Read koho Jang 2 Bible Online

Jang 2 - koho bible

Jang 2

¹Tòm ngai dơ̆ pe, gơs bơta tòmbau tòm Kana kơnhwàl Galile, mơ mè Yàng Jesu gơs tềng hơ̆.

²Yàng Jesu mơ ală cau bơtê Kơnràñ dê kung geh jà tus pơjum sa tòmbau sơl.

³Tòm tŭ jơh tơrnòm, mè Yàng Jesu đơs mơ Kơnràñ lah: “Cau ò gơs tơrnòm tai.”

⁴Yàng Jesu ho lah: “Ơ cau ùr, ñchi bơta gơkwă ai mơ Añ taih? Jơ Añ òhềt tus.”

⁵Mè Kơnràñ đơs mơ ală cau dong broă lah: “Broă lơi Kơnràñ sồr gen lơh jat tĕ.”

⁶Tềng hơ̆ gơs prau nơm yang lŭ dờng nàng ngui tòm bơta lơh sàng goh cau Juda dê, kòp nơm ơn pơgap dô rhiang lit dà.

⁷Yàng Jesu sồr bol khai lah: “Tuh tĕ bềng dà tòm ală yang do.” Bol khai tuh bềng tus di bơr.

⁸Kơnràñ đơs mơ bol khai lah: “Tŭ do bơ̆ tĕ, cèng cau sền nac in.” Bol khai bơ̆ cèng.

⁹Dơ̆ cau sền nac liap dà neh gơlik gơs tơrnòm rau, mơ khai ò git tơrnòm do tus bơh lơi, (ai ală cau dong broă neh bơ̆ dà gen git loh), gen khai hòi cau bơrtơu,

¹⁰mơ đơs lah: “Tơl nă cau òs yò tơrnòm bơkah lài, tŭ cau neh ñô oă rau, gen yò tơrnòm dimơ; ai mê, gen prap tơrnòm bơkah jơl tus di tŭ do.”

¹¹Hơ̆ la tòm Kana kơnhwàl Galile, Yàng Jesu lơh tềl krơi dơ̆ sơnròp mơ yal tơlik bơta gơklŏ Kơnràñ dê; gen ală cau bơtê dòn Kơnràñ.

¹²Tơnơ̆ mơ hơ̆, Kơnràñ bal mơ mè, oh mi mơ ală cau bơtê Kơnràñ dê mù hơ Kapenaum, ơm tềng hơ̆ dô êt ngai.

¹³Bơta pơjum sa Lòt gan làng bol Juda mòr di, Yàng Jesu guh hơ Jerusalem.

¹⁴Kơnràñ gŏ tòm hìu duh khoai, gơs cau tac kơnrồ, belàt, sềm ntòp, mơ cau gơl priă nggui di cơnòng.

¹⁵Kơnràñ wac dô nơm gai mơ che, bơtrơh tơlik jơh bơh di hìu duh khoai, belàt mơ kơnrồ sơl, sơmbrih jền cau gơl priă mơ tơlo cơnòng bol khai dê.

¹⁶Kơnràñ đơs mơ cau tac sềm ntòp lah: “Cèng tơlik tĕ ală phan do bơh tềng do, bañ lơh hìu Bèp Añ jê gơlik gơs hìu kă bro.”

¹⁷Cau bơtê Kơnràñ dê kah wơl jơnau neh cih lah: “Bơta duh hul bơh hìu mê dê chu pơrguc Añ.”

¹⁸Behơ̆ ală cau Juda đơs mơ Kơnràñ lah: “Ồng lơh tềl krơi lơi nàng sơnio bol hi in, Ồng gơs gơnoar lơh broă hơ̆ taih?”

¹⁹Yàng Jesu ho lah: “Sòr tĕ hìu duh khoai do, tòm pe ngai Añ rơp bơtào gơs wơl!”

²⁰Cau Juda đơs tai lah: “Cau bơt hìu duh khoai do tòm poan jơt prau nam mơ ồng rơp bơtào gơs wơl tòm pe ngai ơ?”

²¹Mơya Kơnràñ đơs bơh hìu duh khoai să jan Kơnràñ dê.

²²Behơ̆ tŭ Kơnràñ neh kis wơl bơh bơta chơt, ală cau bơtê kah wơl jơnau Kơnràñ neh đơs, gen dòn Sră Goh mơ jơnau Yàng Jesu neh đơs.

²³Kơnràñ ơm tòm Jerusalem tòm tŭ pơjum sa Lòt Gan, gơs oă cau gŏ ală tềl krơi Kơnràñ neh lơh, gen dòn di sơnđan Kơnràñ.

²⁴Mơya Yàng Jesu, să tòm Kơnràñ ò dòn kơnòm di bol khai in, bơh Kơnràñ git loh tơl nă cau,

²⁵mơ ò càng cau lơh cơng bơh cau lơi, bơh să tòm Kơnràñ git loh jơh ală bơta tòm nùs cau.