Read koho Luka 5 Bible Online

Luka 5 - koho bible

Luka 5

¹Tòm tŭ Yàng Jesu ơm ntào di gah tơnau dờng Genesaret, mpồl làng bol ntềt di Kơnràñ nàng iat jơnau Yàng Tom Trồ.

²Kơnràñ gŏ bàr nơm ơhò dơh di gah tơnau dờng, cau dang bơtơng ka neh lik bơh di ơhò, ơm rào bơtơng.

³Kơnràñ mut dô nơm tòm bàr nơm ơhò hơ̆, la ơhò Simôn dê, dan khai wàs ngài dô êt bơh di gah, gen Kơnràñ nggui tòm ơhò nàng bơto sồr mpồl làng bol.

⁴Dơ̆ neh sir bơto sồr rau, gen Kơnràñ sồr Simôn lah: “Wàs tĕ hơ tiah jrô, dang bơtơng nàng kup ka.”

⁵Simôn đơs lah: “Ơ Kơnràñ, bol hi neh lơh broă bòl glar mang àng tơn, mơya ò geh dô nơm ka lơi! Bulah behơ̆, jat jơnau Kơnràñ añ rơp dang bơtơng tai.”

⁶Dang bơtơng rau, bol khai tơrgòm geh ka oă ngan, tian gơs gơrŭi bơtơng.

⁷Gen bol khai kwài tê hòi oh mi bơyô lơh broă bal tòm ơhò ne lòt tus nàng dong kòl. Bol hơ̆ tus, pơdiang ka bềng bàr nơm ơhò, tian gơs ơhò mòr gơkram.

⁸Simôn Pier gŏ behơ̆, gen cùn gơltang di đap Yàng Jesu mơ đơs lah: “Ơ Yàng, dan lik tĕ bơh di añ, bơh añ la cau glài.”

⁹Bơh khai mơ jơh ală cau ơm mơ khai ai lơh crih crài oă ngan bơh bơta kup ka do,

¹⁰Jakơ mơ Jang, bàr nă kòn Sebede la oh mi bơyô lơh broă bal mơ Simôn kung behơ̆ sơl. Yàng Jesu đơs mơ Simôn lah: “Bañ rngòt, bơh do mê rơp dang bơtơng cau.”

¹¹Bol khai cèng ơhò tus di gah, gen lòi jơh ală bơta mơ jat Kơnràñ.

¹²Tòm tŭ Yàng Jesu ơm tòm ƀòn dờng ne, gơs dô nă cau dun làm să, gŏ Kơnràñ gen tơmbic să mơ rac dan lah: “Ơ Yàng, dilah Kơnràñ kòñ, gen rgơi lơh añ in gơs goh.”

¹³Gen Kơnràñ ai tê ƀư di khai mơ đơs lah: “Añ kòñ, goh tĕ. Gen dun roh thit mo.”

¹⁴Kơnràñ sồr khai lah: “Bañ yal mơ cau lơi, mơya lòt tĕ sơnio să mơ cau gơnoar ơn phan duh khoai; bơh mê neh geh goh, gen ơn tĕ phan be Môise neh sồr, nàng lơh cơng bol khai in.”

¹⁵Sơnđan Kơnràñ sơlo ngai sơlo tiơng pơnro, gơs mpồl làng bol oă pơjum nàng iat mơ geh sơmbòi ală bơta kòp jê bol khai dê.

¹⁶Mơya Kơnràñ pleh is hơ tiah ngềt ngơt nàng hòi dan.

¹⁷Dô ngai ne, Yàng Jesu ơm bơto sồr, gơs ală cau Pharisi mơ cau bơto bơta boh lam bơh kòp nơm ƀòn tòm Galile, Jude mơ Jerusalem lòt tus nggui di gah hơ̆, gơnap gơnoar Yàng dê ơm bal mơ Kơnràñ nàng sơmbòi kòp jê.

¹⁸Do gơs cau tùng dô nă cau gơlte bic hơđang cơnòng, jòi gùng nàng cèng tơmut ơn di đap Kơnràñ.

¹⁹Tài bơh mpồl làng bol gal ir jòi ò gơs gùng nàng cèng tơmut khai, gen bol khai hào hơđang rkàng hìu, pò rkàng mơ kiă mơ tơmù khai bal mơ cơnòng digùl ală cau, song di đap Yàng Jesu.

