Read koho Luka 14 Bible Online

Luka 14 - koho bible

Luka 14

¹Tòm ngai Saƀat, Yàng Jesu mut tòm hìu dô nă cau at bồ jơi cau Pharisi dê nàng sa, gen ală cau ơm tềng hơ̆ kơrhia kơp sền Kơnràñ.

²Tŭ hơ̆ gơs dô nă cau kòp pŭ ntào di đap Kơnràñ.

³Yàng Jesu lùp cau bơto bơta boh lam mơ cau Pharisi lah: “Tòm ngai Saƀat geh gơnoar sơmbòi cau hala ò?”

⁴Mơya bol khai ơm mŏ mŏ. Gen Kơnràñ at di khai, sơmbòi mơ ai khai in rê.

⁵Kơnràñ đơs mơ bol khai lah: “Cau lơi tòm bol mê gơs kòn hala kơnrồ alàng dùh tòm tơrlung tòm ngai Saƀat mơ ò hwài tơngguh tơlik gơ mo ơ?”

⁶Bol khai ò rgơi ho dô jơnau lơi bơh bơta hơ̆.

⁷Tòm tŭ Kơnràñ gŏ ală cau geh jà, cau lơi kung sac rwah nggui tòm tiah niam rlau jơh, gen đơs mơ bol khai dô jơnau pơnyơu:

⁸“Tòm tŭ cau lơi jà mê pơjum sa tòmbau, bañ nggui tòm tiah niam rlau jơh, rngòt tòm ală cau geh jà gơs cau dờng màng rlau mơ mê.

⁹Gen cau neh jà mê tus đơs mơ mê lah: ‘Dan lòi tĕ tiah do cau do in,’ mơ tŭ hơ̆ mê rơp ƀàssìl mơ ruc hơ tiah tơnơ̆.

¹⁰Mơya tòm tŭ mê geh cau jà, nggui tĕ di tiah tơnơ̆ rlau jơh, gen cau tòmjà rơp tus đơs mơ mê lah: ‘Ơ bi, dan nggui hơđap.’ Gen tŭ hơ̆, mê rơp geh màng ryŭ di đap ală cau nggui sa bal mơ mê.

¹¹Bơh cau lơi yò tơngguh is să he gen rơp gơtơmù, ai cau lơi tơnliah is să he gen rơp geh yò tơngguh.”

¹²Kơnràñ kung đơs mơ cau tòmjà Kơnràñ lah: “Tòm tŭ mê yò sa ngai hala sa mho, bañ jà ală oh mi bơyô, oh mi tòm, jơi bơtiàn mơ cau gơp ƀòn pas gơs, rngòt bol khai kung jà mê sào nàng tơm wơl mòn.

¹³Mơya tòm tŭ mê yò sa dờng, jà tĕ ală cau rƀah lơòi, cau sồt rmàñ, cau kwet gơlte, cau jơngo,

¹⁴gen mê rơp geh lơngai, bơh bol khai ò rgơi tơm wơl mê in. Yàng Tom Trồ rơp tơm wơl mê in tòm ngai ală cau song ring kis wơl bơh bơta chơt.”

¹⁵Gơs dô nă cau nggui sa bal mơ Kơnràñ kơno jơnau hơ̆, gen đơs mơ Kơnràñ lah: “Lơngai cau lơi in geh sa piang lă tòm lơgar Yàng Tom Trồ!”

¹⁶Mơya Yàng Jesu ho mơ khai lah: “Gơs dô nă cau yò sa dờng, jà oă cau.

¹⁷Tus di jơ sa, khai sồr cau dĭ khai dê lòt đơs mơ ală cau neh geh jà sào lah: ‘Jà tus, jơh ală bơta neh sir rau.’

¹⁸Mơya jơh tơl nă jòi jơnau pơrwài lơm. Cau sơnròp đơs mơ cau dĭ lah: ‘Añ neh rwat dô bă sre, pal lòt sền; dan lòi añ in ơm.’

¹⁹Cau ndai đơs lah: ‘Añ neh rwat pram yô kơnrồ, pal lòt lòng sền gơ; dan lòi añ in ơm.’

²⁰Cau ndai đơs lah: ‘Añ pa tòmbau, gen ò rgơi lòt tus.’

²¹Cau dĭ rê wơl, yal bơta hơ̆ mơ cau tòm khai dê. Cau tòm gơjrañ mơ sồr cau dĭ khai lah: ‘Lik lòt tĕ mhar tus tòm ală gùng me mơ ală gùng dềt tòm ƀòn dờng, lam ală cau rƀah lơòi, cau sồt rmàñ, cau jơngo mat, cau kwet gơlte tus hơ do.’

²²Tŭ hơ̆ mo cau dĭ yal lah: ‘Ơ cau tòm, bơta ồng neh sồr, añ neh lơh sir rau, mơya gam gơs tiah.’

²³Cau tòm sồr cau dĭ tai lah: ‘Lik tĕ tòm gùng me mơ đah rò pơnggàr, mơ bơklơn cau mut tồ geh bềng hìu añ jê.

²⁴Bơh añ đơs mơ bol mê, tòm ală cau neh geh jà lài, ò gơs dô nă cau lơi geh liap bơta yò sa dờng añ jê.’”

²⁵Gơs mpồl làng bol oă lòt bal mơ Yàng Jesu; gen Kơnràñ wơlke đơs mơ bol khai lah:

²⁶“Dilah cau lơi lòt tus hơ Añ mơ ò kòñ gơboh di Añ rlau mơ mè bèp, kòn bau, oh mi, ruh lŏ he dê, mơ bơta kis să tòm he dê sơl, gen ò rgơi lơh gơs cau bơtê Añ jê.

²⁷Cau lơi ò tui chi pơng he dê mơ lòt jat Añ, gen ò rgơi lơh gơs cau bơtê Añ jê.

²⁸Dilah tòm bol mê gơs cau lơi kòñ bơt bơtào dô nơm gơlang jòng, mơya lài ngan pal nggui nàng kòp khà jền priă, sền mê gơs tơl nàng lơh sir gơ.

²⁹Dilah ò, dơ̆ neh bơt mơnàng rau mơ ò rgơi lơh sir, gen ală cau gŏ rơp dơñŏ tơnhial di mê,

³⁰mơ đơs lah: ‘Cau do neh sơntòm bơt, mơ ò rgơi lơh sir!’

³¹Dilah gơs dô nă cau bơtau lơi lik lòt tòmlơh mơ dô bơtau ndai, mơ lài ngan, khai pal nggui kơlôi bơyai lơh nền dilah khai cèng jơt rbô nă tơl pràn rgơi tòmdră jai mơ cau bơtau cèng bàr jơt rbô nă.

³²Dilah tòmdră ò jai, tòm tŭ cau bơtau ne gam ơm ngài, gen pal sồr dô nă cau kong sồr lòt nàng dan lơh gơtòmsòr wơl.

³³Kung behơ̆ sơl, dilah cau lơi tòm bol mê ò sang lòi jơh ală bơta he gơs, gen ò rgơi lơh gơs cau bơtê Añ jê.

³⁴Boh la phan niam; mơya dilah boh roh ƀă, gen ñchi ai nàng lơh gơ in ƀă wơl taih?

³⁵Boh hơ̆ ò rgơi ngui tòm sre hala tòm phan pơnđồm ù, mìng cau sang gơ hơ bơdìh. Cau lơi gơs tồr nàng iat, gen iat tĕ!”