Read koho Luka 15 Bible Online

Luka 15 - koho bible

Luka 15

¹Tŭ hơ̆, jơh ală cau dar dia mơ ală cau glài lòt tus rềp hơ Yàng Jesu nàng iat jơnau Kơnràñ bơto.

²Ală cau Pharisi mơ ală cau bơto bơta boh lam yoam lah: “Cau do wă rò ală cau glài mơ sa bal mơ bol khai!”

³Gen tàng, Kơnràñ đơs mơ bol khai jơnau pơnyơu do:

⁴“Gơs cau lơi tòm bol mê gơs dô rhiang nơm belàt, dilah roh dô nơm, mơ khai ò lòi sin jơt sin nơm tòm ƀlàng, nàng lòt jòi nền belàt neh roh jơl tus di tŭ bàn gơ ơ?

⁵Dơ̆ neh jòi bàn rau, gen hòn chò tui gơ hơđang pơnì,

⁶rê tus tòm hìu rau gen hòi ală oh mi bơyô mơ cau gơp ƀòn tus mơ đơs lah: ‘Hòn chò tĕ bal mơ añ bơh añ neh jòi bàn belàt roh.’

⁷Kung behơ̆ sơl, Añ đơs mơ bol mê, hơđang trồ rơp hòn chò bơh dô nă cau glài gơjrañ sang glài rlau mơ sin jơt sin nă cau song ring ò càng gơjrañ sang glài.

⁸Hala gơs cau ùr lơi gơs jơt pet priă, dilah khai roh dô pet, mơ ò chu ồs đèng, pơs hìu, jòi nền cê jơl tus di tŭ bàn ò ơ?

⁹Dơ̆ khai neh jòi bàn rau, gen khai hòi ală oh mi bơyô mơ cau gơp ƀòn tus mơ đơs lah: ‘Hòn chò tĕ bal mơ añ, bơh añ neh jòi bàn pet priă neh roh.’

¹⁰Kung behơ̆ sơl, Añ đơs mơ bol mê, ală cau gơnrơh Yàng Tom Trồ dê rơp hòn chò bơh dô nă cau glài gơjrañ sang glài.”

¹¹Yàng Jesu đơs tai lah: “Gơs dô nă cau ne gơs bàr nă kòn klau.

¹²Kòn oh đơs mơ bèp lah: ‘Ơ bèp, dan tòmpà añ in phan jơtài mơ añ rơp gơs.’ Gen cau bèp tòmpà phan jơtài bol khai in.

¹³Dô êt ngai tơnơ̆, kòn oh khòm jơh ală phan mơna mơ lik lòt tiah ngài; tềng hơ̆ khai kơnhơl gơlềng gơlàng pròng preh jơh phan mơna khai dê.

¹⁴Dơ̆ neh ngui sa jơh hir phan jơtài rau, tòm lơgar hơ̆ gơtìp bơta jơgloh rung dờng, gen khai ò gam dô nơm phan lơi tai.

¹⁵Khai pal lơh ơpah mơ dô nă cau tòm lơgar hơ̆, mơ cau hơ̆ sồr khai lòt ê sur tòm ƀlàng.

¹⁶Khai kòñ ngan ai ngkàr khoah cau siam sur nàng sa tồ bềng kơndul, mơya cau ò ai khai in sa.

¹⁷Tŭ hơ̆ khai kah kơlôi wơl mơ đơs is tòm nùs lah: ‘Gơs oă cau lơh ơpah bèp añ in gơs piang lă lìu làc, mơya añ do pal kong chơt jơgloh!

¹⁸Añ rơp ntào rê wơl hơ hìu bèp, mơ đơs lah: Ơ bèp, añ neh tìs glài mơ Yàng Tom Trồ mơ bèp,

¹⁹ò di pal sơnđan la kòn bèp dê tai; dan bèp kòp añ be dô nă cau lơh ơpah bèp dê.’

²⁰Chòp khai ñă ntào mơ rê wơl hơ bèp khai dê. Tòm tŭ gam ơm ngài, bèp gŏ khai gen gơs nùs nđàc sơngit, ntoat tus koar di ngko mơ cum.

²¹Kòn đơs mơ bèp lah: ‘Ơ bèp, añ neh tìs glài mơ Yàng Tom Trồ mơ bèp, ò di pal sơnđan la kòn bèp dê tai.’

²²Mơya cau bèp đơs mơ ală cau dĭ lah: ‘Cèng tĕ mhar ào jrùh niam rlau jơh tơnsoh khai in, tơndò sơmbiat di ràs tê, ai khŏ tơnjă di jơng.

²³Kup tĕ kơnrồ kòn lơmă nàng lơh poac. Bol he sa chò hòp lă!

²⁴Bơh kòn añ do neh chơt mơ kis wơl, neh roh mơ geh bàn wơl.’ Chòp bol khai sơntòm sa chò hòp.

²⁵Tŭ hơ̆ kòn tơnhoa ơm tòm ƀlàng rê mòr tus hìu, gen kơno ntas kơñi mơ cau tòmya,

²⁶gen hòi dô nă cau dĭ mơ lùp hơ̆ la ñchi bơta taih?

²⁷Cau dĭ ho lah: ‘Oh bi dê neh rê, gen bèp bi neh lơh poac kơnrồ kòn lơmă, bơh bèp gŏ oh bi dê neh rê lơngap lơngai.’

²⁸Mơya kòn klau tơnhoa gơhào gơjrañ ò bài mut tòm hìu; bèp lik mơ bơto pơndòm khai.

²⁹Mơya khai đơs mơ bèp lah: ‘Do, añ duh broă bèp in neh oă nam rau, ò gơs tŭ lơi lơh tìs mơ gơnoar sồr bèp dê, mơya bèp ò gơs tŭ lơi ai añ in dô nơm be kòn nàng sa chò hòp bal mơ oh mi bơyô añ jê.

³⁰Mơya dơ̆ kòn bèp dê ne, la cau neh sa loan phan mơna bèp dê bal mơ ală cau ùr dri tơlàr mơ rê wơl, gen bèp bơh khai mơ lơh poac kơnrồ kòn lơmă!’

³¹Cau bèp ho lah: ‘Ơ kòn, mê òs ơm mơ añ sùm, jơh ală phan añ jê la phan mê dê sơl.

³²Mơya di pal ngan sa chò hòp mơ hòn chò, bơh oh mê do neh chơt mơ kis wơl, neh roh mơ geh bàn wơl.’”