Read koho Mak 4 Bible Online

Mak 4 - koho bible

Mak 4

¹Yàng Jesu rơp sơntòm bơto sồr tai di gah dàlềng Galile. Gơs mpồl làng bol oă ngan pơjum gùt dar Kơnràñ, tian gơs Kơnràñ mut nggui tòm dô nơm ơhò tòm dàlềng, ai jơh mpồl làng bol gen ơm di gah dàlềng.

²Kơnràñ ngui jơnau pơnyơu bơto sồr bol khai oă bơta, mơ đơs lah:

³“Iat tĕ. Ne, cau sih gar lik lòt nàng sih.

⁴Tòm tŭ sih, gơs gar rung di gah gùng, gen sềm tus sa jơh.

⁵Gar ƀà rung di tiah lŭ, la tiah ò gơs oă ù, gen gơhòn mo tài bơh gơbồr ò jrô.

⁶Dơ̆ mattơngai lik gen gơ ñòp, tài bơh ò gơs ryas gen tànggơ ro.

⁷Gar ƀà tai rung di tòm lò; lò hòn sơnru lơh gơrềt jơh mơ ò gơlik plai.

⁸Gar ƀà tai rung di ù niam, gen gơhòn, gơlik dờng mơ gơlik plai; gơnar ƀà pe jơt, gơnar ƀà prau jơt, gơnar ƀà dô rhiang.”

⁹Yàng Jesu đơs tai lah: “Cau lơi gơs tồr nàng iat, gen iat tĕ!”

¹⁰Tòm tŭ Yàng Jesu ơm is dô nă, gen ală cau ơm gùt dar Kơnràñ bal mơ jơt bàr nă cau bơtê lùp Kơnràñ bơh jơnau pơnyơu hơ̆.

¹¹Yàng Jesu ho lah: “Neh ai bol mê in bơta ndơp ndơr lơgar Yàng Tom Trồ dê, mơya gơwèt mơ cau ndai la ală cau bơdìh gen ngui jơnau pơnyơu nàng bơto sồr ală bơta.

¹²Tồ bol khai in: sền gen gŏ mơya ò git đal, iat gen kơno mơya ò git wă. Behơ̆ gen bol khai rê wơl mơ geh toh glài mòn.”

¹³Gen Yàng Jesu đơs lah: “Bol mê ò git wă jơnau pơnyơu hơ̆ ơ? Behơ̆ gen mbe rgơi nàng git wă jơh ală jơnau pơnyơu ndai taih?

¹⁴Cau sih gar la sih jơnau Yàng.

¹⁵Ală gar di gah gùng la cau neh kơno jơnau Yàng, mơya dơ̆ kơno gen cà Satan lòt tus kơñau mo jơnau neh sih tòm nùs bol khai dê.

¹⁶Kung behơ̆ sơl, ală gar sih di tiah lŭ la ală cau kơno jơnau Yàng gen hòn chò dòp mo,

¹⁷mơya tòm bol khai ò gơs ryas, mìng ơm ing dô êt, tus di tŭ tìp bơta rung rài hala kup kơryan tài bơh jơnau hơ̆, gen gơtup tìs mo.

¹⁸Ai ală gar geh sih di tòm lò la cau neh kơno jơnau,

¹⁹mơya bơta kơlôi rcang rài do dê, bơta pơrlồm bơta pas sơm dê, mơ ală bơta hàm kòñ ndai gơtơmut tòm nùs bol khai, lơh gơrềt jơnau hơ̆ gen ò gơlik plai.

²⁰Ai ală gar geh sih di ù niam la cau kơno jơnau gen dòp mơ gơlik plai, gơnar ƀà pe jơt, gơnar ƀà prau jơt, gơnar ƀà dô rhiang.”

²¹Yàng Jesu đơs tai mơ bol khai lah: “Gơs cau lơi ơn đèng tòm thùng hala ơn hơđơm cơnòng bic sơl? Ò di ơn gơ hơđang jơng đèng ò ơ?

