Read koho Mak 11 Bible Online

Mak 11 - koho bible

Mak 11

¹Tòm tŭ mòr tus hơ Jerusalem, rềp di ƀòn Betphage mơ Bethani, di gah mơnơm Ôlibe, gen Yàng Jesu sồr bàr nă cau bơtê lòt lài,

²mơ đơs lah: “Lòt tus tĕ hơ ƀòn tòm toh di đap bol mê. Tòm tŭ mut tềng hơ̆, rơp bàn mo dô nơm alàng kòn cau kơt, òhềt gơs cau lơi hào gơ ò. Hồ tĕ gơ, mơ tề cèng hơ do,

³Dilah gơs cau lơi lùp bol mê lah: ‘Ñchi bơh tài bol mê lơh bơta hơ̆ taih?’ Gen ho tĕ lah: ‘Yàng kòñ ngui gơ, mơ rơp brê wơl mo.’”

⁴Bàr nă bol khai lòt, gŏ alàng kòn cau kơt đah bơdìh mpồng di gah gùng me, gen hồ gơ.

⁵Gơs bàr pe nă cau tòm mpồl ơm tềng hơ̆ lùp lah: “Ñchi bol mê lơh hồ alàng kòn hơ̆ taih?”

⁶Bàr nă bol khai ho jat be jơnau Yàng Jesu neh nting sồr, gen bol hơ̆ lòi bol khai in lòt.

⁷Bàr nă bol khai tề alàng kòn hơ̆ Yàng Jesu in, dă ào bol khai hơđang gơ, gen Kơnràñ hào gơ.

⁸Gơs oă cau dă ào bol khai tòm gùng, mơ gơs cau ndai rsìh ntê chi sreh bơh tòm ƀlàng.

⁹Cau ƀà lòt lài cau ƀà jat tơnơ̆, mơ driau dờng lah: “Hôsana! Jòng ro Bơtau ai sơnđan Yàng mơ tus.

¹⁰Lơngai lơgar rơp tus, la lơgar Bơtau Dabit, ồng pàng bol he dê! Hôsana jòng ro Yàng Tom Trồ!”

¹¹Yàng Jesu tus tòm Jerusalem, mut tòm hìu duh khoai. Tòm tŭ Kơnràñ neh sền làm ală bơta gùt dar, gen Kơnràñ lik wơl nàng lòt hơ Bethani bal mơ jơt bàr nă cau bơtê tài bơh trồ jơngo rau.

¹²Àng drim ngai tơnơ̆, tòm tŭ bol khai neh lik bơh Bethani rau, gen Yàng Jesu jơgloh.

¹³Kơnràñ gŏ bơh ngài dô đòm chi ƀal gơs nha, gen tus lòng jòi sền gơs plai lơi sơl, mơ dơ̆ neh tus rềp rau gen gŏ gơs mìng nha lơm, bơh tŭ hơ̆ ò di la kơnhai plai ƀal.

¹⁴Gen Yàng Jesu ai jơnau đơs mơ gơ lah: “Bơh do jơl hìng nau ò gơs tŭ lơi cau sa plai mê dê tai ò!” Ală Cau bơtê kơno jơnau hơ̆.

¹⁵Yàng Jesu mơ ală cau bơtê lòt tus hơ Jerusalem. Kơnràñ mut tòm hìu duh khoai, bơtrơh tơlik jơh ală cau kă bro tòm hơ̆, tơlup cơnòng cau gơl priă mơ tơlo cơnòng nggui cau tac sềm ntòp.

¹⁶Kơnràñ bơkơŭ ò ai cau lơi in cèng phan lơi lòt gan hìu duh khoai.

¹⁷Lồc behơ̆ Kơnràñ bơto sồr lah: “Neh gơs jơnau cih lah: ‘Hìu Añ pal sơnđan la hìu hòi dan jơh ală làng bol in,’? Mơya bol mê neh lơh hìu hơ̆ in gơs trồm ală cau ntung kơñau dê.”

¹⁸Ală cau gơnoar lam bồ ơn phan duh khoai mơ ală cau bơto bơta boh lam kơno ală jơnau hơ̆, gen jòi bơta nàng tơnroh Yàng Jesu; bol khai rngòt di Kơnràñ la tài bơh jơh mpồl làng bol ai lơh crih crài bơh bơta bơto sồr Kơnràñ dê.

¹⁹Tòm tŭ trồ neh mang, Kơnràñ lik bơh ƀòn dờng.

²⁰Àng drim tơnơ̆, tòm tŭ Yàng Jesu mơ ală cau bơtê lòt gan, gŏ chi ƀal neh ro tus tòm ryas.

²¹Tŭ hơ̆ Pier kah wơl jơnau Yàng Jesu neh đơs mơ chi, gen đơs mơ Kơnràñ lah: “Ơ Rabi, sền ne! Chi ƀal mơ Kơnràñ srat gơ neh ro rau.”

²²Chòp Yàng Jesu đơs lah: “Gơs tĕ bơta dòn di Yàng Tom Trồ.

²³Di ngan Añ đơs mơ bol mê, cau lơi đơs mơ mơnơm do lah: ‘Yò tĕ să mơ ntruñ tòm dàlềng,’ dilah khai ò pin wil wơl tòm nùs mơya dòn nền cê jơnau he đơs rơp gơlik gơs ngan, gen ngan bơta hơ̆ rơp gơlik gơs.

²⁴Tài bơh hơ̆ tàng Añ đơs mơ bol mê, jơh ală bơta lơi bol mê dan tòm tŭ hòi dan, dòn tĕ la neh geh gen ngan bol mê rơp geh bơta hơ̆.

²⁵Tòm tŭ bol mê ntào hòi dan, dilah gơs bơta lơi gơtòmkal mơ cau lơi, gen toh glài tĕ nàng Bèp bol mê ơm hơđang trồ kung rơp toh glài bol mê in sơl.” [

²⁶Mơya dilah bol mê ò toh glài gen Bèp bol mê ơm hơđang trồ kung rơp ò toh glài bol mê in sơl.]

²⁷Yàng Jesu mơ ală cau bơtê rê wơl hơ Jerusalem. Tòm tŭ Kơnràñ lòt yơng tòm hìu duh khoai, gen ală cau gơnoar lam bồ ơn phan duh khoai, ală cau bơto bơta boh lam mơ ală cau kwang kra lòt tus hơ Kơnràñ,

²⁸mơ lùp lah: “Bơh gơnoar lơi mơ ồng lơh ală bơta do hala ñcau neh ai ồng in gơnoar nàng lơh ală bơta do taih?”

²⁹Yàng Jesu ho lah: “Añ kung lùp bol mê dô jơnau. Ho tĕ Añ in gen Añ rơp yal bol mê in bơh gơnoar lơi mơ Añ lơh ală bơta do.

³⁰Bơta ƀaptem Jang dê la bơh trồ hala bơh kòn mơnus taih? Ho tĕ Añ in.”

³¹Bol khai bơyai bal mơ gơp lah: “Dilah bol he đơs: ‘Bơh trồ,’ gen khai rơp đơs lah: ‘Behơ̆ ñchi bơh tài bol mê ò dòn Jang taih?’

³²Ai dilah bol he đơs: ‘Bơh kòn mơnus’” gen bol khai rngòt di làng bol, bơh jơh tơl nă neh dòp Jang ngan la cau gơnoar hwơr.

³³Gen bol khai ho Yàng Jesu lah: “Bol hi ò git.” Chòp Yàng Jesu đơs mơ bol khai lah: “Añ kung ò yal bol mê in git bơh gơnoar lơi mơ Añ lơh ală bơta do.”