Read koho Yal Wơl 4 Bible Online

Yal Wơl 4 - koho bible

Yal Wơl 4

¹Ơ Israel, tŭ do iat tĕ ală bơta lơh nền mơ ală bơta boh lam mơ añ rơp bơto bol mê. Lơh jat ală bơta hơ̆ tồ bol mê geh kis mơ rgơi mut mơ dòp geh lơgar Jehôwa Yàng Tom Trồ ală ồng pàng bol mê dê ai bol mê in.

²Bañ bơtơl jơnau lơi hơđang ală jơnau mơ añ sồr bol mê mơ kung bañ pơndut jơnau lơi bơh di ală jơnau hơ̆, mơya prap gàr tĕ ală jơnau sồr Jehôwa Yàng Tom Trồ bol mê dê mơ añ ai bol in.

³Mat bol mê neh gŏ ală bơta mơ Yàng Jehôwa neh lơh tòm broă Baal Pheor. Jehôwa Yàng Tom Trồ bol mê dê neh tơnroh bơh digùl bol mê jơh ală cau jat Baal Pheor,

⁴mơya ală bol mê la cau dòn song mơ Jehôwa Yàng Tom Trồ bol mê dê gen gam kis tus di ngai do.

⁵Sền tĕ, añ neh bơto bol mê in git ală bơta lơh nền mơ ală bơta boh lam mơ Jehôwa Yàng Tom Trồ añ jê neh sồr añ, tồ bol mê rgơi lơh jat tòm lơgar bol mê rơp mut mơ dòp lơh gơs sre brê.

⁶Kơrhia tĕ prap gàr ală bơta hơ̆, bơh ală bơta hơ̆ rơp sơnio bơta jak chài mơ git wă bol mê dê ală làng bol in, bol khai rơp kơno bơh jơh ală bơta lơh nền do mơ đơs lah: “Di ngan làng bol dờng do la dô nơm làng bol jak chài mơ git wă.”

⁷Bơh gơs làng bol dờng lơi ndai gơs dô nă yàng bol khai dê ơm rềp mơ bol khai be Jehôwa Yàng Tom Trồ bol he dê ơm rềp mơ bol he tòm tŭ bol he hòi dan mơ Kơnràñ sơl ơ?

⁸Mơ gơs làng bol lơi ndai dờng geh ală bơta lơh nền mơ ală bơta boh lam song ring be jơh tơl bơta boh lam mơ añ ơn di đap bol mê tòm ngai do sơl ơ?

⁹Mìng pal kơrhia mơ sền gàr nền cê să tòm bol mê dê tồ bol mê ò hŭi ală bơta mơ mat bol mê neh sền gŏ, hala sang lòi ală bơta hơ̆ bơh di nùs tồr bol mê tòm jơh rài kis bol mê dê. Bơto ală bơta hơ̆ ală kòn sau bol mê in, mơ ală kòn sau tơnơ̆ mơ bol khai tai.

¹⁰Kah tĕ ngai mơ bol mê neh ntào di đap Jehôwa Yàng Tom Trồ bol mê dê tòm Hôrep, tòm tŭ Kơnràñ đơs mơ añ lah: “Hòi pơjum tĕ làng bol di đap Añ nàng iat ală jơnau Añ đơs tồ bol khai rgơi bơtê duh rngòt di Añ tòm jơh rài bol khai kis tòm lơgar mơ rgơi bơto ală bơta hơ̆ ală kòn sau bol khai in.”

¹¹Bol mê neh tus rềp mơ ntào di jơng mơnơm tòm tŭ hơđang mơnơm gơcrà tus hơ ală tap trồ. Bal mơ mhwal jù mơ bơta klam jơngo cik.

¹²Gen Yàng Jehôwa neh đơs mơ bol mê bơh digùl ồs. Bol mê neh kơno sap đơs mơya ò gŏ rùp să lơi; gơs mìng sap đơs lơm.

¹³Kơnràñ neh yal tơlik bol mê in bơta ho bal Kơnràñ dê, Jơt Bơta Sồr Lam mơ Kơnràñ ai jơnau gơnoar sồr bol mê pal lơh jat, lồc behơ̆ neh cih ală bơta hơ̆ hơđang bàr nơm mpàn mơ lŭ.

¹⁴Mơ Yàng Jehôwa sồr añ bơto bol mê in git ală bơta lơh nền mơ ală bơta boh lam mơ bol mê pal lơh jat tòm lơgar mơ bol mê rơp tiă Jordan nàng dòp geh lơh gơs sre brê.

¹⁵Tài bơh bol mê ò gŏ dô nơm rùp să lơi tòm ngai Yàng Jehôwa neh đơs mơ bol mê tòm Hôrep bơh digùl lơmpiat ồs, gen tàng kơrhia hàñ tĕ să tòm bol mê,

¹⁶tồ bol mê ò gơlik gơs ƀơ̆ iơh mơ lơh să tòm bol mê in dô nơm rùp ràk, dô nơm rùp duh khoai dờng hala dềt, gơlơh kung be dô nă cau klau hala dô nă cau ùr,

¹⁷hala gơlơh be dô nơm phan poan jơng hơđang ù hala dô nơm sềm par hơđang trồ,

¹⁸hala be dô nơm phan neh geh crơng gơs lòt wañ hơđang ù tiah hala dô nơm ka lơi tòm dà hơđơm ù.

