Read koho Yal Wơl 3 Bible Online

Yal Wơl 3 - koho bible

Yal Wơl 3

¹Tơnơ̆ mơ hơ̆, bol hi wèt wơl mơ lòt guh hơ gah gùng lòt hơ Basan. Ok bơtau Basan bal mơ jơh dô mpồl ling khai dê lik lòt tòmlơh mơ bol hi tòm Edrei.

²Yàng Jehôwa đơs mơ añ lah: “Bañ rngòt di khai, bơh Añ neh jào khai tòm tê mê bal mơ jơh dô mpồl ling khai dê mơ lơgar khai dê. Lơh tĕ di khai kung be mê neh lơh Sihôn bơtau Amôrit at bồ tòm Hesbôn.”

³Behơ̆ Jehôwa Yàng Tom Trồ bol hi dê kung neh jào tòm tê bol hi Ok bơtau Basan mơ jơh dô mpồl ling khai dê. Bol hi tơnchơt khai, ò lòi dô nă cau lơi gam kis.

⁴Tòm tŭ hơ̆ bol hi tòmpìt ai jơh ală ƀòn dờng khai dê. Ò gơs ƀòn dờng lơi tòm prau jơt nơm ƀòn dờng mơ bol hi ò tòmpìt ai bơh di bol khai, hơ̆ la jơh dô kơnhwàl Argôp, lơgar Ôk la bơtau Basan dê.

⁵Jơh ală ƀòn dờng hơ̆ la ală ƀòn dờng kơ̆ cê gơs dơrñang jòng jơnhoa mơ mpồng dờng gơs kai kal wơl, mơ kung gơs oă ƀòn ò gơs dơrñang gùt dar sơl.

⁶Bol hi tơnroh jơh hir bol khai kung be bol hi neh lơh Sihôn in la bơtau Hesbôn dê, tơnroh jơh ală ƀòn dờng, ală cau klau, ală cau ùr mơ ală cau kơnòm.

⁷Mơya ală mpồl phan poan jơng mơ ală phan tòmpìt geh bơh di ală ƀòn dờng bol khai dê gen bol hi tă cèng be phan tòmpìt geh bol hi in.

⁸Behơ̆ tòm tŭ hơ̆ bol hi neh tòmpìt ai bơh di bàr nă bơtau Amôrit dê ù tiah đah mattơngai lik Jordan, bơh thòng Arnôn tus di mơnơm Hermôn.

⁹(Cau Sidôn sơnđan mơnơm Hermôn la Siriôn; ai cau Amôrit sơnđan la Senir.)

¹⁰Bol hi tòmpìt ai jơh ală ƀòn dờng tòm tiah ƀlàng ring, mơ jơh Galaat, mơ jơh Basan tus hơ Salekah mơ Edrei, ală ƀòn dờng lơgar bơtau Ôk tòm Basan.

¹¹(Mìng Ôk bơtau Basan gam wơl bơh di kòn sau Rephaim. Cơnòng bic khai dê lơh mơ lòs mơ gơs rlau mơ jơt pe tal jòng mơ prau tal ơnàng. Cơnòng hơ̆ gam tòm Rapbah cau Ammônit dê.)

¹²Bơh di ù tiah mơ bol hi neh tòmpìt geh tòm tŭ hơ̆, añ ai cau Ruben mơ cau Gat ù tiah đah đang Arôer di gah thòng Arnôn, tơrgòm bal nggùl lơgar mơnơm Galaat dê, bal mơ ală ƀòn dờng gơ dê.

¹³Pơnah gam wơl Galaat dê bal mơ jơh Basan lơgar bơtau Ôk dê gen añ ai nggùl jơi bơtiàn Manase in. (Jơh dô kơnhwàl Argôp tòm Basan òs geh kòp la ù tiah cau Rephaim dê.

¹⁴Jair, dô nă kòn sau Manase dê neh ai jơh dô kơnhwàl Argôp, ngài tus hơ nhàr lơgar cau Gesurit mơ cau Makathit; gơ geh tơmoh sơnđan jat sơnđan khai dê, tian gơs tus di ngai do Basan geh sơnđan la Habôt Jair.)

¹⁵Mơ añ ai Galaat Makir in.

