Read koho Jang 6 Bible Online

Jang 6 - koho bible

Jang 6

¹Tơnơ̆ mơ hơ̆, Yàng Jesu tiă đah ne dàlềng Galile, hơ̆ la dàlềng Tiberias.

²Gơs dô mpồl làng bol oă jat Kơnràñ, bơh neh gŏ ală tềl krơi Kơnràñ lơh ală cau kòp jê in.

³Yàng Jesu guh hơđang mơnơm, nggui tềng hơ̆ bal mơ ală cau bơtê Kơnràñ dê.

⁴Tŭ hơ̆, bơta pơjum sa Lòt Gan la dô bơta pơjum sa làng bol Juda dê mòr di.

⁵Yàng Jesu pò mat tơnggòr, gŏ dô mpồl làng bol oă tus hơ Kơnràñ, gen đơs mơ Philip lah: “Ntềng đah bol he rwat piang lă tồ bol do in sa taih?”

⁶Kơnràñ đơs behơ̆ nàng lòng khai, bơh Kơnràñ neh git bơta Kơnràñ rơp lơh.

⁷Philip ho lah: “Bàr rhiang dơnie rwat piang lă pà kòp nă in dô êt kung ò tơl sơl.”

⁸Gơs dô nă cau bơtê la Andre, oh Simôn Pier dê, đơs lah:

⁹“Do gơs dô nă kơnòm klau gơs pram nơm piang lă kòi mi mơ bàr nơm ka, mơya cau oă kàr do gen kàr hơ̆ ò tơl dô êt lơi.”

¹⁰Yàng Jesu đơs lah: “Sồr tĕ bol khai nggui.” Mơ tai, tiah hơ̆ gơs oă ñhơt. Behơ̆ làng bol nggui, gơs pơgap pram rbô nă cau klau.

¹¹Yàng Jesu ai piang lă kòi mi, ưnngài, lồc behơ̆ pà ală cau neh nggui in; ka kung behơ̆ sơl, bol khai kòñ kàr lơi di lơm.

¹²Tŭ bol khai neh sa hòm rau, gen Kơnràñ đơs mơ ală cau bơtê lah: “Dòñ tĕ ală pet piang lă tơngkah, tồ gơ in ò roh dô pet lơi.”

¹³Behơ̆ bol khai dòñ ală pet tơngkah bơh pram nơm piang lă, tơnơ̆ mơ tŭ ală cau neh sa rau, gen ơn bềng jơt bàr bài.

¹⁴Behơ̆ ală cau gŏ tềl krơi Yàng Jesu neh lơh, gen đơs lah: “Cau do ngan la cau gơnoar hwơr pal tus tòm dunnia.”

¹⁵Yàng Jesu git bol hơ̆ rơp tus bơtào bơklơn Kơnràñ lơh gơs bơtau, gen pleh hơđang mơnơm ơm is dô nă.

¹⁶Tòm tŭ mho mang, ală cau bơtê mù di gah dàlềng,

¹⁷mut tòm dô nơm ơhò mơ tiă đah ne dàlềng nàng tus hơ Kapenaum. Trồ neh mang, mơya Yàng Jesu òhềt tus hơ bol khai.

¹⁸Càl dờng khồm tian gơs dàlềng lơnggac ngan.

¹⁹Tòm tŭ neh wàs pram hala prau kơsồ, bol khai gŏ Yàng Jesu lòt hơđang nha dàlềng, mòr tus rềp di ơhò, gen bol khai rngòt ngan.

²⁰Mơya Kơnràñ đơs lah: “Añ do, bañ rngòt.”

²¹Bol khai kòñ rò Kơnràñ mut tòm ơhò, gen tŭ hơ̆ mo ơhò ơm di gah dàlềng la tiah bol khai kòñ lòt.

²²Ngai tơnơ̆, mpồl làng bol ơm di gah đah ne dàlềng gŏ mìng dô nơm ơhò dềt lơm, mơ git Yàng Jesu ò hào ơhò hơ̆ bal mơ ală cau bơtê, gơs mìng cau bơtê lòt lơm.

²³Mơya gơs ală ơhò ndai bơh Tiberias lòt tus rềp di tiah bol khai neh sa piang lă tòm tŭ Yàng Jesu neh ưnngài rau.

²⁴Behơ̆ tòm tŭ mpồl làng bol gŏ Yàng Jesu ò ơm tềng hơ̆, ală cau bơtê kung ò sơl, gen bol khai hào ală ơhò ne mơ tiă hơ Kapenaum nàng jòi Yàng Jesu.

²⁵Tòm tŭ bol khai bàn Kơnràñ di gah đah ne dàlềng, gen đơs lah: “Ơ Rabi, tŭ lơi ồng lòt tus tềng do taih?”