¹⁹Mơ tòm tŭ bol mê tơnggòr sền hơđang trồ mơ gŏ mattơngai, mat kơnhai mơ ală sơmañ, jơh ală gơnap gơnoar hơđang trồ, gen bañ gơkòl ơniai mơ kun bồ duh khoai ală phan mơ Jehôwa Yàng Tom Trồ bol mê dê neh tòmpà jơh ală làng bol in ơm hơđang ù.

²⁰Mơya đah pơnah mơ bol mê gen Yàng Jehôwa neh tă tơlik bol mê bơh di bơnhă ồs gơm lề lòs, lik bơh di Ejiptơ nàng gơs dô nơm làng bol gơrê is mơ Kơnràñ kung be neh gơs tòm ngai do.

²¹Yàng Jehôwa neh gơhào gơjrañ dê añ tài bơh bol mê, mơ Kơnràñ neh srat să hơ nền kràñ cê lah añ rơp ò geh lòt gan Jordan mơ mut tòm lơgar niam mơ Jehôwa Yàng Tom Trồ bol mê dê ai bol mê in lơh gơs sre brê.

²²Añ rơp chơt tòm lơgar do, añ rơp ò tiă Jordan ò; mơya bol mê rơp tiă đah ne mơ dòp geh ù tiah niam hơ̆ lơh gơs phan tòm.

²³Kơrhia hàñ bañ hŭi bơta ho bal Jehôwa Yàng Tom Trồ bol mê dê mơ Kơnràñ neh bơtào gơs mơ bol mê; bañ lơh să tòm bol mê in dô nơm rùp ràk gơlơh kung be phan lơi mơ Jehôwa Yàng Tom Trồ bol mê dê neh bơkơ̆u.

²⁴Bơh Jehôwa Yàng Tom Trồ bol mê dê la dô nơm ồs sa pơrguc, dô nă Yàng Tom Trồ ƀoah pơrñat.

²⁵Tơnơ̆ mơ tŭ bol mê neh gơs ală kòn mơ ală sau mơ neh ơm tòm lơgar jŏ rau, dilah tòm tŭ hơ̆ bol mê gơlik gơs ƀơ̆ iơh tài bơh lơh rùp ràk lơi nàng duh khoai, lơh bơta iơh bơsak di đap mat Jehôwa Yàng Tom Trồ bol mê dê mơ bơrcek Kơnràñ gơhào gơjrañ,

²⁶Añ hòi trồ mơ tiah lơh cơng tòmdră mơ bol mê tòm ngai do la bol mê rơp kong roh rui mhar bơh di ù tiah mơ bol mê neh tiă Jordan nàng dòp lơh gơs sre brê. Bol mê rơp ò kis jŏ tòm lơgar hơ̆ mơ ngan la rơp kong tơnroh.

²⁷Yàng Jehôwa rơp rsìh bol mê digùl ală làng bol, mơ mìng dô pơnah dềt tòm bol mê rơp gam kis digùl ală làng bol mơ Yàng Jehôwa rơp cèng bol mê tus.

²⁸Tềng hơ̆, bol mê rơp duh khoai ală yàng bơh tê cau mòn gơs mơ chi, mơ lŭ, la ală yàng ò rgơi gŏ, ò rgơi kơno, ò rgơi sa hala ƀô.

²⁹Mơya bơh tềng hơ̆ bol mê rơp jòi jat Jehôwa Yàng Tom Trồ bol mê dê, bol mê rơp jòi bàn Kơnràñ dilah bol mê jơh nùs jơh hwềng soàn jòi jat Kơnràñ.

³⁰Tòm tŭ bol mê gơs bơta bòl glar kalke mơ jơh ală bơta do gơlik gơs di bol mê, gen tòm ală ngai lồi dut bol mê rơp rê wơl hơ Jehôwa Yàng Tom Trồ bol mê dê mơ dòn bơr Kơnràñ.

³¹Bơh Jehôwa Yàng Tom Trồ bol mê dê la Yàng Tom Trồ gơs nùs nđàc sơngit, Kơnràñ rơp ò sang lòi hala tơnroh bol mê hala lòi hŭi bơta ho bal mơ ală ồng pàng bol mê dê mơ Kơnràñ neh srat sa ho bal nàng lơh nền.

³²Tŭ do lùp tĕ bơh ală ngai yau òr, jŏ jòng lài mơ pah rài bol mê dê, bơh ngai Yàng Tom Trồ neh crơng gơs kòn mơnus hơđang plai ù; lùp tĕ bơh dê jơng ală tap trồ do tus hơ đah ne.

