Read koho Jang 1 Bible Online

Jang 1 - koho bible

Jang 1

¹Bơh sơnròp gơs Bơtau Jơnau, Bơtau Jơnau ơm mơ Yàng Tom Trồ, mơ Bơtau Jơnau la Yàng Tom Trồ.

²Bơh sơnròp Bơtau Jơnau ơm mơ Yàng Tom Trồ.

³Jơh ală phan la bơh Kơnràñ crơng gơs, ò gơs phan lơi neh geh crơng gơs la ò bơh Kơnràñ.

⁴Tòm Kơnràñ gơs bơta kis, bơta kis la bơta àng kòn mơnus in.

⁵Bơta àng pơnđàng tòm bơta jơngo, mơ bơta jơngo ò pha rlau mơ bơta àng.

⁶Gơs dô nă cau Yàng Tom Trồ sồr lòt tus, sơnđan la Jang.

⁷Khai lòt tus nàng lơh cơng bơh bơta àng, tồ bơh khai gen jơh ală cau rgơi dòn.

⁸Khai ò di la bơta àng, mơya khai lòt tus nàng lơh cơng bơh bơta àng.

⁹Hơ̆ la bơta àng ngan, neh tus tòm dunnia nàng pơnđàng tơl nă cau in.

¹⁰Bơtau Jơnau neh ơm tòm dunnia, mơ dunnia neh geh crơng gơs bơh Kơnràñ, mơya dunnia ò git đal Kơnràñ.

¹¹Kơnràñ neh tus tòm tiah Kơnràñ, mơya làng bol Kơnràñ ò dòp Kơnràñ.

¹²Mơya dilah cau lơi neh dòp Kơnràñ, hơ̆ la dòn di sơnđan Kơnràñ; gen Kơnràñ ai khai in gơnoar gơlik gơs kòn sau Yàng Tom Trồ dê.

¹³Cau hơ̆ ò di deh bơh mhàm, ò di bơh nùs kòñ poac să, kung ò di bơh nùs kòñ cau dê, mơya deh bơh Yàng Tom Trồ.

¹⁴Bơtau Jơnau neh gơlik gơs poac să, ơm digùl bol he, bềng bơta nđàc mơ jơnau song. Bol he neh sền gŏ bơta gơklŏ Kơnràñ dê, kung be bơta gơklŏ Kòn Dùl dê tus bơh Bèp.

¹⁵Jang lơh cơng bơh Kơnràñ mơ yal dờng lah: “Bơh Bơtau hơ̆ mơ añ neh đơs: ‘Bơtau tus tơnơ̆ añ lin rlau mơ añ, bơh Kơnràñ neh gơs lài mơ añ.’”

¹⁶Bơh tòm bơta lìu làc Kơnràñ dê, jơh ală bol he neh dòp geh bơta nđàc bơtơl hơđang bơta nđàc.

¹⁷Bơh bơta boh lam geh ai bơh Môise, ai bơta nđàc mơ jơnau song tus bơh Yàng Jesu Krist.

¹⁸Ò gơs cau lơi neh gŏ Yàng Tom Trồ, mìng Kòn Dùl ơm tòm nùs Bèp, la Bơtau sơnio bơh Bèp bol he in.

¹⁹Do la jơnau lơh cơng Jang dê tòm tŭ làng bol Juda sồr ală cau gơnoar ơn phan duh khoai mơ cau Lebi bơh Jerusalem lòt tus lùp khai lah: “Ồng la ñcau?”

²⁰Khai yal tơlik, ò pồn bơta lơi lah: “Añ ò di la Bơtau Krist.”

²¹Bol hơ̆ lùp tai lah: “Behơ̆ ồng la ñcau taih? La Eli ơ?” Khai ho lah: “Ò di.” “Behơ̆ ồng la cau gơnoar hwơr ơ?” Khai ho lah: “Ò di.”

²²Gen bol hơ̆ đơs lah: “Behơ̆ ồng la ñcau tồ bol hi in ho wơl mơ ală cau neh sồr bol hi lòt tus. Ồng đơs is să he la ñcau taih?”

²³Khai ho lah: “Añ la jơnau cau hòi driau tòm ƀlàng bràs lah: ‘Bơsong tĕ gùng Yàng dê,’” be gơnoar hwơr Esai neh đơs.

²⁴Ală cau geh sồr lòt tus, la tòm mpồl cau Pharisi.

²⁵Bol hơ̆ lùp tai lah: “Dilah ồng ò di la Bơtau Krist, ò di la Eli, ò di la cau gơnoar hwơr, gen ñchi bơh tài ồng lơh ƀaptem taih?”

²⁶Jang ho lah: “Añ lơh ƀaptem mơ dà, mơya gơs dô Bơtau ơm digùl bol mê mơ bol mê ò git.

²⁷Bơtau hơ̆ tus tơnơ̆ añ, añ ò pal hồ che khŏ Kơnràñ.”

