Read koho Yal Wơl 9 Bible Online

Yal Wơl 9 - koho bible

Yal Wơl 9

¹Ơ Israel, iat tĕ, ngai do bol mê rơp tiă Jordan nàng tòmpìt ai ală lơgar dờng rlau mơ pràn rlau mơ bol mê, gơs ală ƀòn dờng ơnàng ơm tòm ală dơrñang kơ̆ cê jơnhoa tus hơ trồ.

²Làng bol pràn kơldang mơ jòng jơnhoa, hơ̆ la ală kòn sau cau Anakim dê! Bol mê git bơh làng bol hơ̆ mơ neh kơno đơs lah: “Ñcau rgơi ntào jai tòmdră mơ ală cau Anakim taih?”

³Mơya git nền tĕ tòm ngai do lah Jehôwa Yàng Tom Trồ bol mê dê la Bơtau tiă lài mơ bol mê kung be ồs sa hơng. Kơnràñ rơp tơnroh bol khai; Kơnràñ rơp kup bol khai dòn duh di đap bol mê. Mơ bol mê rơp ting bơtrơh bol khai mơ tơnroh jơh hir bol khai dô bă mhar jat be jơnau Yàng Jehôwa neh ho mơ bol mê.

⁴Tơnơ̆ mơ tŭ Jehôwa Yàng Tom Trồ bol mê dê neh ting bơtrơh bol khai bơh di đap bol mê. Gen bañ đơs is lah: “Yàng Jehôwa neh cèng añ tus ting do nàng dòp geh lơgar do tài bơh bơta song ring añ jê.” Ò di ò, mơya hơ̆ la tài bơh bơta iơh bơsak ală làng bol do dê mơ Yàng Jehôwa rơp ting bơtrơh bol khai bơh di đap bol mê.

⁵Hơ̆ ò di la tài bơh bơta song ring hala bơta song ngan bol mê dê mơ bol mê rơp dòp geh lơgar bol khai dê; mơya hơ̆ la tài bơh bơta iơh bơsak ală làng bol do dê mơ Jehôwa Yàng Tom Trồ bol mê dê rơp ting bơtrơh bol khai bơh di đap bol mê, nàng lơh gơlik gơs jơnau mơ Kơnràñ neh srat să ho mơ ală ồng pàng bol mê dê la Abraham, Isak mơ Jakôp.

⁶Gen, git wă tĕ lah hơ̆ ò di la tài bơh bơta song ring mơ Jehôwa Yàng Tom Trồ bol mê dê ai bol mê in lơgar niam do nàng dòp geh lơh gơs phan tòm, bơh bol mê la dô nơm làng bol kơldang bồ.

⁷Kah tĕ bơta do mơ bañ gơs tŭ lơi hŭi mbe bol mê neh bơrcek Jehôwa Yàng Tom Trồ bol mê dê gơhào gơjrañ tòm ƀlàng ngềt ngơt. Bơh di ngai bol mê lik bơh Ejiptơ jơl tus di tŭ bol mê tus hơ tiah do, bol mê kư̆ bơtào tòmdră mơ Yàng Jehôwa sùm.

⁸Tòm Hôrep bol mê neh lơh Yàng Jehôwa in gơhào gơjrañ dờng tian gơs Kơnràñ neh rcang sir nàng tơnroh bol mê.

⁹Tòm tŭ añ guh hơđang mơnơm nàng dòp ală mpàn lŭ, ală mpàn bơta ho bal mơ Yàng Jehôwa neh bơtào mơ bol mê, añ ơm hơđang mơnơm poan jơt ngai mơ poan jơt mang; añ ò sa piang lă mơ ò hùc dà.

¹⁰Yàng Jehôwa neh ai añ in bàr nơm mpàn lŭ gơs jơnau cih tòm hơ̆ bơh ràs tê Yàng Tom Trồ dê. Hơđang ală mpàn lŭ hơ̆ la jơh ală jơnau gơnoar sồr mơ Yàng Jehôwa neh ai bol mê in hơđang mơnơm bơh tòm gùl ồs tòm ngai pơjum mpồl jơnum dê.

¹¹Tus di lồi poan jơt ngai mơ poan jơt mang gen Yàng Jehôwa neh ai añ in bàr nơm mpàn lŭ, la ală mpàn lŭ bơta ho bal dê.

¹²Yàng Jehôwa neh sồr añ lah: “Mù tĕ mo bơh tềng do, tài bơh làng bol mê dê mơ mê neh cèng lik bơh di Ejiptơ neh gơlik gơs iơh rmơh. Bol khai neh mhar pơrlac bơh di ală jơnau Añ neh sồr bol khai mơ bol khai neh tŏ rùp ràk bol khai in.”

¹³Mơ Yàng Jehôwa đơs mơ añ lah: “Añ neh gŏ làng bol do, mơ bol khai ngan la dô nơm làng bol kơldang bồ!