³³Gơs bơta lơi dờng behơ̆ neh gơlik gơs, hala gơs bơta lơi ndròm bal behơ̆ neh kơno cau yal sơl ơ? Gơs làng bol lơi neh kơno sap Yàng Tom Trồ đơs bơh tòm ồs be bol mê neh kơno mơ gam kis sơl ơ?

³⁴Gơs yàng lơi ndai neh lòng tă tơlik khai in dô nơm làng bol bơh di dô nơm làng bol ndai kơnòm di bơta pơrlòng, ală bơta krơi tềl is, bơta tòmlơh, bơh dô nơm tê gơnoar pràn mơ tơwòr tê pò ơnàng, hala bơh ală broă dờng mơ pal rngòt rngơt, be jơh ală bơta Yàng Tom Trồ bol mê dê neh lơh bol mê in tòm Ejiptơ di đap mat tòm bol mê dê sơl ơ?

³⁵Ală bơta hơ̆ neh ràng tơlik bol mê in sền gŏ tồ bol mê rgơi git lah Jehôwa la Yàng Tom Trồ; rlau mơ Kơnràñ ò gơs yàng lơi ndai.

³⁶Bơh hơđang trồ, Kơnràñ neh ai bol mê in kơno sap đơs Kơnràñ dê tồ bơto pơniam wơl bol mê. Hơđang ù Kơnràñ neh ràng tơlik bol mê in sền gŏ ồs dờng Kơnràñ dê, mơ bol mê neh kơno ală jơnau đơs Kơnràñ dê bơh tòm ồs.

³⁷Tài bơh Kơnràñ kòñ gơboh ală ồng pàng bol mê dê mơ neh sac rwah ală kòn sau tơnơ̆ mơ bol khai, Kơnràñ neh cèng bol mê lik bơh di Ejiptơ kơnòm di Bơta Gơs Mat Kơnràñ dê, bơh gơnap gơnoar dờng Kơnràñ dê,

³⁸tồ bơtrơh tơlik bơh di đap bol mê ală làng bol dờng rlau mơ pràn rlau mơ bol mê mơ cèng bol mê mut tòm lơgar bol khai dê nàng ai bol mê in lơh gơs sre brê be neh gơs tòm ngai do.

³⁹Gen tàng tòm ngai do, đal git tĕ mơ prap gàr tĕ tòm nùs lah Jehôwa la Yàng Tom Trồ hơđang trồ ne mơ hơđơm plai ù do. Ò gơs yàng lơi ndai tai be Kơnràñ.

⁴⁰Prap gàr tĕ ală bơta lơh nền mơ ală bơta sồr lam Kơnràñ dê mơ añ ai bol mê in tòm ngai do, tồ ală bơta rơp gơlik gơs niam bol mê in mơ ală kòn sau bol mê in tơnơ̆ mơ bol mê, nàng bol mê rgơi geh kis jŏ jòng tòm lơgar mơ Jehôwa Yàng Tom Trồ bol mê dê ai bol mê in gam sùm sùm.

⁴¹Lồc behơ̆ Môise ơn is pe nơm ƀòn dờng đah mattơngai lik Jordan dê,

⁴²nàng cau lơi neh tơnchơt cau rgơi dô ơm tềng hơ̆, gơs cau lơi gơtup gơtơl di tơnchơt cau ơm rềp mơ khai, ò gơs nùs gơjrañ hala kòñ tơnchơt. Khai rgơi dô tus hơ dô nơm tòm ală ƀòn dờng do nàng kìng crŭ să tồ geh kis.

⁴³Ală ƀòn dờng hơ̆ la: Bejer tòm ƀlàng ring ngềt ngơt ală cau Ruben in; Ramôt tòm Galaat ală cau Gat in, mơ Gôlan tòm Basan ală cau Manase in.

⁴⁴Do la bơta boh lam mơ Môise neh ơn di đap ală cau Israel.

⁴⁵Hơ̆ la ală sơnoa rnoas, ală bơta lơh nền mơ ală bơta boh lam mơ Môise neh ai bol khai in tòm tŭ bol khai lik lòt bơh di Ejiptơ

⁴⁶mơ neh ơm tòm thòng rềp di Bet Pheor đah mattơngai lik Jordan dê, tòm lơgar Sihôn bơtau cau Amôrit dê, la bơtau at bồ tòm Hesbôn mơ neh kong ală cau Israel mơ Môise lơh alah tòm tŭ bol khai lik bơh di Ejiptơ.

⁴⁷Bol khai ai lơgar khai dê mơ lơgar Ok bơtau Basan dê lơh gơs sre brê, hơ̆ la bàr nă cau bơtau Amôrit ơm đah mattơngai lik Jordan dê.

⁴⁸Lơgar do gơ lòt ngài bơh di Arôer hơđang gah thòng Arnôn tus hơ mơnơm Siriôn,

⁴⁹bal mơ gơ jơh Arabah đah mattơngai lik Jordan, ngài tus di dàlềng kơnhwàl Arabah, hơđơm jơng mơnơm Pisgah.