Read koho Mathiơ 8 Bible Online

Mathiơ 8 - koho bible

Mathiơ 8

¹Tòm tŭ Yàng Jesu mù bơh mơnơm, gơs mpồl làng bol oă lòt jat Kơnràñ.

²Ne, gơs dô nă cau dun tus cùn khoai Kơnràñ mơ đơs lah: “Ơ Yàng, dilah Kơnràñ kòñ, gen rgơi lơh añ in gơs goh.”

³Yàng Jesu ai tê ƀư di khai mơ đơs lah: “Añ kòñ, goh tĕ.” Gen dun khai goh mo.

⁴Yàng Jesu đơs tai mơ khai lah: “Bañ yal mơ cau lơi, mơya lòt tĕ sơnio să mê mơ cau gơnoar ơn phan duh khoai, mơ ơn phan be Môise neh sồr nàng lơh cơng bol khai in.”

⁵Dơ̆ Yàng Jesu mut tòm Kapenaum, gơs dô nă cau at dô rhiang ling tus rac dan mơ Kơnràñ lah:

⁶“Ơ Yàng, cau dĭ gơna añ kòp gơlte bic tòm hìu, jê bòl glar oă ngan.”

⁷Yàng Jesu đơs lah: “Añ rơp tus sơmbòi khai in.”

⁸Cau at dô rhiang ling ho lah: “Ơ Yàng, añ ò di pal nàng Kơnràñ in mut tòm hìu añ. Dan đơs mìng dô jơnau lơm gen cau dĭ gơna añ jê rơp geh bòi.

⁹Bơh añ ơm tòm tiah gơnoar cau dê mơ kung gơs ală cau ling ơm tòm tiah gơnoar añ jê. Añ sồr cau do: ‘Lòt tĕ,’ gen khai lòt; sồr cau ne; ‘Tus tĕ,’ gen khai tus; mơ sồr cau dĭ añ: ‘Lơh tĕ broă do,’ gen khai lơh.”

¹⁰Yàng Jesu kơno jơnau hơ̆ gen ai lơh krơi, đơs mơ ală cau lòt jat lah: “Di ngan Añ đơs mơ bol mê, Añ òhềt gŏ bơta dòn dờng be do tòm làng bol Israel.

¹¹Añ đơs mơ bol mê, gơs oă cau bơh đah mattơngai lik mơ đah mattơngai mut rơp tus nggui sa bal mơ Abraham, Isak mơ Jakôp tòm lơgar đang trồ.

¹²Mơya ală kòn lơgar hơ̆ dê rơp gơkòl sơrbì hơ bơdìh tòm tiah klam jơngo, tềng hơ̆ rơp gơs ñìm rac mơ rkiat sề.”

¹³Gen Yàng Jesu đơs mơ cau at dô rhiang ling lah: “Rê tĕ, jat be bơta mê neh dòn gen rơp gơs ngan behơ̆.” Cau dĭ gơna geh bòi di di jơ hơ̆.

¹⁴Gen Yàng Jesu mut tòm hìu Pier, gŏ po me khai bic kòp prơm.

¹⁵Chòp Kơnràñ ƀư dê tê mò, gen kòp prơm thit mo, mơ mò guh duh broă Kơnràñ.

¹⁶Tòm mho hơ̆, cau cèng Kơnràñ in oă cau cà lơh. Kơnràñ ngui jơnau đơs mơ bơtrơh ală cà hơ̆, mơ sơmbòi jơh ală cau kòp jê,

¹⁷nàng gơlik di ngan be jơnau cau gơnoar hwơr Esai neh đơs lah: “Să tòm Kơnràñ neh àñ ơnòng ală bơta lơbơn lơño bol he dê, mơ mă àñ ală bơta kòp jê bol he dê.”

¹⁸Mơ tai, tòm tŭ Yàng Jesu gŏ mpồl làng bol oă ơm gùt dar, gen Kơnràñ sồr tiă đah bơtĭ ne tơnau.

¹⁹Gơs dô nă cau bơto bơta boh lam tus đơs mơ Kơnràñ lah: “Ơ Cau Bơto, tiah lơi Ồng lòt, añ rơp lòt jat tềng hơ̆.”

²⁰Yàng Jesu đơs lah: “Pì gơs trồm, sềm gơs rsòn, mơya Kòn mơnus ò gơs tiah gòl bồ.”

²¹Dô nă cau bơtê ndai đơs mơ Kơnràñ lah: “Ơ Yàng, dan ai añ in rê tơp bèp añ lài.”

²²Mơya Yàng Jesu đơs lah: “Jat tĕ Añ, lòi cau chơt tơp cau chơt bol khai dê.”

²³Yàng Jesu mut tòm ơhò, ală cau bơtê jat Kơnràñ.

²⁴Nisơna gơlik rbut dờng tòm gùl dàlềng, tian gơs ryà dà gơ glơm tòm ơhò, mơya Yàng Jesu bic lơhă.

²⁵Ală cau bơtê tus pơrlai Kơnràñ mơ hòi lah: “Ơ Yàng, dan dong klàs bol hi. Bol he mòr chơt roh do!”

²⁶Yàng Jesu đơs lah: “Ơ ală cau gơs dô êt bơta dòn, ñchi bơh tài bol mê rngòt taih?” Chòp Kơnràñ ntào, lah pơrhơng càl mơ dàlềng, gen gơs ring drik ngan.

²⁷Ală cau hơ̆ ai lơh krơi ngan mơ đơs lah: “Cau do la ñcau gen tàng càl mơ dàlềng kung dòn bơr khai dê taih?”

²⁸Tòm tŭ Yàng Jesu neh tiă đah bơtĭ ne rau, tòm kơnhwàl Gadara, gơs bàr nă cau cà lơh lik bơh bơtô ƀồc nàng tìp Kơnràñ; bol khai jàñ bơsak ngan, tian gơs ò gơs cau lơi khin lòt tòm gùng hơ̆.

²⁹Chòp bol khai hòi driau lah: “Ơ Kòn Yàng Tom Trồ, gơs ñchi jơnau digùl bol hi mơ Kơnràñ taih? Kơnràñ tus nàng lơh bòl glar bol hi lài mơ tŭ tus di tơngai lơh nền ơ?”

³⁰Mơ tai, ngài bơh di tiah hơ̆ gơs dô mpồl sur oă ngan ơm sa.

³¹Ală cà rac dan lah: “Dilah Kơnràñ bơtrơh bol hi, dan ai bol hi in mut tòm mpồl sur ne.”

³²Kơnràñ sồr lah: “Lòt tĕ.” Ală cà lik, mut tòm mpồl sur; mpồl sur bơh kơh ntruñ tòm dàlềng, gen dà bŭ chơt jơh.

³³Ală cau ê sur ntoat dô, rê tòm ƀòn dờng, yal wơl jơh ală bơta, mơ jơnau bơh bàr nă cau cà lơh sơl.

³⁴Gen jơh ală cau tòm ƀòn dờng lik nàng tìp Yàng Jesu. Dơ̆ gŏ Kơnràñ, gen rac dan mơ Kơnràñ lik bơh nhàr kơnhwàl lơgar bol khai dê.