Read koho Mathiơ 9 Bible Online

Mathiơ 9 - koho bible

Mathiơ 9

¹Yàng Jesu mut tòm ơhò, tiă dàlềng rê hơ ƀòn Kơnràñ òs ơm.

²Gơs cau tùng tus hơ Kơnràñ dô nă cau gơlte bic hơđang cơnòng. Yàng Jesu gŏ bơta dòn bol khai dê, gen đơs mơ cau gơlte lah: “Ơ kòn, kơ̆ tĕ nùs, tồi glài mê neh geh toh.”

³Tŭ hơ̆ gơs bàr pe nă cau bơto bơta boh lam kơlôi òm lah: “Cau do đơs tràl sơrbil.”

⁴Yàng Jesu git bơta kơlôi bol khai dê gen đơs lah: “Ñchi bơh tài bol mê kơlôi sơnơng iơh tòm nùs behơ̆ taih?

⁵Tòm bàr jơnau đơs: ‘Tồi glài mê neh geh toh,’ hala ‘Ñă ntào tĕ mơ lòt,’ jơnau lơi la ƀuơn rlau taih?

⁶Mơya tồ bol mê in git lah Kòn mơnus gơs gơnoar toh glài hơđang ù,” gen Kơnràñ đơs mơ cau gơlte lah: “Ñă ntào tĕ, at cơnòng mơ rê hìu mê.”

⁷Cau gơlte ñă ntào mơ rê hìu khai.

⁸Mpồl làng bol gŏ bơta hơ̆, gen rngòt rngơt ngan mơ jòng ro Yàng Tom Trồ la Bơtau neh ai cau in gơnoar behơ̆.

⁹Yàng Jesu lòt bơh tềng hơ̆, gŏ dô nă cau sơnđan la Mathiơ nggui tòm tiah boh dia, gen sồr khai lah: “Jat tĕ Añ.” Khai ñă ntào mơ jat Kơnràñ.

¹⁰Tòm tŭ Yàng Jesu nggui sào tòm hìu, gơs oă cau dar dia mơ cau glài tus nggui bal mơ Kơnràñ mơ ală cau bơtê Kơnràñ dê.

¹¹Cau Pharisi gŏ behơ̆ gen đơs mơ cau bơtê Kơnràñ dê lah: “Ñchi bơh tài Cau Bơto bol mê dê sào bal mơ cau dar dia mơ cau glài taih?”

¹²Yàng Jesu kơno jơnau hơ̆ gen đơs mơ bol khai lah: “Cau pràn kơldang ò càng cau gơnoar sơnơm ò, mơya la cau kòp jê.

¹³Lòt tĕ bơtê git jơnau gơtha sèng do: ‘Añ kòñ bơta kòñ nđàc, ò kòñ phan ơn duh khoai ò.’ Bơh Añ tus ò di nàng hòi cau song ring ò, mơya nàng hòi cau glài.”

¹⁴Tŭ hơ̆ ală cau bơtê Jang dê tus hơ Yàng Jesu mơ đơs lah: “Ñchi bơh tài bol hi mơ ală cau Pharisi òs ơt sa, ai cau bơtê Ồng dê ò ơt sa taih?”

¹⁵Yàng Jesu ho lah: “Tòm tŭ cau bơrtơu gam ơm mơ oh mi bơyô he, gen bol khai rgơi moat jrùng sơl? Mơya tus di tŭ cau bơrtơu geh cèng lik bơh bol khai, gen sồng bol khai ơt sa.

¹⁶Ò gơs cau lơi ai bài tơrme mơ tơmbồl di ào klar, bơh bài tơrme rơp lơh gơprơt sèt ào klar, mơ tiah sèt gơlik iơh rlau tai.

¹⁷Kung ò gơs cau tròc tơrnòm pa tòm nhồng gơltau yau, dilah lơh behơ̆ gen bơcah nhồng, tơrnòm hòr lik, mơ nhồng kung roh sơl. Mơya cau tròc tơrnòm pa tòm nhồng gơltau pa, gen jơh bàr bơta hơ̆ gam niam lơm.”

