Read koho Mak 10 Bible Online

Mak 10 - koho bible

Mak 10

¹Yàng Jesu ñă bơh hơ̆ lòt tus hơ kơnhwàl Jude mơ tiă đah ne hiòng Jordan. Mpồl làng bol oă pơjum tai gùt dar Kơnràñ. Kơnràñ bơto sồr bol khai kung be òs.

²Gơs cau Pharisi tus lùp nàng lòng Kơnràñ lah: “Cau klau gơs gơnoar lòi bau ùr khai dê sơl?”

³Kơnràñ lùp lah: “Ñchi jơnau Môise sồr bol mê taih?”

⁴Bol khai ho lah: “Môise neh ai gơnoar cih sră tòmlòi nàng lòi bau ùr.”

⁵Yàng Jesu đơs lah: “Tài bơh nùs bol mê kră kơldang gen tàng khai neh ai gơnoar do.

⁶Mơya bơh sơnròp crơng gơs trồ tiah, ‘Yàng Tom Trồ neh lơh gơs mìng dô nă cau klau mơ dô nă cau ùr lơm.’

⁷‘Tài bơh hơ̆ tàng cau klau rơp lik bơh mè bèp mơ đềt mềr mơ bau ùr khai dê,

⁸mơ bàr nă rơp gơlik gơs dô nơm poac bal.’ Behơ̆ gen bol khai ò di la bàr tai, mơya la dô nơm poac lơm.

⁹Behơ̆ kòn mơnus bañ cah is ală cau mơ Yàng Tom Trồ neh bơrkoat bal.”

¹⁰Tòm tŭ ơm tòm hìu, ală cau bơtê lùp Kơnràñ tai bơh broă hơ̆.

¹¹Kơnràñ ho lah: “Cau lơi lòi bau ùr khai dê mơ bau mơ cau ùr ndai, gen cau hơ̆ tìs glài bơrnàn mơ bau ùr khai,

¹²ai dilah cau ùr hơ̆ lòi bau klau khai dê mơ bau mơ cau klau ndai, gen kung tìs glài bơrnàn behơ̆ sơl.”

¹³Cau cèng ală kơnòm dềt tus hơ Yàng Jesu, nàng Kơnràñ in ơn tê hơđang bol khai. Ală cau bơtê lah pơrhơng ală cau cèng hơ̆.

¹⁴Dơ̆ Yàng Jesu gŏ behơ̆ gen gơjrañ mơ đơs mơ ală cau bơtê lah: “Lòi tĕ ală kơnòm dềt tus hơ Añ, bañ bơkơŭ bol khai; bơh lơgar Yàng Tom Trồ gơrê mơ ală cau be bol khai.

¹⁵Di ngan Añ đơs mơ bol mê, cau lơi ò dòp lơgar Yàng Tom Trồ be dô nă kơnòm dềt, gen ò geh mut tòm hơ̆ ò.”

¹⁶Chòp Kơnràñ kơnđu bol khai, ơn tê hơđang bol khai mơ ai lơngai lơngò bol khai in.

¹⁷Dơ̆ Yàng Jesu sơntòm lik lòt, gơs dô nă cau ntoat tus, cùn gơltang di đap Kơnràñ mơ đơs lah: “Ơ Cau Bơto lơbơn niam, ñchi bơta añ pal lơh nàng geh pơrdòn bơta kis gam sùm sùm taih?”

¹⁸Yàng Jesu ho lah: “Ñchi bơh tài mê sơnđan Añ la lơbơn niam taih? Rlau mơ Yàng Tom Trồ ò gơs cau lơi lơbơn niam.

¹⁹Mê git ală bơta sồr lam: ‘Bañ tơnchơt cau, bañ tìs glài rềs àr bơrnàn, bañ ntung kơñau, bañ lơh cơng blac, bañ pơrlồm, dòn duh tĕ mè bèp mê.’”

²⁰Khai ho lah: “Ơ Cau Bơto, añ neh prap gàr ală bơta hơ̆ bơh tŭ gam kơnòm.”

