Read koho Yal Wơl 28 Bible Online

Yal Wơl 28 - koho bible

Yal Wơl 28

¹Dilah bol mê dòn bơr wil tơl Jehôwa Yàng Tom Trồ bol mê dê mơ kơrhia lơh jat jơh ală jơnau sồr Kơnràñ dê mơ añ ai bol mê in tòm ngai do, gen Jehôwa Yàng Tom Trồ bol mê dê rơp bơtào bol mê hơđang jơh ală làng bol ndai tòm plai ù.

²Jơh ală bơta lơngai lơngò do rơp tus hơđang bol mê mơ lòt jat bol mê dilah bol mê dòn bơr Jehôwa Yàng Tom Trồ bol mê dê:

³Bol mê rơp geh lơngai tòm ƀòn dờng mơ geh lơngai tòm ƀlàng sre.

⁴Plai đo să jan bol mê dê rơp geh lơngai, mơ plai đo tòm ù tiah bol mê dê mơ ală kòn dềt mpồl phan poan jơng bol mê dê, hơ̆ la ală mpồl kơnrồ mơ ală belàt bol mê dê geh bơtơl oă tai.

⁵Bài ơn piang lă mơ kơnac kơmbuh phe mi bol mê dê rơp geh lơngai.

⁶Bol mê rơp geh lơngai tòm tŭ mut tòm hìu mơ geh lơngai tòm tŭ bol mê lik di tiah.

⁷Yàng Jehôwa rơp lơh alah di đap bol mê ală cau sò tơm bơtào tơngguh sòdră mơ bol mê. Bol khai rơp bơh dô đah gùng lòt tus hơ bol mê mơ bol khai rơp ntoat dô tòm poh đah gùng.

⁸Yàng Jehôwa rơp ai dô bơta lơngai lơngò hơđang ală đam jàr bol mê dê mơ hơđang jơh ală broă tê bol mê lơh. Jehôwa Yàng Tom Trồ bol mê dê rơp ai lơngai bol mê in tòm lơgar mơ Kơnràñ neh ai bol mê in.

⁹Yàng Jehôwa rơp bơt bơtào kơ̆ bol mê lơh gơs làng bol sàng goh Kơnràñ dê, tòm toh be Kơnràñ neh srat să ho pơgon mơ bol mê dilah bol mê prap gàr ală jơnau sồr Jehôwa Yàng Tom Trồ bol mê dê mơ lòt jat ală gùng dà Kơnràñ dê.

¹⁰Gen jơh ală làng bol hơđang plai ù rơp gŏ la bol mê neh geh hòi sac bơh sơnđan Yàng Jehôwa, mơ bol khai rơp rngòt di bol mê.

¹¹Yàng Jehôwa rơp ai bol mê in geh bơtoah bơtoài tơngkah tơngkañ tòm ù tiah Kơnràñ neh srat să mơ ală ồng pàng bol mê dê ai bol mê in, hơ̆ la plai đo hìu kòn bol mê dê, kòn dềt tòm mpồl phan poan jơng bol mê dê, mơ kòi mbo tòm ù tiah bol mê dê.

¹²Yàng Jehôwa rơp pò ală tap trồ la đam jàr lìu làc Kơnràñ dê nàng tơndùh mìu hơđang ù tiah bol mê dê di di kơnhai mơ nàng ai lơngai hơđang jơh ală broă tê bol mê lơh. Bol mê rơp ai oă làng bol in càn mơya bol mê rơp ò càn bơh di dô nơm lơgar lơi.

¹³Yàng Jehôwa rơp lơh bol mê in gơlik gơs bồ, ò di tiang. Dilah bol mê kơrhia lơh jat ală jơnau sồr Jehôwa Yàng Tom Trồ bol mê dê mơ añ ai bol mê in tòm ngai do mơ kơrhia lòt jat gơ gen bol mê rơp ơm di bồ hơđang, ò gơs tŭ lơi ơm di tiang hơđơm,

¹⁴mơ dilah bol mê pơrlac sang bơh di jơnau sồr lơi tòm ală jơnau sồr mơ añ ai bol mê in tòm ngai do mơ sĕ đah ma hala đah kiau, lòt jat ală yàng ndai mơ duh broă bol gơ.

