Read koho Luka 18 Bible Online

Luka 18 - koho bible

Luka 18

¹Yàng Jesu yal cau bơtê in dô jơnau pơnyơu, nàng bơto bol khai pal hòi dan sùm, bañ tŭ lơi gơplơ̆ nùs.

²Kơnràñ đơs lah: “Tòm dô nơm ƀòn dờng ne, gơs dô nă cau kwang cahrña ò duh rngòt di Yàng Tom Trồ, kung ò sền dờng màng di cau lơi sơl.

³Kung tòm ƀòn dờng hơ̆, gơs dô nă cau ùr bơnrau òs tus đơs mơ cau kwang cahrña hơ̆ lah: ‘Dan cahrña song ring añ in nàng tòmdră mơ cau sò tơm di añ.’

⁴Cau kwang hơ̆ ò bài cahrña tòm dô pah tơngai. Mơya tơnơ̆ hơ̆ khai đơs is lah: ‘Bulah añ la cau ò duh rngòt di Yàng Tom Trồ, kung ò ki ngàm di cau sơl,

⁵mơya bơh cau ùr bơnrau do ntềt pơrjal di añ, añ rơp cahrña song ring khai in, rngòt khai lòt tus sùm mơ lơh tơmbòl añ mòn.’”

⁶Yàng Jesu đơs tai lah: “Iat tĕ jơnau cau kwang cahrña ò song ring hơ̆ đơs.

⁷Behơ̆, Yàng Tom Trồ ò di ò cahrña song ring ală cau geh sac rwah Kơnràñ in, la ală cau ngai mơ mang hòi dan mơ Kơnràñ, mơ òbat ho mơ bol khai ơ?

⁸Añ đơs mơ bol mê, Kơnràñ rơp mhar cahrña song ring bol khai in. Bulah behơ̆, tòm tŭ Kòn Mơnus tus, rơp jòi bàn bơta dòn hơđang ù sơl ơ?”

⁹Kơnràñ đơs tai jơnau pơnyơu do mơ ală cau sơnđan is să he la song ring mơ sền òsơp di cau ndai.

¹⁰“Gơs bàr nă cau guh hơ hìu duh khoai nàng hòi dan, dô nă cau Pharisi mơ dô nă cau dar dia.

¹¹Cau Pharisi ntào hòi dan òm be do: ‘Khoai Yàng Tom Trồ, añ ưnngài Kơnràñ bơh añ ò di be cau ndai, sa kwà, ò song ring, rềs àr bơrnàn, kung ò di be cau dar dia ne.

¹²Añ ơt sa bàr dơ̆ tòm dô poh, añ ơn dô pơnah jơt bơh jơh ală phan añ dòp geh.’

¹³Ai cau dar dia ơm ngài ngài, ò khin tơnggòr mat hơđang trồ, tur ntơh he mơ đơs lah: ‘Khoai Yàng Tom Trồ, dan nđàc sơngit di añ la cau glài.’

¹⁴Añ đơs mơ bol mê, cau dar dia rê hơ hìu he geh kòp la song ring, ò di cau Pharisi ò; bơh cau lơi yò tơngguh is să he gen rơp gơtơmù, ai cau lơi tơnliah is să he gen rơp geh yò tơngguh.”

¹⁵Cau kung cèng ală kơnòm dềt tus hơ Kơnràñ nàng Kơnràñ ƀư di bol khai. Ală cau bơtê gŏ, gen lah pơrhơng ală cau cèng hơ̆.

¹⁶Mơya Yàng Jesu hòi ală cau bơtê mơ đơs lah: “Lòi tĕ ală kơnòm dềt lòt tus hơ Añ, bañ kơryan bol khai; bơh lơgar Yàng Tom Trồ gơrê mơ ală cau be bol khai.

¹⁷Kah tĕ jơnau Añ đơs mơ bol mê do, cau lơi ò dòp lơgar Yàng Tom Trồ be dô nă kơnòm dềt, gen ò geh mut tòm hơ̆ ò.”

¹⁸Gơs dô nă cau kwang ne lùp Yàng Jesu lah: “Ơ Cau Bơto lơbơn niam, ñchi bơta añ pal lơh nàng geh bơta kis gam sùm sùm taih?”

¹⁹Yàng Jesu đơs lah: “Ñchi bơh tài mê sơnđan Añ la lơbơn niam taih? Ò gơs cau lơi lơbơn niam, mìng Yàng Tom Trồ la Bơtau lơbơn niam lơm.

