Read koho Jang 13 Bible Online

Jang 13 - koho bible

Jang 13

¹Lài mơ bơta pơjum sa Lòt Gan, Yàng Jesu git jơ Kơnràñ pal sang dunnia do nàng rê wơl hơ Bèp neh tus rau; Kơnràñ neh kòñ gơboh di cau gơrê bal mơ Kơnràñ tòm dunnia, gen kư̆ kòñ gơboh jơl tus di lồi dut.

²Tòm tŭ sào mho, cà ràk neh ơn bơta pơrlơ̆ dră di Kơnràñ tòm nùs Juda Iskariôt, kòn Simôn dê.

³Yàng Jesu git lah Bèp neh jào jơh ală bơta tòm tê Kơnràñ, mơ Kơnràñ bơh Yàng Tom Trồ mơ tus, kung rơp rê wơl hơ Yàng Tom Trồ,

⁴gen Kơnràñ ntào bơh cơnòng sào, hồ ào, ai chèo pùt di but he.

⁵Chòp Kơnràñ tuh dà tòm thao bàk, mơ sơntòm rào jơng ală cau bơtê in, mơ ai chèo Kơnràñ neh pùt di but nàng jùt jơng bol khai in.

⁶Kơnràñ lòt tus hơ Simôn Pier, gen khai đơs lah: “Ơ Yàng, Kơnràñ rào jơng añ in ơ?”

⁷Yàng Jesu ho lah: “Bơta Añ lơh tŭ do mê ò git wă, mơya tơnơ̆ wơl mê rơp git wă.”

⁸Pier đơs lah: “Ò di. Ò gơs tŭ lơi Kơnràñ rơp rào jơng añ in ò!” Yàng Jesu ho lah: “Dilah Añ ò rào mê in, gen mê ò gơs dô pơnah lơi mơ Añ.”

⁹Simôn Pier đơs lah: “Ơ Yàng, ò di mìng jơng lơm ò, mơya tê mơ bồ tai sơl!”

¹⁰Yàng Jesu đơs lah: “Cau lơi neh um rau, pal rào mìng jơng, gen gơs goh jơh să. Bol mê neh gơs goh, mơya ò di jơh tơl nă.”

¹¹Bơh Kơnràñ git cau lơi la cau rơp pơrlơ̆ dră di Kơnràñ; gen tàng Kơnràñ đơs lah: “Ò di jơh tơl nă bol mê gơs goh ò.”

¹²Tòm tŭ neh sir rào jơng bol khai in rau, Kơnràñ soh ào, nggui wơl mơ đơs lah: “Bol mê git wă bơta Añ neh lơh bol mê in sơl?

¹³Bol mê sơnđan Añ la Cau Bơto mơ la Yàng; bol mê đơs di, bơh Añ ngan la behơ̆.

¹⁴Behơ̆ dilah Añ la Yàng mơ la Cau Bơto, mơ neh rào jơng bol mê in, gen bol mê kung pal rào jơng bal mơ gơp behơ̆ sơl.

¹⁵Bơh Añ neh lơh krơh bol mê in, nàng bol mê in kung lơh be Añ neh lơh bol mê in sơl.

¹⁶Di ngan, di ngan, Añ đơs mơ bol mê, cau dĭ ò di dờng rlau mơ cau tòm, cau geh sồr lòt kung ò dờng rlau mơ bơtau sồr khai lòt.

¹⁷Dilah bol mê git ală bơta do mơ lơh jat, gen geh lơngai.

¹⁸Añ ò đơs bơh jơh tơl nă bol mê ò, Añ git ală cau Añ neh sac; mơya nàng gơlik di ngan be Sră Goh cih lah: ‘Cau sa piang lă Añ jê yò kơndòl jơng sò Añ wơl.’

¹⁹Bơh tŭ do, Añ yal bol mê in lài mơ tŭ broă hơ̆ òhềt gơlik gơs; nàng tòm tŭ broă hơ̆ gơlik gơs rau, gen bol mê dòn Añ la Bơtau neh gơs mơ gam gơs sùm sùm.

²⁰Di ngan, di ngan, Añ đơs mơ bol mê, cau lơi wă rò cau lơi Añ sồr lòt tus, hơ̆ la wă rò Añ; mơ cau lơi wă rò Añ, hơ̆ la wă rò Bơtau neh sồr Añ lòt tus.”

