Read koho Mak 16 Bible Online

Mak 16 - koho bible

Mak 16

¹Ngai Saƀat neh rlau rau, Mari Madơlen, Mari mè Jakơ dê, mơ Salôme rwat sơnơm ƀô bơlhu nàng lòt bong ƀồc Yàng Jesu.

²Tòm tŭ rìng àng ngai sơnròp tòm dô poh, mattơngai rơp lik, bol khai lòt tus hơ bơtô ƀồc.

³Bol khai đơs bal mơ gơp lah: “Ñcau rơp pơrlă lŭ kơrdơl mpồng bơtô bol he in taih?”

⁴Mơ tai, pơnai lŭ hơ̆ dờng ngan. Dơ̆ tơnggòr sền, bol khai gŏ pơnai lŭ neh gơpơrlă rau.

⁵Behơ̆ bol khai mut tòm bơtô ƀồc, gŏ dô nă cau pơnu ơm nggui đah ma, soh ào jrùh bò gen bol khai rngòt ngan.

⁶Cau hơ̆ đơs mơ bol khai lah: “Bañ rngòt, bol ai jòi Yàng Jesu Cau Nasaret, la Bơtau neh kong pơng di chi pơng. Kơnràñ neh kis wơl rau, ò ơm tềng do tai. Sền tĕ tiah neh tơp Kơnràñ.

⁷Lòt tĕ yal ală cau bơtê Kơnràñ in mơ yal Pier in lah: Kơnràñ lòt lài mơ bol mê hơ Galile. Tềng hơ̆ bol mê rơp gŏ Kơnràñ, be Kơnràñ neh đơs mơ bol mê.”

⁸Gen bol khai lik bơh bơtô ƀồc, ntoat dô, tài bơh rơm să rngòt hur hìr ngan, ò đơs mơ cau lơi dô jơnau lơi tài bơh rngòt rngơt ngan. [

⁹Mơ tai, Yàng Jesu neh kis wơl tòm àng drim ngai sơnròp tòm dô poh, gen sơnròp ngan tơlik să mơ Mari Madơlen, la cau mơ Kơnràñ neh bơtrơh tơlik poh nơm cà bơh di khai.

¹⁰Khai lòt yal mơ ală cau jat Kơnràñ lài òr, bol khai ơm moat jrùng mơ ñìm rac.

¹¹Mơya dơ̆ ală cau hơ̆ kơno jơnau yal bơh Yàng Jesu neh kis wơl, mơ să tòm khai neh gŏ Kơnràñ, gen bol khai ò dòn.

¹²Tơnơ̆ mơ ală bơta hơ̆, Yàng Jesu ai să ndai tơlik mơ bàr nă cau tòm mpồl cau bơtê tòm tŭ bol khai lòt gùng rê hơ ƀòn dềt.

¹³Bàr nă cau hơ̆ lòt yal mơ ală cau bơtê ndai, mơya bol khai kung ò dòn sơl.

¹⁴Tơnơ̆ tai, Yàng Jesu tơlik să mơ jơt dùl nă cau bơtê tòm tŭ bol khai nggui sào, Kơnràñ lah pơrhơng bol khai bơh bơta ò dòn mơ nùs kră kơldang, tài bơh bol khai ò dòn ală cau neh gŏ Kơnràñ tơnơ̆ mơ tŭ Kơnràñ kis wơl.

¹⁵Kơnràñ đơs mơ bol khai lah: “Lòt tĕ làm jơh dunnia, bơto yal Jơnau Niam jơh ală làng bol in.

¹⁶Cau lơi dòn mơ gơs ƀaptem gen rơp geh dong klàs, mơya cau lơi ò dòn gen rơp gơkòl lơh nền glài.

¹⁷Ală cau dòn rơp geh ală tềl krơi do: Bol khai rơp ai sơnđan Añ mơ bơtrơh cà, ngui jơnau đơs pa nàng đơs,

¹⁸kup bơs tòm tê, dilah hùc phan lơi bih khih kung ò gơs tŭ lơi gơlik iơh, mơ dilah ơn tê hơđang cau kòp gen cau kòp hơ̆ rơp geh bòi.”

¹⁹Neh sir Yàng Jesu đơs mơ bol khai behơ̆ rau, gen geh guh rê hơđang trồ, mơ nggui đah ma Yàng Tom Trồ.

²⁰Ai ală cau bơtê lik lòt bơto yal Jơnau Niam làm bă tiah. Yàng lơh broă bal mơ bol khai, mơ ai ală tềl krơi jat bal nàng lơh kơ̆ cê Jơnau Yàng.]