Read koho Yal Wơl 22 Bible Online

Yal Wơl 22 - koho bible

Yal Wơl 22

¹“Dilah bol mê gŏ kơnrồ oh mi he dê lòt lềng làng, bañ sang lòi gơ mơya pal tề cèng gơrê wơl hơ cau tòm gơ dê.

²Dilah cau tòm gơ ò ơm rềp mơ bol mê, hala bol mê ò git khai gen tề cèng gơ tus tòm hìu bol mê mơ sền gàr gơ jơl tus di tŭ khai tus jòi gơ. Gen jào tĕ gơ wơl khai in.

³Bol mê kung pal lơh behơ̆ dilah bol mê bàn alàng gơrê bal mơ oh mi bol mê dê, hala ào jrùh khai dê, hala phan lơi cau gơp ƀòn mê neh lơh roh mơ mê neh bàn, mê bañ lơh be ò git.

⁴Dilah bol mê gŏ alàng hala kơnrồ khai dê gơpừ tòm gùng, bañ sang lòi gơ, mê pal dong tĕ gơ ntào wơl.

⁵Dô nă cau ùr ò di soh ồi ào cau klau, cau klau kung ò di soh phan cau ùr, bơh Jehôwa Yàng Tom Trồ bol mê dê ai lơh cù kìr di cau lơi lơh bơta hơ̆.

⁶Dilah bol mê bàn dô nơm rsòn sềm, gơs sềm me krơm kòn hala krơm ală tap gơ dê, bañ kup sềm mè bal mơ ală sềm kòn.

⁷Bol mê rgơi kup ală sềm kòn mơya lơh nền tĕ lah bañ kup sềm mè tồ ală bơta gơlik gơs niam bol mê in mơ bol mê rgơi geh kis jŏ jòng.

⁸Tòm tŭ bol mê bơt bơtào dô nơm hìu pa, lơh tĕ rơng hìu gùt dar rkàng hìu bol mê dê tồ bol mê ò cèng tus bơta gơkòl glài bơh lơh gơtuh mhàm hơđang hìu bol mê dê, dilah gơs cau lơi dùh bơh hơđang rkàng hìu.

⁹Bañ tam bàr jơi gar sơntìl tòm suơn ño bol mê dê; dilah bol mê tam behơ̆ gen ò di mìng ală phan bol mê toès geh bơh phan neh tam lơm, mơya plai đo suơn ño gơ dê rơp gơrê hơ tiah sàng goh.

¹⁰Bañ lơòr sre mơ dô nơm kơnrồ mơ dô nơm alàng tui bal dô nơm yô.

¹¹Bañ soh ồi ào mơ sơnò belàt tàñ bal mơ che brài.

¹²Kơt tĕ ală mbrùi tiang ào di poan mum ào jrùh bol mê soh.”

¹³“Dilah dô nă cau klau gơs bau ùr mơ tơnơ̆ mơ tŭ neh ơm mơ khai rau gen ò gơboh di khai tai,

¹⁴đơs ò niam bơh khai mơ lơh sơnđan khai in gơlik ƀơ̆ iơh, mơ đơs lah: ‘Añ neh bau mơ cau ùr do, mơya tòm tŭ añ bic mơ khai, añ ò jòi bàn cơng tàng khai la cau gam ơruh,’

¹⁵gen mè bèp cau ùr rơp ràng tơlik cơng tàng bơh khai la cau gam ơruh, ală cau kwang kra ƀòn dờng in di mpồng ƀòn dờng.

¹⁶Bèp cau ùr hơ̆ rơp đơs mơ ală cau kwang kra lah: ‘Añ neh ai kòn ùr añ jê tòmbau mơ cau klau do, mơya cau klau do ò gơboh di kòn ùr añ.

