Read koho Luka 22 Bible Online

Luka 22 - koho bible

Luka 22

¹Bơta pơjum sa piang lă ò gơs kañ, hơ̆ la bơta pơjum sa Lòt Gan, mòr tus.

²Ală cau gơnoar lam bồ ơn phan duh khoai bal mơ ală cau bơto bơta boh lam jòi bơta nàng tơnchơt Yàng Jesu, bơh bol khai rngòt di làng bol.

³Tŭ hơ̆, cà Satan neh mut tòm nùs Juda sơnđan la Iskariôt, la dô nă tòm jơt bàr nă cau bơtê.

⁴Khai lòt bơyai mơ ală cau gơnoar lam bồ ơn phan duh khoai mơ ală cau kwang ling sền gàr hìu duh khoai mbe kòñ lơh nàng bơtào Kơnràñ bol khai in.

⁵Bol hơ̆ chò hòp, ho ai jền priă khai in.

⁶Neh dô nùs bal rau, gen khai jòi tŭ lơmpah nàng bơtào Kơnràñ bol khai in tòm tŭ ò gơs làng bol.

⁷Tus di ngai pơjum sa piang lă ò gơs kañ, la ngai pal tơnchơt belàt kòn bơta pơjum sa Lòt Gan dê,

⁸Yàng Jesu sồr Pier mơ Jang lah: “Lòt tĕ rcang yò sa bơta pơjum sa Lòt Gan bol he in.”

⁹Bol khai đơs lah: “Ntềng đah Kơnràñ kòñ bol he rcang yò sa taih?”

¹⁰Kơnràñ ho lah: “Dơ̆ bol mê mut tòm ƀòn dờng, rơp tìp dô nă cau klau đoa dô nơm yang dà; jat tĕ khai tòm hìu lơi khai mut,

¹¹mơ đơs mơ cau tòm hìu hơ̆ lah: ‘Cau Bơto đơs mơ mê lah: Ntềng đah ơdŭ nac la tiah Añ rơp sa bơta pơjum sa Lòt gan bal mơ ală cau bơtê Añ jê taih?’

¹²Cau tòm rơp sơnio bol mê in dô nơm ơdŭ dờng tap hơđang, neh rcang rơndap sir; rcang yò sa tĕ tềng hơ̆.”

¹³Bol khai lòt, tìp ală bơta tòm toh be jơnau Kơnràñ neh đơs, mơ bol khai rcang yò sa bơta pơjum sa Lòt Gan.

¹⁴Tus di jơ sa, Kơnràñ nggui di cơnòng, ală cau gơnoar bơto dờng nggui bal mơ Kơnràñ.

¹⁵Kơnràñ đơs mơ bol khai lah: “Añ neh kòñ ngan sa bơta pơjum sa Lòt Gan do bal mơ bol mê lài mơ tŭ Añ kong jê sồt.

¹⁶Bơh Añ đơs mơ bol mê, Añ rơp ò sa bơta pơjum sa do tai jơl tus di tŭ ngai hơ̆ gơlik wil tơl tòm lơgar Yàng Tom Trồ.”

¹⁷Chòp Kơnràñ ai mơngàn, ưnngài gen đơs lah: “Ai tĕ mơngàn do tòmpà bal mơ gơp.

¹⁸Bơh Añ đơs mơ bol mê, bơh do jơl hìng nau, Añ ò hùc dà plai ño do tai jơl tus di tŭ lơgar Yàng Tom Trồ tus rau.”

¹⁹Chòp Kơnràñ ai piang lă, ưnngài, gen dơrkă, tong bol khai in mơ đơs lah: “Do la să jan Añ, bơh bol mê mơ ai phi. Lơh tĕ bơta do nàng kah wơl Añ.”

²⁰Kung behơ̆ sơl, tơnơ̆ mơ tŭ sa mho, Kơnràñ ai mơngàn mơ đơs lah: “Mơngàn do la bơta ho bal pa tòm mhàm Añ, hơ̆ la mhàm tài bơh bol mê mơ hòr lik.

²¹Mơya ne, cau pơrlơ̆ dră di Añ ơm di cơnòng bal mơ Añ.

²²Kòn Mơnus rơp chơt be Yàng Tom Trồ neh lơh nền, mơya bòl glar cau do in la cau pơrlơ̆ dră di Kơnràñ.”

²³Ală cau bơtê lùp bal mơ gơp ñcau rơp lơh bơta hơ̆.

²⁴Gơs bơta tòm pơndang bal digùl ală cau bơtê lòng sền ñcau tòm bol khai la dờng rlau jơh.