²¹Yàng Jesu sền di khai mơ kòñ gơboh, gen đơs lah: “Mê gam siơ̆u dô bơta lơm. Lòt tĕ tac jơh ală phan mơna mê dê mơ tòmpà cau rƀah lơòi in, gen mê rơp geh phan màng hơđang trồ; lồc behơ̆ tus tĕ jat Añ.”

²²Dơ̆ kơno jơnau hơ̆, cau do gơlơh kơnjơ̆ muh mat, gen moat jrùng mơ lòt, bơh khai gơs oă ngan phan mơna.

²³Tŭ hơ̆ Yàng Jesu sền gùt dar Kơnràñ mơ đơs mơ ală cau bơtê lah: “Cau pas sơm mut tòm lơgar Yàng Tom Trồ la kalke ngan!”

²⁴Ală cau bơtê ai lơh krơi ngan bơh ală jơnau hơ̆. Mơya Yàng Jesu đơs tai lah: “Ơ ală kòn, ală cau kơnòm di bơta pas sơm nàng mut tòm lơgar Yàng Tom Trồ la kalke ò git lơh!

²⁵Làkđa mut tòm trồm jrum la ƀuơn rlau mơ cau pas sơm mut tòm lơgar Yàng Tom Trồ.”

²⁶Ală cau bơtê ai lơh crih crài oă ngan mơ đơs mơ Kơnràñ lah: “Behơ̆ gen ñcau rgơi geh dong klàs taih?”

²⁷Yàng Jesu sền di bol khai mơ đơs lah: “Bơta hơ̆ jơi kòn mơnus ò rgơi lơh, mơya Yàng Tom Trồ ò di behơ̆, bơh Yàng Tom Trồ rgơi lơh jơh ală bơta.”

²⁸Chòp Pier đơs mơ Kơnràñ lah: “Do, bol hi neh sang jơh ală bơta mơ jat Kơnràñ.”

²⁹Yàng Jesu ho lah: “Di ngan Añ đơs mơ bol mê, cau lơi bơh Añ mơ bơh Jơnau Niam mơ sang hìu đam, oh mi, ruh lŏ, mè bèp, oh kòn hala sre brê,

³⁰gen rơp dòp leng tòm tŭ do mơ tòm rài do, dô rhiang dơ̆ rlau mơ ală hìu đam, oh mi, ruh lŏ, mè bèp, oh kòn, sre brê, bal mơ bơta kup kơryan, mơ bơta kis gam sùm sùm tòm rài tơnơ̆.

³¹Mơya gơs oă cau sơnròp rơp gơlik gơs lồi dut, mơ cau lồi dut rơp gơlik gơs sơnròp.”

³²Yàng Jesu mơ ală cau bơtê lòt gùng guh hơ Jerusalem, Kơnràñ lòt lài mơ bol khai. Ală cau bơtê ai lơh crih crài mơ ală cau lòt jat rngòt rngơt ngan. Kơnràñ cèng is jơt bàr nă cau bơtê, mơ rơp sơntòm đơs bơh ală broă pal gơlik tus di Kơnràñ lah:

³³“Do, bol he guh hơ Jerusalem. Kòn mơnus rơp gơkòl bơtào tòm tê ală cau gơnoar lam bồ ơn phan duh khoai mơ ală cau bơto bơta boh lam; bol khai rơp lơh nền glài chơt Khai in, mơ jào Khai tòm tê làng bol bơdìh.

³⁴Bol khai rơp dơñŏ tơnhial di Khai, choh di Khai, pù lơh Khai mơ tơnchơt tơn. Mơya tơnơ̆ mơ pe ngai Khai rơp kis wơl.”

³⁵Tŭ hơ̆ Jakơ mơ Jang la bàr nă kòn klau Sebede dê tus rềp hơ Kơnràñ mơ đơs lah: “Ơ Cau Bơto, bol hi kòñ Kơnràñ lơh gơs bơta bol hi rơp dan do.”