²¹Tòm tŭ Yàng Jesu neh đơs behơ̆ rau, gen hwềng nùs Kơnràñ dơrcul, mơ Kơnràñ lơh cơng lah: “Di ngan, di ngan, Añ đơs mơ bol mê, dô nă cau tòm bol mê rơp pơrlơ̆ dră dê Añ.”

²²Ală cau bơtê tòm rmê bal, ò git Kơnràñ đơs bơh cau lơi.

²³Gơs dô nă cau bơtê sơrkềng să di ntơh Yàng Jesu, hơ̆ la cau Kơnràñ kòñ gơboh.

²⁴Behơ̆ Simôn Pier lơh tềl, sồr cau hơ̆ lah: Yal tĕ bol hi in git Kơnràñ đơs bơh cau lơi.

²⁵Behơ̆ cau sơrkềng să di ntơh Yàng Jesu lùp lah: “Ơ Yàng, hơ̆ la ñcau taih?”

²⁶Yàng Jesu ho lah: “Hơ̆ la cau mơ Añ tong pet piang lă Añ rơp iurŭ do.” Tòm tŭ neh iurŭ dô pet piang lă rau, gen Kơnràñ tong Juda in, kòn Simôn Iskariôt dê.

²⁷Tơnơ̆ mơ tŭ Juda neh dòp pet piang lă rau, gen cà Satan mut tòm nùs khai. Behơ̆ Yàng Jesu đơs mơ khai lah: “Bơta mê lơh, lơh tĕ mhar.”

²⁸Mơya tòm ală cau nggui bal tềng hơ̆ ò gơs cau lơi git wă ñchi bơh tài Kơnràñ đơs mơ khai behơ̆.

²⁹Gơs cau ƀà tồnlah tài bơh Juda gơs kơldung priă, gen tàng Yàng Jesu đơs mơ khai lah: Rwat tĕ phan bol he kòñ ngui tòm tŭ pơjum sa, hala pal pà phan lơi cau rƀah lơòi in.

³⁰Ai Juda tŭ neh dòp pet piang lă hơ̆ rau, gen lik lòt mo. Tŭ hơ̆ trồ neh mang rau.

³¹Tòm tŭ Juda neh lik lòt rau, Yàng Jesu đơs lah: “Tòm tŭ do Kòn Mơnus geh gơklŏ, mơ Yàng Tom Trồ kung geh gơklŏ di Kòn Mơnus sơl.

³²Dilah Yàng Tom Trồ geh gơklŏ di Kòn mơnus, gen Yàng Tom Trồ rơp lơh Kòn Mơnus in geh gơklŏ di să tòm Yàng Tom Trồ, mơ Yàng Tom Trồ rơp lơh Kơnràñ in geh gơklŏ mo.

³³Ơ ală kòn dềt Añ jê, Añ gam ơm mơ bol mê dô êt jŏ tai. Bol mê rơp jòi Añ, mơ be Añ neh đơs mơ ală cau Juda lah: ‘Tiah Añ lòt bol mê ò rgơi lòt tus,’ gen tŭ do Añ kung đơs mơ bol mê behơ̆ sơl.

³⁴Añ ai bol mê in dô bơta sồr lam pa, hơ̆ la bol mê kòñ gơboh tĕ bal mơ gơp; Añ neh kòñ gơboh di bol mê be lơi, gen bol mê kung kòñ gơboh tĕ bal mơ gơp behơ̆ sơl.

³⁵Dilah bol mê gơs bơta kòñ gơboh bal mơ gơp, gen bơh bơta hơ̆ jơh tơl nă cau rơp git bol mê la cau bơtê Añ jê.”

³⁶Simôn Pier đơs mơ Kơnràñ lah: “Ơ Yàng, ntềng đah Kơnràñ lòt taih?” Yàng Jesu ho lah: “Tiah Añ lòt, tòm tŭ do mê ò rgơi jat Añ ò, mơya tơnơ̆ wơl mê rơp jat Añ.”

³⁷Pier đơs lah: “Ơ Yàng, ñchi bơh tài tòm tŭ do añ ò rgơi jat Kơnràñ taih? Añ rơp bơh Kơnràñ mơ phi bơta kis añ!”

³⁸Yàng Jesu ho lah: “Mê rơp bơh Añ mơ phi bơta kis mê dê ơ? Di ngan, di ngan, Añ đơs mơ mê, tŭ iar òhềt nrau, gen mê neh pơndang sang Añ pe dơ̆ rau.”