Read koho Yal Wơl 26 Bible Online

Yal Wơl 26 - koho bible

Yal Wơl 26

¹Tòm tŭ bol mê neh mut tòm lơgar mơ Jehôwa Yàng Tom Trồ bol mê dê ai bol mê in lơh gơs sre brê mơ neh dòp geh lơgar hơ̆ rau mơ ơm tềng hơ̆,

²bol mê ai tĕ dô êt plai bồ sơnam bơh di jơh ală phan mơ bol mê neh lơh gơlik gơs bơh di ù tiah mơ Jehôwa Yàng Tom Trồ bol mê dê neh ai bol mê in mơ ơn gơtòm dô nơm bài. Lồc behơ̆ lòt tĕ tus hơ tiah mơ Jehôwa Yàng Tom Trồ bol mê dê rơp sac rwah lơh gơs tiah sơnđan Kơnràñ in ơm.

³Mơ bol mê pal tus mơ cau gơnoar ơn phan duh khoai duh broă tòm tŭ hơ̆ mơ đơs mơ khai lah: “Ngai do, añ yal tơlik mơ Jehôwa Yàng Tom Trồ ồng dê lah añ tus di lơgar mơ Yàng Jehôwa neh srat să ho mơ ală ồng pàng bol hi dê rơp ai bol hi in.”

⁴Cau gơnoar ơn phan duh khoai rơp dòp bài bơh di tê bol mê mơ ơn gơ di đap cơnòng duh khoai Jehôwa Yàng Tom Trồ bol mê dê.

⁵Lồc behơ̆, bol mê rơp yal tơlik di đap Jehôwa Yàng Tom Trồ bol mê dê lah: “Ồng pàng bol hi dê la dô nă cau Aram lòt bơh tiah do tus tiah ne, mơ khai neh mù hơ Ejiptơ bal mơ dô êt nă cau ơm tềng hơ̆ mơ neh gơlik gơs dô nơm làng bol dờng, gơs gơnoar pràn mơ gơs oă cau.

⁶Mơya cau Ejiptơ gơwèt ò niam mơ bol hi mơ lơh pơnjê pơngkồr di bol hi, sồr bol hi pal lơh broă kơnjơ̆ bòl glar.

⁷Gen bol hi hòi driau mơ Yàng Jehôwa la Yàng Tom Trồ ală ồng pàng bol hi dê, mơ Yàng Jehôwa neh kơno jơnau hòi driau bol hi dê mơ sền gŏ bơta dồn sa rƀah, bơta lơh broă bòl glar mơ bơta rồn bơklơn mơ bol hi kong.

⁸Behơ̆ Yàng Jehôwa neh ngui tê gơnoar pràn mơ tơwòr tê pò ơnàng bal mơ bơta rngòt rngơt dờng mơ ală tềl is mơ bơta krơi nàng tă cèng bol hi lik bơh Ejiptơ.

⁹Kơnràñ neh cèng bol hi tus di tiah do mơ ai bol hi in lơgar do la lơgar gơs bềng lìu dà toh mơ dà lơwe;

¹⁰mơ tŭ do, ơ Yàng Jehôwa, añ cèng ală plai bồ sơnam gơlik gơs bơh di ù tiah do mơ Kơnràñ neh ai añ in.” Ơn tĕ bài di đap Jehôwa Yàng Tom Trồ bol mê dê mơ cùn khoai di đap Kơnràñ.

¹¹Gen bol mê bal mơ ală cau Lebi mơ ală cau làng bol bơdìh ơm digùl bol mê rơp hòn chò tòm jơh ală bơta niam mơ Jehôwa Yàng Tom Trồ bol mê dê neh ai bol mê mơ hìu nhă bol mê in.

¹²Tòm tŭ bol mê neh sir ơn is dô pơnah jơt bơh di jơh ală phan neh gơlik gơs bol mê in tòm nam dơ̆ pe rau, hơ̆ la nam ơn phan pơnah jơt, bol mê rơp ai phan hơ̆ cau Lebi, cau làng bơdìh, cau kòn đòi mơ cau ùr bơnrau in, tồ bol khai rgơi sa tòm ală ƀòn dờng bol mê dê mơ geh hòm lai.

¹³Lồc behơ̆ bol mê đơs tĕ mơ Jehôwa Yàng Tom Trồ bol mê dê lah: “Añ neh tă bơh di hìu añ jê pơnah ơn is sàng goh mơ neh ai phan hơ̆ cau Lebi, cau làng bơdìh, cau kòn đòi mơ cau ùr bơnrau in, tòm toh jat be jơh ală jơnau mơ Kơnràñ neh sồr añ. Añ neh ò pơrlac sang bơh ală jơnau sồr Kơnràñ dê hala neh lòi hŭi jơnau lơi bơh di ală jơnau hơ̆.

¹⁴Añ neh ò sa phan hơ̆ tòm tŭ añ neh ơm tòm bơta ñìm ƀồc, añ ò tă phan lơi tòm tŭ añ ò goh, mơ añ kung ò ơn phan lơi bơh di phan hơ̆ cau chơt in. Añ neh dòn bơr Jehôwa Yàng Tom Trồ añ jê; añ neh lơh jat jơh ală bơta mơ Kơnràñ neh sồr añ.

¹⁵Dan Kơnràñ sền tơmềt bơh hơđang trồ la tiah ơm sùm sàng goh Kơnràñ dê, mơ ai lơngai làng bol Israel in la làng bol Kơnràñ in, mơ ù tiah mơ Kơnràñ ai bol hi in tòm toh jat be Kơnràñ neh srat să ho nền mơ ală ồng pàng bol hi dê, la lơgar bềng lìu dà toh mơ dà lơwe.”

¹⁶Ngai do Jehôwa Yàng Tom Trồ bol mê dê ai jơnau sồr bol mê lơh jat ală bơta lơh nền mơ ală bơta boh lam; jơh nùs jơh hwềng soàn kơrhia prap gàr lơh jat tĕ ală bơta hơ̆.

¹⁷Ngai do bol mê neh yal tơlik lah Jehôwa Yàng Tom Trồ bol mê dê mơ bol mê rơp lòt jat tòm ală gùng dà Kơnràñ dê, mơ bol mê rơp prap gàr lơh jat ală bơta lơh nền mơ ală bơta boh lam Kơnràñ dê, mơ bol mê rơp dòn bơr Kơnràñ.

¹⁸Mơ Yàng Jehôwa neh yal tơlik tòm ngai do lah bol mê la làng bol Kơnràñ dê, la phan màng gơrê bal mơ Kơnràñ tòm toh jat be jơnau Kơnràñ neh ho bal, mơ bol mê pal prap gàr lơh jat jơh ală jơnau sồr Kơnràñ dê.

¹⁹Kơnràñ neh yal tơlik lah Kơnràñ rơp lơh bol mê in geh jòng ro, geh tiơng pơnro mơ geh ki ngàm hơđang rlau mơ jơh ală làng bol mơ Kơnràñ neh lơh gơs, mơ bol mê rơp la dô nơm làng bol sàng goh Jehôwa Yàng Tom Trồ bol mê in tòm toh be Kơnràñ neh ho pơgon.