Read koho Yal Wơl 27 Bible Online

Yal Wơl 27 - koho bible

Yal Wơl 27

¹Môise bal mơ ală cau kwang kra Israel dê neh ai jơnau sồr làng bol in be do: “Prap gàr lơh jat tĕ ală jơnau sồr do mơ añ ai bol mê in tòm ngai do.

²Tòm tŭ bol mê neh tiă Jordan mơ mut tòm lơgar mơ Jehôwa Yàng Tom Trồ bol mê dê ai bol mê in gen bơtào tĕ dô êt pơnai lŭ dờng mơ ai cùr pih gơ.

³Cih tĕ hơđang gơ ală jơnau tòm bơta boh lam do tòm tŭ bol mê neh tiă đah ne mơ mut tòm lơgar mơ Jehôwa Yàng Tom Trồ bol mê dê ai bol mê in, la dô nơm lơgar gơs bềng lìu dà toh mơ dà lơwe, tòm toh jat be Jehôwa Yàng Tom Trồ bol mê dê neh ho mơ bol mê.

⁴Mơ tòm tŭ bol mê neh tiă Jordan rau, bơtào tĕ ală pơnai lŭ do hơđang mơnơm Ebal tòm toh jat be añ sồr bol mê tòm ngai do, mơ pih gơ mơ cùr.

⁵Bơt bơtào tĕ tềng hơ̆ dô nơm cơnòng duh khoai Jehôwa Yàng Tom Trồ bol mê in, la dô nơm cơnòng duh khoai bơt mơ ală pơnai lŭ. Bañ ngui phan ngui lơi mơ lòs nàng phàt gơ.

⁶Bơt bơtào tĕ cơnòng duh khoai Jehôwa Yàng Tom Trồ bol mê dê mơ ală pơnai lŭ òhềt phàt, mơ ơn ală phan ơn duh khoai chu pơrguc hơđang gơ Jehôwa Yàng Tom Trồ bol mê in.

⁷Ơn tĕ ală phan ơn bơta ring lơngai hơđang hơ̆, sa gơ mơ hòn chò tĕ di đap Jehôwa Yàng Tom Trồ bol mê dê.

⁸Mơ bol mê rơp cih loh làng ngan jơh ală jơnau bơh bơta boh lam do hơđang ală pơnai lŭ mơ bol mê neh bơtào.”

⁹Lồc behơ̆ Môise mơ ală cau gơnoar ơn phan duh khoai la ală cau Lebi đơs mơ jơh ală cau Israel lah: “Ơ Israel, ơm tĕ mŏ mŏ mơ ơm iat! Bol mê tŭ do neh gơlik gơs làng bol Jehôwa Yàng Tom Trồ bol mê dê.

¹⁰Gen tàng dòn bơr tĕ Jehôwa Yàng Tom Trồ bol mê dê mơ lơh jat ală jơnau sồr mơ ală bơta lơh nền Kơnràñ dê mơ añ ai bol mê in tòm ngai do.”

¹¹Kung tòm ngai hơ̆ Môise ai jơnau sồr làng bol in be do:

¹²“Tòm tŭ bol mê neh tiă Jordan rau, ală jơi bơtiàn do rơp ntào hơđang mơnơm Gerijim nàng ai lơngai làng bol in, hơ̆ la: Simeôn, Lebi, Juda, Isakar, Jôsep mơ Benjamin.

¹³Mơ ală jơi bơtiàn do rơp ntào hơđang mơnơm Ebal nàng yal tơlik jơnau srat sơntơm, hơ̆ la: Ruben, Gat, Aser, Jebulun, Dan mơ Neptali.

¹⁴Ală cau Lebi rơp ai sap đơs dờng mơ yal wơl mơ jơh làng bol Israel lah:

¹⁵‘Pal srat sơntơm cau lơi pac sềr dô nơm rùp duh khoai hala tŏ dô nơm rùp ràk, hơ̆ la dô nơm phan cù kìr di đap Yàng Jehôwa, la broă tê cau pac sềr lơh gơs mơ bơtào gơtòm tiah ndơp ndơr.’ Gen jơh làng bol rơp đơs lah: ‘Amen!’

¹⁶‘Pal srat sơntơm cau lơi ò dòn duh bèp hala mè khai dê.’ Gen jơh làng bol rơp đơs lah: ‘Amen!’

¹⁷‘Pal srat sơntơm cau lơi tòmgơl tiah sơntơp pơnai lŭ nhàr ù tiah.’ Gen jơh làng bol rơp đơs lah: ‘Amen!’

¹⁸‘Pal srat sơntơm cau lơi tề lam cau jơngo mat lòt tìs gùng.’ Gen jơh làng bol rơp đơs lah: ‘Amen!’

¹⁹‘Pal srat sơntơm cau lơi ò lơh bơta song ring gơwèt hơ cau làng bơdìh, cau kòn đòi hala cau ùr bơnrau.’ Gen jơh làng bol rơp đơs lah: ‘Amen!’

²⁰‘Pal srat sơntơm cau lơi bic mơ bau ùr bèp khai dê, bơh khai ò ki ngàm di cơnòng bic bèp khai dê.’ Gen jơh làng bol rơp đơs lah: ‘Amen!’

²¹‘Pal srat sơntơm cau lơi bic mơ dô nơm phan poan jơng lơi.’ Gen jơh làng bol rơp đơs lah: ‘Amen!’

²²‘Pal srat sơntơm cau lơi bic mơ bi ùr khai dê, la kòn ùr bèp khai dê hala kòn ùr mè khai dê.’ Gen jơh làng bol rơp đơs lah: ‘Amen!’

²³‘Pal srat sơntơm cau lơi bic mơ po me khai dê.’ Gen jơh làng bol rơp đơs lah: ‘Amen!’

²⁴‘Pal srat sơntơm cau lơi tơnchơt dô bă ndơp ndơr cau ơm rềp mơ khai.’ Gen jơh làng bol rơp đơs lah. ‘Amen!’

²⁵‘Pal srat sơntơm cau lơi dòp ai phan loă nàng tơnchơt dô nă cau ò gơs glài.’ Gen jơh làng bol rơp đơs lah: ‘Amen!’

²⁶‘Pal srat sơntơm cau lơi ò prap gàr ală jơnau bơta boh lam do nàng lơh jat.’ Gen jơh làng bol rơp đơs lah: ‘Amen!’”