Read koho Luka 11 Bible Online

Luka 11 - koho bible

Luka 11

¹Tòm tŭ Yàng Jesu neh sir hòi dan tòm tiah ne rau. Gen gơs dô nă cau bơtê đơs mơ Kơnràñ lah: “Dan Yàng bơto bol hi hòi dan, kung be Jang neh bơto ală cau bơtê khai dê sơl.”

²Yàng Jesu đơs lah: “Tòm tŭ bol mê hòi dan, đơs tĕ: ‘Khoai Bèp, sơnđan Bèp gơs sàng goh, lơgar Bèp gơs tus.

³Dan ai bol hi in phan sa ngai lơi tơl ngai hơ̆.

⁴Dan toh glài bol hi in, bơh să tòm bol hi kung toh glài kòp nă cau kòl dồs mơ bol hi; bañ lòi bol hi gơkòl tòm bơta ơniai.’”

⁵Yàng Jesu đơs tai mơ bol khai lah: “Gơs cau lơi tòm bol mê lòt tus hơ oh mi bơyô tòm gùl mơnang mơ đơs lah: ‘Ơ bi, ai añ in càn pe nơm piang lă.

⁶Bơh oh mi bơyô añ jê lòt gùng ngài pa tus, añ ò gơs phan lơi yò khai in sa.’

⁷Mơ dilah cau ơm tòm dơlam ho lah: ‘Bañ lơh pơnjê añ, mpồng neh kal rau, ală kòn añ mơ añ neh bic rau, añ ò rgơi guh nàng ai phan lơi bi in ò.’

⁸Añ đơs mơ bol mê, bulah cau ơm tòm hìu hơ̆ ò bài guh ai, tài bơh cau ne la bơyô khai dê, mơya tài bơh bơta ntềt pơrjal bơyô khai dê, ngan khai rơp guh, ai bơyô in tơl phan ngui sa.

⁹Añ đơs tai mơ bol mê, dan tĕ, rơp ai; jòi tĕ, rơp bàn; teh tĕ, rơp geh pò bol mê in.

¹⁰Bơh dilah cau lơi dan gen geh, cau lơi jòi gen bàn, mơ cau lơi teh gen geh pò khai in.

¹¹Tòm bol mê cau lơi la bèp, mơ kòn dan piang lă, gen ai lŭ ơ? Hala dan ka, mơ ai bơs ala ka sơl ơ?

¹²Hala dan tap, mơ ai diang sơl ơ?

¹³Dilah bol mê la cau iơh, mơ git ai kòn he in ală phan niam, tơ ài lah Bèp bol mê ơm hơđang trồ ò ai Yàng Hwềng Goh ală cau lơi in dan mơ Kơnràñ ò ơ?”

¹⁴Yàng Jesu bơtrơh tơlik dô nơm cà kloat; dơ̆ cà neh lik, gen cau kloat tus đơs. Mpồl làng bol ai lơh krơi.

¹⁵Mơya tòm bol khai gơs cau đơs lah: “Khai kơnòm di Beeljebul la bơtau cà mơ bơtrơh cà.”

¹⁶Cau ndai tai kòñ lòng Kơnràñ mơ dan dô nơm tềl krơi bơh trồ.

¹⁷Mơya Kơnràñ git bơta kơlôi sơnơng bol khai dê, gen đơs mơ bol khai lah: “Dilah lơgar lơi tòmcah is gen rơp roh gơprah gơpring, dilah hìu lơi cah is gơ dê gen rơp tơrlah tơrling.

¹⁸Behơ̆ dilah cà Satan kung cah is gơ dê, gen lơgar gơ mbe rgơi gam kơ̆ taih? Behơ̆ mơ bol mê đơs lah Añ kơnòm di Beeljebul nàng bơtrơh cà.

¹⁹Dilah Añ kơnòm di Beeljebul nàng bơtrơh cà gen ală kòn klau bol mê kơnòm di ñcau nàng bơtrơh cà taih? Behơ̆ gen, bol khai la cau rơp lơh nền glài bơta tìs bol mê dê.