¹⁷Tŭ do khai đơs iơh di kòn ùr añ mơ đơs lah: “Añ ò gŏ kòn ùr ồng dê gam ơruh.” Mơya do la cơng tàng bơh kòn ùr añ jê gam ơruh.’ Lồc behơ̆ mè bèp cau ùr hơ̆ rơp ràng tơlik ồi ào kòn ùr khai dê di đap ală cau kwang kra ƀòn dờng dê,

¹⁸mơ ală cau kwang kra ƀòn dờng rơp kup cau klau hơ̆ mơ lơh glài khai.

¹⁹Bol khai rơp lơh glài cau klau hơ̆ dô rhiang sieklơ priă mơ ai priă hơ̆ bèp cau ùr hơ̆ in, tài bơh cau klau hơ̆ neh đơs iơh sơnđan dô nă cau ơruh Israel dê. Cau ùr hơ̆ rơp gam la bau ùr cau klau hơ̆ dê; khai ò di sang lòi bau ùr khai dê tòm ală tŭ tơngai khai gam kis.

²⁰Bulah behơ̆, dilah bơta yă hơ̆ la ngan mơ ò gŏ jòi bàn cơng tàng bơh cau ùr hơ̆ gam ơruh,

²¹gen pal lam khai tus di mpồng hìu bèp khai dê mơ tềng hơ̆ ală cau klau ƀòn dờng khai dê rơp cơm lŭ tơnchơt khai. Khai neh lơh dô bơta ƀàssìl ƀàsso tòm Israel bơh neh tìs glài rềs àr tòm tŭ khai gam ơm tòm hìu bèp khai dê. Bol mê pal tă sang bơta iơh bơsak bơh digùl Israel.

²²Dilah dô nă cau klau gơkòl cau kup tòm tŭ bic mơ bau ùr cau ndai di, gen bàr nă cau ùr mơ cau klau hơ̆ pal chơt. Behơ̆ bol mê rơp tă sang bơta iơh bơsak bơh Israel.

²³Tòm tŭ dô nă kòn ơruh òhềt ròm mơ cau klau lơi mơ neh ho bau mơ dô nă cau, mơ gơs dô nă cau ndai tìp khai tòm gùng ƀòn dờng mơ bic mơ khai.

²⁴Gen bol mê rơp cèng bàr nă bol khai tus hơ mpồng dờng ƀòn dê mơ cơm lŭ tơnchơt bol khai; cau ơruh tài bơh khai ò driau dờng hòi cau dong kòl, mơ cau klau tài bơh khai neh lơh iơh di bau ùr dô nă cau ndai dê. Bol mê pal tă sang bơta iơh bơsak bơh digùl bol mê.

²⁵Mơya dilah đah bơdìh ƀòn, dô nă cau klau nisơna tìp dô nă cau neh ho bau mơ bic bơklơn mơ khai, gen mìng dô nă cau klau neh lơh bơta hơ̆ rơp chơt.

²⁶Bañ lơh bơta lơi di cau ơruh, khai ò tìs glài lơi pal chơt. Bơta hơ̆ la kung be dô nă cau lơi hơ̆ neh brồ lơh mơ tơnchơt cau ơm rềp mơ khai,

²⁷bơh cau klau neh bàn cau ơruh đah bơdìh ƀòn, mơ bulah cau ơruh neh ho bau hơ̆ hòi driau dờng kung ò gơs cau lơi nàng dong klàs khai.

²⁸Dilah dô nă cau nisơna tìp dô nă cau ơruh òhềt ho bau mơ bic bơklơn mơ khai mơ cau jòi git bơta hơ̆,

²⁹gen khai pal tơm bèp kòn ùr hơ̆ in pram jơt sieklơ priă. Khai pal bau mơ kòn ùr hơ̆ bơh khai neh lơh iơh di kòn ùr hơ̆. Khai ò gơs tŭ lơi rgơi sang lòi bau ùr hơ̆ tòm nđò jŏ khai gam kis.

³⁰Dô nă cau ò di bau mơ bau ùr bèp khai dê, khai lơh behơ̆ la sền òsơp bèp khai dê.”