²⁶Yàng Jesu ho lah: “Di ngan, Añ đơs ngan mơ bol mê, bol mê jòi Añ ò di bơh neh gŏ ală tềl krơi, mơya bơh bol mê neh sa hòm piang lă jat be nùs kòñ.

²⁷Bañ lơh broă bơh phan sa roh rui, mơya bơh phan sa gam wơl tus di bơta kis gam sùm sùm, la bơta Kòn Mơnus rơp ai bol mê in, bơh hơ̆ la Bơtau mơ Yàng Tom Trồ la Bèp neh tap ƀang kì cơng tàng.”

²⁸Bol hơ̆ đơs lah: “Ñchi bol hi pal lơh nàng geh lơh broă Yàng Tom Trồ dê taih?”

²⁹Yàng Jesu ho lah: “Broă Yàng Tom Trồ dê hơ̆ la bol mê dòn Bơtau mơ Kơnràñ neh sồr lòt tus.”

³⁰Bol khai đơs lah: “Behơ̆ gen, ồng lơh tềl krơi lơi nàng bol hi in gŏ mơ dòn taih? Ñchi ồng lơh taih?

³¹Ồng pàng bol hi dê neh sa mana tòm ƀlàng ngềt ngơt jat be jơnau neh cih lah: ‘Kơnràñ neh ai bol khai in sa piang lă bơh đang trồ.’”

³²Yàng Jesu đơs lah: “Di ngan, Añ đơs ngan mơ bol mê, ò di Môise neh ai bol mê in piang lă bơh đang trồ ò, mơya Bèp Añ ai bol mê in piang lă ngan bơh đang trồ.

³³Bơh piang lă Yàng Tom Trồ dê la piang lă bơh đang trồ mù mơ ai bơta kis dunnia in.”

³⁴Behơ̆ bol hơ̆ đơs lah: “Ơ ồng, dan ai piang lă hơ̆ bol hi in sùm sùm.”

³⁵Yàng Jesu đơs lah: “Añ la piang lă bơta kis dê, cau lơi lòt tus hơ Añ gen ò gơs tŭ lơi jơgloh, mơ cau lơi dòn Añ gen ò gơs tŭ lơi tơhìr.

³⁶Mơya Añ neh đơs mơ bol mê lah: bulah bol mê neh gŏ Añ, mơya gam ò dòn.

³⁷Jơh ală cau Bèp ai Añ in, gen rơp lòt tus hơ Añ; cau lơi lòt tus hơ Añ, gen Añ ò gơs tŭ lơi sang khai hơ bơdìh ò.

³⁸Tài bơh Añ bơh đang trồ mù, ò di nàng lơh jat nùs kòñ Añ, mơya lơh jat nùs kòñ Bơtau neh sồr Añ lòt tus.

³⁹Do la nùs kòñ Bơtau neh sồr Añ lòt tus: Hơ̆ la jơh ală cau Kơnràñ neh ai Añ in, gen Añ ò lòi roh dô nă lơi, mơya Añ pal lơh bol khai in kis wơl tòm ngai lồi dut.

⁴⁰Do la nùs kòñ Bèp Añ jê: Hơ̆ la kòp nă cau lơi sền đal Kòn mơ dòn Kơnràñ gen geh bơta kis gam sùm sùm, mơ Añ rơp lơh cau hơ̆ in kis wơl tòm ngai lồi dut.”

⁴¹Tài bơh Kơnràñ neh đơs lah: “Añ la piang lă bơh đang trồ mù,” gen tàng ală cau Juda yoam Kơnràñ,

⁴²lah: “Hơ̆ ò di la Jesu kòn Jôsep dê, bol he git mè bèp khai ò ơ? Behơ̆ mbe khai đơs lah: ‘Añ bơh đang trồ mù, taih’?”

⁴³Yàng Jesu ho lah: “Bol mê bañ yoam tai.

⁴⁴Dilah Bèp, la Bơtau sồr Añ lòt tus, ò hwài tus, gen ò gơs cau lơi rgơi lòt tus hơ Añ, mơ Añ rơp lơh cau hơ̆ in kis wơl tòm ngai lồi dut.

⁴⁵Tòm ală sră gơnoar hwơr neh cih lah: ‘Jơh tơl nă cau rơp geh Yàng Tom Trồ bơto sồr.’ Kòp nă cau lơi neh iat mơ bơtê bơh di Bèp, gen lòt tus hơ Añ.

⁴⁶Òhềt gơs cau lơi neh gŏ Bèp ò, mìng Bơtau bơh Yàng Tom Trồ mơ tus, Bơtau hơ̆ neh gŏ Bèp.

