Read koho Broă 14 Bible Online

Broă 14 - koho bible

Broă 14

¹Tòm Ikôni, Pol mơ Banaba mut bal tòm hìu jum cau Juda dê mơ bơto yal lơh oă ngan cau Juda mơ cau Grek dòn Yàng.

²Mơya ală cau Juda ò dòn gen chồl bơchồt, lơh nùs cau làng bol bơdìh in kơlôi iơh di ală oh mi.

³Bulah behơ̆, Pol mơ Banaba ơm wơl tềng hơ̆ jŏ ngai, mơ bơto yal bơh Yàng dô bă khin cha, mơ Yàng ngui tê bol khai lơh gơs ală bơta krơi tềl is, nàng lơh cơng di ngan jơnau bơta nđàc Kơnràñ dê.

⁴Mơya làng bol tòm ƀòn dờng cah is; mpồl do jat cau Juda, mpồl ne jat bàr nă cau gơnoar bơto dờng.

⁵Tŭ hơ̆, ală cau làng bol bơdìh mơ cau Juda bal mơ ală cau kwang bol khai dê jòi kai lơh iơh mơ cơm lŭ di bàr nă cau gơnoar bơto dờng,

⁶Kơno jơnau hơ̆, bàr nă cau gơnoar bơto dờng pleh lòt hơ Listrơ mơ Derbơ, la ală ƀòn dờng gơrê bal mơ Likaôni mơ ală kơnhwàl gùt dar hơ̆,

⁷mơ bơto yal Jơnau Niam tềng hơ̆.

⁸Tòm Listrơ gơs dô nă cau gơlte jơng bơh tŭ deh, ò tŭ lơi rgơi lòt.

⁹Khai iat jơnau Pol bơto yal. Pol sền trol di khai, gŏ khai gơs bơta dòn nàng geh sơmbòi,

¹⁰gen đơs dờng lah: “Ntào tĕ song jơng.” Khai sơnđoh mơ cơnđòa lòt.

¹¹Làng bol gŏ broă Pol neh lơh, gen driau dờng mơ jơnau Likaôni lah: “Ală yàng neh ai rùp kòn mơnus tơlik să mù mơ bol he.”

¹²Bol hơ̆ sơnđan Banaba la yàng Jeus, ai Pol la yàng Hermes, tài bơh khai la cau lam bồ bơto.

¹³Cau ơn phan duh khoai yàng Jeus dê gơs dô nơm bơmồng hơ bơdìh ƀòn dờng, khai cèng kơnrồ dam mơ ñòng bơkào tus di đap mpồng, kòñ bal mơ mpồl làng bol ơn phan duh khoai bàr nă cau gơnoar bơto dờng in.

¹⁴Mơya dơ̆ bàr nă cau gơnoar bơto dờng la Banaba mơ Pol kơno bơta hơ̆ gen crè ào he, brồ mut tòm gùl mpồl làng bol, mơ driau dờng:

¹⁵“Ơ ală oh mi, ñchi bơh tài lơh bơta hơ̆ taih? Bol hi la kòn mơnus kung be ală oh mi sơl, bol hi bơto yal Jơnau Niam ală oh mi in, nàng oh mi wèt sang ală yàng roh lơm ne, mơ rê wơl hơ Yàng Tom Trồ gam kis sùm, la Bơtau neh crơng gơs trồ tiah, dàlềng mơ ală phan tòm hơ̆.

¹⁶Tòm rài lài òr, Kơnràñ lòi jơh ală làng bol in lòt jat gùng is he dê,

¹⁷bulah behơ̆ Kơnràñ kư̆ lơh cơng sùm bơh să tòm he, pà bơta lơngai lơngò, ai mìu bơh đang trồ, pà ai sơnam kơnhai gơs oă plai đo, phan sa tơngkah tơngkañ, lơh nùs oh mi bềng lìu bơta hòn chò.”

¹⁸Bulah neh đơs jơh jơnau, bàr nă cau gơnoar bơto dờng kalke ngan, sồng geh kơryan mpồl làng bol ơn phan duh khoai bol khai in.

¹⁹Tŭ hơ̆, gơs ală cau Juda bơh Antiôt mơ Ikôni lòt tus bơchồt mpồl làng bol, bol khai cơm lŭ di Pol, tồnlah khai neh chơt rau, gen hwài khai hơ bơdìh ƀòn dờng.

²⁰Mơya tòm tŭ ală cau bơtê ơm pơjum gùt dar Pol, gen khai guh mơ mut wơl tòm ƀòn dờng. Ngai hìng Pol lòt mơ Banaba tus hơ Derbơ.

²¹Tòm tŭ bàr nă cau gơnoar bơto dờng neh sir bơto Jơnau Niam tòm ƀòn dờng hơ̆ rau, mơ lơh oă cau gơlik gơs cau bơtê, gen rê wơl hơ Listrơ, Ikôni mơ Antiôt,

²²Lơh ală cau bơtê kơ̆ nùs, bơto pơndòm bol khai prap kơ̆ bơta dòn, mơ yal lah bol he pal kong oă bơta bòl glar gen sồng geh mut tòm lơgar Yàng Tom Trồ.

²³Tơnơ̆ mơ tŭ neh bơtào gơnoar broă ală cau kwang kra tòm kòp nơm Hìu Jum Goh, bàr nă cau gơnoar bơto dờng hòi dan, ơt sa rau, mơ jào ală cau hơ̆ Yàng in la Bơtau bol khai dòn kơnòm.

²⁴Bơh tềng hơ̆ bàr nă cau gơnoar bơto dờng lòt gan Pisidi mơ tus hơ Pamphili.

²⁵Tơnơ̆ mơ tŭ neh bơto yal jơnau Yàng tòm Perje rau, gen mù tơn tòm Attali.

²⁶Bơh tềng hơ̆, bol khai hào ơhò tus hơ Antiôt, la tiah bơh lài bol khai geh jào bơta nđàc Yàng Tom Trồ in nàng lơh broă bol khai pa lơh sir.

²⁷Tòm tŭ tus tềng hơ̆, Pol mơ Banaba pơjum tơrgòm Hìu Jum Goh, yal wơl jơh ală broă Yàng Tom Trồ neh lơh bal mơ bol khai, mơ mbe lơi Kơnràñ neh pò mpồng bơta dòn cau làng bol bơdìh in.

²⁸Bàr nă ồng ơm tềng hơ̆ jŏ ngai bal mơ ală cau dòn.