Read koho Broă 17 Bible Online

Broă 17 - koho bible

Broă 17

¹Pol mơ Sila lòt gan di Amphipôlis mơ Apôlôni, lồc behơ̆ lòt tus hơ Tesalônika, tềng hơ̆ gơs dô nơm hìu jum cau Juda dê.

²Jat bơta òs mòng Pol tus hơ hìu jum cau Juda dê, mơ tòm pe ngai Saƀat khai tòmbơyai bal mơ bol hơ̆,

³ai Sră Goh yal loh mơ lơh cơng lah Bơtau Krist pal kong jê sồt, lồc behơ̆ kis wơl bơh bơta chơt. Khai đơs lah: “Yàng Jesu mơ añ bơto yal ală ồng in do hơ̆ la Bơtau Krist.”

⁴Gơs cau ƀà tòm bol hơ̆ geh bơto pơndòm jat Pol mơ Sila; kung gơs oă ngan cau Grek duh rngòt Yàng Tom Trồ, mơ gơs oă cau ùr pas ryŭ dòn Yàng sơl.

⁵Mơya ală cau Juda ƀoah gơjrañ, jà ală cau gơlềng gơlàng tòm gùng pơjum gơs mpồl, lơh nggồr nggàc tòm ƀòn dờng. Bol hơ̆ brồ mut tòm hìu Jasôn, jòi kup Pol mơ Sila nàng cèng tơlik di đap làng bol.

⁶Jòi ò bàn, bol khai hwài Jasôn bal mơ dô êt nă cau dòn tus di đap ală cau kwang at bồ tòm ƀòn dờng mơ yă lah: “Ală cau do neh lơh sơlồng sơlàng tòm ƀòn lơgar, tŭ do bol khai kung neh tus tềng do,

⁷mơ Jasôn neh wă rò bol hơ̆ tòm hìu! Jơh bol khai tòmdră wơl mơ gơnoar sồr Sesa dê, mơ đơs lah gơs dô bơtau ndai, la Jesu.”

⁸Kơno ală jơnau hơ̆, làng bol mơ ală cau kwang at bồ ƀòn dờng ò suk ơm.

⁹Tơnơ̆ hơ̆, ală cau kwang at bồ sồr Jasôn mơ ală cau ndai tơm priă jat bơta boh lam lơh nền, gen lòi bol khai in lòt.

¹⁰Tòm mang hơ̆ mo, ală cau dòn jun Pol mơ Sila tus hơ Bere. Neh tus tềng hơ̆ rau, bol khai mut tòm hìu jum cau Juda dê.

¹¹Ală cau ơm tềng hơ̆ git jơnau rlau mơ ală cau ơm tòm Tesalônika, bol khai kơno jơnau Yàng dô bă ngac ngar, kòp ngai kung sền sơwì Sră Goh, nàng lòng sền jơnau Pol bơto sồr hơ̆ la ngan hala ò.

¹²Oă cau tòm mpồl bol khai dòn Yàng, gơs ală cau ùr Grek pas ryŭ, bal mơ ală cau klau kung oă sơl.

¹³Mơya tòm tŭ cau Juda ơm tòm Tesalônika kơno Pol kung bơto yal jơnau Yàng Tom Trồ tòm Bere, gen bol khai tus tềng hơ̆ nàng lơh dơrcul mơ chồl bơchồt làng bol.

¹⁴Tŭ hơ̆ mo ală cau dòn jun Pol lòt hơ đah dàlềng, ai Sila mơ Timôthe gen ơm wơl tòm Bere.

¹⁵Ală cau lòt jun Pol lam khai tus hơ Athen lồc behơ̆ rê wơl hơ Bere, mơ cèng jơnau Pol nting sồr Sila mơ Timôthe in pal lòt tus hơ khai mhar dilah rgơi.

¹⁶Tŭ hơ̆, Pol ơm gơn Sila mơ Timôthe tòm ƀòn dờng Athen, khai gơjrañ ngan tòm tŭ gŏ tòm ƀòn dờng hơ̆ bềng lìu ală rùp ràk.

¹⁷Behơ̆, khai tòmbơyai bal mơ cau Juda tòm hìu jum cau Juda, bal mơ làng bol bơdìh duh khoai Yàng Tom Trồ, mơ ală cau lòt cau rê tòm ƀlàng drà kòp ngai.

