Read koho Broă 18 Bible Online

Broă 18 - koho bible

Broă 18

¹Tơnơ̆ hơ̆ Pol lik bơh Athen lòt tus hơ Kôrintô.

²Tềng hơ̆, khai tìp mơ dô nă cau Juda, sơnđan la Akila, khai deh tòm ƀòn Pontus, bal mơ bau ùr la Prissil pa tus bơh lơgar Itali, tài bơh bơtau Claudius neh sồr jơh ală cau Juda pal lik bơh Rôma. Pol dah còp bol khai,

³ơm lơh broă bal tòm hìu bol khai, tài bơh broă lơh ndròm bal la jing sàl.

⁴Kòp ngai Saƀat Pol bơto sồr tòm hìu jum cau Juda, mơ chồl pơndòm ală cau Juda mơ cau Grek.

⁵Tòm tŭ Sila mơ Timôthe tus bơh lơgar Masedoan, Pol ơn jơh tŭ tơngai khai dê nàng bơto yal jơnau Yàng dê, mơ lơh cơng bơh cau Juda in lah Yàng Jesu la Bơtau Krist.

⁶Mơya ală bol hơ̆ tòmdră đơs tràl sơrbil, gen tàng Pol rtuh ào khai mơ đơs lah: “Mhàm bol mê tuh wơl hơđang bồ bol mê! Ai đah mơ añ gen ò kòl glài; bơh tŭ do añ rơp lòt tus hơ làng bol bơdìh.”

⁷Pol lik bơh hơ̆, mut tòm hìu dô nă cau sơnđan la Tit Justus, la cau duh khoai Yàng Tom Trồ; hìu khai di gah hìu jơnum cau Juda dê.

⁸Tŭ hơ̆ Krispus la cau at bồ hìu jum cau Juda, bal mơ jơh hìu nhă khai dòn Yàng; kung gơs oă cau Kôrintô kơno Pol bơto gen dòn, mơ gơs ƀaptem.

⁹Tòm trồ mang Yàng đơs mơ Pol tòm bơta gơtơnggŏ lah: “Bañ rngòt mơya đơs tĕ, bañ ơm mŏ mŏ;

¹⁰bơh Añ ơm bal mơ mê, ò gơs cau lơi sò tơm nàng lơh iơh di mê ò, bơh Añ gơs oă cau tòm ƀòn dờng do.”

¹¹Pol ơm tòm ƀòn hơ̆ dô nam mơ prau kơnhai, bơto jơnau Yàng Tom Trồ dê bol khai in.

¹²Tòm tŭ Gallio lơh gơs kwang đơng lơgar Acai dê, cau Juda dô nùs bal ntào tòmdră mơ Pol, kup khai cèng lòt tus hơ tiah cahrña,

¹³mơ yă lah: “Cau do bơchồt làng bol duh khoai Yàng Tom Trồ tìs mơ bơta boh lam.”

¹⁴Pol rơp pò bơr đơs, gen Gallio đơs mơ cau Juda lah: “Ơ cau Juda, dilah bơh lơh tìs boh lam hala bơta iơh bơsak lơi, gen ngan la añ pal kong iat bol mê.

¹⁵Mơya dilah do la bơta tòm pơndang bơh ală jơnau đơs, ală sơnđan hala bơta boh lam is bol mê dê, gen cahrña is tĕ bol mê dê, añ ò bài cahrña ală broă hơ̆ ò.”

¹⁶Gen Gallio bơtrơh tơlik ală bol hơ̆ bơh tiah cahrña.

¹⁷Bol khai kup Sôthen, cau sền gàr hìu jum cau Juda, pù lơh di đap tiah cahrña, mơya Gallio ò bài kơlôi bơh broă hơ̆.

¹⁸Pol gam ơm jŏ ngai bal mơ cau dòn tòm Kôrintô, lồc behơ̆ tơngac ală cau dòn, hào ơhò bal mơ Prissil mơ Akila, lòt hơ lơgar Siri, tơnơ̆ mơ tŭ neh koah sŏ tòm Senkre, bơh khai neh gơs jơnau ho pơgon.

¹⁹Tus hơ Ephesô rau, gen Pol lòi bol khai ơm tềng hơ̆. Ai să tòm khai gen mut tòm hìu jum cau Juda tòmbơyai mơ ală cau Juda.

²⁰Ală bol hơ̆ dan khai ơm jŏ tai, mơya khai ò bài ơm.

²¹Sơlơ̆u wơl, khai tơngac ală cau hơ̆ mơ đơs lah: “Dilah Yàng Tom Trồ kòñ gen añ rơp tus wơl hơ bol mê.” Lồc behơ̆ khai hào ơhò bơh Ephesô mơ lòt.

²²Tòm tŭ tus hơ Sesare, gen khai guh hơ Jerusalem, còp să Hìu Jum Goh, gen lòt hơ Antiôt.

²³Khai ơm tềng hơ̆ dô êt jŏ, lồc behơ̆ lòt làm jơh lơgar Galati mơ lơgar Phriji, lơh jơh ală cau bơtê in kơ̆ nùs.

²⁴Tŭ hơ̆, gơs dô nă cau Juda sơnđan la Apôlôs, ƀòn tòm khai la Aleksandria lòt tus hơ Ephesô; khai la cau đơs jak mơ git wă Sră Goh sơl.

²⁵Khai neh geh bơtê jơnau Yàng dê, mơ ai nùs duh hul bơto yal mơ bơto tòm toh ngan ală bơta bơh Yàng Jesu, bulah khai mìng git bơta ƀaptem Jang dê lơm.

²⁶Khai sơntòm bơto yal dô bă khin cha tòm hìu jum cau Juda. Dơ̆ Prissil mơ Akila kơno khai bơto gen cèng khai rê hìu mơ bol khai, mơ yal Gùng Duh Khoai Yàng Tom Trồ dê tòm toh rlau tai khai in.

²⁷Tòm tŭ Apôlôs lơh nền lòt hơ lơgar Acai, gen ală cau dòn tòm Ephesô dong kòl khai cih sră pơyoa ală cau dòn in tòm Acai sồr wă rò khai. Tòm tŭ neh tus rau, gen khai dong kòl oă ngan ală cau neh kơnòm di bơta nđàc mơ gơlik gơs cau dòn.

²⁸Bơh khai pràn kơldang bơto tòmdră mơ cau Juda di đap ƀòn lơgar, mơ khai ai Sră Goh lơh cơng lah Yàng Jesu la Bơtau Krist.