²⁰Mơya dilah Añ kơnòm di ràs tê Yàng Tom Trồ dê nàng bơtrơh cà, gen lơgar Yàng Tom Trồ neh tus hơ bol mê rau.

²¹Tòm tŭ dô nă cau pràn kơldang soh phan tòmlơh wil tơl nàng sền gàr gơlang khai dê, gen phan mơna khai dê geh sròng lơngap lơngai.

²²Mơya tòm tŭ gơs cau pràn kơldang rlau tus brồ lơh, pha lin rlau mơ khai, gen tòmpìt sơmbrơt jơh ală phan tòmlơh mơ khai neh kơnòm, mơ tòmpà ală phan mơna neh tòmpìt.

²³Cau lơi ò ơm đah mơ Añ la tòmdră mơ Añ; cau lơi ò gơtòmklac mơ Añ gen lơh gơprah gơpring.

²⁴Dơ̆ cà lik bơh di dô cau lơi, gen gơ lòt làm tòm ală tiah ro rañ nàng jòi tiah rlô bòl, mơya jòi ò gơs, gen đơs lah: ‘Añ rơp rê wơl hơ hìu mơ añ pa lik.’

²⁵Dơ̆ rê wơl, gơ gŏ hìu hơ̆ neh pơs goh mơ rơndap niam.

²⁶Gơ lòt tai mơ lam tus poh nơm cà ndai iơh bơsak rlau mơ gơ, mut ơm bal tềng hơ̆; behơ̆ rài kis cau hơ̆ gơlik iơh rmơh rlau mơ lài òr.”

²⁷Tòm tŭ Yàng Jesu gam đơs ală jơnau hơ̆, gơs dô nă cau ùr tòm mpồl làng bol đơs lah: “Lơngai hìu kòn neh đung Kơnràñ, mơ toh Kơnràñ neh pô.”

²⁸Mơya Kơnràñ đơs lah: “Di, bulah behơ̆, cau iat jơnau Yàng Tom Trồ mơ prap gàr gơs lơngai rlau!”

²⁹Tòm tŭ mpồl làng bol tơrgòm pơjum gùt dar Kơnràñ oă rlau gen Kơnràñ sơntòm đơs lah: “Cau do la jơi bơtiàn iơh bơsak; bol khai dan dô nơm tềl krơi, mơya rơp ò ai bol khai in tềl krơi lơi rlau mơ tềl krơi Jôna dê.

³⁰Be Jôna la tềl krơi cau Ninibe in, gen Kòn Mơnus la tềl krơi jơi bơtiàn do in.

³¹Tòm ngai cahrña, bơtau ùr đah đơm rơp ñă ntào mơ cau rài do mơ lơh nền glài bol khai, bơh mò lòt tus bơh kơndòl plai ù nàng iat bơta jak chài Salômôn dê, mơ do gơs dô nă cau dờng rlau mơ Salômôn!

³²Tòm ngai cahrña, cau Ninibe rơp ñă ntào mơ cau rài do mơ lơh nền glài bol khai, bơh cau Ninibe neh gơjrañ sang glài tòm tŭ Jôna bơto yal, mơ do gơs dô nă cau dờng rlau mơ Jôna!”

³³“Ò gơs cau lơi chu đèng mơ ơn tòm tiah ndơp hơđơm hìu, hala ơm hơđơm thùng, mơya ơn hơđang jơng đèng nàng cau lơi mut gen gŏ bơta àng.

³⁴Mat mê la đèng să jan dê; tŭ mat mê niam, gen jơh să jan mê gơs àng loh, mơya tòm tŭ mat mê ò niam gen jơh să jan mê gơs klam jơngo.

³⁵Behơ̆ kơrmap gàr tĕ, rngòt bơta àng tòm mê gơlik bơta klam jơngo mòn.

³⁶Gen behơ̆ dilah jơh să jan mê la àng loh, ò gơs pơnah lơi klam jơngo, gen rơp àng làm jơh, kung be bơta àng đèng pơnđàng mê in sơl.”

³⁷Tòm tŭ Yàng Jesu đơs sir rau, gơs dô nă cau Pharisi jà Kơnràñ sào mho tòm hìu khai. Gen Kơnràñ mut nggui sa.

