Read koho Broă 16 Bible Online

Broă 16 - koho bible

Broă 16

¹Pol tus hơ ƀòn dờng Derbơ mơ Listrơ. Tềng hơ̆, gơs dô nă cau bơtê sơnđan la Timôthe, kòn klau dô nă cau ùr Juda dê neh dòn Yàng, ai bèp khai la cau Grek.

²Ală cau dòn ơm tòm Listrơ mơ Ikôni lơh cơng niam bơh Timôthe.

³Pol kòñ cèng Timôthe lòt bal, gen tàng Pol neh siat gơltau khai in, tài bơh ală cau Juda ơm tòm ală tiah hơ̆ git lơm bèp khai la cau Grek.

⁴Tòm tŭ neh lòt làm ală ƀòn dờng, bol khai nting sồr ală cau dòn pal prap gàr ală bơta sồr lam neh geh lơh nền bơh ală cau gơnoar bơto dờng mơ ală cau kwang kra ơm tòm Jerusalem, mơ sồr bol khai pal lơh jat.

⁵Behơ̆, ală Hìu Jum Goh geh kơ̆ nền pràn kơldang tòm bơta dòn, mơ khà cau dòn kư̆ sơlo gơbơtơl kòp ngai.

⁶Bol khai lòt làm kơnhwàl Phriji mơ Galati, tài bơh Yàng Hwềng Goh neh bơkơŭ bol khai bơto yal jơnau Yàng tòm Asia.

⁷Tòm tŭ neh tus hơ nhàr Misia rau, bol khai pơnđơl mut tòm kơnhwàl Bithini, mơya Hwềng Yàng Jesu dê ò ai gơnoar,

⁸gen tàng bol khai lòt gan di Misia mơ mù hơ Trôas.

⁹Tòm mang hơ̆ Pol gŏ bơta gơtơnggŏ gơs dô nă cau Masedoan ntào di đap khai mơ rac dan lah: “Tus tĕ hơ Masedoan nàng dong kòl bol hi.”

¹⁰Tòm tŭ Pol gŏ bơta gơtơnggŏ rau, tŭ hơ̆ mo bol hi rcang nàng tus hơ Masedoan, bơh dòp git nền lah Yàng Tom Trồ hòi sac bol hi bơto yal Jơnau Niam ală cau ơm tềng hơ̆.

¹¹Behơ̆, bơh Trôas bol hi hào ơhò tus song hơ Samôtras, ngai tơnơ̆ lòt tus hơ Neapôli.

¹²Bơh tềng hơ̆, bol hi lòt tus hơ Philip la ƀòn dờng sơnròp tòm càr Masedoan, gơrê bal mơ lơgar Rôma. Bol hi ơm tềng hơ̆ dô êt ngai.

¹³Tus dê ngai Saƀat, bol hi lik hơ bơdìh ƀòn dờng lòt rềp di gah hiòng, tềng hơ̆ la tiah bol hi kơlôi lah gơs cau Juda pơjum bal nàng hòi dan; Bol hi nggui mơ tòmbơhbơr mơ ală cau ùr neh pơjum tềng hơ̆.

¹⁴Gơs dô nă cau ùr iat jơnau bol hi, sơnđan la Lidi, ƀòn tòm la Thiatirơ, la cau tac bài dà gur, mơ duh khoai Yàng Tom Trồ. Yàng pò nùs mò in wèt tồr iat jơnau Pol đơs.

¹⁵Tơnơ̆ mơ tŭ neh gơs ƀaptem bal mơ cau tòm hìu khai dê rau, Lidi jà bol hi lah: “Dilah ală ồng sơwì añ la cau dòn song mơ Yàng, gen dan mut ơm tòm hìu añ.” Lồc behơ̆ khai jơh nùs jà bol hi mut.

¹⁶Dô ngai ne, bol hi lòt tus hơ tiah hòi dan, gen tìp dô nă cau dĭ ùr kòl cà Phithôn mut mơ ai khai in yal lài bơta rơp gơlik tus. Khai jòi geh oă ngan priă cau tòm khai in tòm bơta juh proh.

¹⁷Khai jat Pol mơ bol hi, hòi driau lah: “Ală cau do la dĭ gơna Yàng Tom Trồ Hơđang Rlau Jơh dê, bơto yal bol mê in bơta dong klàs.”

¹⁸Khai kư̆ lơh sùm behơ̆ tòm oă ngai, Pol gơlơh sơềt sơềl ngan tòm nùs, gen wơlke đơs mơ hwềng iơh lah: “Añ ai sơnđan Yàng Jesu Krist sồr mê lik tĕ bơh di cau ùr do.” Gen tòm jơ hơ̆ mo hwềng iơh lik bơh di khai.

