Read koho Jang 11 Bible Online

Jang 11 - koho bible

Jang 11

¹Gơs dô nă cau kòp jê sơnđan la Lasarơ, ơm tòm Bethani la ƀòn Mari dê, mơ bi ùr khai la Mathe.

²Mari do la cau neh bong mơñà ƀô bơlhu Yàng in, mơ ai sŏ khai jùt jơng Kơnràñ; bi khai la Lasarơ bic kòp.

³Behơ̆, bàr nă oh mi khai sồr cau lòt tus đơs mơ Yàng Jesu lah: “Ơ Yàng, cau Yàng kòñ gơboh gam bic kòp.”

⁴Mơya tòm tŭ Yàng Jesu kơno jơnau hơ̆ gen đơs lah: “Bơta kòp jê do ò gơs chơt ò, mơya la bơh bơta gơklŏ Yàng Tom Trồ dê, tồ bơh bơta hơ̆ mơ Kòn Yàng Tom Trồ in geh gơklŏ.”

⁵Yàng Jesu kòñ gơboh di Mathe, bal mơ oh khai mơ Lasarơ.

⁶Bulah tòm tŭ kơno Lasarơ kòp, gen Kơnràñ ơm wơl bàr ngai tai tòm tiah Kơnràñ ơm.

⁷Lồc behơ̆, Kơnràñ đơs mơ ală cau bơtê lah: “Bol he rê wơl lă hơ kơnhwàl Jude.”

⁸Ală cau bơtê đơs lah: “Ơ Rabi, cau Juda jòi nàng cơm lŭ dê Cau Bơto, mơ tŭ do ñchi bơh tài Cau Bơto kòñ rê wơl tềng hơ̆ taih?”

⁹Yàng Jesu ho lah: “Tòm trồ ngai ò di gơs jơt bàr jơ ò ơ? Dilah cau lơi lòt tòm trồ ngai, gen ò gơtup jơng tài bơh gŏ bơta àng dunnia do.

¹⁰Mơya dilah cau lơi lòt tòm trồ mang, gen gơtup jơng, tài bơh ò gơs bơta àng.”

¹¹Tơnơ̆ mơ tŭ đơs bơta hơ̆ rau, Yàng Jesu đơs tai lah: “Lasarơ, bơyô bol he dê, neh bic rau, mơya Añ lòt nàng pơrlai khai.”

¹²Ală cau bơtê đơs lah: “Ơ Yàng, dilah khai bic, ngan rơp geh bòi.”

¹³Yàng Jesu đơs bơh bơta chơt Lasarơ dê, mơya ală cau bơtê tồnlah Kơnràñ đơs bơh bơta lơhă bic òs.

¹⁴Tài behơ̆ Yàng Jesu đơs loh làng mơ bol khai lah: “Lasarơ neh chơt rau.

¹⁵Mơya tài bơh bol mê, Añ hòn chò bơh ò gơs Añ tềng hơ̆, nàng bol mê in dòn; Tŭ do bol he lòt lă tus hơ khai.”

¹⁶Bơh hơ̆ Thôma, sơnđan la Didim, đơs mơ ală cau bơtê ndai lah: “Bol he lòt lă tus tềng hơ̆ chơt bal mơ Kơnràñ!”

¹⁷Tòm tŭ neh tus, Yàng Jesu gŏ Lasarơ neh geh tơp tòm bơtô poan ngai rau.

¹⁸Ƀòn Bethani rềp mơ Jerusalem pơgap pe kơsồ.

¹⁹Gen tàng oă cau Juda tus pơndòm pơniang Mathe mơ Mari bơh bi bol khai dê.

²⁰Tòm tŭ Mathe kơno Yàng Jesu tus, gen lòt rò Kơnràñ; mơya Mari kư̆ ơm nggui tòm hìu.

²¹Mathe đơs mơ Yàng Jesu lah: “Ơ Yàng, dilah gơs Yàng tềng do, gen bi añ ò chơt;

²²mơya añ git bulah bơta lơi Cau Bơto dan mơ Yàng Tom Trồ, gen Yàng Tom Trồ rơp ai Cau Bơto in.”

²³Yàng Jesu đơs lah: “Bi ai dê rơp kis wơl.”

²⁴Mathe đơs lah: “Añ git lah bi añ rơp kis wơl tòm bơta kis wơl tòm ngai lồi dut.”

²⁵Yàng Jesu đơs lah: “Añ la bơta kis wơl mơ bơta kis; cau lơi dòn Añ gen rơp kis, bulah neh chơt rau.

²⁶Ai cau lơi kis mơ dòn Añ gen rơp ò tŭ lơi chơt ò. Ai dòn bơta hơ̆ sơl?”

²⁷Mathe ho lah: “Ơi, ơ Yàng, añ dòn lah Yàng la Bơtau Krist, Kòn Yàng Tom Trồ, Bơtau pal tus tòm dunnia.”

²⁸Đơs sir rau, Mathe rê hòi oh ùr khai la Mari mơ đơs òm lah: “Cau Bơto neh ơm tềng do rau mơ hòi ai.”

²⁹Tòm tŭ kơno jơnau hơ̆, Mari sơrbac sơrbang ntào lòt tus hơ Kơnràñ.

³⁰Tŭ hơ̆, Yàng Jesu òhềt mut tòm ƀòn, mơya gam ntào di tiah Mathe neh lòt rò Kơnràñ.

³¹Tòm tŭ ală cau Juda gam ơm tòm hìu bal mơ Mari nàng pơndòm pơniang khai, gŏ khai ntào sơrbac sơrbang lik lòt, gen lòt jat, bơh kơlôi lah: Khai lòt tus hơ bơtô nàng ñìm.

