơm lề oă ngan.”

²⁸Tòm tŭ Yàng Jesu neh đơs ală jơnau hơ̆ rau, gen mpồl làng bol ai lơh crih crài bơh bơta bơto sồr Kơnràñ dê,

²⁹bơh Kơnràñ bơto bol khai dô bă gơs gơnoar, ò di be ală cau bơto bơta boh lam bol khai dê.