²⁰Kơnràñ gŏ bơta dòn bol khai dê, gen đơs lah: “Ơ kòn, tồi glài kòn dê neh geh toh.”

²¹Ală cau bơto bơta boh lam mơ ală cau Pharisi bơyai bal lah: “Cau do la ñcau mơ khin đơs tràl sơrbil behơ̆ taih? Rlau mơ Yàng Tom Trồ, ñcau rgơi toh glài taih?”

²²Mơya Yàng Jesu git bơta bơyai bal bol khai dê, gen lùp lah: “Ñchi bơta bol mê bơyai bal tòm nùs taih?

²³Tòm bàr jơnau đơs: ‘Tồi glài mê neh geh toh,’ hala ‘Ñă ntào tĕ mơ lòt,’ jơnau lơi la ƀuơn rlau taih?

²⁴Mơya tồ bol mê in git lah Kòn Mơnus gơs gơnoar toh glài hơđang ù”, gen Kơnràñ đơs mơ cau gơlte lah: “Añ sồr mê, ñă ntào tĕ, at cơnòng mơ rê hìu mê.”

²⁵Khai ñă ntào mo di đap bol hơ̆, at cơnòng mơ rê hìu, jòng ro Yàng Tom Trồ.

²⁶Jơh tơl nă cau ai lơh crih crài mơ jòng ro Yàng Tom Trồ, bềng bơta rngòt rngơt mơ đơs lah: “Ngai do bol he gŏ ală bơta krơi is ngan.”

²⁷Tơnơ̆ mơ hơ̆, Yàng Jesu lik lòt, gŏ dô nă cau dar dia sơnđan la Lebi nggui tòm tiah boh dia, gen sồr khai lah: “Jat tĕ Añ.”

²⁸Khai sang jơh ală bơta, ñă ntào mơ jat Kơnràñ.

²⁹Lebi yò sa dờng Kơnràñ in tòm hìu khai, gơs oă cau dar dia mơ cau ndai nggui sa bal mơ bol khai.

³⁰Ală cau Pharisi mơ ală cau bơto bơta boh lam yoam ală cau bơtê Kơnràñ lah: “Ñchi bơh tài bol mê ñô sa bal mơ ală cau dar dia mơ cau glài taih?”

³¹Yàng Jesu đơs mơ bol khai lah: “Cau pràn kơldang ò càng cau gơnoar sơnơm ò, mơya la cau kòp jê.

³²Añ tus ò di nàng hòi cau song ring, mơya nàng hòi cau glài gơjrañ sang glài.”

³³Bol khai đơs mơ Kơnràñ lah: “Ală cau bơtê Jang dê òs ơt sa mơ hòi dan, ală cau bơtê cau Pharisi kung behơ̆ sơl, ai ală cau bơtê ồng dê mìng git sa mơ ñô lơm.”

³⁴Kơnràñ ho mơ bol khai lah: “Bol mê rgơi bơklơn ală cau nac tus ñô sa tòmbau ơt sa tòm tŭ cau bơrtơu gam ơm bal mơ bol khai ơ?

³⁵Mơya ală ngai tơnơ̆ hơ̆ la tŭ cau tă bơrtơu lik bơh di bol khai, gen tŭ hơ̆ sồng bol khai ơt sa.”

³⁶Kơnràñ đơs tai mơ bol khai dô jơnau pơnyơu lah: “Ò gơs cau lơi crè dô pet ào pa mơ tơmbồl di ào klar; dilah lơh behơ̆ gen sèt ào pa, mơ pet pa kung ò gơròm bal mơ ào yau.

³⁷Kung ò gơs cau tròc tơrnòm pa tòm nhồng gơltau yau; dilah lơh behơ̆ gen tơrnòm pa lơh bơcah nhồng, tơrnòm hòr jơh mơ nhồng kung roh sơl.

³⁸Mơya tơrnòm pa pal tròc tòm nhồng gơltau pa.

³⁹Kung ò gơs cau lơi ñô tơrnòm yau mơ gam kòñ tơrnòm pa, bơh khai đơs lah: ‘Tơrnòm yau bơkah rlau.’”