³²Tòm tŭ tus di tiah Yàng Jesu mơ gŏ Kơnràñ, gen Mari tơmbic să di jơng Kơnràñ mơ đơs lah: “Ơ Yàng, dilah gơs Yàng tềng do, gen bi añ ò chơt.”

³³Yàng Jesu gŏ Mari ñìm, mơ ală cau Juda lòt bal mơ khai kung ñìm sơl, gen tòm nùs jê sồt mơ rngoh rngac,

³⁴mơ lùp lah: “Ntềng đah bol ai neh tơp khai taih?” Bol khai ho lah: “Ơ Yàng, dan tus sền tĕ.”

³⁵Yàng Jesu ñìm.

³⁶Tài behơ̆ ală cau Juda đơs lah: “Sền ne, khai kòñ gơboh di cau hơ̆ ò git lơh!”

³⁷Mơya cau ƀà tòm bol khai đơs lah: “Khai neh pò mat cau jơngo, mơ ò rgơi lơh cau do in klàs chơt ò ơ?”

³⁸Yàng Jesu rngoh rngac tai, gen tàng lòt tus hơ bơtô ƀồc. Hơ̆ la dô nơm gồp gơs dô pơnai lŭ kơrdơl wơl.

³⁹Yàng Jesu đơs lah: “Pơrlă tĕ pơnai lŭ.” Mathe, oh ùr cau chơt dê, đơs lah: “Ơ Yàng, neh ƀô ồm, bơh khai bic tềng do neh poan ngai rau.”

⁴⁰Yàng Jesu đơs tai lah: “Añ ò di neh đơs mơ ai lah dilah ai dòn gen rơp gŏ bơta gơklŏ Yàng Tom Trồ dê ò ơ?”

⁴¹Behơ̆, bol khai pơrlă pơnai lŭ. Yàng Jesu tơnggòr hơđang mơ đơs lah: “Ơ Bèp, Añ ưnngài Bèp, bơh neh dòp jơnau Añ.

⁴²Añ neh git Bèp dòp jơnau Añ sùm, mơya Añ đơs bơta hơ̆ tài bơh ală cau ơm ntào gùt dar do, tồ bol khai in dòn lah Bèp neh sồr Añ lòt tus.”

⁴³Đơs sir rau, Kơnràñ hòi dờng lah: “Ơ Lasarơ, lik tĕ!”

⁴⁴Cau chơt lik, tê jơng gơkơt mơ ồi pò, mơ muh mat gơgòm mơ chèo. Yàng Jesu đơs mơ bol khai lah: “Hồ tĕ khai in, mơ lòi khai lòt.”

⁴⁵Oă cau Juda neh tus hơ Mari mơ gŏ bơta Yàng Jesu neh lơh, gen dòn Kơnràñ.

⁴⁶Mơya gơs cau ƀà tòm bol hơ̆ lòt tus hơ cau Pharisi mơ yal ală bơta Yàng Jesu neh lơh.

⁴⁷Tài behơ̆, ală cau gơnoar lam bồ ơn phan duh khoai mơ ală cau Pharisi pơjum Mpồl Kwang Tơrña mơ đơs lah: “Ñchi bol he pal lơh taih? Cau do lơh oă ngan tềl krơi.

⁴⁸Dilah bol he kư̆ lòi khai in lơh sùm behơ̆, gen jơh tơl nă rơp dòn khai, gen cau Rôma rơp lòt tòmlơh pìt tiah do bal mơ lơgar bol he dê.”

⁴⁹Mơya gơs dô nă cau tòm mpồl bol khai, la Kaiphe lơh gơs cau gơnoar dờng lam bồ ơn phan duh khoai tòm nam hơ̆, đơs lah: “Bol mê ò git dô êt lơi!

⁵⁰Bol mê ò git wă lah chan lòi dô nă cau kong chơt ala làng bol in la niam rlau mơ jơh làng bol pal kong roh rui.”

⁵¹Khai ò đơs is bơta hơ̆, mơya tài bơh khai la cau gơnoar dờng lam bồ ơn phan duh khoai tòm nam hơ̆, gen tàng khai đơs hwơr bơh Yàng Jesu rơp kong chơt bơh làng bol;

⁵²Ò di mìng bơh làng bol lơm ò, mơya kung nàng pơjum tơrgòm dô bă bal ală kòn sau Yàng Tom Trồ dê neh nrah nring.

⁵³Bơh ngai hơ̆, bol khai bơtào kai gơrmơ̆i nàng tơnchơt Kơnràñ.

⁵⁴Tài behơ̆, Yàng Jesu ò lòt dô bă loh làng digùl cau Juda tai, mơya lòt tòm kơnhwàl rềp ƀlàng ngềt ngơt, tus tòm dô nơm ƀòn sơnđan la Epraim, mơ ơm wơl tềng hơ̆ bal mơ ală cau bơtê.

⁵⁵Bơta pơjum sa Lòt Gan làng bol Juda dê mòr di. Gơs oă cau bơh ală ƀòn dềt guh hơ ƀòn dờng Jerusalem nàng lơh sàng goh lài mơ bơta pơjum sa.

⁵⁶Bol khai jòi Yàng Jesu, mơ tòm tŭ ntào tòm hìu duh khoai bol khai đơs bal lah: “Mbe bol mê kơlôi taih? Khai ò tus tòm bơta pơjum sa ơ?”

⁵⁷Ai ală cau gơnoar dờng lam bồ ơn phan duh khoai mơ ală cau Pharisi ai gơnoar sồr lah dilah cau lơi git Yàng Jesu ơm tiah lơi, gen pal yal bol khai in git, nàng bol khai kup Kơnràñ.