Read koho Jang 3 Bible Online

Jang 3 - koho bible

Jang 3

¹Tòm jơi cau Pharisi, gơs dô nă cau sơnđan la Nikôđem, la cau kwang làng bol Juda dê.

²Tòm trồ mang, khai lòt tus hơ Yàng Jesu mơ đơs lah: “Ơ Rabi, bol hi git Kơnràñ la cau bơto tus bơh Yàng Tom Trồ, dilah Yàng Tom Trồ ò ơm bal, gen ò gơs cau lơi rgơi lơh gơs ală tềl krơi Kơnràñ neh lơh hơ̆.”

³Yàng Jesu ho lah: “Di ngan, Añ đơs ngan mơ mê, dilah cau lơi ò deh wơl pa, gen ò rgơi gŏ lơgar Yàng Tom Trồ dê ò.”

⁴Nikôđem đơs lah: “Cau neh kra gen mbe rgơi deh wơl taih? Khai rgơi mut wơl tòm kơndul mè nàng deh dô dơ̆ tai sơl ơ?”

⁵Yàng Jesu ho lah: “Di ngan, di ngan, Añ đơs mơ mê, dilah cau lơi ò bơh dà mơ Yàng Hwềng mơ deh, gen ò rgơi mut tòm lơgar Yàng Tom Trồ dê ò.

⁶Bơta lơi deh bơh poac să la poac să, mơ bơta lơi deh bơh Yàng Hwềng la hwềng.

⁷Bañ ai lơh krơi bơh bơta Añ neh đơs mơ mê: ‘Ală bol mê pal deh wơl pa.’

⁸Càl kòñ khồm tiah lơi gen khồm, mê kơno jơnau ntas gơ, mơya ò git gơ tus bơh lơi mơ gơ lòt tiah lơi. Cau lơi deh bơh Yàng Hwềng, gen kung behơ̆ sơl.”

⁹Nikôđem lùp tai lah: “Bơta hơ̆ mbe rgơi gơlik gơs taih?”

¹⁰Yàng Jesu ho lah: “Mê la cau bơto làng bol Israel dê mơ ò git bơta hơ̆ ơ?

¹¹Di ngan, di ngan, Añ đơs mơ mê, bol hi đơs bơta hi git, lơh cơng bơta hi neh gŏ; ai bol mê ò dòp jơnau lơh cơng bol hi dê.

¹²Dilah Añ đơs mơ bol mê ală broă bal mơ ù mơ bol mê ò dòn, tơ ài lah Añ đơs ală broă bal mơ trồ, gen mbe lơi bol mê dòn taih?

¹³Ò gơs cau lơi neh guh hơđang trồ, mìng gơs Bơtau bơh đang trồ mù, hơ̆ la Kòn Mơnus.

¹⁴Be Môise yồng bơs tòm ƀlàng bràs be lơi, gen Kòn Mơnus kung pal kong yồng behơ̆ sơl,

¹⁵tồ cau lơi dòn Kơnràñ gen geh bơta kis gam sùm sùm.

¹⁶Bơh Yàng Tom Trồ kòñ gơboh dunnia, tian gơs neh ai Kòn Dùl Kơnràñ dê, tồ cau lơi in dòn Kơnràñ, gen ò kòl roh rui, mơya geh bơta kis gam sùm sùm.

¹⁷Bơh Yàng Tom Trồ sồr Kòn Kơnràñ tus tòm dunnia ò di nàng cahrña dunnia ò, mơya tồ dunnia in geh dong klàs.

¹⁸Cau lơi dòn Kòn gen ò kòl cahrña ò; cau lơi ò dòn gen neh kòl cahrña rau, tài bơh ò dòn di sơnđan Kòn Dùl Yàng Tom Trồ dê.

¹⁹Bơta cahrña hơ̆ la be do: Bơta àng neh tus tòm dunnia mơ cau kòñ gơboh bơta jơngo rlau mơ bơta àng, tài bơh ală broă bol khai dê la iơh bơsak.

²⁰Bơh cau lơi lơh iơh bơsak gen gơjrañ kơuềng di bơta àng, mơ ò lòt tus hơ bơta àng, rngòt ală broă khai dê gơkòl yal tơlik.

²¹Mơya cau lơi lơh jat jơnau song, gen lòt tus hơ bơta àng, nàng ală broă khai neh lơh tòm Yàng Tom Trồ geh yal tơlik.”

²²Tơnơ̆ hơ̆ Yàng Jesu mơ ală cau bơtê lòt tus hơ kơnhwàl Jude, Kơnràñ ơm mơ bol khai tềng hơ̆ mơ lơh ƀaptem.

²³Jang kung lơh ƀaptem tòm Enôn, rềp Salim, tài bơh tềng hơ̆ gơs oă dà, mơ cau lòt tus nàng gơs ƀaptem.

²⁴Tŭ hơ̆ Jang òhềt kòl kup jàm.

²⁵Mơ tai, gơs jơnau tòm pơndang bal digùl ală cau bơtê Jang dê mơ dô nă cau Juda bơh bơta lơh sàng goh.

²⁶Bol khai lòt tus hơ Jang mơ đơs lah: “Ơ Rabi, cau neh ơm mơ ồng đah mattơngai lik hiòng Jordan, mơ geh ồng lơh cơng niam, tŭ do khai ơm lơh ƀaptem mơ jơh tơl nă cau lòt tus hơ khai.”

²⁷Jang ho lah: “Dilah ò di bơh đang trồ ai gen ò gơs cau lơi dòp geh bơta lơi.

²⁸Să tòm bol mê lơh cơng añ in lah añ neh đơs: Añ ò di la Bơtau Krist, mơya añ neh geh sồr lòt tus lài mơ Kơnràñ.

²⁹Cau lơi pa tòmbau hơ̆ la bơrtơu, mơya oh mi bơyô bơrtơu dê ơm ntào mơ iat jơnau khai, dơ̆ kơno jơnau đơs bơrtơu dê gen hòn chò oă ngan; hơ̆ la bơta hòn chò añ jê geh wil tơl behơ̆.

³⁰Kơnràñ pal tơngguh, añ pal tơmù.

³¹Cau bơh đang tus la hơđang rlau jơh. Cau bơh ù lik la bal mơ ù, đơs kung la bal mơ ù; ai Cau bơh đang trồ tus la hơđang rlau jơh.

³²Kơnràñ lơh cơng bơh bơta Kơnràñ neh gŏ mơ kơno, mơ ò gơs cau lơi dòp jơnau lơh cơng Kơnràñ dê.

³³Cau lơi neh dòp jơnau lơh cơng Kơnràñ dê, gen neh dòp nền lah, Yàng Tom Trồ la song ngan.

³⁴Bơh Bơtau mơ Yàng Tom Trồ neh sồr lòt tus, gen bơto yal jơnau Yàng Tom Trồ dê, bơh Yàng Tom Trồ ai Yàng Hwềng Kơnràñ in ò git jơh.

³⁵Bèp kòñ gơboh di Kòn mơ neh jào jơh ală bơta tòm tê Kơnràñ.

³⁶Cau lơi dòn Kòn gen geh bơta kis gam sùm sùm, cau lơi ò bài dòn Kòn gen ò gŏ bơta kis ò, mơya bơta gơjrañ dờng Yàng Tom Trồ dê ơm sùm hơđang cau hơ̆.”