¹⁶Mơya đah pơnah cau Ruben mơ cau Gat gen añ ai ù tiah gơ lòt bơh di Galaat mù tus hơ thòng Arnôn (digùl thòng la nhàr lơgar) mơ tus hơ hiòng Jabbôk la nhàr lơgar cau Ammônit dê.

¹⁷Nhàr đah mattơngai mut gơ dê la ƀlàng ring Jordan, bơh di Kinneret tus hơ Dàlềng Arabah, la Dàlềng Chơt, hơđơm gah mơnơm Pisga.

¹⁸Tòm tŭ hơ̆ añ ai jơnau sồr bol mê lah: “Jehôwa Yàng Tom Trồ bol mê dê neh ai bol mê in lơgar do lơh gơs sre brê. Mơya jơh ală cau klau rgơi lòt tòmlơh pal mă àñ phan tòmlơh mơ tiă hiòng Jordan lài mơ ală oh mi Israel bol mê dê.

¹⁹Bulah behơ̆, ală bau ùr bol mê dê, ală kòn sau bol mê dê mơ ală mpồl phan poan jơng bol mê dê (añ git bol mê gơs oă mpồl phan poan jơng) rgơi ơm wơl tòm ală ƀòn dờng mơ añ neh ai bol mê in,

²⁰jơl tus di tŭ Yàng Jehôwa neh ai bơta rlô lơngai ală oh mi bol mê in kung be Kơnràñ neh ai bol mê in, mơ bol khai kung pal dòp geh lơgar mơ Jehôwa Yàng Tom Trồ bol mê dê ai bol khai in, đah ne Jordan. Tơnơ̆ mơ hơ̆, kòp nă bol mê rgơi rê wơl hơ sre brê mơ añ neh ai bol mê in.”

²¹Tòm tŭ hơ̆ añ neh ai jơnau sồr Jôsue in lah: “Mê neh sền gŏ mơ mat tòm mê dê jơh ală bơta mơ Yàng Jehôwa neh lơh gơwèt hơ bàr nă cau bơtau ne. Yàng Jehôwa kung rơp lơh behơ̆ gơwèt mơ jơh ală lơgar ală cau bơtau ơm đah ne la tiah bol mê rơp lòt tus.

²²Bañ rngòt di bol khai; să tòm Jehôwa Yàng Tom Trồ bol mê dê rơp tòmlơh bol mê in.”

²³Tòm tŭ hơ̆ añ rac dan mơ Yàng Jehôwa lah:

²⁴“Khoai Yàng Jehôwa la Bơtau At Bồ Hơđang Rlau Jơh, Kơnràñ neh sơntòm yal tơlik cau duh broă Kơnràñ in bơta dờng ryŭ mơ tê pràn kơldang Kơnràñ dê. Bơh hơđang trồ hala tòm ù gơs yàng lơi gơs broă lơh mơ lơh ală broă gơnap gơnoar be Kơnràñ neh lơh sơl ơ?

²⁵Dan ai añ in tiă mơ sền gŏ lơgar niam đah ne Jordan la lơgar mơnơm mơ Liban hàng mơnĕ.”

²⁶Mơya tài bơh bol mê mơ Yàng Jehôwa gơhào gơjrañ di añ mơ ò dòp jơnau añ. Yàng Jehôwa đơs lah: “Kàr hơ̆ la tơl rau, bañ đơs tai mơ Añ bơh bơta do.

²⁷Lòt guh tĕ hơđang bồ mơnơm Pisga, mơ wèt sền đah mattơngai mut mơ đah đang, đah đơm mơ đah mattơngai lik. Sền gŏ tĕ lơgar mơ mat tòm mê dê, tài bơh mê rơp ò tiă Jordan do.

²⁸Mơya ai tĕ jơnau gơnoar sồr Jôsue in, mơ chồl tĕ nùs khai khin cha mơ lơh tĕ khai in pràn kơldang, bơh khai rơp lam làng bol do tiă đah ne mơ lơh bol khai in dòp geh lơgar mơ mê rơp gŏ lơh gơs sre brê.”

²⁹Behơ̆ bol hi ơm wơl tòm thòng tòm toh dê Bet Pheor.