Read koho Luka 13 Bible Online

Luka 13 - koho bible

Luka 13

¹Tòm tŭ hơ̆ gơs ală cau ơm tềng hơ̆ yal wơl Yàng Jesu in bơh broă Pilat neh tơnchơt ală cau Galile, ai mhàm ală cau hơ̆ bơcă bal mơ phan ơn duh khoai bol khai dê.

²Kơnràñ ho lah: “Bol mê kơlôi lah ală cau Galile hơ̆ gơs glài rlau mơ ală cau Galile ndai sơl, gen tàng pal kong jê sồt behơ̆ ơ?

³Añ đơs mơ bol mê, ò di; mơya dilah bol mê ò gơjrañ sang glài, gen jơh tơl nă bol mê kung rơp roh rui behơ̆ sơl.

⁴Hala jơt phàm nă cau kòl gơlang jòng Silôe tơrlah gơklơn chơt ne, bol mê kơlôi bol khai gơs glài rlau mơ ală cau ndai ơm tòm Jerusalem ơ?

⁵Añ đơs mơ bol mê, ò di; mơya dilah bol mê ò gơjrañ sang glài, gen jơh tơl nă bol mê kung rơp roh rui behơ̆ sơl.”

⁶Kơnràñ đơs pơnyơu do: “Dô nă cau ne gơs dô nơm chi ƀal tam tòm suơn khai dê, tus jòi plai mơ ò gŏ,

⁷gen đơs mơ cau sền gàr suơn lah: ‘Ne, neh pe nam do, añ lòt tus jòi plai di chi ƀal do mơ ò gŏ. Kơl tĕ gơ; ñchi bơh tài lòi gơ tìm gòi ù behơ̆ taih?’

⁸Cau sền gàr suơn ho lah: ‘Ơ ồng, dan lòi wơl dô nam do tai, gơn añ tò gùt dar mơ ơn phan pơnđồm ù,

⁹lòng sền tơnơ̆ gơlik plai sơl; dilah ò, gen ồng rơp kơl.’”

¹⁰Gơs dô ngai Saƀat, Yàng Jesu bơto sồr tòm dô nơm hìu jum.

¹¹Ne, gơs dô nă cau ùr gơkòl cà lơh, kòp jê tòm jơt phàm nam, khun but ò rgơi ntào song.

¹²Dơ̆ Yàng Jesu gŏ khai, gen hòi mơ đơs lah: “Ơ kòn ùr, ai geh lik klàs bơh di bơta kòp jê rau.”

¹³Kơnràñ ơn tê di să khai, chòp khai ntào song mo mơ jòng ro Yàng Tom Trồ.

¹⁴Tài bơh Yàng Jesu neh sơmbòi tòm ngai Saƀat, gen cau dong gàr hìu jum gơjrañ, đơs mơ làng bol lah: “Gơs prau ngai cau pal lơh broă; behơ̆ tus tĕ tòm ală ngai hơ̆ nàng geh sơmbòi, bañ tus tòm ngai Saƀat.”

¹⁵Mơya Yàng ho mơ khai lah: “Ơ cau ma blac! Kòp nă tòm bol mê tòm ngai Saƀat ò di hồ kơnrồ hala alàng he dê lik bơh bòng ñhơt mơ tề gơ lòt hùc dà ò ơ?

¹⁶Tơ ài lah cau ùr do la kòn sau Abraham dê, mơ cà Satan neh kơt cap tòm jơt phàm nam do, ò di la ò hồ toh khai bơh di che cap hơ̆ tòm ngai Saƀat ò ơ?”

¹⁷Kơnràñ đơs ală jơnau hơ̆ gen ală cau sò tơm di Kơnràñ ƀàssìl jơh, ai jơh mpồl làng bol hòn chò bơh jơh ală broă crih crài Kơnràñ neh lơh.

¹⁸Behơ̆ Kơnràñ đơs lah: “Lơgar Yàng Tom Trồ tòm toh be bơta lơi taih? Añ pal pơndròm mơ bơta lơi taih?