²⁵Mơya Kơnràñ đơs mơ bol khai lah: “Ală cau bơtau làng bol bơdìh dê ai gơnoar nàng at bồ, ală cau kwang bàng geh sơnđan la cau bơyô làng bol dê.

²⁶Ai đah mơ bol mê, ò di behơ̆ ò; mơya cau lơi dờng rlau tòm bol mê pal gơlik gơs be cau dềt rlau jơh, mơ cau lơi lam bồ pal gơlik gơs be cau duh broă.

²⁷Bơh cau nggui di cơnòng mơ cau duh broă, ñcau la dờng rlau taih? Ò di la cau nggui di cơnòng ò ơ? Mơya Añ ơm digùl bol mê be cau duh broă.

²⁸Bol mê la cau kư̆ ơm bal mơ Añ tòm bơta gơlòng bòl glar Añ jê.

²⁹Gen tàng Añ ai bơta song ring bol mê in, kung be Bèp neh ai Añ in sơl,

³⁰bol mê geh ñô sa di cơnòng Añ jê tòm lơgar Añ; bol mê kung rơp nggui hơđang sơbàn mơ cahrña jơt bàr jơi bơtiàn làng bol Israel.”

³¹Yàng đơs lah: “Ơ Simôn, Simôn, do cà Satan kòñ nggum ngkhiang bol mê be kòi mi.

³²Mơya Añ neh hòi dan mê in, tồ bơta dòn mê dê ò gơhuc. Behơ̆ tus di tŭ mê rê wơl hơ Añ, gen lơh tĕ oh mi mê in kơ̆ nùs.”

³³Chòp Pier đơs lah: “Ơ Yàng, añ neh rcang sir nàng kong jàm kong chơt bal mơ Yàng.”

³⁴Kơnràñ đơs lah: “Ơ Pier, Añ đơs mơ mê, ngai do tŭ iar òhềt nrau, gen mê rơp pơndang pe dơ̆ lah ò git Añ.”

³⁵Chòp Kơnràñ đơs mơ bol khai lah: “Dơ̆ Añ neh sồr bol mê lòt ò cèng kơldung priă, kơldung phan, hala gơltau jă, bol mê siơ̆u phan lơi sơl?” Bol khai ho lah: “Ò siơ̆u.”

³⁶Kơnràñ đơs lah: “Mơya tŭ do cau lơi gơs kơldung priă gen ai tĕ, cau lơi gơs kơldung phan kung behơ̆ sơl; cau lơi ò gơs đào pal tac ào bơdìh nàng rwat.

³⁷Bơh Añ đơs mơ bol mê, jơnau Sră Goh neh cih lah: ‘Cau kòp Kơnràñ tòm sèng cau glài,’ pal gơlik di ngan di Añ. Bơh ală bơta neh cih bơh Añ pal gơlik gơs di ngan.”

³⁸Bol khai đơs lah: “Ơ Yàng, gơs bàr nơm đào do.” Kơnràñ đơs lah: “Neh tơl rau!”

³⁹Tŭ hơ̆ Kơnràñ lik lòt, guh hơđang mơnơm Ôlibe jat be òs; ală cau bơtê kung lòt jat Kơnràñ.

⁴⁰Dơ̆ neh tus tềng hơ̆ rau, Kơnràñ đơs mơ bol khai lah: “Hòi dan tĕ, tồ bol mê in ò gơtơmut tòm bơta ơniai.”

⁴¹Gen Kơnràñ lòt bơh bol khai pơgap dô bồng sơrbì lŭ, cùn gơltang hòi dan lah:

⁴²“Ơ Bèp, dilah Bèp kòñ, dan tă mơngàn do bơh di Añ! Bulah behơ̆, ò di jat nùs kòñ Añ, mơya jat nùs kòñ Bèp dê.” [

⁴³Gơs dô nă cau gơnrơh bơh trồ tơlik mat mơ bơtơl pràn Kơnràñ in.

⁴⁴Tòm bơta jê sồt bòl glar ngan Kơnràñ hòi dan sơlo rac ròc, kơlhề gơlik gơs be ntòc mhàm dờng rung di tiah.]

⁴⁵Neh sir hòi dan, Kơnràñ ñă ntào, lòt tus hơ ală cau bơtê, gŏ bol khai lơhă bic bơh moat jrùng,

⁴⁶gen đơs lah: “Ñchi bơh tài bol mê lơhă bic taih? Guh tĕ hòi dan, tồ bol mê ò gơtơmut tòm bơta ơniai.”

⁴⁷Tòm tŭ Kơnràñ gam đơs, ne, dô mpồl cau lòt tus, bơh Juda, la dô nă cau tòm jơt bàr nă cau bơtê, lòt lài tus rềp di Yàng Jesu nàng cum Kơnràñ.

