Read koho Luka 24 Bible Online

Luka 24 - koho bible

Luka 24

¹Ngai sơnròp tòm dô poh tŭ trồ rìng àng, ală cau ùr hơ̆ cèng sơnơm ƀô bơlhu neh rcang sir mơ lòt tus hơ bơtô ƀồc.

²Bol khai gŏ pơnai lŭ neh gơpơrlă bơh di mpồng bơtô,

⁴Tòm tŭ bol khai ơm pin wil wơl bơh bơta hơ̆, nisơna gơs bàr nă cau klau ntào di gah bol khai, soh ào àng gơcrà.

⁵Bol khai nrơt rngòt ngan, drup mat di ù, gen bàr nă cau hơ̆ đơs mơ bol khai lah: “Ñchi bơh tài bol ai jòi cau kis digùl cau chơt taih?

⁶Kơnràñ ò ơm tềng do ò, mơya neh kis wơl rau. Kah wơl tĕ mbe Kơnràñ neh đơs mơ bol ai tòm tŭ gam ơm tòm Galile,

⁷mơ lah: ‘Kòn Mơnus pal kong jào tòm tê cau glài, kong pơng di chi pơng, tus di ngai pe gen kis wơl.’”

⁸Gen bol khai kah wơl jơnau Kơnràñ neh đơs.

⁹Lồc behơ̆, bol khai rê bơh bơtô ƀồc, yal ală bơta hơ̆ mơ jơt dùl nă cau bơtê mơ ală cau ndai.

¹⁰Cau neh yal ală bơta hơ̆ ală cau gơnoar bơto dờng in la Mari Madơlen, Jannơ, Mari mè Jakơ, bal mơ ală cau ùr ndai lòt bal mơ bol khai.

¹¹Mơya ală jơnau hơ̆ gơlơh be jơnau đơs kơnhơl bol khai in, gen tàng bol khai ò dòn.

¹²Bulah behơ̆, Pier ñă ntào, ntoat tus hơ bơtô ƀồc, kun tơmềt sền tòm dơlam, gŏ mìng bài che dơmài lơbơn ơm is dô bă, gen rê hìu, ai lơh krơi bơh broă neh gơlik gơs.

¹³Kung tòm ngai hơ̆, gơs bàr nă cau bơtê lòt tus hơ ƀòn ne sơnđan la Emmaus, ngài bơh Jerusalem jơt dùl kơsồ.

¹⁴Bol khai tòmbơhbơr bal bơh ală bơta neh gơlik gơs.

¹⁵Tòm tŭ bol khai tòmbơhbơr mơ bơyai bal, gen să tòm Yàng Jesu tus rềp, lòt bal mơ bol khai.

¹⁶Mơya mat bol khai gơkìng ò đal git Kơnràñ.

¹⁷Kơnràñ đơs mơ bol khai lah: “Bol mê tòmbơhbơr bal bơh bơta lơi tòm tŭ lòt gùng taih?” Bol khai dơh wơl, muh mat moat jrùng ngan.

¹⁸Tòm bàr nă bol khai, dô nă sơnđan la Kleôpa đơs mơ Kơnràñ lah: “Ngan mìng dô nă ồng la cau nac crih tòm Jerusalem mơ ò git broă neh gơlik gơs tềng hơ̆ tòm ală ngai do ơ?”

¹⁹Kơnràñ lùp lah: “Ñchi broă taih?” Bol khai ho lah: “Broă gơtơntus di Yàng Jesu Cau Nasaret, la dô nă cau gơnoar hwơr gơs gơnoar pràn tòm broă lơh mơ jơnau đơs di đap Yàng Tom Trồ mơ làng bol sơl;

²⁰mbe lơi ală cau gơnoar lam bồ ơn phan duh khoai mơ ală cau kwang bàng bol he dê neh jào Kơnràñ nàng lơh nền glài tơnchơt mơ neh pơng di chi pơng.

²¹Mơya bol hi neh kơp kòñ să tòm Kơnràñ rơp dong tă làng bol Israel. Bulah behơ̆, mơya broă hơ̆ neh gơlik gơs pe ngai do rau.

²²Mơ tai, gơs ală cau ùr tòm mpồl bol hi neh lơh bol hi in nrơt nrơl, bơh tòm rìng àng bol khai lòt tus hơ bơtô ƀồc,

²³mơya ò gŏ ƀồc Kơnràñ, gen rê yal lah bol khai kung neh gŏ cau gơnrơh tơlik mat, đơs lah Kơnràñ neh kis wơl.

²⁴Gơs dô êt nă tòm mpồl bol hi tus hơ bơtô ƀồc, gŏ ngan be ală cau ùr hơ̆ neh đơs, ai Kơnràñ gen bol khai ò gŏ.”

²⁵Tŭ hơ̆ Yàng Jesu đơs lah: “Ơ cau bơrngơl gơla, gơs nùs òbat dòn jơh ală jơnau cau gơnoar hwơr neh đơs.

²⁶Ò di Bơtau Krist pal kong ală bơta bòl glar behơ̆, gen sồng mut tòm bơta gơklŏ Kơnràñ dê ò ơ?”

