Read koho Yal Wơl 29 Bible Online

Yal Wơl 29 - koho bible

Yal Wơl 29

¹Do la ală jơnau lơh nền tòm bơta ho bal mơ Yàng Jehôwa neh sồr ồng Môise bơtào mơ ală cau Israel tòm Môap, rlau mơ bơta ho bal Yàng neh bơtào gơs mơ bol khai tòm Hôrep.

²Môise hòi pơjum bal jơh ală cau Israel mơ đơs mơ bol khai lah: “Mat bol mê neh gŏ jơh ală broă mơ Yàng Jehôwa neh lơh tòm Ejiptơ di Pharaôn, di jơh ală cau kwang duh broă khai mơ jơh ù tiah lơgar khai dê.

³Mat tòm bol mê neh gŏ ală broă gơlòng bòl glar dờng hơ̆, ală tềl is crih crài mơ ală bơta krơi dờng.

⁴Mơya jơl tus di tŭ do Yàng Jehôwa òhềt ai bol mê in dơngoh jak nàng git wă hala ală gar mat nàng sền gŏ hala ală trồm tồr nàng kơno.

⁵Kơnràñ đơs lah: ‘Añ neh tề lam bol mê tòm poan jơt nam tòm ƀlàng ngềt ngơt, ồi ào di să bol mê dê ò sèt, mơ khŏ jă di jơng bol mê dê kung ò siar sơl.

⁶Bol mê ò sa piang lă, kung ò ñô tơrnòm hala phan ñô gơs kañ. Añ neh lơh behơ̆ nàng bol mê git Añ la Jehôwa Yàng Tom Trồ bol mê dê.’

⁷Tòm tŭ bol mê tus tềng do, Sihôn bơtau Hesbôn dê mơ Ôk bơtau Basan dê lik lòt nàng tòmlơh mơ bol he, mơya bol he neh pha rlau mơ bol khai.

⁸Bol he neh tòmpìt ai ù tiah lơgar bol khai dê mơ ai gơlơh gơs sre brê ală cau Ruben in, cau Gat in mơ nggùl jơi bơtiàn Manase in.

⁹Kơrhia tĕ lơh jat ală bơta lơh nền tòm bơta ho bal do tồ bol mê rgơi geh bơtoah bơtoài tòm jơh ală broă bol mê lơh.

¹⁰Jơh tơl nă bol mê ntào tòm ngai do di đap mat Jehôwa Yàng Tom Trồ bol mê dê, di đap ală cau kwang lam bồ mơ ală cau kwang at bồ bol mê dê, ală cau kwang kra, mơ jơh ală cau klau tòm Israel,

¹¹bal mơ ală kòn sau mơ ală bau ùr bol mê dê, mơ ală cau làng bơdìh ơm kis digùl ală sàl ơm bol mê dê la ală cau koh lòng ơnòng dà bol mê in,

¹²nàng mut tòm bơta ho bal Jehôwa Yàng Tom Trồ bol mê dê, mơ jơnau srat să ho nền mơ Jehôwa Yàng Tom Trồ neh bơtào mơ bol mê tòm ngai do;

¹³nàng ngai do dòp git bol mê la làng bol Kơnràñ dê, Kơnràñ la Yàng Tom Trồ bol mê dê be Kơnràñ neh ho mơ bol mê mơ kung be Kơnràñ neh srat să ho nền mơ ală ồng pàng bol mê dê la Abraham, Isak mơ Jakôp.

¹⁴Añ bơtào gơs bơta ho bal do bơh dô jơnau ho nền, ò di mìng mơ bol mê la ală cau ơm ntào tềng do bal mơ bol hi tòm ngai do di đap mat Jehôwa Yàng Tom Trồ bol he dê lơm ò,

¹⁵mơya kung bal mơ ală cau ò gơs mat tềng do mơ bol he tòm ngai do sơl.

¹⁶Bol mê git mbe bol he neh kis tòm lơgar Ejiptơ, mơ mbe bol he neh lòt gan ală lơgar rò gùng bol he lòt tus hơ do.

¹⁷Bol mê neh gŏ digùl bol khai gơs ală rùp duh khoai mơ ală rùp ràk cù kìr bol khai dê lơh gơs mơ chi mơ lŭ mơ priă mơ màh.

