Read koho Jang 8 Bible Online

Jang 8 - koho bible

Jang 8

²Rìng àng drim, Kơnràñ rê wơl hơ hìu duh khoai. Jơh làng bol lòt tus hơ Kơnràñ, Kơnràñ nggui bơto sồr bol khai.

³Ală cau bơto bơta boh lam mơ ală cau Pharisi cèng tus hơ Kơnràñ dô nă cau ùr neh cau kup tòm tŭ tìs glài bơrnàn, ơn khai ntào di đap bol khai,

⁴mơ đơs mơ Kơnràñ lah: “Ơ Cau Bơto, cau ùr do neh cau kup tòm tŭ tìs glài bơrnàn.

⁵Tòm bơta boh lam Môise neh sồr bol he lah cơm lŭ tĕ di ală cau be do. Ai Cau Bơto, gen mbe Ồng đơs taih?”

⁶Bol khai đơs behơ̆ nàng lòng Kơnràñ, tồ rgơi geh yă Kơnràñ. Yàng Jesu kun, ai ràs tê cih di ù.

⁷Tài bơh bol khai kư̆ lùp tai, gen Kơnràñ ntào mơ đơs lah: “Cau lơi tòm bol mê la cau ò gơs glài, cơm tĕ lŭ lài di khai.”

⁸Lồc behơ̆ Kơnràñ kun wơl mơ cih di ù.

⁹Dơ̆ bol khai kơno jơnau hơ̆, gen lik lòt dô nă dô nă, lài la cau kra tus cau kơnòm. Yàng Jesu ơm is dô nă mơ cau ùr gam ntào di đap Kơnràñ.

¹⁰Yàng Jesu ntào, đơs mơ cau ùr hơ̆ lah: “Ơ cau ùr, ntềng đah bol khai taih? Ò gơs cau lơi lơh nền glài ai ơ?”

¹¹Cau ùr ho lah: “Ơ Yàng, ò gơs dô nă cau lơi.” Yàng Jesu đơs lah: “Añ kung ò lơh nền glài ai sơl; lòt tĕ, bañ tìs glài tai yơ.”]

¹²Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.”

¹³Ală cau Pharisi đơs lah: “Cau Bơto lơh cơng is bơh să tòm he, gen jơnau lơh cơng Cau Bơto dê la ò ngan.”

¹⁴Yàng Jesu ho lah: “Bulah Añ lơh cơng is bơh să tòm Añ, gen jơnau lơh cơng Añ jê la song ngan; bơh Añ git Añ neh tus bơh lơi mơ lòt tiah lơi, mơya bol mê ò git Añ tus bơh lơi hala lòt tiah lơi.

¹⁵Bol mê cahrña jat poac să, Añ ò cahrña dô nă cau lơi ò.

¹⁶Dilah Añ cahrña, gen bơta cahrña Añ jê la song ngan; bơh ò di mìng dô nă Añ, mơya Añ mơ Bèp la Bơtau neh sồr Añ lòt tus cahrña bal.

¹⁷Tòm bơta boh lam bol mê dê kung neh cih lah jơnau lơh cơng bàr nă cau dê la song ngan.

¹⁸Añ lơh cơng is bơh să tòm Añ, mơ Bèp la Bơtau neh sồr Añ lòt tus kung lơh cơng Añ in sơl.”

¹⁹Behơ̆ bol khai lùp Kơnràñ lah: “Ntềng đah Bèp Cau Bơto dê taih?” Yàng Jesu ho lah: “Bol mê ò git Añ, mơ kung ò git Bèp Añ sơl. Dilah bol mê git Añ, gen kung git Bèp Añ tai sơl.”

²⁰Yàng Jesu đơs ală jơnau hơ̆ tòm tŭ ơm bơto sồr tòm hìu duh khoai, tiah gơs thùng ơn jền, mơya ò gơs cau lơi kup Kơnràñ bơh jơ Kơnràñ òhềt tus.

²¹Kơnràñ đơs tai mơ bol khai lah: “Añ lòt, bol mê rơp jòi Añ, mơ bol mê rơp chơt tòm tồi glài bol mê dê. Tiah Añ lòt, bol mê ò rgơi lòt tus.”

