Read koho Broă 1 Bible Online

Broă 1 - koho bible

Broă 1

¹Ơ ồng dờng Theôphilus, tòm sră dơ̆ dùl, añ neh cih jơh ală bơta Yàng Jesu neh lơh mơ bơto bơh sơnròp,

²jơl tus di ngai Kơnràñ geh guh rê hơđang trồ, tơnơ̆ mơ tŭ Kơnràñ kơnòm di Yàng Hwềng Goh nàng bơto sồr ală cau gơnoar bơto dờng Kơnràñ neh sac rwah.

³Kơnràñ ai oă cơng tàng yal loh ală cau gơnoar bơto dờng in lah Kơnràñ neh kis, tơnơ̆ mơ tŭ neh kong chơt, mơ tơlik să mơ bol khai tòm poan jơt ngai, bơto yal ală bơta bơh lơgar Yàng Tom Trồ.

⁴Tòm tŭ ơm pơjum bal mơ ală cau gơnoar bơto dờng, Kơnràñ nting lah “Bañ lik bơh Jerusalem, mơya kư̆ ơm gơn tĕ bơta mơ Bèp neh ho ai, la bơta bol mê neh kơno Añ đơs.

⁵Bơh ngan Jang neh lơh ƀaptem mơ dà, mơya tòm dô êt ngai tai bol mê rơp gơs ƀaptem mơ Yàng Hwềng Goh.”

⁶Behơ̆ tòm tŭ cau gơnoar bơto dờng ơm pơjum bal mơ Yàng Jesu, gen lùp Kơnràñ lah: “Ơ Yàng, tòm tŭ do Kơnràñ rơp bơtào wơl lơgar Israel sơl?”

⁷Yàng Jesu đơs mơ bol khai lah: “Pah tơngai mơ tŭ jơ Bèp neh lơh nền jat gơnoar Kơnràñ dê, hơ̆ la broă bol mê ò càng git.

⁸Mơya tòm tŭ Yàng Hwềng Goh mù hơđang bol mê, gen bol mê rơp dòp geh gơnap gơnoar, mơ rơp lơh gơs cau lơh cơng bơh Añ tòm ƀòn dờng Jerusalem, jơh lơgar Jude, lơgar Samari, jơl tus làm plai ù.”

⁹Lồc Kơnràñ đơs ală jơnau hơ̆ rau, gen geh guh rê hơđang trồ tòm tŭ ală cau hơ̆ ơm tơnggòr sền, gơs mhwal mù rò Kơnràñ ndơp thit, bol khai ò gŏ tai.

¹⁰Tŭ ală cau hơ̆ ơm tơnggòr sền hơđang trồ tòm tŭ Kơnràñ guh rê, nisơna gơs bàr nă cau klau soh ào bò ntào di gah bol khai,

¹¹mơ đơs lah: “Ơ cau Galile, ñchi bơh tài bol mê ntào tơnggòr sền hơđang trồ behơ̆ taih? Jesu do neh geh guh rê hơđang trồ bơh digùl bol mê, gen kung rơp rê wơl be bol mê neh gŏ Kơnràñ guh rê hơđang trồ hơ̆ sơl.”

¹²Tơnơ̆ hơ̆ ală cau gơnoar bơto dờng bơh mơnơm Ôlibe rê wơl hơ ƀòn dờng Jerusalem. Mơnơm hơ̆ rềp mơ Jerusalem pơgap dô kơsồ

¹³Tòm tŭ neh tus tòm ƀòn dờng, bol khai guh tòm dô nơm ơdŭ tap hơđang la tiah Pier, Jang, Jakơ, Andre, Philip, Thôma, Bathelemi, Mathiơ, Jakơ kòn Alphe, Simôn Selôt, mơ Juda kòn Jakơ òs ơm.

¹⁴Jơh ală cau hơ̆ gơs dô nùs bal hòi dan sùm mơ ală cau ùr, mơ Mari la mè Yàng Jesu bal mơ ală oh Kơnràñ dê sơl.

¹⁵Tòm ală ngai hơ̆, Pier ntào digùl ală oh mi dòn Yàng, (ntum ală cau pơjum tềng hơ̆ pơgap dô rhiang bàr jơt nă), mơ đơs lah:

¹⁶“Ơ ală oh mi, jơnau Sră Goh mơ Yàng Hwềng Goh neh kơnòm di bơr Dabit nàng đơs hwơr bơh Juda, la cau neh lam gùng cau in nàng kup Yàng Jesu, jơnau hơ̆ pal gơlik di ngan.

¹⁷Bơh khai neh bal mơ mpồl bol he, mơ neh geh pơnah tòm gơnoar broă do.

¹⁸(Cau hơ̆ neh ai jền tơngai tồi glài iơh bơsak khai dê rwat dô bă sre, lồc behơ̆ dùh tòm ù bơcah kơndul mơ gơtơlhung jơh pròc.

¹⁹Bơta hơ̆ jơh làng bol Jerusalem git lơm, tian gơs bol khai sơnđan sre hơ̆ jat jơnau đơs bol khai dê la Hakeldama, hơ̆ la sre mhàm)

²⁰Bơh tòm sră Đơs Crih neh cih lah: ‘Lòi tiah ơm khai dê gơlik gơs ngềt ngơt, Bañ gơs dô nă cau lơi ơm tềng hơ̆;’ Mơ lah: ‘Lòi gơs dô nă cau ndai dòp gơnoar broă khai dê.’

²¹Behơ̆, tòm ală cau neh ơm bal mơ bol he, tòm ală tŭ tơngai Yàng Jesu ơm digùl bol he,

²²bơh di tŭ Jang lơh ƀaptem jơl tus di ngai Yàng Jesu guh rê hơđang trồ bơh digùl bol he, pal gơs dô nă cau lơh cơng bal mơ bol he bơh bơta kis wơl Kơnràñ dê.”

²³Ală cau bơtê bơtào bàr nă cau la Jôsep hơ̆ la Barsabba, kung sơnđan la Justus, mơ Mathia.

²⁴Lồc behơ̆ bol khai hòi dan lah: “Khoai Yàng, Kơnràñ git nùs tơl nă cau, dan Yàng sơnio bol hi in tòm bàr nă cau do, ñcau la cau Yàng neh sac rwah,

²⁵nàng ala pơnah broă tòm cau gơnoar bơto dờng dê mơ Juda neh sang lòi nàng lòt tòm tiah ơn is khai in.”

²⁶Gen bol khai tă khà, di di Mathia; khai geh mut bal tòm jơt dùl nă cau gơnoar bơto dờng.