²⁰Mê git ală bơta sồr lam: ‘Bañ tìs glài rềs àr bơrnàn, bañ tơnchơt cau, bañ ntung kơñau, bañ lơh cơng blac, dòn duh tĕ mè bèp mê.’”

²¹Khai ho lah: “Ală bơta hơ̆ añ neh prap gàr bơh tŭ gam kơnòm.”

²²Yàng Jesu kơno bơta hơ̆ gen đơs mơ khai lah: “Mê gam siơ̆u dô bơta: Tac tĕ jơh ală phan mơna mê dê mơ tòmpà cau rƀah lơòi in, gen mê rơp geh phan màng hơđang trồ; lồc behơ̆ tus tĕ jat Añ.”

²³Mơya dơ̆ khai kơno jơnau hơ̆ gen moat jrùng ngan, bơh khai pas sơm ngan.

²⁴Yàng Jesu gŏ khai behơ̆ gen đơs lah: “Cau pas sơm mut tòm lơgar Yàng Tom Trồ la kalke ngan!

²⁵Bơh làkđa mut tòm trồm jrum la ƀuơn rlau mơ cau pas sơm mut tòm lơgar Yàng Tom Trồ.”

²⁶Ală cau kơno jơnau hơ̆ đơs lah: “Behơ̆ gen ñcau rgơi geh dong klàs taih?”

²⁷Kơnràñ đơs lah: “Bơta lơi kòn mơnus ò rgơi lơh, gen Yàng Tom Trồ rgơi lơh lơm.”

²⁸Chòp Pier đơs lah: “Do, bol hi neh sang jơh ală bơta mơ jat Kơnràñ.”

²⁹Kơnràñ đơs lah: “Di ngan Añ đơs mơ bol mê, ò gơs cau lơi bơh lơgar Yàng Tom Trồ mơ sang hìu đam, bau ùr, oh mi, mè bèp, kòn sau,

³⁰mơ ò dòp leng oă dơ̆ rlau tòm rài do, bal mơ bơta kis gam sùm sùm tòm rài tơnơ̆ tai.”

³¹Chòp Yàng Jesu lam is jơt bàr nă cau bơtê mơ đơs mơ bol khai lah: “Do, bol he guh hơ Jerusalem, ală bơta mơ ală cau gơnoar hwơr neh cih bơh Kòn Mơnus pal gơlik gơs di ngan.

³²Bơh Khai rơp gơkòl bơtào tòm tê cau làng bol Bơdìh, kong dơñŏ tơnhial, bơtat bơtròh mơ choh druh;

³³tơnơ̆ hơ̆, cau pù lơh mơ tơnchơt Khai; tus di ngai dơ̆ pe, Khai rơp kis wơl.”

³⁴Mơya ală cau bơtê ò wă jơnau lơi; bơh jơnau hơ̆ gơkòl pồn ndơp bol khai in, gen tàng bol khai ò git wă ală jơnau Yàng Jesu kòñ đơs.

³⁵Tòm tŭ Yàng Jesu tus rềp hơ Jerikô, gơs dô nă cau jơngo nggui kanadàn di gah gùng.

³⁶Khai kơno mpồl làng bol lòt gan, gen lùp: “Ñchi bơta hơ̆ taih?”

³⁷Bol khai yal khai in git lah Yàng Jesu Cau Nasaret lòt gan.

³⁸Chòp khai hòi driau lah: “Ơ Jesu, Kòn Dabit, dan nđàc sơngit di añ.”

³⁹Ală cau lòt lài lah pơrhơng khai, sồr ơm mŏ mŏ, mơya khai sơlo driau dờng rlau lah: “Ơ Kòn Dabit, dan nđàc sơngit di añ.”

⁴⁰Yàng Jesu dơh wơl, sồr cau lam khai tus. Dơ̆ khai tus rềp, gen Kơnràñ lùp khai lah:

⁴¹“Ñchi mê kòñ Añ lơh mê in taih?” Khai ho lah: “Ơ Yàng, añ kòñ geh gŏ.”

⁴²Yàng Jesu đơs mơ khai lah: “Gŏ tĕ, bơta dòn mê neh sơmbòi mê.”

⁴³Khai gŏ mo mơ lòt jat Kơnràñ mơ jòng ro Yàng Tom Trồ. Jơh làng bol gŏ behơ̆ gen jòng ro Yàng Tom Trồ.