²⁷Chòp Kơnràñ sơntòm bơh Môise tus di ală cau gơnoar hwơr mơ yal tơlik loh bol khai in ală bơta sơnio bơh Kơnràñ tòm làm jơh Sră Goh.

²⁸Dơ̆ mòr tus hơ ƀòn bol khai kòñ lòt, gen Kơnràñ lơh be kòñ lòt tai,

²⁹mơya bol khai jà bơklơn Kơnràñ lah: “Dan ơm wơl mơ bol hi, bơh trồ neh mho, mòr mang rau.” Gen Kơnràñ mut ơm bal mơ bol khai.

³⁰Tòm tŭ Kơnràñ nggui di cơnòng sa bal mơ bol khai, gen Kơnràñ ai piang lă, ai lơngai, dơrkă mơ tong bol khai in.

³¹Tŭ hơ̆ mat bol khai gơ pò loh mơ đal git Kơnràñ, mơya Kơnràñ nisơna roh thit bơh di bol khai.

³²Bol khai đơs bal lah: “Tòm tŭ lòt rò gùng nti, Kơnràñ tòmbơhbơr mơ bol he mơ yal tơlik loh Sră Goh bol he in, nùs bol he ò duh hul ơ?”

³³Tòm jơ hơ̆ mo, chòp bol khai ñă ntào, rê wơl hơ Jerusalem, tìp jơt dùl nă cau gơnoar bơto dờng ơm pơjum bal mơ ală cau ơm bal mơ bol khai,

³⁴gen đơs lah: “Ngan Yàng neh kis wơl, mơ neh tơlik mat mơ Simôn.”

³⁵Gen bàr nă bol khai yal wơl bơta neh gơlik gơs tòm tŭ lòt gùng, mơ mbe lơi bol khai neh đal git Kơnràñ tòm tŭ Kơnràñ dơrkă piang lă.

³⁶Tòm tŭ bol khai gam đơs ală bơta hơ̆, să tòm Yàng Jesu ntào digùl bol khai mơ đơs lah: “Lơngap lơngai bol mê in.”

³⁷Mơya bol khai nrơt să mơ rngòt rngơt bơh tồnlah gŏ hwềng.

³⁸Kơnràñ đơs lah: “Ñchi bơh tài bol mê dơrcul, mơ ñchi bơh tài tòm nùs bol mê pin wil wơl behơ̆ taih?

³⁹Sền tĕ tê Añ mơ jơng Añ, ngan la să tòm Añ. Ƀư tĕ di Añ mơ sền, bơh hwềng gen ò gơs poac mơ ntìng be bol mê gŏ Añ gơs do.”

⁴⁰Neh đơs rau, gen Kơnràñ sơnio bol khai in sền tê mơ jơng Kơnràñ dê.

⁴¹Tòm tŭ bol khai òhềt dòn tài bơh hòn chò ngan, mơ ai lơh krơi, gen Kơnràñ đơs lah: “Tềng do bol mê gơs phan sa sơl?”

⁴²Bol khai ai Kơnràñ in dô gơl ka buh.

⁴³Kơnràñ dòp mơ sa di đap bol khai.

⁴⁴Mơ Kơnràñ đơs mơ bol khai lah: “Do la jơnau Añ neh đơs mơ bol mê tòm tŭ Añ gam ơm bal mơ bol mê, mbe lơi ală bơta neh cih bơh Añ tòm sră boh lam Môise dê, tòm sră ală cau gơnoar hwơr mơ tòm Sră Đơs crih pal gơlik gơs di ngan.”

⁴⁵Gen Kơnràñ pò dơngoh kơlôi bol khai dê nàng git wă Sră Goh,

⁴⁶mơ đơs mơ bol khai lah: “Gơs jơnau cih lah Bơtau Krist pal kong bòl glar, mơ tòm ngai pe kis wơl bơh bơta chơt,

⁴⁷mơ cau pal ai sơnđan Kơnràñ mơ bơto yal bơta gơjrañ sang glài mơ bơta toh glài jơh ală làng bol in, rơp sơntòm bơh Jerusalem.

⁴⁸Bol mê la ală cau lơh cơng bơh ală bơta hơ̆.

⁴⁹Mơ do, Añ sồr Bơtau mơ Bèp neh ho mù hơđang bol mê; ai bol mê kư̆ ơm tĕ tòm Jerusalem jơl tus di tŭ neh dòp soh gơnap gơnoar bơh đang jòng.”

⁵⁰Gen Kơnràñ lam bol khai lòt tus di ƀòn Bethani, pò tê ai lơngai bol khai in.

⁵¹Tòm tŭ Kơnràñ gam ai lơngai, gen Kơnràñ lòi bol khai mơ geh cèng guh rê hơ trồ.

⁵²Bol khai duh khoai Kơnràñ, gen rê hơ Jerusalem hòn chò ò git lơh,

⁵³kư̆ ơm sùm tòm hìu duh khoai jòng ro Yàng Tom Trồ.