²²Ală cau Juda đơs lah: “Khai neh đơs: ‘Tiah Añ lòt bol mê ò rgơi lòt tus, behơ̆ khai rơp tơnchơt is să khai dê ơ’?”

²³Yàng Jesu ho lah: “Bol mê lik bơh hơđơm, ai Añ bơh hơđang. Bol mê lik bơh dunnia do, ai Añ ò di lik bơh dunnia do.

²⁴Gen tàng, Añ neh đơs mơ bol mê lah bol mê rơp chơt tòm tồi glài bol mê dê; bơh dilah bol mê ò dòn Añ la Bơtau neh gơs mơ gam gơs, gen bol mê rơp chơt tòm tồi glài he dê.”

²⁵Bol khai lùp Kơnràñ lah: “Cau Bơto la ñcau taih?” Yàng Jesu ho lah: “Be jơnau Añ neh đơs mơ bol mê bơh sơnròp.

²⁶Añ gơs oă bơta đơs mơ cahrña bol mê; mơya Bơtau neh sồr Añ lòt tus la Bơtau song ngan, mơ Añ yal wơl dunnia in ală bơta Añ kơno bơh Kơnràñ.”

²⁷Bol khai ò git wă lah Kơnràñ đơs bơh Bèp bol khai in.

²⁸Behơ̆ Yàng Jesu đơs lah: “Tòm tŭ bol mê yồng Kòn Mơnus hơđang, tŭ hơ̆ bol mê rơp git Añ la Bơtau neh gơs mơ gam gơs, mơ git Añ ò lơh is bơta lơi, mơya Añ mìng yal wơl ală bơta Bèp neh bơto Añ.

²⁹Bơtau neh sồr Añ lòt tus gam ơm sùm sùm mơ Añ, ò lòi Añ ơm is; tài bơh Añ lơh ală bơta niam nùs Kơnràñ sùm.”

³⁰Tòm tŭ Kơnràñ đơs ală bơta hơ̆, gen gơs oă cau dòn Kơnràñ.

³¹Behơ̆ Yàng Jesu đơs mơ ală cau Juda neh dòn Kơnràñ lah: “Dilah bol mê ơm sùm tòm jơnau Añ, gen bol mê ngan la cau bơtê Añ jê;

³²Bol mê rơp git jơnau song, mơ jơnau song rơp hồ toh bol mê.”

³³Bol khai ho lah: “Bol hi la jơi bơtiàn Abraham dê, òhềt tŭ lơi lơh dĭ cau lơi in. Behơ̆ ñchi bơh tài Cau Bơto đơs lah: ‘Bol mê rơp geh hồ toh, taih’?”

³⁴Yàng Jesu ho lah: “Di ngan, Añ đơs ngan mơ bol mê, cau lơi tìs glài la lơh dĭ gơna tồi glài in.

³⁵Dĭ gơna ò ơm sùm tòm hìu nhă, ai kòn gen kư̆ ơm sùm.

³⁶Behơ̆, dilah Kòn hồ toh bol mê, gen bol mê rơp geh khat gơboh ngan.

³⁷Añ git lah bol mê la jơi bơtiàn Abraham dê, mơya bol mê jòi nàng tơnchơt Añ, tài bơh jơnau Añ jê ò gơs tiah tòm bol mê.

³⁸Añ đơs bơta Añ neh gŏ bơh di Bèp Añ, ai bol mê lơh bơta bol mê neh kơno bơh di bèp bol mê dê.”

³⁹Bol khai ho lah: “Bèp bol hi dê la Abraham.” Yàng Jesu đơs lah: “Dilah bol mê la kòn sau Abraham dê, gen rơp lơh ală broă Abraham dê sơl.

⁴⁰Mơya tŭ do bol mê jòi nàng tơnchơt Añ, la cau neh yal bol mê in jơnau song neh kơno bơh Yàng Tom Trồ; Abraham ò gơs tŭ lơi lơh bơta hơ̆!

⁴¹Bol mê lơh broă bèp bol mê dê.” Bol khai đơs lah: “Bol hi ò di la kòn tir; bol hi gơs mìng dô nă Bèp la Yàng Tom Trồ.”