¹⁹Tòm tŭ ală cau tòm khai dê gŏ ò gam gơn kơnòm jòi geh cồng nha tai, gen kup Pol mơ Sila hwài tus hơ ƀlàng drà di đap ală cau kwang,

²⁰Bol khai cèng bol hơ̆ tus di đap ală cau kwang dờng Rôma mơ đơs lah: “Ală cau do la cau Juda, lơh nggồr nggàc tòm ƀòn dờng bol he dê,

²¹bơto yal ală bơta òs mòng tòmdră mơ bơta boh lam bol he dê, bol he la cau Rôma ò rgơi dòp hala lơh jat.”

²²Mpồl làng bol kung ntào tòmdră di Pol mơ Sila sơl, ală cau kwang dờng sồr crè ào mơ pù lơh bàr nă bol khai.

²³Tơnơ̆ mơ tŭ neh pù lơh rau, tơmut bol khai tòm hìu jàm, mơ nting sồr cau at bồ hìu jàm kơp gàr kơ̆ nền ngan.

²⁴Geh gơnoar sồr hơ̆ rau, cau at bồ hìu jàm sơrbì bol khai tòm ơdŭ jơngo mơ dò gơsàng di jơng.

²⁵Pơgap digùl mơnang, Pol mơ Sila ơm hòi dan mơ đơs chò jòng ro Yàng Tom Trồ, jơh ală cau ơm jàm kơno lơm.

²⁶Nisơna, gơs bơta gơlơnggơr ù dờng ngan, tian gơs mơnàng hìu jàm wañ lơnggơr; tŭ hơ̆ mo, ală mpồng gơ pò jơh, che sreng cap cau ơm jàm gơhồ sơntă jơh hir.

²⁷Cau at bồ hìu jàm kah rngal, gŏ ală mpồng neh gơ pò jơh, tồnlah ală cau ơm jàm neh dô jơh rau, gen tă đào mong srơp să tòm.

²⁸Mơya Pol hòi dờng lah: “Bañ lơh iơh di să tòm behơ̆, jơh ală bol hi gam lơm do.”

²⁹Cau at bồ hìu jàm hòi cau ai ồs, mut sơrbac sơrbang, rơm să rngòt, mơ tơmbic să di jơng Pol mơ Sila,

³⁰chòp tơlik bàr nă bol khai hơ bơdìh mơ lùp lah: “Ơ ală ồng, ñchi añ pal lơh tồ geh dong klàs taih?”

³¹Bol khai ho lah: “Dòn tĕ Yàng Jesu gen mê mơ jơh hìu nhă mê rơp geh dong klàs.”

³²Gen bol khai bơto yal jơnau Yàng khai in, mơ jơh ală cau ơm tòm hìu khai in sơl.

³³Di di jơ hơ̆ tòm mang hơ̆, cau at bồ hìu jàm cèng bàr nă ồng rào ală tềl sồt; lồc behơ̆ khai mơ jơh hìu nhă gơs ƀaptem mo.

³⁴Cau at bồ hìu jàm jà bàr nă ồng guh tòm hìu khai dê mơ rcang yò sào. Khai mơ jơh hìu nhă hòn chò ngan bơh neh dòn Yàng Tom Trồ.

³⁵Àng drim ngai tơnơ̆, ală cau kwang Rôma sồr ală cau ling đơs mơ cau at bồ hìu jàm lah: “Hồ tĕ bàr nă cau hơ̆.”

³⁶Behơ̆ cau at bồ hìu jàm đơs mơ Pol lah: “Ală cau kwang dờng neh sồr añ hồ ală ồng; behơ̆ lik tĕ mơ lòt lơngap lơngai.”

³⁷Mơya Pol đơs mơ bol khai lah: “Bol hi la làng bol Rôma, tòm tŭ òhềt lơh nền glài gen bol khai neh pù lơh bol hi di đap ƀòn lơgar, lồc behơ̆ krơ̆ tòm hìu jàm; mơ tŭ do kòñ tơlik òm bol hi ơ? Ò di behơ̆. Să tòm bol khai pal lòt tus hơ do nàng hồ bol hi.”

³⁸Ală cau kwang dờng kơno ală ling yal wơl jơnau hơ̆, gen rngòt tài bơh git bàr nă cau hơ̆ la cau Rôma.

³⁹Behơ̆, bol khai lòt tus dan să mơ lam bàr nă ồng lik, mơ dan bol khai lik bơh di ƀòn dờng.

⁴⁰Tòm tŭ lik bơh jàm, bàr nă cau gơnoar bơto dờng mut tòm hìu Lidi, còp să mơ bơto pơndòm ală cau dòn, lồc behơ̆ lik lòt.