³⁸Cau Pharisi gŏ Kơnràñ ò rào tê lài mơ tŭ sa gen ai lơh krơi.

³⁹Mơya Yàng Jesu đơs mơ khai lah: “Do bol mê la ală cau Pharisi rào goh đah bơdìh mơngàn mơ prềng, mơya đah dơlam bol mê bềng lìu bơta sa kwà mơ iơh bơsak.

⁴⁰Ơ ală cau bơrngơl gơla ne! Bơtau neh crơng gơs đah bơdìh, ò di neh crơng gơs đah dơlam tai sơl ơ?

⁴¹Mơya bol mê ai tĕ bơta gơs tòm dơlam mơ pà gòi dờng ơnàng cau rƀah lơòi in, gen ală bơta la goh bol mê in.

⁴²Mơya bòl glar bol mê in la cau Pharisi! Bơh bol mê neh ơn dô pơnah jơt biap trau, biap krồng mơ ală biap ndai, mơ sang lòi bơta song ring mơ nùs kòñ gơboh di Yàng Tom Trồ. Ală bơta do bol mê pal lơh mơ kung ò di lơi hŭi ală bơta ne sơl.

⁴³Bòl glar bol mê in la cau Pharisi! Bơh bol mê kòñ nggui cơnòng hơđap tòm hìu jum, kòñ gơs cau lùp còp să tòm gùl drà.

⁴⁴Bòl glar bol mê in, bơh bol mê kung be ală bơtô ƀồc roh tềl, cau lòt jă hơđang gơ mơ ò git.”

⁴⁵Digùl ală cau bơto bơta boh lam, gơs dô nă cau đơs mơ Kơnràñ lah: “Ơ Cau Bơto, ồng đơs behơ̆ kung gơlơh ƀàssìl di bol hi sơl.”

⁴⁶Kơnràñ đơs lah: “Kung bòl glar bol mê in la cau bơto bơta boh lam! Bơh bol mê neh tơnàñ kơnjơ̆ cau ò jai kong, ai să tòm bol mê gen ò ƀư mơ cồng tê.

⁴⁷Bòl glar bol mê in! Bơh bol mê bơt bơtô ƀồc ală cau gơnoar hwơr dê mơ ồng pàng bol mê neh tơnchơt.

⁴⁸Behơ̆ bol mê lơh cơng lah bol mê dô nùs bal mơ broă ồng pàng bol mê neh lơh; bơh bol khai neh tơnchơt ală cau gơnoar hwơr, ai bol mê gen bơt bơtô ală ƀồc hơ̆ in.

⁴⁹Gen tàng bơta jak chài Yàng Tom Trồ dê kung neh đơs lah: ‘Añ rơp sồr ală cau gơnoar hwơr mơ ală cau gơnoar bơto dờng lòt tus hơ bol khai; bol khai rơp tơnchơt cau do, kup kơryan cau ne.’

⁵⁰Behơ̆ jơi bơtiàn do rơp kong lơh glài bơh mhàm jơh ală cau gơnoar hwơr tồ mhàm jơh ală cau gơnoar hwơr neh hòr lik bơh ngai crơng gơs trồ tiah,

⁵¹bơh mhàm Abel jơl tus di mhàm Sacari, la cau neh gơkòl tơnchơt digùl cơnòng duh khoai mơ hìu duh khoai. Di ngan Añ đơs mơ bol mê, rơp kư̆ lùp wơl mhàm hơ̆ di jơi bơtiàn do,

⁵²Bòl glar bol mê in la cau bơto bơta boh lam! Bơh bol mê prap kai mpồng bơta git jak dê; să tòm bol mê ò bài mut, mơ ală cau ndai kòñ mut gen bol mê kơryan kơrdơl.”

⁵³Dơ̆ Yàng Jesu lik bơh tềng hơ̆ rau, ală cau bơto bơta boh lam mơ ală cau Pharisi ntềt di Kơnràñ, chồl bơrcek Kơnràñ đơs oă bơta tai,

⁵⁴mơ kơp nàng kup jơnau đơs lik bơh di bơr Kơnràñ.