Read koho Luka 7 Bible Online

Luka 7 - koho bible

Luka 7

¹Dơ̆ Yàng Jesu đơs jơh ală jơnau hơ̆ làng bol in iat rau, gen Kơnràñ mut tòm Kapenaum.

²Gơs dô nă cau dĭ gơna kòñ gơboh cau at dô rhiang ling dê kòp mòr chơt.

³Dơ̆ khai kơno pơnro bơh Yàng Jesu, gen sồr ală cau kwang kra làng bol Juda dê lòt dan mơ Kơnràñ tus sơmbòi cau dĭ gơna khai in.

⁴Tŭ bol khai tus hơ Yàng Jesu, gen dan rac ròc lah: “Cau kwang hơ̆ la di pal nàng ồng in dong kòl,

⁵bơh khai kòñ gơboh di làng bol he dê, mơ să tòm khai neh bơt bơtào hìu jum bol he in.”

⁶Gen Yàng Jesu lòt bal mơ bol khai. Tòm tŭ ò ngài bơh hìu, cau at dô rhiang ling sồr oh mi bơyô lòt kơp Kơnràñ mơ đơs lah: “Ơ Yàng, añ ò khin lơh pơnjê Kơnràñ, bơh añ ò di pal nàng Kơnràñ mut tòm hìu añ,

⁷gen tàng añ kung kơlôi lah să tòm añ ò di pal nàng tus hơ Kơnràñ. Mơya dan Kơnràñ đơs dô jơnau, gen cau dĭ gơna añ jê rơp geh bòi.

⁸Bơh añ kung ơm hơđơm gơnoar cau ndai dê, kung gơs ală cau ling ơm hơđơm gơnoar añ jê. Añ sồr cau do: ‘Lòt tĕ,’ gen khai lòt; sồr cau ne: ‘Tus tĕ,’ gen khai tus; mơ sồr cau dĭ gơna añ: ‘Lơh tĕ broă do,’ gen khai lơh.”

⁹Yàng Jesu kơno ală jơnau hơ̆, gen ai lơh krơi bơh khai, mơ wơlke đơs mơ mpồl làng bol lòt jat Kơnràñ lah: “Añ đơs mơ bol mê, bulah tòm làng bol Israel Añ kung òhềt gŏ bơta dòn dờng be do.”

¹⁰Ală cau neh geh sồr lòt rê hìu, gŏ cau dĭ gơna neh bòi rau.

¹¹Tơnơ̆ mơ hơ̆ dô êt jŏ, tòm tŭ Yàng Jesu lòt tus hơ ƀòn dờng ne sơnđan la Nain, gơs ală cau bơtê mơ mpồl làng bol oă lòt bal mơ Kơnràñ.

¹²Dơ̆ neh tus rềp di mpồng ƀòn dờng, ne, cau tùng tơlik dô nă cau chơt, la kòn klau dô nă mè khai dê, la ùr bơnrau; gơs oă cau tòm ƀòn dờng lòt bal mơ khai.

¹³Yàng gŏ cau ùr hơ̆ gen gơs nùs nđàc sơngit mơ đơs lah: “Bañ ñìm.”

¹⁴Gen Kơnràñ tus rềp, ƀư di bòng ƀồc, gen ală cau tùng dơh wơl. Mơ Kơnràñ đơs lah: “Ơ cau pơnu, Añ sồr mê guh tĕ.”

¹⁵Chòp cau chơt guh mo mơ sơntòm đơs. Gen Kơnràñ jào khai mè khai in.

¹⁶Jơh tơl nă gơlơh rngòt rngơt, jòng ro Yàng Tom Trồ mơ đơs lah: “Gơs cau gơnoar hwơr dờng tơngguh digùl bol he, mơ Yàng Tom Trồ neh tus còp làng bol Kơnràñ dê.”

¹⁷Jơnau do pơnro làm Jude mơ jơh tiah gùt dar.

¹⁸Ală cau bơtê Jang dê yal jơh ală jơnau hơ̆ khai in.

¹⁹Gen Jang hòi bàr nă cau bơtê khai dê sồr lòt tus hơ Yàng mơ đơs lah: “Ồng la Bơtau pal tus, hala bol hi pal gơn Bơtau ndai taih?”

²⁰Tòm tŭ bàr nă cau bơtê tus hơ Yàng Jesu, gen đơs lah: “Jang Ƀaptis sồr bol hi tus lùp ồng: ‘Ồng la Bơtau pal tus, hala bol hi pal gơn Bơtau ndai taih?’”

²¹Mơ tai, tòm tŭ hơ̆ Yàng Jesu sơmbòi oă cau kòp jê pluh plàng, gơkòl cà lơh, mơ oă cau jơngo geh àng.

²²Kơnràñ ho lah: “Rê tĕ yal Jang in ală bơta bol mê neh gŏ mơ kơno: cau jơngo gơs àng, cau kwet gơlte gơs lòt, cau dun gơs goh, cau tĭ gơs klo, cau chơt gơs kis wơl, mơ cau rƀah lơòi gơs kơno bơto yal Jơnau Niam.

²³Lơngai cau lơi in ò gơtup tìs tài bơh Añ!”

²⁴Dơ̆ ală cau kong sồr Jang dê neh lik lòt rau, Yàng Jesu đơs mơ mpồl làng bol bơh Jang lah: “Ñchi bol mê neh lik sền tòm ƀlàng bràs taih? Sền tòm proh gơs càl tơnwañ ơ?