⁴⁷Di ngan, Añ đơs ngan mơ bol mê, cau lơi dòn Añ gen geh bơta kis gam sùm sùm.

⁴⁸Añ la piang lă bơta kis dê.

⁴⁹Ồng pàng bol mê dê neh sa mana tòm ƀlàng ngềt ngơt, gen kung chơt.

⁵⁰Do la piang lă bơh đang trồ mù, tồ cau lơi in sa gen ò chơt ò.

⁵¹Añ la piang lă kis bơh đang trồ mù, dilah cau lơi sa piang lă hơ̆, gen rơp kis gam sùm sùm, mơ piang lă Añ rơp ai, tài bơh bơta kis dunnia dê, hơ̆ la poac Añ.”

⁵²Tài bơh hơ̆, ală cau Juda tòm pơndang bal mơ đơs lah: “Mbe rgơi cau do ai poac khai dê bol he in sa taih?”

⁵³Yàng Jesu đơs mơ bol khai lah: “Di ngan, Añ đơs ngan mơ bol mê, dilah bol mê ò sa poac mơ ò hùc mhàm Kòn Mơnus dê, gen ò gơs bơta kis gam sùm sùm.

⁵⁴Cau lơi sa poac Añ mơ hùc mhàm Añ, gen geh bơta kis gam sùm sùm; Añ rơp lơh cau hơ̆ in kis wơl tòm ngai lồi dut.

⁵⁵Bơh poac Añ jê ngan la phan sa, mhàm Añ jê ngan la phan hùc.

⁵⁶Cau lơi sa poac Añ mơ hùc mhàm Añ, gen ơm tòm Añ mơ Añ ơm tòm cau hơ̆.

⁵⁷Be Bèp la Bơtau kis neh sồr Añ lòt tus, mơ Añ kis bơh Bèp be lơi, gen cau lơi sa Añ kung rơp kis bơh Añ behơ̆ sơl.

⁵⁸Do la piang lă bơh đang trồ mù, ò di be mana mơ ồng pàng bol mê neh sa gen kung chơt; cau lơi sa piang lă do gen kis gam sùm sùm.”

⁵⁹Yàng Jesu đơs ală bơta hơ̆ tòm tŭ bơto sồr tòm hìu jum tòm Kapenaum.

⁶⁰Gơs oă cau bơtê Kơnràñ dê kơno bơta do gen đơs lah: “Jơnau do kalke ngan, ñcau rgơi git wă taih?”

⁶¹Mơya Yàng Jesu git is ală cau bơtê Kơnràñ dê yoam bơh jơnau hơ̆, gen đơs lah: “Jơnau do lơh bol mê in gơtup tìs ơ?

⁶²Behơ̆ dilah bol mê gŏ Kòn Mơnus guh hơ tiah Kơnràñ neh ơm lài òr, gen mbe bol mê rơp lơh taih?

⁶³Hơ̆ la hwềng ai bơta kis, poac să ò kwơ dô êt lơi. Ală jơnau Añ neh đơs mơ bol mê hơ̆ la hwềng mơ bơta kis.

⁶⁴Mơya dô êt nă tòm bol mê gơs cau ò dòn.” Bơh Yàng Jesu neh git bơh sơnròp ñcau la cau ò dòn, ñcau la cau rơp pơrlơ̆ dră di Kơnràñ.

⁶⁵Kơnràñ đơs lah: “Tài bơh hơ̆ tàng Añ neh đơs mơ bol mê lah dilah Bèp ò ai, gen ò gơs cau lơi rgơi lòt tus hơ Añ.”

⁶⁶Bơh tŭ hơ̆, gơs oă cau bơtê Kơnràñ dê ruc wơl, ò lòt jat Kơnràñ tai.

⁶⁷Behơ̆ Yàng Jesu đơs mơ jơt bàr nă cau bơtê lah: “Ai bol mê kung kòñ ruc wơl sơl ơ?”

⁶⁸Simôn Pier ho Kơnràñ lah: “Ơ Kơnràñ, bol hi rơp lòt jat ñcau taih? Kơnràñ gơs ală jơnau bơta kis gam sùm sùm dê.

⁶⁹Bol hi neh dòn mơ git lah, Kơnràñ la Bơtau sàng goh Yàng Tom Trồ dê.”

⁷⁰Yàng Jesu ho lah: “Añ ò di neh sac bol mê la jơt bàr nă cau bơtê ơ? Mơ gơs dô nă cau tòm bol mê la cà.”

⁷¹Kơnràñ đơs bơh Juda kòn Simôn Iskariôt, la dô nă tòm jơt bàr nă cau bơtê, bơh să tòm khai tơnơ̆ wơl rơp pơrlơ̆ dră di Kơnràñ.