Read koho Luka 2 Bible Online

Luka 2 - koho bible

Luka 2

¹Tŭ hơ̆, bơtau Ôgustơ tơlik dô jơnau gơnoar sồr, sồr jơh ală lơgar dunnia pal cih sơnđan mat tòm sră.

²Bơta cih sơnđan mat do la dơ̆ sơnròp tòm rài Kirinius la cau kwang đơng lơgar Siri.

³Jơh tơl nă lik lòt, kòp nă rê hơ ƀòn tòm, nàng cih sơnđan mat tòm sră.

⁴Bơh Jôsep la bal mơ hìu nhă jơi bơtiàn Dabit dê, gen kung bơh Nasaret tòm Galile guh hơ Jude, tus hơ ƀòn dờng Dabit, sơnđan la Betlehem,

⁵nàng cih sơnđan khai mơ sơnđan Mari, la cau neh ho bau mơ khai, cau hơ̆ gam bun.

⁶Tòm tŭ bol khai ơm tềng hơ̆ gen ngai Mari deh neh tus.

⁷Khai deh kòn klau tơnhoa, ai ồi klơm, mơ tơmbic tòm bòng ñhơt, bơh hìu ơpah bic ò gơs tiah bol khai in ơm.

⁸Mơ tai, tòm kơnhwàl hơ̆ gơs ală cau ê belàt ơm tòm ƀlàng, drơng mang kơp gàr mpồl belàt.

⁹Nisơna gơs cau gơnrơh Yàng dê tơlik mat mơ bol khai, mơ bơta gơklŏ Yàng dê gơcrà gùt dar, bol khai rngòt rngơt ngan.

¹⁰Gen cau gơnrơh đơs mơ bol khai lah: “Bañ rngòt, do, añ yal bol mê in dô nơm jơnau niam hòn chò dờng, gơ rơp dờng màng ală làng bol in;

¹¹hơ̆ la ngai do tòm ƀòn dờng Dabit dê neh deh bol mê in dô Bơtau Dong klàs, la Krist, la Yàng.

¹²Do la tềl sơnio bol mê in: Bol mê rơp gŏ dô nă oh nga klơm mơ ồi, bic tòm bòng ñhơt.”

¹³Nisơna gơs rbô rhiang cau ling bơh trồ bal mơ cau gơnrơh hơ̆ jòng ro Yàng Tom Trồ lah:

¹⁴“Gơklŏ ngan Yàng Tom Trồ ơm hơđang tap trồ jòng rlau jơh, Ring lơngai tòm ù ai cau geh nđàc in niam nùs Kơnràñ.”

¹⁵Tŭ ală cau gơnrơh neh lòi bol khai mơ guh rê hơ lơgar trồ rau, ală cau ê belàt đơs bal lah: “Heh! Bol he lòt lă tus hơ Betlehem nàng sền broă neh gơlik gơs mơ Yàng ai bol he in git.”

¹⁶Chòp bol khai sơrbac sơrbang lòt tus tềng hơ̆, gŏ Mari, Jôsep, mơ oh nga bic tòm bòng ñhơt.

¹⁷Neh gŏ behơ̆, gen bol khai yal wơl ală jơnau neh yal bol khai in bơh kòn dềt hơ̆.

¹⁸Jơh ală cau lơi kơno jơnau cau ê belàt yal wơl, gen ai lơh krơi ngan.

¹⁹Ai Mari gen prap ală jơnau hơ̆ mơ kơlôi sơnơng tòm nùs.

²⁰Ală cau ê belàt rê wơl, lơh àng sơnđan mơ jòng ro Yàng Tom Trồ bơh ală bơta bol khai neh kơno mơ gŏ, tòm toh be jơnau neh yal bol khai in.

²¹Tơl phàm ngai rau, gen pal siat gơltau kòn dềt in, mơ tơmoh sơnđan la Jesu, hơ̆ la sơnđan cau gơnrơh neh tơmoh lài mơ tŭ bun Kơnràñ tòm kơndul mè.

²²Tòm tŭ ală ngai lơh bơta sàng goh jat be bơta boh lam Môise neh sir rau, gen bol khai cèng Kòn Dềt tus hơ Jerusalem nàng ơn Yàng in,

²³(be neh cih tòm bơta boh lam Yàng dê lah: “Jơi dam lơi ƀlong sò lài pal ơn is Yàng in”),

²⁴mơ ơn phan duh khoai jat be bơta boh lam Yàng neh sồr, la dô yô ntòp hala bàr nơm kòn ntòp hui.

²⁵Mơ tai, tòm Jerusalem gơs dô nă cau klau sơnđan la Simeôn, la cau song ring mơ duh rngòt, kơp gơn bơta pơndòm pơniang Israel dê, mơ Yàng Hwềng Goh ơm hơđang khai.

²⁶Khai neh gơs Yàng Hwềng Goh yal tơlik is lah, khai rơp ò chơt lài mơ tŭ gŏ Bơtau Krist Yàng dê.

