Read koho Luka 21 Bible Online

Luka 21 - koho bible

Luka 21

¹Yàng Jesu pò mat, gŏ ală cau pas ơn phan tòm đam jàr,

²kung gŏ dô nă cau ùr bơnrau rƀah ne ơn bàr su trà.

³Kơnràñ đơs lah: “Añ đơs ngan mơ bol mê, cau ùr bơnrau rƀah do neh ơn oă rlau mơ jơh ală cau ne.

⁴Bơh jơh ală cau ne ai phan tơngkah tơngkañ bol khai dê mơ ơn tòm hơ̆, ai cau ùr rƀah siơ̆u siar do neh ơn jơh phan khai gơs, la phan ròng siam să khai.”

⁵Tòm tŭ gơs cau đơs bơh hìu duh khoai geh bơka mơ lŭ niam mơ ală phan ơn, gen Yàng Jesu đơs lah:

⁶“Ală bơta bol mê gŏ tŭ do, tòm ală ngai rơp tus rơp ò gơs pơnai lŭ lơi ơm hơđang pơnai lŭ ndai mơ ò gơtơrlơm.”

⁷Bol khai lùp Kơnràñ lah: “Ơ Cau Bơto, tŭ lơi rơp gơlik gơs ală bơta hơ̆, mơ dơ̆ ală bơta hơ̆ mòr gơlik tus gen gơs tềl krơi lơi taih?”

⁸Kơnràñ đơs lah: “Kơrhia tĕ, rngòt bol mê gơkòl pơrlồm tìs nrah mòn, bơh gơs oă cau rơp ai sơnđan Añ lòt tus mơ đơs lah: ‘Añ la Krist!’ mơ lah: ‘Tŭ tơngai neh tus rềp.’ Bol mê bañ lòt jat bol khai.

⁹Tòm tŭ bol mê rơp kơno đơs bơh kơlìn gơtoă mơ nggồr nggàc, bañ rngòt rngơt; bơh ală bơta hơ̆ pal gơlik tus lài, mơya òhềt la tŭ lồi dut.”

¹⁰Kơnràñ đơs tai mơ bol khai lah: “Làng bol do rơp bơtào tòmsò mơ làng bol ne, lơgar do tòmlơh mơ lơgar ndai,

¹¹rơp gơs lơnggơr ù dờng, oă tiah gơs jơgloh rung mơ pluh plàng; kung gơs ală broă rngòt cù kìr mơ tềl krơi dờng bơh trồ.

¹²Mơya lài mơ tŭ gơs ală bơta hơ̆, cau rơp ai tê kup bol mê mơ kup kơryan bol mê, bơtào tòm hìu jum, tơmut tòm hìu jàm, hwài bol mê tus di đap ală cau bơtau mơ ală cau kwang đơng lơgar tài bơh sơnđan Añ.

¹³Hơ̆ la tŭ lơmpah nàng bol mê in lơh cơng.

¹⁴Behơ̆ bol mê lơh nền tĕ tòm nùs, bañ kơlôi lài mbe rơp tò să he.

¹⁵Bơh Añ rơp ai bol mê in jơnau đơs mơ bơta jak chài mơ ală cau sò tơm di bol mê ò rgơi tòmdră hala đơs tơrwơl.

¹⁶Bol mê kung rơp gơkòl mè bèp, oh mi, jơi bơtiàn, gơp bơyô pơrlơ̆ dră; bol khai rơp tơnchơt cau ƀà tòm mpồl bol mê.

¹⁷Bol mê rơp gơkòl jơh ală cau gơjrañ kơuềng tài bơh sơnđan Añ.

¹⁸Mơya dô dang che sŏ di bồ bol mê dê kung ò roh sơl.

¹⁹Kơnòm di bơta kơ̆ nùs bol mê dê mơ bol mê geh sròng hwềng soàn he dê.

²⁰Tòm tŭ bol mê gŏ Jerusalem gơkòl mpồl ling gơrwàng, gen git tĕ lah bơta tơrlah tơrling gơ mòr tus.