¹⁸Tòm tŭ Yàng Jesu đơs ală jơnau hơ̆, gơs dô nă cau at bồ hìu jum tus, cùn khoai Kơnràñ mơ đơs lah: “Kòn ùr añ pa chơt; dan Kơnràñ tus ơn tê hơđang khai nàng khai in kis.”

¹⁹Gen Yàng Jesu ñă ntào lòt jat khai, ală cau bơtê Kơnràñ kung lòt sơl.

²⁰Tŭ hơ̆, gơs dô nă cau ùr kòp pìng mhàm neh jơt bàr nam rau, tus bơh ngkòi Kơnràñ mơ ƀư di tiang ào Kơnràñ dê.

²¹Bơh khai kơlôi is lah: “Dilah añ mìng ƀư di ào Kơnràñ, gen añ rơp geh bòi.”

²²Yàng Jesu wơlke, gŏ khai gen đơs lah: “Ơ kòn ùr, kơ̆ tĕ nùs, bơta dòn ai dê neh sơmbòi ai.” Gen cau ùr hơ̆ geh bòi mo bơh di jơ hơ̆.

²³Tòm tŭ Yàng Jesu tus hơ hìu cau at bồ hìu jum, gŏ mpồl cau uh kơwào mơ mpồl làng bol lơh nggồr nggàc,

²⁴gen đơs lah: “Lik tĕ, bơh kòn ùr do ò di chơt ò, mơya khai bic lơhă gơ dê.” Bol khai dơñŏ tơnhial di Kơnràñ.

²⁵Dơ̆ neh bơtrơh mpồl làng bol rau, gen Kơnràñ mut, at di tê kòn ùr, gen khai guh mo.

²⁶Jơnau do pơnro làm kơnhwàl hơ̆.

²⁷Yàng Jesu lòt bơh tềng hơ̆, gơs bàr nă cau jơngo jat Kơnràñ mơ hòi lah: “Ơ Kòn Dabit, dan nđàc sơngit di bol hi.”

²⁸Dơ̆ Kơnràñ mut tòm hìu rau, bàr nă cau jơngo hơ̆ tus hơ Kơnràñ. Yàng Jesu đơs mơ bol khai lah: “Bol mê dòn Añ rgơi lơh bơta bol mê dan sơl?” Bol khai ho lah: “Ơ Yàng, bol hi dòn.”

²⁹Gen Kơnràñ ƀư dê mat bol khai mơ đơs lah: “Bơta dòn bol mê dê be lơi gen gơs ngan behơ̆.”

³⁰Mat bol khai gơ pò mo. Yàng Jesu ai jơnau kràñ cê đơs lah: “Bañ ai cau lơi in git.”

³¹Mơya bol khai lik lòt mơ yal pơnro sơnđan Kơnràñ làm lơgar hơ̆.

³²Tòm tŭ bol khai lik lòt, gơs cau cèng tus di Kơnràñ dô nă cau kloat cà lơh.

³³Dơ̆ neh bơtrơh tơlik cà rau gen cau kloat tus đơs, mơ mpồl làng bol ai lơh krơi mơ đơs lah: “Ò tŭ lơi gŏ bơta be do tòm Israel.”

³⁴Mơya cau Pharisi đơs lah: “Khai kơnòm di bơtau cà mơ bơtrơh cà gơ dê.”

³⁵Yàng Jesu lòt làm ală ƀòn dờng ƀòn dềt, bơto sồr tòm ală hìu jum, bơto yal Jơnau Niam lơgar đang trồ dê, mơ sơmbòi ală bơta kòp jê lơbơn lơño.

³⁶Dơ̆ Kơnràñ gŏ mpồl làng bol gen gơs nùs nđàc sơngit, bơh bol khai bòl glar, mơ nrah nring be belàt ò gơs cau ê.

³⁷Gen Kơnràñ đơs mơ ală cau bơtê lah: “Kơnhai toès la dờng ngan, mơya cau toès la dô êt lơm.

³⁸Behơ̆ hòi dan tĕ mơ Yàng kơnhai toès sồr cau toès lòt tus tòm tiah toès Kơnràñ dê.”