¹⁵Mơya dilah bol mê ò dòn bơr Jehôwa Yàng Tom Trồ bol mê dê mơ ò kơrhia lòt jat jơh ală jơnau sồr mơ bơta lơh nền Kơnràñ dê mơ añ ai bol mê in tòm ngai do, gen jơh ală jơnau srat sơntơm do rơp tus hơđang bol mê mơ kup sơmbat bol mê:

¹⁶Bol mê rơp kong srat sơntơm tòm ƀòn dờng mơ kong srat sơntơm tòm ƀlàng sre.

¹⁷Bài ơn kơmbuh phe mơ kơnac kơmbuh phe bol mê dê rơp kong srat sơntơm.

¹⁸Plai đo hìu kòn bol mê dê rơp kong srat sơntơm, plai đo ù tiah bol mê dê mơ ală kơnrồ kòn tòm ală mpồl phan poan jơng bol mê dê mơ ală belàt kòn rơp kong srat sơntơm.

¹⁹Bol mê rơp kong srat sơntơm tòm tŭ bol mê mut tòm hìu mơ tòm tŭ bol mê lik di tiah.

²⁰Yàng Jehôwa rơp đùh bơta srat sơntơm hơđang bol mê bal mơ bơta sơlồng sơlàng mơ bơta lah pơrhơng tòm jơh ală phan mơ bol mê ơn tê hơđang jơl tus di tŭ bol mê kong tơnroh mơ kong bơta roh rui nisơna gơtơntus tài bơh bơta iơh bơsak mơ bol mê neh lơh, tài bơh bol mê neh sang lòi Kơnràñ.

²¹Yàng Jehôwa rơp đùh ală bơta kòp jê jơl tus di tŭ Kơnràñ neh tơnroh bol mê bơh di ù tiah mơ bol mê neh mut mơ dòp geh.

²²Yàng Jehôwa rơp đùh bơta kòp jê chơt roh hơđang bol mê, kòp bơsiă reh jòr mơ kòp pŭ, bơta kòp prơm mơ chơt pluh, gơs bơta jơgloh rung mơ bơta prang duh trơàl, ro rañ mơ dà tŭ but bơsềt, ală bơta hơ̆ rơp ting jat bol mê jơl tus di tŭ bol mê roh rui.

²³Ală tap trồ hơđang bồ bol mê rơp gơlik kung be kòng, ù tiah hơđơm bol mê rơp gơlik gơs kung be lòs.

²⁴Yàng Jehôwa rơp lơh mìu hơđang lơgar bol mê gơlik gơs kung be thul mơ kơmbuh ù; gơ rơp dùh bơh đang trồ jơl tus di tŭ bol mê neh kong tơnroh jơh.

²⁵Yàng Jehôwa rơp lòi bol mê kong alah di đap ală cau sò tơm bol mê dê. Bol mê rơp bơh dô đah brồ lơh bol khai mơya rơp ntoat dô tòm poh đah, mơ bol mê rơp gơlik gơs dô nơm phan cù kìr di đap jơh ală lơgar hơđang ù.

²⁶Ƀồc chơt bol mê dê rơp gơlik gơs phan sa jơh ală sềm in tòm pah gòi mơ ală phan poan jơng in tòm ù, mơ rơp ò gơs cau lơi ting bơtrơh bol gơ.

²⁷Yàng Jehôwa rơp tơndùh hơđang bol mê bơta kòp jê toh kiat lơgar Ejiptơ dê bal mơ kòp as kràng lơu, toh mồr, kùh mơ bol mê ò rgơi geh sơmbòi.

²⁸Yàng Jehôwa rơp lơh bòl glar di bol mê bơh bơta sơnrang sơnrồng, jơngo mat mơ roh dơngoh jak.

²⁹Tòm trồ ngai, bol mê rơp tơbư kung be cau jơngo mat ơm tòm bơta klam jơngo. Bol mê rơp ò geh bơtoah bơtoài tòm kòp nơm broă bol mê lơh; ngai do tus hơ ngai ne bol mê rơp kong rồn bơklơn mơ kong cau tòmpìt sơmbrơt mơ ò gơs cau lơi dong tă bol mê.