²⁷Khai gơs Yàng Hwềng chồl mut tòm hìu duh khoai; tòm tŭ mè bèp cèng kòn dềt la Jesu tus, nàng lơh Kơnràñ in jat bơta òs mòng bơta boh lam dê,

²⁸gen khai kơnđu kòn dềt mơ jòng ro Yàng Tom Trồ lah:

²⁹“Khoai Yàng, tŭ do dan Yàng ai dĭ gơna Yàng dê chơt lơngap lơngai, jat be jơnau Yàng;

³⁰Bơh mat añ neh gŏ bơta dong klàs Yàng dê,

³¹Mơ Kơnràñ neh rcang sir di đap jơh ală làng bol,

³²hơ̆ la bơta àng yal tơlik làng bol bơdìh in, mơ la bơta gơklŏ làng bol Israel Kơnràñ dê.”

³³Mè bèp Kơnràñ ai lơh krơi bơh ală jơnau ồng Simeôn neh đơs bơh Kơnràñ.

³⁴Gen Simeôn ai lơngai bol khai in, mơ đơs mơ Mari mè Kơnràñ lah: “Do, kòn do neh geh bơtào gơs nàng lơh oă cau tòm Israel in gơtup pừ hala tơngguh wơl, kung lơh dô nơm tềl gơkòl tòmdră wơl.

³⁵Ai ai, gơs dô nơm đào rơp srơp bluh hwềng soàn ai, nàng bơta kơlôi tòm nùs oă cau dê geh ràng tơlik.”

³⁶Gơs cau gơnoar hwơr ùr Anne, kòn ùr Phanuel dê, jơi bơtiàn Aser, neh jòng sơnam ngan; bơh di tŭ neh bau ơm bal mơ bau klau tòm poh nam,

³⁷mơ do neh ơm bơnrau phàm jơt poan nam rau. Mò ò gơs tŭ lơi lik bơh di hìu duh khoai, ngai mơ mang kư̆ duh broă Yàng, ơt sào mơ hòi dan.

³⁸Di di tŭ hơ̆, mò kung guh tềng hơ̆, jòng ro ưnngài Yàng Tom Trồ, mơ tòmbơhbơr bơh Kơnràñ mơ ală cau kơp gơn bơta dong tă Jerusalem.

³⁹Dơ̆ Jôsep mơ Mari neh lơh tơl ală broă jat bơta boh lam Yàng dê rau, gen rê wơl hơ Galile, hơ ƀòn dờng tòm bol khai dê la Nasaret.

⁴⁰Kòn dềt rhòi dờng, sơlo pràn kơldang, bềng lìu bơta jak chài, mơ bơta nđàc Yàng Tom Trồ dê ơm hơđang Kơnràñ.

⁴¹Mơ tai, kòp nam tus di bơta pơjum sa Lòt gan, mè bèp Kơnràñ lòt tus hơ Jerusalem.

⁴²Tòm tŭ Yàng Jesu gơs jơt bàr nam, jat òs mòng Kơnràñ lòt tus tòm bơta pơjum sa.

⁴³Tŭ bơta pơjum sa jơh rau, bol khai sơntòm rê hìu. Kơnòm Jesu ơm wơl tòm Jerusalem, mơ mè bèp ò git,

⁴⁴tồnlah Kơnràñ gơs bal tòm mpồl cau rê. Neh lòt dô ngai sồng jòi lùp digùl ală cau jơi bơtiàn mơ gơp ƀòn,

⁴⁵mơya ò gŏ Kơnràñ, gen rê wơl hơ Jerusalem nàng jòi.

⁴⁶Tơnơ̆ mơ pe ngai bol khai bàn Kơnràñ tòm hìu duh khoai, ơm nggui digùl ală cau bơto, iat ndang lùp ndang.

⁴⁷Cau lơi kơno gen ai lơh crih crài bơh bơta jak chài mơ bơta ho Kơnràñ dê.

⁴⁸Dơ̆ mè bèp gŏ Kơnràñ gen ai lơh crih crài ngan, mơ mè Kơnràñ lùp lah: “Ơ kòn, ñchi bơh tài mê lơh bàr nă bol hi in be do taih? Do, bèp kòn mơ mè neh kơlôi moat ngan mơ jòi kòn.”

⁴⁹Yàng Jesu ho lah: “Ñchi bơh tài mè bèp jòi Añ taih? Mè bèp ò git Añ pal duh broă Bèp Añ ò ơ?”

⁵⁰Mơya bol khai ò wă jơnau Kơnràñ đơs hơ̆.

⁵¹Lồc behơ̆ Kơnràñ mơ bol khai mù rê hơ Nasaret, mơ Kơnràñ dòn duh bol khai. Mè Kơnàñ prap ală jơnau hơ̆ tòm nùs.

⁵²Yàng Jesu sơlo jak chài, să jan sơlo dờng, sơlo niam nùs Yàng Tom Trồ mơ cau sơl.