²⁸Ală broă hơ̆ neh gơlik tòm Bethani, đah mattơngai lik hiòng Jordan, la tiah Jang lơh ƀaptem.

²⁹Ngai tơnơ̆, Jang gŏ Yàng Jesu lòt tus hơ khai gen đơs lah: “Ne, Belàt Kòn Yàng Tom Trồ dê, la Bơtau tă sang tồi glài dunnia dê.

³⁰Hơ̆ la Bơtau mơ añ neh đơs: ‘Bơtau tus tơnơ̆ añ la lin rlau mơ añ, bơh Kơnràñ neh gơs lài mơ añ.’

³¹Añ ò git Kơnràñ, mơya añ neh lòt tus lơh ƀaptem mơ dà, nàng Kơnràñ in geh yal tơlik làng bol Israel in.”

³²Jang lơh cơng tai lah: “Añ neh gŏ Yàng Hwềng bơh đang trồ mù be sềm ntòp rơp hơđang Kơnràñ.

³³Añ ò git Kơnràñ, mơya Bơtau sồr añ lòt tus lơh ƀaptem mơ dà neh đơs mơ añ lah: ‘Bơtau mơ mê rơp gŏ Yàng Hwềng mù ơm hơđang, hơ̆ la Bơtau lơh ƀaptem mơ Yàng Hwềng Goh.’

³⁴Añ neh gŏ mơ lơh cơng lah, hơ̆ la Kòn Yàng Tom Trồ dê.”

³⁵Ngai tơnơ̆, Jang ntào bal mơ bàr nă cau bơtê khai dê,

³⁶gŏ Yàng Jesu lòt gan, gen khai đơs lah: “Ne, Belàt Kòn Yàng Tom Trồ dê!”

³⁷Bàr nă cau bơtê kơno jơnau hơ̆ gen lòt jat Yàng Jesu.

³⁸Yàng Jesu wơlke, gŏ bol khai lòt jat gen lùp lah: “Ñcau bol mê jòi taih?” Bol khai ho lah: “Rabi, (gơtha la cau bơto), ntềng đah Cau Bơto ơm?”

³⁹Kơnràñ đơs lah: “Tus tĕ sền.” Gen bol khai tus sền tiah Kơnràñ ơm, mơ ơm wơl mơ Kơnràñ tòm ngai hơ̆; tŭ hơ̆ di di poan jơ mho.

⁴⁰Dùl tòm bàr nă cau neh kơno jơnau Jang đơs mơ lòt jat Yàng Jesu, hơ̆ la Andre oh Simôn Pier dê.

⁴¹Sơnròp ngan khai bàn bi khai dê la Simôn gen đơs lah: “Bol hi neh tìp Bơtau Mesi,” (gơtha la Bơtau Krist).

⁴²Gen khai lam Simôn lòt tus hơ Yàng Jesu. Yàng Jesu sền gŏ Simôn gen đơs lah: “Mê la Simôn, kòn Jôna dê, mê rơp geh sơnđan la Sepha,” (gơtha la Pier).

⁴³Ngai tơnơ̆, Yàng Jesu kòñ lòt hơ Galile. Kơnràñ bàn Philip mơ đơs lah: “Jat tĕ Añ.”

⁴⁴Philip la cau Betsaida, dô ƀòn bal mơ Andre mơ Pier.

⁴⁵Philip bàn Nathanael gen đơs lah: “Bol hi neh tìp Bơtau mơ Môise neh cih tòm bơta boh lam, mơ ală cau gơnoar hwơr kung neh cih sơl, hơ̆ la Jesu, kòn Jôsep dê, cau Nasaret.”

⁴⁶Gen Nathanael đơs lah: “Gơs ñchi lơi niam gơlik bơh Nasaret sơl ơ?” Philip đơs lah: “Tus tĕ sền.”

⁴⁷Yàng Jesu gŏ Nathanael lòt tus hơ Kơnràñ gen đơs bơh khai lah: “Do la dô nă cau Israel ngan, tòm khai ò gơs bơta lac lèo lơi.”

⁴⁸Nathanael đơs mơ Kơnràñ lah: “Mbe lơh ồng git añ taih?” Yàng Jesu ho khai lah: “Lài mơ tŭ Philip hòi mê, Añ neh gŏ mê ơm di tòm chi ƀal.”

⁴⁹Nathanael ho lah: “Rabi, Cau Bơto la Kòn Yàng Tom Trồ, Kơnràñ la Bơtau làng bol Israel dê!”

⁵⁰Yàng Jesu ho khai lah: “Bơh Añ neh đơs, Añ gŏ mê ơm di tòm chi ƀal, gen tàng mê dòn ơ? Mê rơp gŏ ală broă dờng rlau mơ bơta hơ̆ tai.”

⁵¹Kơnràñ đơs tai lah: “Di ngan, Añ đơs mơ bol mê, bol mê rơp gŏ trồ gơ pò, mơ ală cau gơnrơh Yàng Tom Trồ dê guh mơ mù hơđang Kòn Mơnus.”