Read koho Yal Wơl 7 Bible Online

Yal Wơl 7 - koho bible

Yal Wơl 7

¹Tòm tŭ Jehôwa Yàng Tom Trồ bol mê dê cèng bol mê tus di lơgar mơ bol mê rơp mut mơ dòp geh mơ ting bơtrơh bơh di đap bol mê oă làng bol, hơ̆ la ală cau Hetit, Girgas, Amôr, Kanaan, Pheris, Heb mơ Jebusit, jơh ală la poh làng bol dờng rlau mơ pràn kơldang rlau mơ bol mê,

²mơ tòm tŭ Jehôwa Yàng Tom Trồ bol mê dê neh jào bol khai bol mê in mơ bol mê neh lơh alah bol khai, gen bol mê pal tơnroh jơh hir bol khai. Bañ bơtào jơnau tòmho bal lơi mơ bol khai, mơ bañ gơs bơta nđàc sơngit dê bol khai.

³Bañ lap klau tòmbau ùr mơ bol khai. Bañ ai ală kòn ùr bol mê dê bau mơ ală kòn klau bol khai dê hala ai ală kòn ùr bol khai dê bau mơ ală kòn klau bol mê dê,

⁴bơh bol khai rơp pơrlac ngài ală kòn sau bol mê dê ò lòt jat Añ tai; mơ rơp duh khoai ală yàng ndai, mơ bơta gơjrañ Yàng Jehôwa dê rơp gơhào khuh tòmdră mơ bol mê mơ rơp tơnroh bol mê mhar ngan.

⁵Bol mê pal lơh gơwèt hơ bol khai be do: Sòr tơrlah ală cơnòng duh khoai bol khai dê, jan bơcah ală lŭ duh khoai bol khai dê, koh tơnroh ală jrong duh khoai Asera bol khai dê mơ chu ală rùp ràk bol khai dê tòm ồs.

⁶Bơh bol mê la dô nơm làng bol ơn is sàng goh Jehôwa Yàng Tom Trồ bol mê in. Jehôwa Yàng Tom Trồ bol mê dê neh sac rwah bol mê bơh digùl jơh ală làng bol ơm hơđang plai ù nàng lơh gơs làng bol Kơnràñ dê, lơh gơs phan tòm kas màng Kơnràñ dê.

⁷Yàng Jehôwa ò di neh kòñ gơboh di bol mê mơ sac rwah bol mê tài bơh bol mê la dô nơm làng bol dờng rlau mơ ală làng bol ndai, bơh bol mê la dô nơm làng bol gơs dô êt cau rlau mơ jơh ală làng bol ndai.

⁸Mơya hơ̆ la tài bơh Yàng Jehôwa neh kòñ gơboh di bol mê mơ prap gàr jơnau srat să ho nền mơ ală ồng pàng bol mê dê mơ Kơnràñ neh ngui tê gơnoar pràn tă tơlik bol mê mơ dong tơwài bol mê bơh di lơgar ơm dĭ, klàs bơh di gơnoar pràn Pharaôn bơtau Ejiptơ dê.

⁹Gen tàng, dòp git tĕ Jehôwa Yàng Tom Trồ bol mê dê la Yàng Tom Trồ: Kơnràñ la Yàng Tom Trồ lơh jat jơnau ho Kơnràñ dê, prap gàr bơta ho bal kòñ gơboh Kơnràñ dê tus di rbô rài ală cau in kòñ gơboh di Kơnràñ mơ prap gàr ală bơta sồr lam Kơnràñ dê.

¹⁰Mơya cau lơi gơjrañ di Kơnràñ, gen Kơnràñ rơp tơm wơl bơta roh rui mo di đap mat bol khai; Kơnràñ rơp ò lơh òbat tòm bơta tơm wơl mo di đap mat bol khai ală cau gơjrañ di Kơnràñ.

¹¹Gen tàng, ngac ngar lơh jat tĕ ală jơnau gơnoar sồr, ală bơta lơh nền mơ ală bơta boh lam añ ai bol mê in tòm ngai do.

¹²Dilah bol mê ơn nùs tồr dê ală bơta boh lam do mơ kơrhia lòt jat ală bơta hơ̆ gen Jehôwa Yàng Tom Trồ bol mê dê rơp prap gàr bơta ho bal bơh bơta kòñ gơboh mơ bol mê tòm toh jat be Kơnràñ neh srat să ho nền mơ ală ồng pàng bol mê dê.

