Read koho Jang 21 Bible Online

Jang 21 - koho bible

Jang 21

¹Tơnơ̆ mơ hơ̆ Yàng Jesu tơlik să tai mơ ală cau bơtê Kơnràñ dê di gah dàlềng Tiberias. Bơta tơlik să Kơnràñ dê be do:

²Simôn Pier, Thôma sơnđan la Didim, Nathanael cau Kana kơnhwàl Galile, ală kòn klau Sebede mơ bàr nă cau bơtê ndai ơm bal.

³Simôn Pier đơs lah: “Añ lòt kup ka.” Ală cau ne đơs lah: “Bol hi kung lòt bal mơ bi sơl.” Bol khai lik lòt mut tòm ơhò, mơya tòm mang hơ̆ bol khai ò geh kup dô nơm ka lơi.

⁴Tus àng drim Yàng Jesu ntào di gah dà, mơya ală cau bơtê ò git hơ̆ la Yàng Jesu.

⁵Yàng Jesu lùp lah: “Ơ ală kòn, bol mê ò gơs ka lơi ơ?” Bol khai ho lah: “Ò gơs.”

⁶Kơnràñ đơs lah: “Đùh tĕ bơtơng đah ma ơhò, gen bol mê rơp geh.” Behơ̆ bol khai đùh bơtơng, mơ ò jai hwài tơngguh tài bơh geh ka oă ngan.

⁷Behơ̆ cau bơtê Yàng Jesu kòñ gơboh đơs mơ Pier lah: “Hơ̆ la Yàng.” Dơ̆ Simôn Pier kơno hơ̆ la Yàng, gen khai ai ào jrùh pùt di să khai tài bơh ơm kuh, mơ ntruñ tòm dàlềng.

⁸Ală cau bơtê ndai ơm tòm ơhò dềt tus hwài bơtơng bềng ka, bơh bol khai ò ơm ngài bơh di gah dà, mìng pơgap bàr rhiang tal.

⁹Tòm tŭ bol khai neh guh di gah; gen gŏ tềng hơ̆ gơs ồs rnga, gơs ka hơđang hơ̆ mơ gơs piang lă sơl.

¹⁰Yàng Jesu đơs lah: “Ka bol mê pa geh cèng tĕ hơ do.”

¹¹Simôn Pier hào tòm ơhò, hwài di gah dà bơtơng bềng dô rhiang pram jơt pe nơm ka dờng; bulah ka oă behơ̆ mơya bơtơng ò gơs sèt dô êt lơi.

¹²Yàng Jesu đơs lah: “Tus tĕ sa.” Mơya ò gơs dô nă cau bơtê lơi khin lùp Kơnràñ lah: “Ồng la ñcau?” Bơh git hơ̆ la Yàng.

¹³Yàng Jesu tus, ai piang lă tong bol khai in, mơ ka kung behơ̆ sơl.

¹⁴Hơ̆ la dơ̆ pe mơ Yàng Jesu tơlik să mơ ală cau bơtê, tơnơ̆ mơ tŭ Kơnràñ kis wơl bơh bơta chơt.

¹⁵Tơnơ̆ mơ tŭ neh sa rau, Yàng Jesu đơs mơ Simôn Pier lah: “Ơ Simôn, kòn Jôna, mê kòñ gơboh di Añ rlau mơ ală cau do sơl?” Pier đơs lah: “Ơ Yàng, ơi, Kơnràñ git lah añ gơboh di Kơnràñ.” Kơnràñ đơs lah: “Ròng siam tĕ ală belàt kòn Añ jê.”

¹⁶Kơnràñ đơs dơ̆ bàr mơ khai lah: “Ơ Simôn, kòn Jôna, mê kòñ gơboh di Añ sơl?” Pier đơs lah: “Ơ Yàng, ơi, Kơnràñ git lah añ gơboh di Kơnràñ.” Kơnràñ đơs lah: “Ê tĕ ală belàt Añ jê.”

¹⁷Kơnràñ đơs tai mơ khai dơ̆ pe lah: “Ơ Simôn, kòn Jôna, mê gơboh di Añ sơl?” Pier moat jrùng bơh Kơnràñ đơs tai mơ khai dơ̆ pe: “Mê gơboh di Añ sơl?” Gen khai đơs lah: “Ơ Yàng, Kơnràñ git jơh ală bơta, Kơnràñ git lah añ gơboh di Kơnràñ.” Yàng Jesu đơs lah: “Ròng siam tĕ ală belàt Añ jê.

¹⁸Di ngan, Añ đơs ngan mơ mê, tòm tŭ mê gam pơnu, mê kơt is but mê dê, kòñ lòt tiah lơi khat gơboh; mơya tòm tŭ mê kra, gen mê rơp pò tê, cau ndai kơt but mê in mơ hwài mê lòt tus di tiah mê ò bài.”

¹⁹Kơnràñ đơs bơta hơ̆ nàng sơnio bơh Pier rơp kong chơt be lơi nàng lơh gơklŏ Yàng Tom Trồ in. Tơnơ̆ mơ tŭ đơs behơ̆ rau, gen Kơnràñ đơs tai lah: “Jat tĕ Añ.”

²⁰Pier wơlke, gŏ cau bơtê Yàng Jesu kòñ gơboh jat bơh tơnơ̆, hơ̆ la cau tòm tŭ sào mho sơrkềng să di ntơh Yàng Jesu mơ đơs lah: “Ơ Yàng, ñcau la cau pơrlơ̆ dră di Kơnràñ taih?”

²¹Dơ̆ gŏ cau hơ̆ Pier lùp Yàng Jesu lah: “Ơ Yàng, ai cau do gen mbe gơlơh taih?”

²²Yàng Jesu đơs lah: “Dilah Añ kòñ khai kư̆ ơm jơl tus di tŭ Añ tus, gen ñchi bơta gơkwă di mê taih? Ai mê, jat tĕ Añ.”

²³Behơ̆ jơnau hơ̆ pơnro tòm ală oh mi lah cau bơtê hơ̆ rơp ò chơt. Mơya Yàng Jesu ò đơs lah cau hơ̆ rơp ò chơt ò, mơya đơs lah; “Dilah Añ kòñ khai kư̆ ơm jơl tus di tŭ Añ tus, gen ñchi bơta gơkwă dê mê taih?”

²⁴Hơ̆ la să tòm cau bơtê hơ̆ lơh cơng bơh ală bơta do mơ neh cih ală bơta do; bol he git jơnau lơh cơng khai dê la song ngan.

²⁵Mơ gam oă broă ndai tai Yàng Jesu neh lơh; dilah cih jơh kòp nơm broă hơ̆ gen añ kơlôi lah jơh dunnia kung ò rgơi prap jơh ală sră geh cih hơ̆.