Read koho Jang 15 Bible Online

Jang 15 - koho bible

Jang 15

¹“Añ la tòm ño ngan, Bèp Añ la cau tam.

²Ntê lơi tòm Añ mơ ò gơlik plai gen Kơnràñ koh sang, mơ ntê lơi gơlik plai gen Kơnràñ rcang niam, nàng gơlik oă plai tai.

³Bol mê geh goh rau bơh jơnau Añ neh bơto yal bol mê in.

⁴Ơm tĕ sùm tòm Añ gen Añ rơp ơm sùm tòm bol mê. Be ntê, dilah ò gơđềt mơ tòm ño, gen ò rgơi gơlik plai is gơ dê ò, dilah bol mê ò ơm sùm tòm Añ gen kung behơ̆ sơl.

⁵Añ la tòm ño, bol mê la ntê. Cau lơi ơm sùm tòm Añ mơ Añ ơm sùm tòm khai gen gơlik oă ngan plai, bơh ơm bơdìh Añ, gen bol mê ò rgơi lơh bơta lơi ò.

⁶Dilah cau lơi ò ơm sùm tòm Añ gen kòl sang tơlik di tiah kung be ntê ne, gơ ro rañ gen cau dòñ, sang tòm ồs, mơ chu jơh.

⁷Dilah bol mê ơm sùm tòm Añ, mơ ală jơnau Añ jê ơm sùm tòm bol mê, dan tĕ bơta lơi bol mê kòñ, gen rơp geh bơta hơ̆.

⁸Bèp Añ geh gơklŏ, hơ̆ la tài bơh bol mê gơlik oă plai, mơ bol mê rơp lơh gơs cau bơtê Añ jê.

⁹Bèp neh kòñ gơboh di Añ be lơi, gen Añ kung kòñ gơboh di bol mê behơ̆ sơl; ơm tĕ sùm tòm bơta kòñ gơboh Añ jê.

¹⁰Dilah bol mê prap gàr ală bơta sồr lam Añ jê, gen rơp ơm sùm tòm bơta kòñ gơboh Añ jê, kung be Añ neh prap gàr ală bơta sồr lam Bèp Añ jê, mơ ơm sùm tòm bơta kòñ gơboh Kơnràñ dê.

¹¹Añ neh yal bol mê in ală bơta hơ̆, tồ bơta hòn chò Añ jê ơm tòm bol mê, mơ bơta hòn chò bol mê dê geh wil tơl.

¹²Do la bơta sồr lam Añ jê: Bol mê kòñ gơboh tĕ bal mơ gơp, kung be Añ neh kòñ gơboh di bol mê.

¹³Ò gơs bơta kòñ gơboh lơi dờng rlau mơ bơta kòñ gơboh bơh bơyô he mơ phi bơta kis he.

¹⁴Dilah bol mê lơh jat bơta Añ bơto sồr, gen bol mê la bơyô Añ jê.

¹⁵Añ ò tai sơnđan bol mê la cau dĭ, bơh cau dĭ ò git bơta cau tòm he lơh; mơya Añ sơnđan bol mê la bơyô, tài bơh Añ neh yal bol mê in git jơh ală bơta Añ neh kơno bơh di Bèp Añ.

¹⁶Ò di bol mê neh sac Añ, mơya Añ neh sac mơ bơtào bol mê, nàng bol mê in lòt mơ gơlik plai, mơ plai bol mê gơ ơm sùm; tồ bơta lơi bol mê rơp ai sơnđan Añ mơ dan mơ Bèp, gen Kơnràñ ai bol mê in.

¹⁷Añ bơto sồr bol mê ală bơta hơ̆, nàng bol mê kòñ gơboh bal mơ gơp.”

¹⁸“Dilah dunnia gơjrañ di bol mê, gen git tĕ lah bol khai neh gơjrañ di Añ lài mơ bol mê rau.

¹⁹Dilah bol mê gơrê bal mơ dunnia, gen dunnia rơp kòñ gơboh di cau bal mơ bol khai; mơya tài bơh bol mê ò bal mơ dunnia, mơya Añ neh sac bol mê lik bơh dunnia, gen tàng dunnia gơjrañ di bol mê.

²⁰Kah tĕ jơnau Añ neh đơs mơ bol mê: ‘Cau dĭ ò dờng rlau mơ cau tòm.’ Dilah bol khai neh kup kơryan Añ, gen kung rơp kup kơryan bol mê sơl; dilah bol khai neh prap gàr jơnau Añ, gen kung rơp prap gàr jơnau bol mê sơl.

²¹Mơya tài bơh sơnđan Añ mơ bol khai rơp lơh jơh ală bơta hơ̆ di bol mê, tài bơh bol khai ò git Bơtau neh sồr Añ lòt tus.

²²Dilah Añ ò lòt tus mơ yal bol khai in, gen bol khai ò gơs glài; mơya tòm tŭ do bol khai ò rgơi tò să he nàng klàs glài ò.

²³Cau lơi gơjrañ di Añ gen kung gơjrañ di Bèp Añ sơl.

²⁴Dilah Añ ò lơh ală broă digùl bol khai la broă ò gơs cau lơi rgơi lơh, gen bol khai ò gơs glài, mơya tòm tŭ do bol khai neh gŏ, mơ gơjrañ di Añ bal mơ Bèp Añ sơl.

²⁵Hơ̆ tồ gơlik di ngan be jơnau neh cih tòm bơta boh lam bol khai dê lah: ‘Bol khai gơjrañ di Añ la ò bồ.’

²⁶Mơya tŭ lơi Bơtau Pơndòm pơniang tus, la Bơtau Añ rơp sồr bơh di Bèp mơ lòt tus hơ bol mê, hơ̆ la Hwềng Jơnau song dê lik bơh di Bèp, Bơtau hơ̆ rơp lơh cơng bơh Añ.

²⁷Bol mê kung rơp lơh cơng sơl, tài bơh bol mê neh ơm mơ Añ bơh sơnròp.”