⁴⁸Yàng Jesu lùp khai lah: “Ơ Juda, mê ngui bơta cum nàng pơrlơ̆ dră di Kòn Mơnus ơ?”

⁴⁹Ală cau bơtê ơm bal mơ Kơnràñ gŏ bơta neh gơlik gơs, gen đơs lah: “Ơ Yàng, bol he pal ngui đào nàng tòmlơh sơl?”

⁵⁰Mơ gơs dô nă cau tòm mpồl bol khai pòng cau dĭ cau gơnoar dờng lam bồ ơn phan duh khoai dê, sreh tac tồr đah ma khai dê.

⁵¹Mơya Yàng Jesu đơs lah: “Neh gơs behơ̆, gen kong tĕ.” Gen Kơnràñ ƀư tồr khai mơ sơmbòi khai in.

⁵²Chòp Kơnràñ đơs mơ ală cau gơnoar lam bồ ơn phan duh khoai, ală cau kwang ling sền gàr hìu duh khoai mơ ală cau kwang kra neh lòt tus nàng kup Kơnràñ lah: “Bol mê at đào mơ gai tus kup Añ be kup cau phà kơñau ơ?

⁵³Kòp ngai Añ ơm mơ bol mê tòm hìu duh khoai, mơ bol mê ò ai tê nàng kup Añ. Mơya do la jơ bol mê dê mơ gơnoar bơta klam jơngo dê.”

⁵⁴Bol khai kup Kơnràñ, lam tus hơ hìu cau gơnoar dờng lam bồ ơn phan duh khoai. Pier lòt jat Kơnràñ ngài ngài.

⁵⁵Bol khai sing ồs digùl ƀlàng mơ nggui bal; Pier kung nggui bal mơ bol khai sơl.

⁵⁶Dô nă cau dĭ ùr ne gŏ Pier nggui di gah, gen sền đal di khai mơ đơs lah: “Cau do kung ơm bal mơ cau hơ̆ sơl.”

⁵⁷Mơya Pier pơndang lah: “Ơ cau ùr gen, añ ò git cau hơ̆.”

⁵⁸Dô êt tơnơ̆ gơs cau ndai gŏ Pier, gen đơs lah: “Mê kung bal mơ mpồl hơ̆.” Pier đơs lah: “Ơ cau gen, ò di behơ̆ ò.”

⁵⁹Pơgap dô jơ tơnơ̆ gen gơs cau ndai đơs nền lah: “Ngan, cau do kung ơm bal mơ cau hơ̆, bơh khai la cau Galile.”

⁶⁰Mơya Pier đơs lah: “Ơ cau gen, añ ò git ñchi mê đơs.” Tòm tŭ Pier gam đơs gen iar nrau mo.

⁶¹Yàng wơlke sền Pier. Pier kah wơl jơnau đơs Yàng dê, mbe Kơnràñ neh đơs mơ khai lah: “Ngai do lài mơ tŭ iar òhềt nrau, gen mê rơp pơndang pe dơ̆ lah mê ò git Añ.”

⁶²Gen khai lik lòt, ñìm rac ròc pơt wòl.

⁶³Ală cau sền gàr Yàng Jesu dơñŏ tơnhial, pù lơh Kơnràñ,

⁶⁴Pùt dơp mat Yàng, gen lùp lah: “Đơs hwơr tĕ! Ñcau neh pù lơh mê taih?”

⁶⁵Bol hơ̆ ai oă jơnau ndai nàng dơñŏ tơnhial di Kơnràñ.

⁶⁶Rìng àng, ală cau kwang kra tòm làng bol, ală cau gơnoar lam bồ ơn phan duh khoai mơ ală cau bơto bơta boh lam pơjum bal, cèng Yàng Jesu mut tòm Mpồl Kwang Tơrña bol khai dê,

⁶⁷Bol khai lùp lah: “Dilah mê la Bơtau Krist, yal tĕ bol hi in.” Kơnràñ ho lah: “Dilah Añ yal, gen ngan ală ồng ò dòn;

⁶⁸Mơ dilah Añ lùp, gen ală ồng ò ho.

⁶⁹Mơya bơh do jơl hìng nau Kòn mơnus rơp nggui đah ma gơnap gơnoar Yàng Tom Trồ dê.”

⁷⁰Tơl nă cau lùp lah: “Behơ̆ mê la Kòn Yàng Tom Trồ ơ?” Kơnràñ ho lah: “Să tòm ală ồng neh đơs behơ̆.”

⁷¹Gen bol khai đơs lah: “Bol he pal gơs cơng tàng lơi tai ơ? Bol he ò càng cơng tàng lơi tai ò, bơh bol he neh kơno bơh di bơr khai rau.”