Read koho Yal Wơl 6 Bible Online

Yal Wơl 6 - koho bible

Yal Wơl 6

¹Do la ală gơnoar sồr, ală bơta lơh nền mơ ală bơta boh lam mơ Jehôwa Yàng Tom Trồ bol mê dê neh sồr añ bơto bol mê prap gàr tòm lơgar mơ bol mê rơp tiă Jordan mơ dòp geh,

²nàng bol mê, ală kòn sau bol mê dê mơ ală kòn sau bol khai dê tơnơ̆ mơ bol khai rơp duh rngòt di Jehôwa Yàng Tom Trồ bol mê dê tòm jơh rài kis bol mê dê, bơh bơta prap gàr jơh ală bơta lơh nền mơ ală gơnoar sồr mơ añ neh ai bol mê in tồ bol mê rơp geh kis jŏ.

³Ơ Israel, ơm iat tĕ mơ kơrhia dòn bơr lơh jat nàng jơh ală bơta rơp gơlik niam bol mê in, mơ bol mê rơp gơlik gơs rơ̆sơmpài ràipơjềng tòm lơgar lìu làc dà toh mơ dà lơwe tòm toh kung be Jehôwa Yàng Tom Trồ ală ồng pàng bol mê dê neh ho mơ bol mê.

⁴Ơ Israel, ơm iat tĕ; Jehôwa Yàng Tom Trồ bol he dê la Jehôwa gơs mìng dô nă.

⁵Oh mi pal jơh nùs, jơh hwềng soàn, jơh pràn, mơ kòñ gơboh di Jehôwa la Yàng Tom Trồ oh mi dê.

⁶Ală bơta sồr lam do mơ añ ai bol mê in tòm ngai do pal prap tĕ tòm nùs bol mê dê.

⁷Yal wơl tĕ ală bơta hơ̆ ală kòn sau bol mê in, đơs tĕ bơh ală bơta hơ̆ tòm tŭ bol mê nggui tòm hìu mơ tòm tŭ bol mê lòt rò gùng, tòm tŭ bol mê bic rlô mơ tòm tŭ bol mê guh.

⁸Kơt tĕ ală bơta hơ̆ lơh gơs rùp sơnio di ală mpàng tê bol mê dê mơ di bìng liang bol mê dê.

⁹Cih tĕ ală bơta hơ̆ di ală jrong mpồng hìu ơm bol mê dê mơ di ală mpồng ƀòn bol mê dê.

¹⁰Tòm tŭ Jehôwa Yàng Tom Trồ bol mê dê cèng bol mê mut tòm lơgar mơ Kơnràñ neh srat să ai ală ồng pàng bol mê dê la Abraham, Isak mơ Jakôp rơp ai bol mê in, dô nơm lơgar gơs ală ƀòn dờng pas sơm ngan mơ bol mê ò gŏ bơt bơtào,

¹¹ală hìu bềng lìu ală phan niam mơ bol mê ò rcang, ală tơrlung dà mơ bol mê ò tò, ală suơn ño mơ suơn ôlibe bol mê ò tam; gen tòm tŭ bol mê sa hòm lai,

¹²gen bol mê kơrhia tĕ nàng ò lòi hŭi Yàng Jehôwa la Bơtau neh tă tơlik bol mê bơh di Ejiptơ, bơh di lơgar ơm dĭ.

¹³Rngòt tĕ di Jehôwa Yàng Tom Trồ bol mê dê, duh broă mìng dô nă Kơnràñ lơm mơ ai sơnđan Kơnràñ dê srat să ho pơgon.

¹⁴Bañ lòt jat ală yàng ndai la ală yàng ală làng bol ơm gùt dar bol mê dê;

¹⁵bơh Jehôwa Yàng Tom Trồ bol mê dê, Bơtau ơm digùl bol mê, la Yàng Tom Trồ ƀoah pơrñat mơ bơta gơjrañ dờng Kơnràñ dê rơp gơhào khuh tòmdră mơ bol mê, mơ Kơnràñ rơp tơnroh bol mê bơh di hơđang ù.

¹⁶Bañ lòng Jehôwa Yàng Tom Trồ bol mê dê kung be bol mê neh lơh tòm Masa.

¹⁷Lơh nền tĕ prap gàr ală jơnau sồr Jehôwa Yàng Tom Trồ bol mê dê mơ ală sơnoa rnoas mơ jơnau lơh nền mơ Kơnràñ neh ai bol mê in.

¹⁸Lơh tĕ bơta lơi dimơ niam di đap Yàng Jehôwa, nàng ală bơta rơp gơlik niam bol mê in, mơ bol mê rgơi mut mơ dòp geh lơgar niam mơ Yàng Jehôwa neh srat să ho ai ală ồng pàng bol mê in,

¹⁹ting bơtrơh tơlik jơh ală cau sò tơm di đap bol mê jat be Yàng Jehôwa neh đơs.

²⁰Tòm ală ngai tơnơ̆, tòm tŭ kòn klau bol mê dê lùp bol mê lah: “Ñchi jơnau gơtha bơh ală sơnoa rnoas, ală bơta lơh nền mơ ală bơta boh lam mơ Jehôwa Yàng Tom Trồ bol he dê neh sồr mè bèp taih?”

²¹Gen đơs tĕ mơ khai lah: “Bol hi neh ơm dĭ duh broă Pharaôn tòm Ejiptơ, mơya Yàng Jehôwa neh ngui tê gơnoar pràn tă cèng bol hi lik bơh Ejiptơ.

²²Yàng Jehôwa neh lơh gơs ală bơta krơi tềl is dờng mơ pal rngòt rngơt ngan hơđang Ejiptơ mơ Pharaôn mơ jơh hìu nhă khai dê.

²³Mơya Kơnràñ neh tă bol hi lik bơh tềng hơ̆ mơ cèng bol hi mut tềng do mơ ai bol hi in lơgar mơ Kơnràñ neh srat să ho ai ală ồng pàng bol hi in.

²⁴Yàng Jehôwa neh ai jơnau gơnoar sồr bol hi pal prap gàr jơh ală jơnau lơh nền do, mơ rngòt di Jehôwa Yàng Tom Trồ bol hi dê, tồ bol hi rơp geh bơtoah bơtoài sùm sùm mơ geh kis kung be tòm ngai do.

²⁵Mơ dilah bol hi kơrhia dòn bơr lơh jat jơh bơta boh lam do di đap Jehôwa Yàng Tom Trồ bol hi dê, be Kơnràñ neh sồr bol hi, gen bol hi neh lơh bơta di ngan.”