Read koho Broă 10 Bible Online

Broă 10 - koho bible

Broă 10

¹Tòm ƀòn dờng Sesare, gơs dô nă cau sơnđan la Kornai, la cau at dô rhiang ling tòm mpồl ling Itali dê.

²Khai la dô nă cau dòn duh, bal mơ jơh hìu nhă khai duh rngòt di Yàng Tom Trồ lơm, jak pà gòi làng bol in, òs hòi dan mơ Yàng Tom Trồ sùm.

³Pơgap di dê jơ dơ̆ sin tòm trồ ngai, tòm bơta gơtơnggŏ, khai gŏ loh làng gơs dô nă cau gơnrơh Yàng Tom Trồ dê mut tòm hìu khai mơ đơs lah: “Ơ Kornai!”

⁴Khai rngòt rngơt sền trol di cau gơnrơh, mơ đơs lah: “Ơ Yàng, gơs ñchi broă taih?” Cau gơnrơh ho lah: “Jơnau hòi dan mơ bơta pà gòi mê dê neh guh tus hơ Yàng Tom Trồ, mơ Kơnràñ neh cih kah rau.

⁵Tŭ do sồr tĕ cau lòt tus hơ ƀòn dờng Jôppe, jà Simôn kung sơnđan la Pier.

⁶Khai ơm tòm hìu Simôn, cau chài lơh gơltau; hìu hơ̆ rềp di gah dàlềng.”

⁷Tòm tŭ cau gơnrơh đơs mơ khai neh lòt rau, gen Kornai hòi bàr nă cau dong broă khai dê mơ dô nă cau ling duh rngòt ơm hơđơm gơnoar he dê,

⁸mơ yal wơl ală bơta hơ̆ bol khai in iat, lồc behơ̆ sồr bol khai lòt tus hơ Jôppe.

⁹Ngai tơnơ̆, tòm tŭ pe nă bol hơ̆ gam lòt rò gùng mơ neh mòr tus ƀòn dờng, pơgap di di jơ prau, Pier guh hơđang rkàng hìu nàng hòi dan.

¹⁰Khai jơgloh mơ gơdan sào; mơya tòm tŭ cau rcang yò sào gen khai gơlơh jơngo sup tòm dơngoh.

¹¹Khai gŏ trồ gơ pò, mơ gơs phan be dô blah ồi dờng kơt di poan mum, mơ gơtơmù tus tòm ù.

¹²Tòm hơ̆ gơs jơh ală jơi phan poan jơng, ală phan wìn nsròng tòm ù, mơ ală sềm hơđang trồ.

¹³Mơ gơs jơnau đơs mơ khai lah: “Ơ Pier, guh tĕ, lơh poac mơ sa.”

¹⁴Mơya Pier ho lah: “Ơ Yàng, ò di behơ̆ ò; bơh añ ò gơs tŭ lơi sa phan ƀơ̆ ƀơl hala ò goh ò.”

¹⁵Jơnau hơ̆ đơs dơ̆ bàr mơ khai lah: “Phan lơi Yàng Tom Trồ neh lơh goh rau gen bañ sền be la ƀơ̆ ƀơl.”

¹⁶Broă hơ̆ gơlik gơs pe dơ̆, lồc behơ̆ gen phan be dô blah ồi dờng geh tơngguh hơđang trồ.

¹⁷Tòm tŭ Pier ơm kơlôi tòm nùs jơnau gơtha bơta gơtơnggŏ mơ khai neh gŏ hơ̆ la mbe lơi, gen ală cau mơ Kornai sồr lòt neh jòi bàn hìu Simôn rau, mơ neh ơm ntào di bơr mpồng,

¹⁸Bol khai hòi nàng lùp lah tềng do la tiah Simôn sơnđan la Pier ơm, di sơl?

¹⁹Pier gam ơm kơlôi bơh bơta gơtơnggŏ hơ̆ gen Yàng Hwềng đơs mơ khai lah: “Ne gơs pe nă cau ơm jòi mê.

²⁰Behơ̆ ntào tĕ mù lòt bal mơ bol khai, bañ pin, bơh Añ neh sồr bol khai lòt tus.”

²¹Pier mù hơ bol hơ̆ mơ đơs lah: “Añ do la cau bol mê jòi hơ̆; ñchi jơnau bol mê lòt tus tềng do taih?”

²²Bol khai ho lah: “Kornai cau at dô rhiang ling la cau song ring duh rngòt di Yàng Tom Trồ, jơh làng bol Juda neh lơh cơng niam bơh khai, khai hơ̆ neh bơh dô nă cau gơnrơh sàng goh mơ dòp jơnau sồr lòt jà ồng tus tòm hìu, mơ kơno jơnau ồng đơs.”

²³Pier jà bol hơ̆ mut tòm hìu mơ ơm tềng hơ̆. Àng ngai hìng Pier ñă lòt bal mơ bol hơ̆, gơs bàr pe nă cau tòm oh mi bơh Jôppe lòt bal sơl.

²⁴Ngai tơnơ̆ tai bol khai tus hơ Sesare. Kornai ơm gơn bal mơ gơp bơtiàn khai dê mơ oh mi đềt mềr mơ khai neh jà pơjum bal tòm hìu.

²⁵Pier rơp mut gen Kornai lik rò, tơmbic să di jơng khai mơ khoai.

²⁶Mơya Pier yò tơngguh khai mơ đơs lah: “Ồng ntào tĕ, bơh să tòm añ kung la kòn mơnus sơl gơ dê.”