¹³Kơnràñ rơp kòñ gơboh di bol mê mơ ai lơngai bol mê in mơ lơh jơi bơtiàn bol mê dê gơbơtơl oă. Kơnràñ rơp ai lơngai plai đo hìu kòn bol mê dê, cồng nha ù tiah bol mê dê, hơ̆ la kòi mbo, tơrnòm pa mơ mơñà, ală kơnrồ tòm ală mpồl phan poan jơng bol mê dê mơ ală belàt kòn tòm ală mpồl belàt bol mê dê tòm lơgar mơ Kơnràñ neh srat să ho nền mơ ală ồng pàng bol mê dê ai bol mê in.

¹⁴Bol mê rơp geh lơngai rlau mơ jơh ală làng bol ndai; ò gơs cau klau cau ùr lơi tòm bol mê rơp ò gơs kòn, ală phan poan jơng tòm ală mpồl bol mê dê kung rơp ò siơ̆u ală kòn dềt.

¹⁵Yàng Jehôwa rơp sền gàr bol mê klàs bơh di ală bơta kòp jê. Kơnràñ rơp ò pơnjê bol mê bơh ală bơta kòp jê iơh rmơh mơ bol mê neh git làm tòm Ejiptơ, mơya Kơnràñ rơp tơndùh ală bơta kòp jê hơ̆ hơđang jơh ală cau gơjrañ kơuềng di bol mê.

¹⁶Bol mê pal tơnroh jơh ală làng bol mơ Yàng Jehôwa jào tòm tê bol mê dê. Bañ gơs nùs nđàc sơngit di bol khai mơ bañ duh khoai ală yàng bol khai dê, bơh bơta hơ̆ rơp kung be dô nơm dă bol mê in.

¹⁷Bol mê digơlan rơp đơs is mơ să tòm he lah: “Ală làng bol do la pràn kơldang rlau mơ bol hi. Mbe bol hi rgơi ting bơtrơh bol khai taih?”

¹⁸Mơya bañ rngòt di bol khai; kah tĕ nền cê ală bơta mơ Jehôwa Yàng Tom Trồ bol mê dê neh lơh di Pharaôn mơ jơh ală cau Ejiptơ.

¹⁹Bol mê neh sền gŏ mơ mat tòm bol mê dê ală bơta pơrlòng dờng ngan, ală bơta krơi tềl is, tê gơnoar pràn pò dờng mơ Jehôwa Yàng Tom Trồ bol mê dê neh ngui nàng cèng bol mê lik lòt bơh hơ̆. Jehôwa Yàng Tom Trồ bol mê dê kung rơp lơh behơ̆ gơwèt mơ jơh ală làng bol mơ tŭ do bol mê rngòt.

²⁰Rlau mơ hơ̆, Jehôwa Yàng Tom Trồ bol mê dê rơp sồr ală òng tus digùl bol khai jơl tus di tŭ tơnroh jơh ală cau gam kis neh ntoat dô bơh di bol mê.

²¹Bañ rngòt rngơt di bol khai bơh Jehôwa Yàng Tom Trồ bol mê dê la Bơtau ơm digùl bol mê la dờng mơ pal rngòt ngan.

²²Jehôwa Yàng Tom Trồ bol mê dê rơp rhòi rhòi ting bơtrơh ală làng bol hơ̆ bơh di đap bol mê. Bol mê ò geh gơnoar tơnroh jơh hir bol khai tòm dô dơ̆ lĕ, rngòt ală phan poan jơng tòm brê rơp gơbơtơl oă gùt dar bol mê.

²³Mơya Jehôwa Yàng Tom Trồ bol mê dê rơp jào bol khai tòm tê bol mê dê, mơ sang bol khai tòm bơta rngòt rngơt dờng ngan, jơl tus di tŭ bol khai gơkòl tơnroh jơh.

²⁴Kơnràñ rơp ơn ală cau bơtau bol khai dê tòm tê bol mê, mơ bol mê rơp jùt jơh ală sơnđan bol khai bơh di ù tiah hơđơm trồ. Ò gơs cau lơi rgơi ñă ntào tòmdră mơ bol mê, bol mê rơp tơnroh bol khai.

²⁵Ală rùp duh khoai ală yàng bol khai dê, bol mê pal chu jơh tòm ồs. Bañ hàm hà priă mơ màh di bol gơ, mơ bañ ai gơ să tòm bol mê in, rngòt bol mê rơp gơkòl yar dă gơ dê, bơh gơ la cù kìr di đap Jehôwa Yàng Tom Trồ bol mê dê.

²⁶Bañ cèng brê dô nơm phan cù kìr tus tòm hìu bol mê dê, rngòt bol mê rơp kong ơn is nàng tơnroh kung be gơ. Cù kìr mơ sang lòi tĕ gơ bơh gơ neh kòl ơn is nàng tơnroh.