¹⁴Lòi tĕ Añ in nàng Añ tơnroh bol khai mơ jùt sang sơnđan bol khai dê bơh di hơđơm trồ. Mơ Añ rơp lơh mê in gơlik gơs dô nơm làng bol pràn kơldang rlau mơ oă rlau mơ bol khai.”

¹⁵Behơ̆ añ rê wơl mơ mù bơh hơđang mơnơm tòm tŭ gơ gam ồs sa hơng. Mơ bàr nơm mpàn lŭ bơta ho bal gam tòm tê añ.

¹⁶Tòm tŭ añ sền gen ngan añ gŏ bol mê neh tìs glài tòmdră mơ Jehôwa Yàng Tom Trồ bol mê dê, bol mê neh lơh să tòm bol mê in dô nơm rùp ràk tŏ be dô nơm kơnrồ. Bol mê neh mhar wơlke bơh di gùng mơ Yàng Jehôwa neh sồr bol mê lòt jat.

¹⁷Behơ̆ añ neh ai bàr nơm mpàn lŭ mơ sang sơrbì gơ bơh di tê añ, jan bơcah rpot rpet bol gơ di đap mat bol mê.

¹⁸Lồc behơ̆, dô dơ̆ tai añ cùn khoai di đap Yàng Jehôwa tòm poan jơt ngai mơ poan jơt mang; añ ò sa piang lă kung ò hùc dà sơl, tài bơh jơh ală bơta tồi glài mơ bol mê neh lơh tìs, lơh bơta iơh bơsak di đap mat Yàng Jehôwa mơ bơrcek Kơnràñ gơhào gơjrañ.

¹⁹Añ neh rngòt di bơta gơhào gơjrañ mơ bơta gơjrañ dờng Yàng Jehôwa dê, tài bơh Kơnràñ neh gơhào gơjrañ di bol mê tian gơs kòñ tơnroh bol mê. Mơya dô dơ̆ tai Yàng Jehôwa neh iat añ.

²⁰Mơ Yàng Jehôwa kung neh gơjrañ di Arôn tian gơs kòñ tơnroh khai, mơya tòm tŭ hơ̆ añ neh hòi dan Arôn in.

²¹Añ kung neh ai phan bơta tồi glài bol mê dê la kơnrồ kòn mơ bol mê neh lơh gơs mơ chu gơtòm ồs. Lồc behơ̆ añ neh jan bơcah gơ mơ tơnlề gơlik kơmbuh rhền kung be thul mơ tuh thul hơ̆ tòm croh dà gơhòr mù bơh di mơnơm.

²²Bol mê kung neh lơh Yàng Jehôwa in gơhào gơjrañ tòm Tabera, Masa mơ Kiprôt Hathaba.

²³Mơ tòm tŭ Yàng Jehôwa neh sồr bol mê lik lòt bơh di Kades Barnea, Kơnràñ neh đơs lah: “Guh tĕ mơ ai lơgar Añ neh ai bol mê in lơh gơs phan tòm bol mê dê.” Mơya bol mê bơtào tòmdră mơ jơnau gơnoar sồr Jehôwa Yàng Tom Trồ bol mê dê. Bol mê ò dòn kơnòm di Kơnràñ, kung ò dòn bơr Kơnràñ sơl.

²⁴Bol mê sùm sùm bơtào tòmdră mơ Yàng Jehôwa bơh di ngai añ mòng git mơ bol mê.

²⁵Añ cùn khoai di đap Yàng Jehôwa tòm poan jơt ngai mơ poan jơt mang hơ̆, tài bơh Yàng Jehôwa neh đơs lah Kơnràñ rơp tơnroh bol mê.

²⁶Añ hòi dan mơ Yàng Jehôwa mơ đơs lah: Ơ Yàng Jehôwa At Bồ Hơđang Rlau Jơh, dan bañ tơnroh làng bol Kơnràñ dê la sre brê Kơnràñ dê mơ Kơnràñ neh tơwài bơh gơnap gơnoar dờng Kơnràñ dê mơ cèng bơh di Ejiptơ kơnòm di tê gơnoar pràn Kơnràñ dê.

²⁷Dan Kơnràñ kah wơl ală cau duh broă Yàng dê la Abraham, Isak mơ Jakôp. Dan sang lòi bơta kơldang bồ làng bol do dê, bơta iơh bơsak mơ bơta tồi glài bol khai dê.

²⁸Dilah ò behơ̆, lơgar mơ bơh tềng hơ̆ Kơnràñ neh tă cèng bol hi rơp đơs lah: “Tài bơh Yàng Jehôwa ò rgơi cèng bol khai mut tòm lơgar Kơnràñ neh ho ai bol khai in, mơ tài bơh Kơnràñ gơjrañ kơuềng di bol khai gen Kơnràñ neh cèng bol khai nàng tơnchơt bol khai tòm ƀlàng ngềt ngơt.”

²⁹Mơya bol khai la làng bol Kơnràñ dê, la sre brê Kơnràñ dê mơ Kơnràñ neh ngui gơnap gơnoar dờng, tơwòr tê pò dờng Kơnràñ dê mơ cèng bol khai lik bơh hơ̆.