²⁷Tơnơ̆ mơ tŭ Pier tòmbơhbơr mơ Kornai, mut tòm hìu gŏ oă cau ơm pơjum bal.

²⁸Khai đơs mơ bol hơ̆ lah: “Să tòm oh mi neh git lah cau Juda ò geh gơnoar tòmklac bal hala lòt rê mơ cau lơi tòm làng bol ndai, mơya Yàng Tom Trồ neh yal añ in git ò di sền dô nă cau lơi la ƀơ̆ ƀơl hala ò goh.

²⁹Gen tàng, dơ̆ ală oh mi sồr cau lòt jà añ gen añ lòt mo, ò kơlôi bơta lơi. Behơ̆ añ lùp oh mi bơh jơnau lơi mơ oh mi jà añ lòt tus tềng do taih?”

³⁰Kornai ho lah: “Neh poan ngai do rau, kung di di jơ pe, añ ơm hòi dan, nisơna gơs cau soh ào gơcrà àng lơr, ntào di đap añ,

³¹mơ đơs lah: ‘Ơ Kornai, jơnau hòi dan mê dê neh geh kơno rau, bơta pà gòi mê dê neh geh Yàng Tom Trồ cih kah.

³²Behơ̆ mê sồr tĕ cau lòt hơ Jôppe nàng jà Simôn sơnđan la Pier lòt tus hơ do; khai gam ơm tòm hìu Simôn, cau chài lơh gơltau, rềp di gah dàlềng,’

³³gen añ sồr mo cau lòt jà ồng, mơ ồng neh niam nùs lòt tus hơ do. Behơ̆ tŭ do jơh ală bol hi ơm di đap Yàng Tom Trồ, nàng iat jơh ală bơta Yàng neh nting mơ ồng.”

³⁴Pier pò bơr mơ đơs lah: “Ngan añ đal git Yàng Tom Trồ ò di sền òsơp di cau lơi ò,

³⁵mơya tòm jơh ală làng bol, dilah cau lơi duh rngòt di Yàng mơ lơh bơta song ring, gen cau hơ̆ geh Kơnràñ dòp.

³⁶Yàng Tom Trồ ai Jơnau Kơnràñ dê kòn sau Israel in, bơto yal Jơnau Niam lơngap lơngai, bơh Yàng Jesu Krist la Yàng jơh tơl nă cau dê

³⁷Ală ồng neh git loh rau ală bơta neh gơlik gơs, sơntòm bơto yal bơh Galile mơ làm jơh kơnhwàl Jude; tơnơ̆ mơ tŭ Jang neh bơto yal bơh bơta ƀaptem;

³⁸mbe lơi Yàng Tom Trồ neh bong mơñà Yàng Jesu Cau Nasaret in mơ Yàng Hwềng Goh bal mơ gơnap gơnoar, lồc behơ̆ Kơnràñ lòt làm jơh, lơh broă lơbơn niam mơ sơmbòi jơh ală cau cà ràk bơklơn, bơh Yàng Tom Trồ ơm bal mơ Kơnràñ.

³⁹Bol hi la cau lơh cơng bơh jơh ală bơta Kơnràñ neh lơh tòm Jude mơ tòm Jerusalem. Làng bol hơ̆ neh yồng Kơnràñ hơđang chi pơng mơ tơnchơt tơn.

⁴⁰Mơya tus di ngai pe Yàng Tom Trồ neh lơh Kơnràñ in kis wơl, mơ Kơnràñ tơlik să,

⁴¹ò dimơ jơh làng bol, mơya tơlik să mơ bol hi la ală cau lơh cơng mơ Yàng Tom Trồ neh sac lài, la cau sa hùc bal mơ Kơnràñ, tơnơ̆ mơ tŭ Kơnràñ neh kis wơl bơh bơta chơt.

⁴²Kơnràñ neh nting sồr bol hi bơto yal tĕ làng bol in, mơ lơh cơng lah să tòm Kơnràñ la Bơtau mơ Yàng Tom Trồ neh pồ bơtào lơh gơs Cau Kwang Cahrña cau kis mơ cau chơt.

⁴³Jơh ală cau gơnoar hwơr neh lơh cơng bơh Kơnràñ lah kòp nă cau lơi dòn Kơnràñ gen kơnòm di sơnđan Kơnràñ mơ dòp geh bơta toh glài.”

⁴⁴Tòm tŭ Pier gam đơs ală jơnau do gen Yàng Hwềng Goh mù hơđang tơl nă cau ơm iat jơnau Yàng.

⁴⁵Ală cau dòn Yàng neh siat gơltau la ală cau neh lòt bal mơ Pier, gen ai lơh krơi lơm tài bơh bơta ai gòi la Yàng Hwềng Goh kung tuh hơđang ală cau làng bol bơdìh in sơl,

⁴⁶bơh ală cau dòn Yàng hơ̆ kơno bol khai đơs jơnau đơs ndai mơ jòng ro Yàng Tom Trồ.

⁴⁷Tŭ hơ̆ Pier đơs tai lah: “Ñcau rgơi kơryan lơh ƀaptem mơ dà, ală cau do in la cau neh dòp geh Yàng Hwềng Goh kung be bol he taih?”

⁴⁸Behơ̆ khai sồr lơh ƀaptem bol hơ̆ in ai sơnđan Yàng Jesu Krist. Gen bol hơ̆ jà khai ơm wơl tòm bàr pe ngai tai.