³⁰Bol mê rơp ho bau mơ dô nă cau ùr, mơya dô nă cau ndai rơp bau mơ bic mơ khai. Bol mê rơp bơt dô nơm hìu mơya bol mê rơp ò ơm tòm hìu hơ̆. Bol mê rơp tam dô nơm suơn ño mơya bol mê kung rơp ò geh sơntòm chò hòp bơh plai gơ dê.

³¹Kơnrồ dam bol mê dê rơp kong sreh lơh poac di đap mat bol mê, mơya bol mê ò geh sa dô êt poac lơi gơ dê. Ơseh alàng bol mê dê rơp kong cau ngui pràn tòmpìt ai gơ mơ rơp ò tơm wơl bol mê in. Belàt bol mê dê rơp kong tòmpà ai ală cau sò tơm di bol mê mơya ò gơs cau lơi dong tă gơ.

³²Ală kòn klau kòn ùr bol mê dê rơp kong jào phi tòm tê dô nơm làng bol lơgar ndai, mơ gar mat bol mê dê rơp kơrlu kơrli kơp gơn bol khai bơh ngai do tus hơ ngai ne, ò tơl pràn nàng pò dô đah tê.

³³Dô nơm làng bol mơ bol mê ò git rơp sa phan bơh tê mơ ù tiah bol mê neh lơh broă bòl glar nàng gơlik gơs, mơ bol mê ò geh bơta lơi rlau mơ bơta kong rồn bơklơn iơh rmơh tòm jơh rài kis bol mê dê.

³⁴Ală bơta bol mê rơp gŏ gơ rơp lơh bol mê in sơnrang sơnrồng.

³⁵Yàng Jehôwa rơp ngui toh kiat jê sồt ngan gơlơh bòl glar di gơltang mơ jơng bol mê mơ bol mê ò geh sơmbòi, gơ rơp sa rì bơh di kơndòl jơng bol mê dê tus hơ cồng bồ bol mê dê.

³⁶Yàng Jehôwa rơp ting bơtrơh bol mê mơ cau bơtau mơ bol mê neh bơtào hơđang bol mê tus di dô nơm lơgar mơ bol mê bal mơ ală ồng pàng bol mê dê òhềt git. Tềng hơ̆ bol mê rơp duh khoai ală yàng ndai, la ală yàng mơ chi mơ lŭ.

³⁷Bol mê rơp gơlik gơs dô nơm phan rngòt cù kìr mơ dô nơm tơnggume lah pơrhơng mơ dơñŏ tơnhial jơh ală ƀòn lơgar in mơ Yàng Jehôwa neh bơtrơh bol mê tus.

³⁸Bol mê rơp sih oă gar kòi tòm ƀlàng sre mơya bol mê rơp toès mìng dô êt lơm tài bơh ală srah nting rơp sa loan gơ.

³⁹Bol mê rơp tam ală suơn ño mơ sền gàr gơ mơya bol mê rơp ò ñô hala pic plai ño, tài bơh ală tu rơp sa gơ.

⁴⁰Bol mê rơp gơs ală chi Ôlibe tòm làm jơh lơgar mơya bol mê rơp ò ngui mơñà gơ, tài bơh ală plai ôlibe rơp rung roh jơh.

⁴¹Bol mê rơp gơs ală kòn klau mơ ală kòn ùr mơya bol mê rơp ò prap gàr bol khai tài bơh bol khai rơp kong kup cèng.

⁴²Ală mpồl srah nting rơp sa roh jơh ală chi che bal mơ kòi mbo lơgar bol mê dê.

⁴³Cau làng bơdìh ơm kis digùl bol mê rơp bơtào tơngguh sơlo ngai sơlo jơnhoa rlau hơđang bol mê, mơya bol mê rơp gơ mù sơlo ơm sơlo liah rlau.

⁴⁴Khai rơp ai bol mê in càn mơya bol mê rơp ò ai khai in càn. Khai rơp la bồ, mơya bol mê rơp la tiang.