¹⁸Lơh nền tĕ tòm ngai do lah ò gơs cau klau hala cau ùr, hìu nhă hala jơi bơtiàn lơi digùl bol mê tòmgơl nùs, sang lòi Jehôwa Yàng Tom Trồ bol mê dê mơ lòt duh khoai ală yàng làng bol hơ̆ dê. Lơh nền tĕ nàng digùl bol mê ò gơs ryas gơtơnggơs phan bih khih mơ plai bơtang.

¹⁹Jơh ală cau kơno ală jơnau srat să ho nền do, hừh nùs mơ kơlôi sơnơng is tòm nùs lah: ‘Añ rơp geh lơngap lơngai bulah añ kư̆ kơldang nùs lòt jat gùng is añ jê.’ Bơta hơ̆ rơp cèng tus bơta rung rài hơđang ù tiah sùh kung be hơđang ù tiah ro rañ.

²⁰Yàng Jehôwa rơp ò tŭ lơi kòñ toh glài khai; bơh bơta gơjrañ dờng mơ bơta duh hul Kơnràñ dê rơp chu pơrguc tòmdră mơ bol khai. Jơh ală jơnau srat sơntơm neh cih tòm sră do rơp dùh hơđang bol khai, mơ Yàng Jehôwa rơp jùt sang sơnđan mat bol khai dê bơh hơđơm trồ.

²¹Yàng Jehôwa rơp cah is bol khai bơh di jơh ală jơi bơtiàn Israel, nàng kong bơta rung rài jat be jơh ală jơnau srat sơntơm bơta ho bal be neh cih tòm Sră bơta boh lam.

²²Ală kòn sau rài tơnơ̆ pơnjat bol mê mơ ală cau làng bol bơdìh neh tus bơh di ală lơgar ngài rơp gŏ ală bơta rung rài dùh hơđang ù tiah mơ ală bơta pluh plàng mơ Yàng Jehôwa neh tơndùh hơđang gơ.

²³Jơh dô nơm lơgar rơp gơlik kung be dô bă tiah sang lòi gòi bơh neh ồs sa, gơs mìng boh mơ siau, ò tùc tam, ò phan lơi hòn lik, ò chi che biap nha lơi hòn tềng hơ̆. Gơ rơp gơlik gơs kung be bơta tơnroh Sôdôm mơ Gômôrơ, Atma mơ Sebôim mơ Yàng Jehôwa neh tơnroh tòm bơta gơjrañ dờng Kơnràñ dê.

²⁴Jơh ală làng bol rơp lùp lah: ‘Ñchi bơh tài Yàng Jehôwa neh lơh bơta do lơgar hơ̆ in taih? Ñchi bơh tài gơs bơta gơjrañ dờng mơ sa roh behơ̆ taih?’

²⁵Mơ jơnau ho wơl lah: ‘Hơ̆ la tài bơh làng bol do neh sang lòi bơta ho bal mơ Jehôwa Yàng Tom Trồ la Yàng Tom Trồ ală ồng pàng bol khai dê, la bơta ho bal mơ Kơnràñ neh bơtào mơ bol khai tòm tŭ Kơnràñ neh cèng bol khai lik bơh di Ejiptơ.

²⁶Bol khai neh sang lòi mơ duh khoai ală yàng ndai mơ cùn khoai di đap bol gơ la ală yàng mơ bol khai ò git, ală yàng mơ Kơnràñ ò ai bol khai in.’

²⁷Gen tàng bơta gơjrañ Yàng Jehôwa dê gơhào khuh be ồs tòmdră mơ ù tiah do, tian gơs Kơnràñ neh dùh hơđang gơ jơh ală jơnau srat sơntơm neh cih tòm sră do.

²⁸Tòm bơta gơjrañ dờng mơ gơhào khuh Kơnràñ dê, Yàng Jehôwa neh dus tă bol khai bơh di ù tiah bol khai dê mơ sang sơrbì bol khai tòm dô nơm lơgar ndai be neh gơs tòm ngai do.”

²⁹Ală bơta ndơp ndơr gơrê bal mơ Jehôwa Yàng Tom Trồ bol he dê, mơya ală bơta neh ràng tơlik gơrê bal mơ bol he mơ kòn sau bol he dê gam sùm sùm, tồ bol he lơh jat jơh ală jơnau neh cih tòm bơta boh lam do.