Read koho Mak 9 Bible Online

Mak 9 - koho bible

Mak 9

¹Kơnràñ đơs tai mơ ală cau bơtê lah: “Di ngan Añ đơs mơ bol mê, tòm ală cau ntào tềng do, ngan gơs cau rơp ò chơt lài mơ tŭ gŏ lơgar Yàng Tom Trồ ai gơnap gơnoar mơ tus.”

²Prau ngai tơnơ̆, Yàng Jesu lam Pier, Jakơ mơ Jang guh is hơđang mơnơm jòng, mơ Kơnràñ srơh să di đap bol khai.

³Ồi ào Kơnràñ dê gơlik àng lơr mơ bò gơcrà lul, tian gơs ò gơs cau chài pìh lơi ơm tòm ù rgơi pìh gơs bò behơ̆.

⁴Eli mơ Môise tơlik mat mơ bol khai mơ tòmbơhbơr mơ Yàng Jesu.

⁵Chòp Pier đơs mơ Yàng Jesu lah: “Ơ Cau Bơto, bol he ơm tềng do niam ngan. Lòi bol hi lơh pe nơm sàl: Dô nơm Kơnràñ in, dô nơm Môise in mơ dô nơm Eli in.”

⁶Bơh Pier ò git ñchi jơnau khai đơs, tài bơh pe nă bol khai rngòt rngơt ngan.

⁷Tŭ hơ̆, gơs dô puk mhwal jơm gòm bol khai, mơ bơh tòm mhwal hơ̆ gơs jơnau đơs lah: “Do la Kòn kòñ gơboh Añ jê iat tĕ khai.”

⁸Nisơna cau bơtê tơnggòr sền gùt dar ò gŏ cau lơi tai, gam mìng dô nă Yàng Jesu lơm ơm bal mơ bol khai.

⁹Tòm tŭ mù bơh mơnơm, Kơnràñ bơkơŭ bol khai bañ yal cau lơi in ală bơta bol khai neh gŏ, jơl tus di tŭ Kòn Mơnus kis wơl bơh bơta chơt.

¹⁰Behơ̆ ală cau bơtê prap jơnau hơ̆ tòm nùs mơ lùp bal bơh bơta chơt kis wơl hơ̆ la ñchi.

¹¹Bol khai lùp Kơnràñ lah: “Ñchi bơh tài ală cau bơto bơta boh lam đơs Eli pal tus lài taih?”

¹²Kơnràñ ho lah: “Ngan Eli pal tus lài bơtào wơl jơh ală bơta. Ai jơnau neh cih bơh Kòn Mơnus lah Kơnràñ pal kong oă bơta bòl glar mơ gơkòl sền òsơp gen mbe lơi taih?

¹³Mơya Añ đơs mơ bol mê lah: Eli neh tus rau mơ cau lơh di khai jat nùs kòñ bol khai dê, tòm toh be jơnau neh cih bơh khai.”

¹⁴Tŭ Yàng Jesu bal mơ pe nă cau bơtê hơ̆ tus hơ ală cau bơtê ndai, gen gŏ mpồl làng bol oă gòm gùt dar, mơ ală cau bơto bơta boh lam tòm pơndang bal mơ ală cau bơtê hơ̆.

¹⁵Jơh mpồl làng bol gŏ Kơnràñ gen tŭ hơ̆ mo bol khai ai lơh crih crài ngan mơ ntoat tus lùp còp să wă rò Kơnràñ.

¹⁶Chòp Yàng Jesu lùp lah: “Ñchi broă bol mê tòm pơndang mơ cau bơtê behơ̆ taih?”

¹⁷Gơs dô nă cau tòm mpồl làng bol ho lah: “Ơ Cau Bơto, añ neh cèng kòn klau añ jê lòt tus hơ Kơnràñ. Khai kòl cà kloat lơh,

¹⁸Kòp dơ̆ cà lơh khai, gen gơ sơrglơm khai, lơh khai gơlik kơmbuh bơr, rkiat sề, mơ khai gơlik be cau chơt kơng. Añ neh dan mơ cau bơtê Kơnràñ dê bơtrơh cà hơ̆, mơya bol khai ò rgơi bơtrơh.”

¹⁹Yàng Jesu ho lah: “Ơ jơi bơtiàn ò dòn ne, Añ pal ơm mơ bol mê jơl tus di tŭ lơi taih? Añ kong ơt mơ bol mê jơl tus di tŭ lơi taih? Cèng tĕ kòn hơ̆ Añ in hơ do.”

²⁰Chòp bol khai cèng oh dềt hơ̆ Yàng Jesu in. Dơ̆ oh dềt gŏ Kơnràñ gen tŭ hơ̆ mo cà sơntơt rơnggô khai pràn ngan, gen khai gơplơ̆ tòm ù, gơpơrlă mơ gơlik kơmbuh bơr.

²¹Yàng Jesu lùp bèp khai lah: “Khai gơlik be do neh nđò jŏ taih?” Bèp khai ho lah: “Bơh di tŭ gam dềt.

²²Neh oă dơ̆ cà sơrbì khai tòm ồs mơ tòm dà nàng tơnroh khai, mơya dilah Kơnràñ rgơi lơh bơta lơi, gen dan nđàc sơngit mơ dong kòl bol hi!”

²³Yàng Jesu ho lah: “Mbe mê đơs: ‘Dilah Kơnràñ rgơi lơh taih?’ Cau lơi dòn gen jơh ală broă rgơi geh lơm.”

²⁴Tŭ hơ̆ mo bèp oh dềt hơ̆ đơs dờng lah: “Añ dòn, dan Yàng dong kòl tòm bơta ò dòn añ jê!”

