Read koho Luka 23 Bible Online

Luka 23 - koho bible

Luka 23

¹Chòp bol hơ̆ ntào, cèng Kơnràñ tus di đap Pilat.

²Bol khai yă Kơnràñ lah: “Bol hi neh gŏ cau chồl bơtrut làng bol hi dê, bơkơŭ boh dia Sesa in, mơ khai sơnđan is să khai la Krist la Bơtau.”

³Pilat lùp Kơnràñ lah: “Mê ngan la Bơtau làng bol Juda dê sơl?” Yàng Jesu ho lah: “Să tòm ồng đơs behơ̆.”

⁴Gen Pilat đơs mơ ală cau gơnoar dờng lam bồ ơn phan duh khoai mơ mpồl làng bol lah: “Añ ò gŏ cau do gơs glài lơi ò.”

⁵Mơya bol khai đơs nền cê lah: “Cau do chồl bơtrut làng bol, bơto sồr làm Jude, sơntòm bơh Galile tus tềng do.”

⁶Pilat kơno jơnau hơ̆, gen lùp cau do la cau Galile hala ò.

⁷Dơ̆ neh git Kơnràñ ơm hơđơm gơnoar at bồ Herôt dê, gen Pilat sồr lam Kơnràñ tus hơ Herôt, bơh Herôt kung ơm tòm Jerusalem tòm ală ngai hơ̆.

⁸Dơ̆ Herôt gŏ Yàng Jesu gen chò hòp ngan, bơh neh jŏ rau khai kòñ tìp Kơnràñ tài bơh neh kơno bơh Kơnràñ, mơ kơp kòñ sền gŏ Kơnràñ lơh tềl krơi lơi.

⁹Khai lùp Kơnràñ oă jơnau, mơya Kơnràñ ò ho dô jơnau lơi.

¹⁰Ală cau gơnoar lam bồ ơn phan duh khoai mơ ală cau bơto bơta boh lam ntào mơ yă Kơnràñ oă ngan.

¹¹Herôt mơ mpồl ling khai dê sền òsơp mơ dơñŏ tơnhial di Kơnràñ, tơnsoh ào bơnga gơcrà Kơnràñ in, gen sồr cèng wơl Kơnràñ hơ Pilat.

¹²Bơh lài Pilat mơ Herôt gơtòmsò bal, mơya tòm ngai hơ̆ bol khai gơlik gơs gơtòmsòr bal.

¹³Pilat hòi tơrgòm ală cau gơnoar lam bồ ơn phan duh khoai, ală kwang bàng mơ làng bol pơjum wơl,

¹⁴mơ đơs lah: “Bol mê neh cèng jào cau do añ in, yă khai chồl bơtrut làng bol do, añ neh sền sơwì khai di đap bol mê, mơya ò gŏ khai gơs glài lơi tòm ală bơta bol mê neh yă.

¹⁵Herôt kung sền gŏ behơ̆ sơl, gen neh sồr cèng khai hơ bol he. Ngan khai ò lơh bơta lơi di pal chơt ò.

¹⁶Behơ̆ gen añ rơp pù tơmàl mơ hồ khai lòt.” [

¹⁷Bơh tus di bơta pơjum sa gen cau kwang pal hồ dô nă cau ơm jàm làng bol in.]

¹⁸Mơya bol khai hòi driau dờng lah: “Tơnchơt tĕ cau do, mơ hồ Baraba bol hi in.”

¹⁹Baraba do kòl jàm tài bơh phà kơñau tòm ƀòn dờng mơ tơnchơt cau.

²⁰Pilat kòñ hồ Yàng Jesu gen đơs tai mơ làng bol.

²¹Mơya bol khai hòi driau dờng lah: “Pơng tĕ khai di chi pơng! Pơng tĕ khai di chi pơng!”

²²Pilat đơs tai tòm dơ̆ pe lah: “Ñchi bơta iơh cau do neh lơh taih? Añ ò gŏ kai lơi cau do pal chơt. Añ rơp pù tơmàl mơ hồ khai lòt.”

²³Mơya bol khai sơlo hòi driau dờng dan pơng Kơnràñ di chi pơng, mơ jơnau driau dờng bol khai geh pha.

²⁴Behơ̆ Pilat lơh nền jat be bol khai dan.

²⁵Khai hồ cau ơm jàm bơh neh lơh nggồr nggàc mơ tơnchơt cau, la cau mơ bol khai neh dan, gen jào Yàng Jesu bol khai in jat nùs bol khai kòñ.

²⁶Tòm tŭ bol khai cèng Yàng Jesu lòt, gen kup dô nă cau Siren sơnđan la Simôn, rê mut tòm ƀòn dờng, tơntui chi pơng hơđang khai, sồr lòt jat tơnơ̆ Kơnràñ.

²⁷Gơs mpồl làng bol oă lòt jat Kơnràñ; tòm hơ̆ gơs ală cau ùr tur ntơh ñìm rac bơh Kơnràñ.

²⁸Mơya Yàng Jesu wơlke mơ đơs mơ bol khai lah: “Ơ ală kòn ùr Jerusalem dê, bañ ñìm bơh Añ, mơya ñìm tĕ bơh să tòm bol ai mơ bơh ală kòn sau bol ai dê.