⁴⁵Jơh ală jơnau srat sơntơm do rơp dùh hơđang bol mê. Bol gơ rơp ting jat bol mê mơ bàn bol mê jơl tus di tŭ bol mê neh kong tơnroh jơh, tài bơh bol mê neh ò dòn bơr Jehôwa Yàng Tom Trồ bol mê dê mơ prap gàr lơh jat ală jơnau gơnoar sồr mơ ală bơta lơh nền mơ Kơnràñ neh ai bol mê in.

⁴⁶Bol gơ rơp lơh gơs dô nơm tềl mơ dô bơta krơi bol mê in mơ ală kòn sau bol mê in jơl tus sùm sùm.

⁴⁷Tài bơh bol mê ò duh broă Jehôwa Yàng Tom Trồ bol mê dê dô bă hòn chò mơ chò hòp tòm tơngai bơtoah bơtoài,

⁴⁸gen tàng tòm ngai jơgloh mơ tơhìr, ơm kuh mơ dồn sa rƀah, bol mê rơp duh broă ală cau sò tơm mơ Yàng Jehôwa neh sồr tus tòmdră mơ bol mê. Kơnràñ rơp ơn dô nơm yô mơ lòs di ngko bol mê dê jơl tus di tŭ Kơnràñ neh tơnroh bol mê.

⁴⁹Yàng Jehôwa rơp cèng tus dô nơm làng bol bơh di tiah ngài lòt tus tòmdră mơ bol mê, bơh di ală tiah lồi plai ù, kung be dô nơm sềm klàng bung bơh đang par mù tus hơđơm, dô nơm làng bol mơ bol mê ò git wă jơnau đơs bol khai dê,

⁵⁰dô nơm làng bol gơs muh mat jàñ bơsak, ò ki ngàm di cau kra hala nđàc sơngit di cau pơnu.

⁵¹Bol khai rơp sa loan ală kòn dềt phan poan jơng bol mê dê, mơ ală kòi mbo ù tiah bol mê dê jơl tus di tŭ bol mê neh kong tơnroh. Bol khai rơp ò lòi bol mê in gar kòi mbo lơi tơrnòm pa hala mơñà lơi, hala kơnrồ kòn lơi bơh di ală mpồl kơnrồ, belàt lơi bơh di ală mpồl belàt bol mê dê jơl tus di tŭ bol mê neh kong roh rui jơh.

⁵²Bol khai rơp gòm gơrwàng gùt dar jơh ală ƀòn dờng tòm làm jơh lơgar bol mê dê jơl tus di tŭ ală dơrñang jơnhoa kơ̆ cê mơ bol mê dòn kơnòm rơp tơrlah jơh.

⁵³Tòm tŭ bol mê gơkòl ală cau sò tơm gòm gơrwàng mơ lơh bol mê in kong bơta jơgloh tơhìr, bol mê rơp sa plai đo kơndul bol mê dê, hơ̆ la poac să ală kòn klau kòn ùr mơ Jehôwa Yàng Tom Trồ bol mê dê neh ai bol mê in.

⁵⁴Bulah cau gơs nùs niam lơnhơn mơ git jơnau rlau jơh digùl bol mê kung rơp ò nđàc di oh mi tòm khai dê hala di bau ùr khai kòñ gơboh hala di ală kòn sau gam kis bol khai dê,

⁵⁵mơ khai rơp ò tòmpà mơ dô nă tòm bol khai dô êt lơi poac kòn sau khai dê mơ khai ơm sa. Hơ̆ rơp la jơh ală phan gam wơl khai dê tài bơh bơta jê sồt bòl glar mơ cau sò tơm rơp lơh di bol mê tòm tŭ gòm gơrwàng jơh ală ƀòn dờng bol mê dê.

⁵⁶Cau ùr niam lơnhơn mơ git jơnau rlau jơh digùl bol mê, git jơnau mơ niam lơnhơn tian gơs ò jă di ù mơ kơndòl jơng khai dê, khai rơp jròk sa gơwèt mơ bau klau khai kòñ gơboh bal mơ kòn klau kòn ùr tòm khai dê,

⁵⁷ò lòi wơl tian gơs phan lik bơh digùl bàr đah bơnô khai dê tơnơ̆ mơ tŭ khai deh kòn, bal mơ kòn khai neh deh, tài bơh khai neh sa òm ală phan hơ̆ tòm tŭ dồn sa rƀah ò gam phan lơi tai, tòm bơta sang să mơ cau sò tơm cèng tus hơđang bol mê tòm ală ƀòn dờng bol mê dê.