³⁶Yàng Jesu lùp bol khai lah: “Ñchi bol mê kòñ Añ lơh bol mê in taih?”

³⁷Bol khai ho lah: “Tòm tŭ Kơnràñ geh gơklŏ, dan ai bol hi in geh nggui dô nă đah ma, dô nă đah kiau Kơnràñ.”

³⁸Mơya Yàng Jesu ho lah: “Bol mê ò git bơta bol mê dan hơ̆. Bol mê rgơi hùc mơngàn mơ Añ hùc, mơ rgơi gơs ƀaptem mơ bơta ƀaptem Añ gơs sơl?”

³⁹Bol khai ho lah: “Bol hi rgơi.” Yàng Jesu đơs lah: “Bol mê rơp hùc mơngàn Añ hùc mơ rơp gơs ƀaptem mơ bơta ƀaptem Añ gơs,

⁴⁰mơya dô nă nggui đah ma mơ dô nă nggui đah kiau Añ, gen ò di la Añ gơs gơnoar ai; tiah hơ̆ Yàng Tom Trồ neh prap lòi ală cau neh geh lơh nền lài in.”

⁴¹Dơ̆ jơt nă cau bơtê ne kơno jơnau hơ̆ gen gơjrañ di Jakơ mơ Jang.

⁴²Gen Yàng Jesu hòi bol khai tus mơ đơs lah: “Bol mê git lah ală cau neh geh pồ bơtào at bồ làng bol bơdìh gen at bồ kràñ cê làng bol bol khai dê, mơ ală cau kwang dờng gen ngui gơnoar pràn nàng at bồ hơđang làng bol.

⁴³Mơya tòm bol mê gen ò di behơ̆ ò. Gơpơrlơ̆ wơl, cau lơi tòm bol mê kòñ gơs dờng gen pal lơh gơs cau duh broă.

⁴⁴Ai cau lơi tòm bol mê kòñ gơs cau lam bồ gen pal lơh gơs dĭ gơna kòp nă cau in.

⁴⁵Bơh Kòn mơnus neh tus ò di nàng Cau duh broă khai in, mơya nàng duh broă cau in mơ phi bơta kis Khai lơh gơs phan tơwài oă cau.”

⁴⁶Yàng Jesu mơ ală cau bơtê lòt tus hơ Jerikô. Tòm tŭ Kơnràñ bal mơ cau bơtê mơ mpồl làng bol oă lik bơh Jerikô, gen gơs dô nă cau jơngo mat, sơnđan la Batime, kòn klau Time dê, nggui kanadàn di gah gùng.

⁴⁷Dơ̆ khai neh kơno đơs hơ̆ la Yàng Jesu Cau Nasaret, gen khai hòi driau lah: “Ơ Yàng Jesu, Kòn bơtau Dabit, dan nđàc sơngit di añ ƀà!”

⁴⁸Gơs oă cau lah pơrhơng khai, sồr ơm mŏ mŏ, mơya khai sơlo hòi driau dờng rlau tai lah: “Ơ Kòn bơtau Dabit, dan nđàc sơngit di añ ƀà!”

⁴⁹Yàng Jesu dơh wơl mơ đơs lah: “Hòi tĕ khai.” Bol hơ̆ hòi cau jơngo mơ đơs lah: “Kơ̆ tĕ nùs, ntào, Kơnràñ hòi mê.”

⁵⁰Cau jơngo sang ào bơdìh, ñă mo mơ tus hơ Yàng Jesu.

⁵¹Yàng Jesu lùp lah: “Ñchi mê kòñ Añ lơh mê in taih?” Cau jơngo ho lah: “Ơ Cau Bơto, añ kòñ geh àng mat.”

⁵²Yàng Jesu đơs lah: “Lòt tĕ, bơta dòn mê neh sơmbòi mê.” Gen khai gŏ mo, mơ lòt jat Kơnràñ tơn tòm gùng.