²⁹Bơh ală ngai rơp tus tòm tŭ cau đơs lah: ‘Lơngai ală cau ùr kơnền in, hìu kòn ò deh mơ toh ò tơmpô!’

³⁰Tŭ hơ̆ cau rơp đơs mơ mơnơm lah: ‘Rlơm tĕ hơđang bol hi,’ đơs mơ dòr lah: ‘Bồr tĕ bol hi!’

³¹Bơh dilah cau neh lơh bơta hơ̆ di chi ris, gen di chi ro mbe gơlơh taih?”

³²Kung gơs bàr nă cau ndai la cau glài, kòl cèng bal mơ Kơnràñ nàng kong tơnchơt.

³³Dơ̆ neh tus hơ dô bă tiah sơnđan la Dòr Ntìng Bồ, gen bol khai pơng Kơnràñ di chi pơng, bal mơ bàr nă cau glài hơ̆, dô nă đah ma, dô nă đah kiau.

³⁴Yàng Jesu đơs lah: “Ơ Bèp, dan toh glài bol khai in, bơh bol khai ò git bơta bol khai lơh.” Chòp bol khai tă khà nàng tòmpà ồi ào Kơnràñ dê.

³⁵Làng bol ntào sền, ai ală cau kwang dơñŏ tơnhial di Kơnràñ lah: “Khai neh dong klàs cau ndai; dilah khai la Bơtau Krist Yàng Tom Trồ neh sac rwah, gen dong klàs tĕ să he!”

³⁶Mpồl ling kung dơñŏ tơnhial lòt tus ai dà sràt Kơnràñ in hùc,

³⁷Mơ đơs lah: “Dilah mê la Bơtau làng bol Juda, gen dong is tĕ să mê.”

³⁸Hơđang Kơnràñ gơs jơnau cih lah: DO LA BƠTAU LÀNG BOL JUDA.

³⁹Tòm bàr nă cau glài kong yồng, dô nă dơñŏ tơnhial di Kơnràñ lah: “Mê ò di la Bơtau Krist ơ? Dong klàs tĕ să tòm mê mơ bol hi sơl.”

⁴⁰Mơya cau ne lah pơrhơng khai lah: “Mê kung kong bal dô bơta lơh glài mơ mê ò rngòt di Yàng Tom Trồ ơ?

⁴¹Bol he kong be do la song ngan, bơh he kong sal wơl tòm toh be broă he lơh, mơya cau do ò lơh dô bơta lơi tìs ò.”

⁴²Gen khai đơs lah: “Ơ Yàng Jesu, tŭ Kơnràñ tus tòm lơgar Kơnràñ, dan kah tĕ añ.”

⁴³Kơnràñ đơs mơ khai lah: “Di ngan Añ đơs mơ mê, ngai do mê rơp ơm bal mơ Añ tòm lơgar Paradis.”

⁴⁴Tŭ hơ̆ pơgap di jơt bàr jơ ngai, làm lơgar gơs klam jơngo cik jơl tus di pe jơ mho,

⁴⁵Mattơngai klam jơngo, bài kơrnìng tòm hìu duh khoai gơcrè digùl.

⁴⁶Gen Yàng Jesu hòi driau dờng mơ lah: “Ơ Bèp, Añ jào hwềng tòm tê Bèp.” Kơnràñ đơs sir rau gen tac nhơm.

⁴⁷Cau at dô rhiang ling gŏ bơta neh gơlik gơs, gen jòng ro Yàng Tom Trồ mơ đơs lah: “Do ngan la cau song ring.”

⁴⁸Jơh mpồl làng bol pơjum nàng sền bơta hơ̆, gŏ bơta neh gơlik gơs rau, gen tur ntơh he mơ rê hìu.

⁴⁹Jơh ală cau mòng git Yàng Jesu mơ ală cau ùr jat Kơnràñ bơh Galile, ơm ngài ngài mơ sền gŏ ală bơta hơ̆.

⁵⁰Gơs dô nă cau sơnđan la Jôsep, la cau tòm mpồl kwang tơrña, la cau lơbơn niam mơ song ring,

⁵¹khai ơm tòm Arimathe, ƀòn dờng gơrê bal mơ làng bol Juda. Khai kơp gơn lơgar Yàng Tom Trồ, ò dô nùs bal tòm bơta lơh nền mơ broă lơh bol hơ̆ dê.

⁵²Khai lòt tus hơ Pilat mơ dan ƀồc Yàng Jesu dê.

⁵³Khai tă tơmù ƀồc, ai bài che dơmài lơbơn nàng pò, gen ơn Kơnràñ tòm bơtô neh phàt tòm lŭ, la bơtô òhềt tơp cau lơi.

⁵⁴Tŭ hơ̆ la ngai Rcang Lài, mơ mòr tus di ngai Saƀat.

⁵⁵Ală cau ùr neh tus bal mơ Kơnràñ bơh Galile lòt jat bơh tơnơ̆, nàng sền bơtô mơ ƀồc Kơnràñ dê ơn mbe lơi,

⁵⁶Gen rê wơl, rcang ală sơnơm ƀô mơ mơñà ƀô bơlhu. Di di ngai Saƀat bol khai ơm rlô jat be bơta sồr lam.