¹⁹Lơgar hơ̆ pơndròm be dô gar sơbê mơ cau ne ai sih tòm suơn khai dê: gơhòn, gơlik dô đòm chi dờng, ală sềm ơm hơđang ntê gơ.”

²⁰Kơnràñ đơs tai lah: “Añ pal pơndròm lơgar Yàng Tom Trồ mơ ñchi lơi taih?

²¹Lơgar hơ̆ pơndròm be kañ mơ cau ùr ne ai bơcă tòm poan jơt lit jơl tus di tŭ kơmbuh phe gơprồ làm jơh.”

²²Kơnràñ lòt làm ală ƀòn dờng ală ƀòn dềt, bơto ndang lòt ndang hơ Jerusalem.

²³Gơs cau đơs mơ Kơnràñ lah: “Ơ Yàng, gơs mìng dô êt cau geh dong klàs ơ?” Kơnràñ ho mơ bol khai lah:

²⁴“Pơnđơl tĕ jơh pràn mut tòm mpồng wềt, bơh Añ đơs mơ bol mê, oă cau rơp jòi gùng kòñ mut mơ ò rgơi.

²⁵Dơ̆ cau tòm hìu guh mơ til mpồng rau, bol mê ntào đah bơdìh, teh mơ hòi lah: ‘Ơ Yàng, dan pò bol hi in.’ Kơnràñ rơp ho lah: ‘Añ ò git bol mê bơh ntềng đah tus.’

²⁶Tŭ hơ̆ bol mê rơp đơs lah: ‘Bol hi neh sa ñô di đap Kơnràñ, mơ Kơnràñ neh bơto sồr tòm ală gùng ƀòn dờng bol hi dê.’

²⁷Kơnràñ rơp ho tai lah: ‘Ơ jơh ală bol mê la cau lơh bơta iơh bơsak, Añ đơs mơ bol mê, Añ ò git bol mê bơh ntềng đah tus; lik lòt tĕ bơh di añ!’

²⁸Tŭ hơ̆, bol mê gŏ Abraham, Isak mơ Jakôp bal mơ jơh ală cau gơnoar hwơr ơm tòm lơgar Yàng Tom Trồ, ai bol mê gen kong sang sơrbì hơ bơdìh; gen bol mê rơp ñìm rac mơ rkiat sề.

²⁹Bơh đah mattơngai lik, đah mattơngai mut, đah đơm, đah đang bol khai rơp tus nàng nggui sa tòm lơgar Yàng Tom Trồ.

³⁰Ngan behơ̆, gơs cau lồi dut rơp gơlik gơs cau sơnròp, cau sơnròp rơp gơlik gơs cau lồi dut.”

³¹Di di jơ hơ̆ gơs dô êt cau Pharisi lòt tus yal mơ Kơnràñ lah: “Lik tĕ bơh tềng do, bơh Herôt kòñ tơnchơt Kơnràñ.”

³²Kơnràñ sồr bol khai lah: “Lòt tĕ yal mơ pì òng hơ̆ lah: ‘Do, Añ bơtrơh tơlik cà, sơmbòi bơta kòp jê ngai do, ngai hìng, tus di ngai pe gen Añ geh wil tơl.

³³Bulah behơ̆, ngai do, ngai hìng mơ ngai hìng nau Añ kư̆ pal lòt, bơh ò gơs tŭ lơi dô nă cau gơnoar hwơr kong tơnchơt di bơdìh Jerusalem.’

³⁴Ơ Jerusalem, Jerusalem, mê tơnchơt ală cau gơnoar hwơr, cơm lŭ di ală cau kong sồr lòt tus hơ mê! Oă dơ̆ Añ kòñ pơjum tơrgòm ală kòn sau mê be iar me ngkrok ală kòn gơ tus hơđơm đar gơ dê, mơya bol mê ò bài!

³⁵Do, hìu bol mê dê rơp lòi srau gòi. Añ đơs mơ bol mê, bol mê rơp ò gŏ Añ tai, jơl tus di tŭ bol mê rơp đơs lah: ‘Lơngai Bơtau ai sơnđan Yàng mơ tus!’”