²¹Tŭ hơ̆ cau lơi ơm tòm Jude dô tĕ hơđang mơnơm, cau lơi ơm tòm Jerusalem lik tĕ, cau lơi ơm tòm ƀlàng bañ mut tòm Jerusalem.

²²Bơh hơ̆ la ală ngai lơh glài, tồ jơh ală bơta neh cih gơlik gơs di ngan.

²³Tòm ală ngai hơ̆, bòl glar cau bun in mơ cau gơs kòn pô in! Bơh rơp gơs bơta rung rài dờng gơdùh tòm ù mơ bơta lơh glài Yàng Tom Trồ rơp tus hơđang làng bol do.

²⁴Bol khai rơp gơplơ̆ hơđơm mat đào, gơkòl cau kup lơh dĭ digùl jơh ală làng bol, Jerusalem rơp gơkòl ală làng bol bơdìh jă trơm jơl tus di ală tŭ tơngai làng bol bơdìh dê geh wil tơl.

²⁵Rơp gơs ală tềl krơi tòm mattơngai, kơnhai mơ ală sơmañ; ai tòm ù gen ală làng bol jê sồt bòl glar, ò git mbe kòñ lơh bơh dàlềng mơ ryà gơ nggồr ur ur.

²⁶Cau gơdô nùs tài bơh rngòt rngơt tòm tŭ gơn sền ală bơta rơp gơlik gơs tòm làm jơh dunnia, bơh gơnap gơnoar ală tap trồ dê gơlơnggơr.

²⁷Tòm tŭ hơ̆, cau rơp gŏ Kòn Mơnus ai gơnap gơnoar dờng mơ bơta gơklŏ ryŭ ryơm ơm tòm mhwal mơ tus.

²⁸Tŭ lơi ală bơta hơ̆ rơp gơlik tus, gen ntào tĕ song mơ tơnggòr hơđang, bơh bơta dong tă bol mê dê tus rềp.”

²⁹Chòp Kơnràñ đơs mơ bol khai dô jơnau pơnyơu lah: “Sền tĕ chi ƀal mơ ală chi ndai;

³⁰tòm tŭ gơcat nha, gen bol mê gŏ mơ git lah kơnhai duh mòr tus.

³¹Kung behơ̆ sơl, tòm tŭ bol mê gŏ ală bơta hơ̆ gơlik gơs, gen git tĕ lah lơgar Yàng Tom Trồ mòr tus rau.

³²Di ngan Añ đơs mơ bol mê, cau pah rài do ò sơrlèt rlau jơl tus di tŭ jơh ală bơta hơ̆ gơlik gơs rau.

³³Trồ tiah rơp roh, mơya jơnau đơs Añ jê ò gơs tŭ lơi roh.

³⁴Behơ̆ bol mê kơrmap gàr tĕ să he, rngòt bơta ñô sa oă ir, bơta bơñul lơmbè mơ bơta kơlôi rcang rài do dê lơh giga nùs bol mê dê, mơ ngai hơ̆ tus nisơna hơđang bol mê be tras jàl mòn;

³⁵bơh ngai hơ̆ rơp tus hơđang kòp nă cau ơm làm gùt plai ù kung behơ̆ sơl.

³⁶Behơ̆ bol mê pal drơng kơp tĕ mơ hòi dan sùm, tồ bol mê in gơs tơl pràn nàng lik klàs bơh di ală bơta pal tus hơ̆ mơ ntào di đap Kòn Mơnus.”

³⁷Mơ tai, kòp ngai Yàng Jesu bơto sồr tòm hìu duh khoai, ai kòp mang Kơnràñ lik lòt mơ ơm hơđang mơnơm sơnđan la Ôlibe.

³⁸Gơ rơp rìng àng, jơh làng bol lòt tus hơ Kơnràñ tòm hìu duh khoai nàng iat Kơnràñ.