²⁵Hala ñchi bol mê lik sền taih? Sền cau soh ào bài lơbơn ơ? Ne, ală cau soh ào hàng mơnĕ ryŭ ryơm mơ ngui sa pròng preh gen ơm lơngap lơngai tòm gơlang bơtau.

²⁶Behơ̆ gen ñchi bol mê lik sền taih? Sền cau gơnoar hwơr ơ? Ngan Añ đơs mơ bol mê, kung lin rlau mơ cau gơnoar hwơr tai sơl.

²⁷Bơh cau hơ̆ mơ gơs cih lah: ‘Do, Añ sồr cau kong sồr Añ jê lòt tus di đap mê, La cau rơp wàs gùng lài mê in.’

²⁸Añ đơs mơ bol mê, tòm ală cau deh bơh cau ùr, ò gơs cau lơi dờng rlau mơ Jang; mơya cau dềt rlau jơh tòm lơgar Yàng Tom Trồ la dờng rlau mơ khai.”

²⁹Jơh làng bol bal mơ ală cau dar dia neh gơs ƀaptem Jang dê kơno Kơnràñ đơs gen kòp Yàng Tom Trồ la song ring.

³⁰Mơya ală cau Pharisi mơ ală cau bơto bơta boh lam ò kòñ Jang lơh ƀaptem, gen ò dòp bơta lơh nền Yàng Tom Trồ dê ơn is bol khai in.

³¹“Behơ̆ Añ pơndròm cau rài do mơ ñchi, bol khai dròm be ñcau taih?

³²Bol khai be ală cau kơnòm nggui tòm drà, hòi driau bal lah: ‘Bol hi neh uh kơwào bol mê in, mơya bol mê ò tòmya; bol hi neh pơt wòl mơya bol mê ò ñìm rac.’

³³Bơh Jang Ƀaptis neh tus ò sa piang lă, ò ñô tơrnòm, gen bol mê đơs lah: ‘Khai gơkòl cà lơh.’

³⁴Kòn Mơnus tus sa mơ ñô, gen bol mê đơs lah: ‘Ne khai la cau jròk sa jròk ñô, oh mi bơyô mơ ală cau dar dia mơ ală cau glài!’

³⁵Behơ̆ bơta jak chài geh kòp la song ring kơnòm di kòn sau bơta jak chài dê.”

³⁶Gơs dô nă cau Pharisi jà Yàng Jesu sào bal mơ khai. Gen Kơnràñ mut tòm hìu cau Pharisi hơ̆ mơ nggui sào.

³⁷Ne, gơs dô nă cau ùr tìs glài ơm tòm ƀòn dờng hơ̆, git Kơnràñ ơm nggui sào tòm hìu cau Pharisi, gen cèng dô nơm gri mơ lŭ màng gơs ƀô bơlhu,

³⁸ơm ntào đah ngkòi di jơng Kơnràñ mơ ñìm, dà mat hòr sùh jơng Kơnràñ, gen khai ai sŏ mơ jùt, cum jơng Kơnràñ, mơ bong mơñà ƀô sơl.

³⁹Cau Pharisi neh jà Kơnràñ gŏ behơ̆ gen kơlôi òm lah: “Dilah cau do la cau gơnoar hwơr gen git cau ùr ƀư dê să khai la ñcau mơ la cau mbe lơi, bơh khai la cau glài.”

⁴⁰Yàng Jesu ai jơnau đơs mơ cau Pharisi lah: “Ơ Simôn, Añ gơs jơnau đơs mơ mê.” Khai đơs lah: “Ơ cau Bơto, dan kư̆ đơs.”

⁴¹“Cau tòm ne gơs bàr nă cau kòl dồs; cau do dồs pram rhiang dơnie, cau ne dồs pram jơt.

⁴²Bơh bol khai ò gơs phan lơi nàng tơm dồs, gen cau tòmlòi tơn dồs jơh bàr nă bol khai in. Tòm bàr nă cau hơ̆, ñcau kòñ gơboh di cau tòm rlau taih?”

⁴³Simôn ho lah: “Añ kơlôi la cau geh sang dồs oă rlau.” Kơnràñ đơs lah: “Mê kơlôi hơ̆ la di.”

⁴⁴Gen Kơnràñ wơlke hơ cau ùr, đơs mơ Simôn lah: “Mê gŏ cau ùr do sơl? Añ mut tòm hìu mê, mê ò ai dà rào jơng, mơya khai ai dà mat lơh sùh jơng Añ mơ ai sŏ jùt sơl.

⁴⁵Mê ò cum Añ, mơya bơh di tŭ Añ mut tòm hìu mê gen khai cum jơng Añ ò dơh.

⁴⁶Mê ò bong mơñà di bồ Añ, mơya khai ngui mơñà ƀô bơlhu bong di jơng Añ.

⁴⁷Behơ̆ gen, Añ đơs mơ mê, tồi glài khai gơs oă kung geh toh jơh, bơh khai kòñ gơboh oă; mơya cau geh toh dô êt, gen kòñ gơboh dô êt.”

⁴⁸Kơnràñ đơs mơ cau ùr lah: “Tồi glài ai dê neh geh toh rau.”

⁴⁹Ală cau nggui sào bal mơ Kơnràñ đơs is lah: “Cau do la ñcau mơ gơs gơnoar toh glài taih?”

⁵⁰Mơya Kơnràñ đơs mơ cau ùr lah: “Bơta dòn ai neh dong klàs ai; rê tĕ lơngap lơngai.”