Read koho Yal Wơl 5 Bible Online

Yal Wơl 5 - koho bible

Yal Wơl 5

¹Môise pơjum jơh Israel mơ đơs lah: “Ơ Israel, iat tĕ ală bơta lơh nền mơ ală bơta boh lam mơ añ bơto yal tòm tồr bol mê tòm ngai do. Bơtê tĕ mơ lơh nền lơh jat ală bơta hơ̆.

²Jehôwa Yàng Tom Trồ bol he dê neh lơh dô bơta ho bal mơ bol he tòm Hôrep.

³Yàng Jehôwa ò di lơh bơta ho bal mơ ală ồng pàng bol he dê mơya Yàng Jehôwa neh lơh bơta ho bal do mơ bol he, la ală cau gam kis tòm ngai do.

⁴Yàng Jehôwa neh đơs mơ bol mê mat tòm toh mat bơh tòm ồs hơđang mơnơm.

⁵(Tòm tŭ hơ̆ añ ntào digùl Yàng Jehôwa mơ bol mê nàng bơto yal bol mê in jơnau đơs Yàng Jehôwa dê, tài bơh bol mê rngòt di ồs mơ ò guh hơđang mơnơm.) Mơ Kơnràñ đơs lah:

⁶‘Añ la Jehôwa Yàng Tom Trồ bol mê dê, la Bơtau neh tă cèng bol mê lik bơh di Ejiptơ, bơh di lơgar bol mê ơm dĭ.

⁷Bol mê bañ gơs ală yàng lơi ndai tai di đap Añ.

⁸Bol mê bañ lơh să tòm he in dô nơm rùp duh khoai lơi gơs rùp să kung be phan lơi hơđang trồ, hala hơđơm ù, hala tòm dà jrô.

⁹Bol mê bañ cùn khoai bol gơ hala duh khoai bol gơ; bơh Añ la Jehôwa Yàng Tom Trồ bol mê dê, la Yàng Tom Trồ ƀoah pơrñat, lơh glài kòn sau bơh tồi glài ală ồng pàng tus di pe poan rài cau lơi pơndang sang Añ,

¹⁰mơya ràng tơlik bơta kòñ gơboh rbô rài ală cau in kòñ gơboh di Añ mơ prap gàr ală bơta sồr lam Añ jê.

¹¹Bol mê ò di ngui khat gơboh sơnđan Jehôwa Yàng Tom Trồ bol mê dê, bơh Yàng Jehôwa rơp ò lòi cau lơi ngui tìs sơnđan Kơnràñ dê la cau ò gơs glài.

¹²Kah prap tĕ ngai Saƀat lơh gơs ngai sàng goh jat be Jehôwa Yàng Tom Trồ bol mê dê neh sồr bol mê.

¹³Bol mê rơp lơh broă tòm prau ngai mơ lơh tĕ jơh ală broă bol mê dê,

¹⁴mơya ngai poh la ngai Saƀat Jehôwa Yàng Tom Trồ bol mê dê. Tòm ngai hơ̆ bol mê ò di lơh broă lơi, bol mê, kòn klau hala kòn ùr bol mê dê, cau klau duh broă hala cau ùr duh broă bol mê dê, kơnrồ, alàng hala phan poan jơng lơi ndai bol mê dê, hala cau nac crih tòm hìu bol mê dê, nàng cau klau duh broă mơ cau ùr duh broă bol mê dê rgơi ơm rlô kung be bol mê.

¹⁵Kah tĕ lah bol mê neh ơm dĭ tòm Ejiptơ mơ hơ̆ la Jehôwa Yàng Tom Trồ bol mê dê neh ngui mpàng tê gơnoar pràn mơ tơwòr tê pò tơlik nàng cèng bol mê lik klàs bơh di tiah hơ̆. Gen tàng Jehôwa Yàng Tom Trồ bol mê dê neh sồr bol mê prap gàr ngai Saƀat.

¹⁶Dòn duh tĕ mè bèp bol mê dê jat be jơnau Jehôwa Yàng Tom Trồ bol mê dê neh sồr bol mê, tồ bol mê rgơi kis jŏ mơ bol mê rgơi geh lơngai tòm lơgar mơ Jehôwa Yàng Tom Trồ bol mê dê ai bol mê in.

¹⁷Bol mê bañ tơnchơt cau.