²²Bơh ò gơs bơta lơi pồn mơ ò gơ pò tơlik, kung ò gơs broă lơi ndơp mơ ò gơlik loh làng.

²³Dilah cau lơi gơs tồr, gen iat tĕ!”

²⁴Kơnràñ đơs tai lah: “Kơrhia tĕ bơh bơta bol mê kơno. Bol mê was cau in mơ rnoas lơi, gen cau kung was wơl bol mê in rnoas hơ̆, mơ bơtơl tai sơl.

²⁵Bơh cau lơi gơs gen rơp ai bơtơl tai, mơ cau lơi ò gơs, gen rơp tă tơn bơta khai neh gơs.”

²⁶Yàng Jesu đơs tai lah: “Lơgar Yàng Tom Trồ la kung be dô nă cau neh sih gar tòm ù.

²⁷Khai bic hala guh, mang mơ ngai, gar cat nha hòn dờng, mơya khai ò git mbe lơi.

²⁸Bơh ù tơnggơs plai is gơ dê, sơnròp gơs tòm, gen gơs sơnyùr, gen gơs gar bềng tòm sơnyùr.

²⁹Tòm tŭ kòi neh dum rau, gen cau ơn mo mơ̆ di gơ bơh kơnhai toès neh di.”

³⁰Yàng Jesu lùp lah: “Bol he pơndròm lơgar Yàng Tom Trồ dê mơ bơta lơi hala ai jơnau pơnyơu lơi nàng yal tơlik taih?

³¹Lơgar hơ̆ la kung be dô gar sơbê cau sih tòm ù, gơ dềt rlau jơh mơ ală gar ndai hơđang ù do,

³²mơya dơ̆ neh sih rau, gơhòn mơ gơlik dờng rlau jơh mơ ală biap, mơ gơcah gơs ntê dờng tian gơs sềm rgơi lơh rsòn di gơ.”

³³Yàng Jesu ngui oă jơnau pơnyơu ndròm behơ̆ mơ bơto jơnau Yàng bol khai in, jat be bơta chài rgơi bol khai wă.

³⁴Kơnràñ ò bơto bol khai dilah ò ngui jơnau pơnyơu, mơya tòm tŭ ơm is mơ ală cau bơtê, gen Kơnràñ yal tơlik loh làng jơh ală bơta bol khai in.

³⁵Tòm mho ngai hơ̆ Yàng Jesu đơs mơ ală cau bơtê lah: “Bol he tiă lă đah bơtĭ ne dà.”

³⁶Tòm tŭ neh lòi mpồl làng bol, Yàng Jesu kư̆ ơm tòm ơhò mơ ală cau bơtê lam Kơnràñ lòt, kung gơs ơhò ndai lòt bal sơl.

³⁷Nisơna, gơlik càl rbut dờng gơrơndul tơngguh, ryà dà mut tòm ơhò tian gơs mòr bềng dà.

³⁸Mơya Kơnràñ ơm tơnơ̆ di tiah tơrwơl ơhò sơnđìng bồ di kơrnòl mơ bic. Ală cau bơtê pơrlai Kơnràñ mơ đơs lah: “Ơ cau Bơto, ồng ò kơlôi bol he mòr chơt roh ơ?”

³⁹Phul Yàng Jesu guh mo, lah pơrhơng càl mơ đơs mơ dàlềng lah: “Thit tĕ, ơm tĕ mŏ mŏ!” Càl thit mo mơ ơm mŏ mŏ gen gơs ring drik ngan.

⁴⁰Chòp Yàng Jesu đơs mơ ală cau bơtê lah: “Ñchi bơh tài bol mê rngòt taih? Òhềt gơs bơta dòn ơ?”

⁴¹Ală cau bơtê rngòt rngơt ngan mơ đơs bal lah: “Cau do la ñcau, tian gơs càl mơ dàlềng kung dòn bơr khai dê taih?”