¹⁸Gơs ală cau bơto tòm mpồl cau Epikurien mơ cau Stoic kung tòm pơndang mơ khai. Cau ƀà lùp lah: “Ñchi cau jak đơs do kòñ đơs taih?” Cau ƀà tai đơs lah: “Gơlơh be khai bơto yal bơh ală yàng lơgar bơdìh,” tài bơh Pol bơto yal Jơnau Niam bơh Yàng Jesu mơ bơta kis wơl.

¹⁹Bol khai kup Pol cèng tus hơ mpồl kwang tơrña tòm tiah Areôpa mơ lùp lah: “Bol hi kòñ git loh ñchi bơta bơto pa do mơ ồng đơs hơ̆ di sơl?

²⁰Bơh ală bơta ồng bơto bol hi iat krơi is, gen tàng bol hi kòñ git jơnau gơtha ală bơta hơ̆ la ñchi.”

²¹Ngan behơ̆, jơh ală cau Athen mơ cau lơgar bơdìh ơm ing tòm Athen mìng lòi tŭ nàng đơs mơ iat jơnau pa mơ krơi lơm.

²²Tŭ hơ̆, Pol ntào digùl tiah Areôpa mơ đơs lah: “Ơ ală ồng la cau Athen, añ gŏ tòm jơh ală pơnah, ală ồng ngan la cau duh rngòt.

²³Bơh tòm tŭ añ lòt làm ƀòn dờng mơ sền ală tiah duh khoai ală ồng dê, añ gŏ dô nơm cơnòng duh khoai gơs jơnau cih lah: DUH YÀNG ÒHỀT GIT. Behơ̆ Bơtau ală ồng duh khoai mơ ò git hơ̆, la Bơtau añ bơto yal ală ồng in do.

²⁴Yàng Tom Trồ la Bơtau neh crơng gơs dunnia mơ ală phan tòm hơ̆, la Yàng trồ tiah dê, ò ơm tòm hìu duh khoai bơh tê cau lơh gơs ò.

²⁵Kơnràñ kung ò càng ngui tê cau nàng duh broă, gơlơh be Kơnràñ pal càng di bơta lơi, tài bơh să tòm Kơnràñ la Bơtau ai bơta kis, nhơm tă mơ jơh ală bơta ndai tơl nă cau in.

²⁶Bơh di dô nă cau Kơnràñ neh lơh gơlik gơs ală làng bol, mơ lơh bol khai in ơm kis làm jơh hơđang ù, Kơnràñ lơh nền pah tŭ tơngai mơ nhàr tiah bol khai in ơm,

²⁷nàng bol khai jòi jat Yàng Tom Trồ, tồ rgơi geh tìp Kơnràñ, bulah Kơnràñ ò ơm ngài bơh kòp nă tòm bol he.

²⁸Bơh ơm tòm Kơnràñ bol he geh kis, lơh lòt, mơ gam gơs; be dô êt nă cau cih pơnđik ală ồng dê đơs lah: ‘Bol he kung la ală kòn Kơnràñ dê sơl.’

²⁹Bơh tòm tŭ he la ală kòn Yàng Tom Trồ dê, gen bol he bañ tồnlah Yàng Tom Trồ be rùp ràk màh priă, hala lŭ, bơh broă chài lơh mơ jat bơta kơlôi sơnơng kòn mơnus dê mơ lơh gơs.

³⁰Yàng Tom Trồ ò kòp ală rài cau òhềt git Kơnràñ ò, mơya tŭ do Kơnràñ sồr jơh ală cau tòm kòp bă tiah pal gơjrañ sang glài,

³¹bơh Yàng Tom Trồ neh lơh nền dô ngai, tòm tŭ Kơnràñ rơp ai bơta song ring cahrña dunnia bơh Cau Kơnràñ neh pồ bơtào. Kơnràñ lơh cơng tàng nền cê kòp nă cau in gŏ, Kơnràñ neh lơh Khai in kis wơl bơh bơta chơt.”

³²Dơ̆ kơno đơs bơh bơta kis wơl cau chơt dê, gen cau ƀà dơñŏ tơnhial, cau ƀà tai đơs lah: “Bol he kòñ iat ồng đơs jơnau do dô dơ̆ tai.”

³³Behơ̆, Pol lik lòt bơh di bol khai.

³⁴Mơya gơs dô êt cau jat khai mơ dòn Yàng; tòm ntum cau hơ̆ gơs Deni la cau kwang tơrña Areôpa dê, mơ dô nă cau ùr sơnđan la Damari, bal mơ ală cau ndai tai.