¹⁸Bol mê bañ tìs glài rềs àr bơrnàn.

¹⁹Bol mê bañ ntung kơñau.

²⁰Bol mê bañ lơh cơng blac tòmdră mơ cau ơm rềp bol mê dê.

²¹Bol mê bañ hàm kòñ bau cau ơm rềp di bol mê. Bol mê bañ gơs nùs hàm hà hìu ơm hala ù tiah khai dê, cau klau duh broă hala cau ùr duh broă khai dê, kơnrồ hala alàng khai dê, hala phan lơi gơrê bal mơ cau ơm rềp di bol mê.’

²²Hơ̆ la ală bơta sồr lam mơ Yàng Jehôwa neh ai sap đơs dờng bơto yal jơh mpồl jơnum bol mê dê tềng hơ̆ hơđang mơnơm bơh di ồs, mhwal mơ bơta klam jơngo cik; mơ Kơnràñ ò gŏ đơs bơtơl jơnau lơi ndai tai. Lồc behơ̆ Kơnràñ neh cih ală jơnau hơ̆ hơđang bàr nơm mpàn lŭ mơ ai añ in.

²³Tòm tŭ bol mê neh kơno sap đơs lik bơh di bơta klam jơngo tòm tŭ mơnơm gơs ồs sa hơng gen jơh ală cau at bồ jơh ală jơi bơtiàn bol mê dê mơ ală cau kwang kra bol mê dê lòt tus hơ añ,

²⁴mơ bol mê đơs lah: ‘Jehôwa Yàng Tom Trồ bol hi dê neh ràng tơlik bol hi in bơta gơklŏ mơ bơta ryŭ ryơm Kơnràñ dê, mơ bol hi neh kơno sap đơs Kơnràñ dê bơh tòm ồs. Ngai do, bol hi neh gŏ lah dô nă cau rgơi gam kis bulah Yàng Tom Trồ đơs mơ bol khai.

²⁵Mơya tŭ do ñchi bơh tài bol hi pal chơt taih? Ồs dờng do rơp sa roh bol hi, mơ bol hi rơp chơt dilah bol hi gam kơno jŏ tai sap đơs Jehôwa Yàng Tom Trồ bol hi dê.

²⁶Bơh tŭ lơi gơs kòn mơnus lơi neh kơno sap đơs Yàng Tom Trồ kis gam sùm sùm đơs bơh tòm ồs kung be bol hi neh kơno mơ gam kis taih?

²⁷Să tòm ồng, tus tĕ rềp mơ ơm iat jơh ală jơnau mơ Jehôwa Yàng Tom Trồ bol hi dê đơs. Lồc behơ̆ yal wơl bol hi in ală jơnau lơi mơ Yàng Tom Trồ bol hi dê đơs mơ ồng. Bol hi rơp ơm iat mơ dòn bơr.’

²⁸Yàng Jehôwa neh kơno bol mê tòm tŭ bol mê đơs mơ añ, mơ Yàng Jehôwa đơs mơ añ lah: ‘Añ neh kơno ñchi jơnau làng bol do neh đơs mơ mê. Jơh ală jơnau bol khai neh đơs la niam.

²⁹Dilah làng bol do gơs nùs duh rngòt di Añ sùm, mơ òs prap gàr jơh ală jơnau sồr Añ jê, behơ̆ sồng khai mơ kòn sau bol khai rơp geh lơngai sùm sùm!

³⁰Lòt tĕ yal bol khai in mơ sồr bol khai rê wơl hơ sàl ơm bol khai dê.

³¹Mơya mê ơm wơl tềng do bal mơ Añ nàng Añ ai mê in jơh ală jơnau sồr, ală bơta lơh nền mơ ală bơta boh lam mơ mê rơp bơto bol khai lơh jat tòm lơgar Añ rơp ai bol khai in dòp geh lơh gơs phan tòm.’

³²Behơ̆ kơrhia tĕ lơh jat ală bơta mơ Jehôwa Yàng Tom Trồ bol mê dê neh sồr bol mê; bañ pơrlac wèt đah ma hala đah kiau.

³³Lòt tĕ tòm jơh ală gùng dà mơ Jehôwa Yàng Tom Trồ bol mê dê neh sồr bol mê tồ bol mê in geh kis, geh bơtoah bơtoài mơ geh ơm jŏ jòng tòm lơgar mơ bol mê rơp dòp geh.”