⁴²Yàng Jesu đơs lah: “Dilah Yàng Tom Trồ la Bèp bol mê gen bol mê rơp kòñ gơboh di Añ, tài bơh Añ lik bơh Yàng Tom Trồ mơ bơh Kơnràñ mơ tus; bơh Añ ò di tus is Añ jê ò, mơya să tòm Kơnràñ neh sồr Añ lòt tus.

⁴³Ñchi bơh tài bol mê ò rgơi git wă bơta Añ đơs taih? Tài bơh bol mê ò rgơi dòp jơnau Añ jê.

⁴⁴Bol mê lik bơh bèp bol mê dê la cà ràk, mơ kòñ lơh jat bơta hàm kòñ is bèp bol mê dê. Bơh sơnròp gơ neh la cau tơnchơt cau, ò ntào tòm jơnau song, bơh ò gơs jơnau song tòm gơ ò. Tŭ lơi gơ đơs blac, gen đơs jat nùs is gơ dê, tài bơh gơ la cau đơs blac mơ la bèp bơta đơs blac dê.

⁴⁵Mơya tài bơh Añ đơs jơnau song, gen tàng bol mê ò dòn Añ.

⁴⁶Gơs cau tòm bol mê rgơi kup glài Añ taih? Dilah Añ đơs jơnau song, gen ñchi bơh tài bol mê ò dòn Añ?

⁴⁷Cau lơi lik bơh Yàng Tom Trồ, gen iat jơnau Yàng Tom Trồ. Bơh bol mê ò iat tài bơh bol mê ò gơrê bal mơ Yàng Tom Trồ.”

⁴⁸Ală cau Juda ho lah: “Bol hi đơs lah Cau Bơto la cau Samari mơ kòl cà lơh, hơ̆ la ngan.”

⁴⁹Yàng Jesu ho lah: “Añ ò kòl cà lơh, mơya Añ jòng ro Bèp Añ jê, ai bol mê gen sền òsơp di Añ.

⁵⁰Añ ò jòi bơta gơklŏ să tòm Añ jê, neh gơs Bơtau jòi bơta hơ̆ mơ cahrña.

⁵¹Di ngan, Añ đơs ngan mơ bol mê, dilah cau lơi prap gàr jơnau Añ, gen rơp ò tŭ lơi gŏ bơta chơt ò.”

⁵²Ală cau Juda đơs lah: “Bol hi git loh Cau Bơto kòl cà lơh; Abraham neh chơt, ală cau gơnoar hwơr kung behơ̆ sơl, mơ Cau Bơto đơs lah: ‘Dilah cau lơi prap gàr jơnau Añ, gen rơp ò tŭ lơi git làm bơta chơt!’

⁵³Ngan sơl Cau Bơto dờng rlau mơ Abraham, ồng pàng bol hi dê, la cau neh chơt ơ? Ală cau gơnoar hwơr kung neh chơt! Cau Bơto sơnđan is să he la ñcau taih?”

⁵⁴Yàng Jesu ho lah: “Dilah Añ lơh gơklŏ is Añ in, gen bơta gơklŏ Añ jê la ò gơlik lơ̆; să tòm Bèp lơh gơklŏ Añ in, Kơnràñ la Bơtau bol mê sơnđan la Yàng Tom Trồ bol mê dê.

⁵⁵Bol mê ò git Kơnràñ, mơya Añ git Kơnràñ. Dilah Añ đơs Añ ò git Kơnràñ, gen Añ kung la cau đơs blac be bol mê sơl; mơya Añ git Kơnràñ ngan, mơ prap gàr jơnau Kơnràñ dê.

⁵⁶Bèp bol mê la Abraham hòn chò kơp kòñ geh gŏ ngai Añ jê; khai neh gŏ mơ hòn chò.”

⁵⁷Ală cau Juda đơs lah: “Cau Bơto òhềt tơl pram jơt nam mơ neh gŏ Abraham ơ?”

⁵⁸Yàng Jesu đơs lah: “Di ngan, Añ đơs ngan mơ bol mê, lài mơ tŭ gơs Abraham, Añ neh gơs mơ gam gơs sùm sùm.”

⁵⁹Gen bol khai dòñ lŭ nàng cơm di Kơnràñ, mơya Yàng Jesu dô pleh mơ lik bơh hìu duh khoai.