²⁵Dơ̆ Yàng Jesu gŏ mpồl làng bol ntoat tus gen Kơnràñ lah pơrhơng cà mơ đơs lah: “Ơ cà kloat mơ tĭ, Añ sồr mê lik tĕ bơh di oh dềt do, bañ tŭ lơh tai khai.”

²⁶Chòp cà driau dờng, sơntơt rơnggô oh dềt pràn ngan mơ lik bơh di khai. Oh dềt hơ̆ gơlik gơs be neh chơt, tian gơs oă cau đơs lah: “Khai neh chơt rau.”

²⁷Mơya Yàng Jesu at di tê yò tơngguh khai, gen khai ñă ntào.

²⁸Tòm tŭ Yàng Jesu neh mut tòm hìu rau, gen ală cau bơtê lùp is Kơnràñ lah: “Ñchi bơh tài bol hi ò rgơi bơtrơh cà hơ̆ taih?”

²⁹Yàng Jesu ho lah: “Mìng cau lơi hòi dan, gen sồng rgơi bơtrơh jơi cà do.”

³⁰Chòp Yàng Jesu mơ ală cau bơtê lik bơh hơ̆ lòt gan Galile, mơya Kơnràñ ò kòñ ai cau in git.

³¹Bơh Kơnràñ bơto sồr ală cau bơtê lah: “Kòn Mơnus rơp gơkòl bơtào tòm tê cau, mơ bol hơ̆ rơp tơnchơt Khai. Neh sir tơnchơt Khai, gen tơnơ̆ mơ pe ngai Khai rơp kis wơl.”

³²Mơya ală cau bơtê ò git wă jơnau hơ̆, mơ rngòt sơl, ò khin lùp Kơnràñ.

³³Bol khai lòt tus hơ Kapenaum; tòm tŭ ơm tòm hìu, Kơnràñ lùp ală cau bơtê lah: “Tòm tŭ lòt gùng nti, ñchi jơnau bol mê bơyai bal taih?”

³⁴Mơya bol khai ơm mŏ mŏ, bơh rò gùng nti bol khai neh tòm pơndang bơh ñcau la dờng rlau.

³⁵Chòp Kơnràñ nggui, hòi jơt bàr nă cau bơtê mơ đơs lah: “Dilah cau lơi kòñ lơh gơs cau lam bồ, gen pal lơh gơs cau lồi dut mơ lơh gơs cau duh broă tơl nă cau in.”

³⁶Gen Kơnràñ ai dô nă kơnòm dềt ơn digùl ală cau bơtê, lồc behơ̆ kơnđu khai tòm tê mơ đơs lah:

³⁷“Cau lơi bơh sơnđan Añ mơ wă rò dô nă cau be kơnòm dềt do, hơ̆ la wă rò Añ. Ai cau lơi wă rò Añ gen ò di la wă rò Añ, mơya la wă rò Bơtau neh sồr Añ lòt tus.”

³⁸Jang yal mơ Kơnràñ lah: “Ơ Cau Bơto, bol hi neh gŏ dô nă cau ai sơnđan Kơnràñ nàng bơtrơh cà, gen bol hi neh bơkơŭ khai bơh khai ò jat bol he.”

³⁹Mơya Yàng Jesu đơs lah: “Bañ bơkơŭ khai, bơh ò gơs cau lơi ai sơnđan Añ nàng lơh broă gơnap gơnoar mơ rgơi mhar đơs iơh bơh Añ.

⁴⁰Dilah cau lơi ò tòmdră mơ bol he hơ̆ la tòmsòr mơ bol he.

⁴¹Behơ̆ dilah cau lơi ai bol mê in hùc dô mơngàn dà bơh bol mê la bal mơ Bơtau Krist, di ngan Añ đơs mơ bol mê, cau hơ̆ rơp ò gơs tŭ lơi roh phan ƀàn khai dê ò.”

⁴²“Mơya cau lơi lơh gơtup tìs dô nă tòm ală kơnòm dềt neh dòn Añ do, gen chan kơt mpal lŭ dờng di ngko cau hơ̆ mơ sơrbì khai tòm dàlềng la niam rlau.

⁴³Dilah tê mê lơh mê in gơtup tìs, koh tĕ gơ. Chan mê lut tê mơ geh mut tòm bơta kis la niam rlau mơ gơs tơl bàr nơm tê mơ mù tòm brah tìng gơs ồs hơng sùm. [

⁴⁴Hơ̆ la tiah gơs tu rhài ò chơt, mơ ồs hơng sùm.]

⁴⁵Dilah jơng mê lơh mê in gơtup tìs, koh tĕ gơ. Chan mê lut jơng mơ geh mut tòm bơta kis la niam rlau mơ gơs tơl bàr nơm jơng mơ kong sơrbì tòm brah tìng. [

⁴⁶Hơ̆ la tiah tu rhài ò chơt, mơ ồs hơng sùm.]

⁴⁷Dilah mat mê lơh mê in gơtup tìs, kơlwĕ tĕ gơ. Chan mê gơs dô đah mat mơ geh mut tòm lơgar Yàng Tom Trồ la niam rlau mơ gơs tơl bàr đah mat mơ kong sơrbì tòm brah tìng,

⁴⁸hơ̆ la tiah tu rhài ò chơt, mơ ồs hơng sùm.

⁴⁹Bơh kòp nă cau rơp kong pơră mơ ồs be phan ơn pơdơng pơră mơ boh.

⁵⁰Boh la phan niam, mơya dilah boh roh ƀă gen ñchi ai nàng lơh gơ in ƀă wơl taih? Bol mê gơs tĕ boh tòm he, mơ gơtòmsòr tĕ bal mơ gơp.”