⁵⁸Dilah bol mê ò kơrhia lòt jat jơh ală jơnau bơta boh lam do, la jơnau neh cih tòm sră do, mơ ò ki ngàm di sơnđan gơklŏ mơ pal rngòt rngơt do, hơ̆ la Jehôwa Yàng Tom Trồ bol mê dê,

⁵⁹gen Yàng Jehôwa rơp đùh oă bơta rung rài pal rngòt rngơt hơđang bol mê mơ hơđang ală kòn sau bol mê dê, ală bơta rung rài kơnjơ̆ ngan mơ gơ ơm jŏ jòng ngan, ală bơta kòp jê pal rngòt rngơt gơ ơm tòm jŏ ngai.

⁶⁰Kơnràñ rơp đùh hơđang bol mê jơh ală bơta kòp jê Ejiptơ dê mơ bol mê rngòt rngơt, mơ bol gơ rơp gơđềt di bol mê.

⁶¹Yàng Jehôwa kung rơp đùh hơđang bol mê ală bơta kòp jê mơ rung rài ò gơs cih tòm Sră bơta Boh lam do, jơl tus di tŭ bol mê neh kong tơnroh.

⁶²Bol mê la làng bol gơs ntum khà cau gal ngan kung be ală sơmañ hơđang trồ, bol mê rơp gam wơl khà mìng dô êt lơm, tài bơh bol mê ò dòn bơr Jehôwa Yàng Tom Trồ bol mê dê.

⁶³Kung be Yàng Jehôwa neh niam nùs lơh bol mê in gơlik gơs rơ̆sơmpài ràipơjềng gen Kơnràñ kung rơp niam nùs lơh bol mê in roh rui mơ tơnroh bol mê. Bol mê rơp kong tă tơlik bơh lơgar mơ bol mê neh mut nàng dòp geh.

⁶⁴Gen Yàng Jehôwa rơp rsìh bol mê digùl jơh ală làng bol, bơh jơng trồ do tus hơ jơng trồ ne. Tềng hơ̆ bol mê rơp duh khoai ală yàng ndai, la ală yàng mơ chi mơ lŭ mơ bol mê hala ală ồng pàng bol mê dê kung ò tŭ lơi git.

⁶⁵Digùl ală làng bol hơ̆ bol mê rơp ò jòi bàn bơta ơm lơngai, ò gơs tiah kơndòl jơng hala jơng bol mê in ơm rlô. Tềng hơ̆ Yàng Jehôwa rơp lơh dơngoh jak bol mê dê kơlôi rcang, gar mat bol mê dê siar roh bơh kơp gơn, mơ nùs bol mê dê gơplơ̆ moat jrùng.

⁶⁶Bol mê rơp kis tòm bơta kơp gơn sùm sùm, bềng lìu bơta kơlôi rngòt ngai mơ mang, ò tŭ lơi git nền bơh bơta kis bol mê dê.

⁶⁷Tòm trồ àng drim bol mê rơp đơs lah: “Kơp kòñ dilah trồ neh mho rau!” mơ tòm tŭ trồ mho bol mê rơp đơs lah: “Kơp kòñ dilah trồ la àng drim!” tài bơh nùs bol mê gơs bềng lìu bơta rngòt rngơt mơ tài bơh ală bơta mơ mat bol mê rơp sền gŏ.

⁶⁸Yàng Jehôwa rơp lòi bol mê hào ơhò mơ rê wơl hơ Ejiptơ tòm dô nơm gùng lòt mơ Kơnràñ đơs lah bol mê rơp ò tŭ lơi lòt tai. Tềng hơ̆ bol mê rơp tac să tòm bol mê dê ală cau sò tơm bol mê in nàng lơh gơs ală cau dĭ klau mơ dĭ ùr, mơya ò gơs cau lơi rơp blơi bol mê.