Read koho Broă 2 Bible Online

Broă 2 - koho bible

Broă 2

¹Tus di ngai pơjum sa Ngai Pram Jơt, ală cau bơtê pơjum bal dô bă.

²Nisơna, gơs ntas bơh đang trồ tus be ntas càl khồm ur ur bềng jơh dô nơm hìu bol khai ơm nggui.

³Ală cau bơtê gŏ ală lơmpiat be lơmpiat ồs gơlik, gơcah is mơ rơp hơđang kòp nă cau tòm bol khai.

⁴Jơh tơl nă geh bềng lìu Yàng Hwềng Goh, rơp sơntòm đơs ală jơnau đơs lơgar ndai, jat be Yàng Hwềng ai bol khai in đơs.

⁵Tŭ hơ̆ gơs ală cau Juda la cau duh rngòt tus bơh tòm jơh ală làng bol tòm dunnia mơ ơm tòm Jerusalem.

⁶Tòm tŭ kơno ntas ală jơnau hơ̆, gen mpồl làng bol ràn tus, mơ nrơt nrơl bơh kòp nă kơno lơm ală cau bơtê đơs jơnau đơs lơgar tòm he dê.

⁷Bol hơ̆ mơp dơl ngan mơ lùp bal lah: “Ală cau đơs hơ̆ gen ò di la cau Galile ò ơ?

⁸Behơ̆, mbe bol he kơno bol khai đơs jơnau lơgar tòm bol he dê taih?

⁹Cau Pathe, Medi, Elamit, cau ơm tòm Mesôpôtami, Jude, Kapadôs, Pontus, Asi,

¹⁰Phriji, Pamphili, Ejiptơ, tiah Libi rềp Siren, mơ ală cau nac tus bơh Rôma,

¹¹jơh ală cau Juda mơ cau pa jat gùng duh khoai cau Juda dê, cau Kret bal mơ cau Arap sơl, bol he kơno bol khai ai jơnau đơs bol he dê mơ đơs bơh ală broă gơnap gơnoar Yàng Tom Trồ dê.”

¹²Jơh tơl nă bol khai ai lơh crih crài, ò git kơlôi mbe lơh, gen đơs bal lah: “Ñchi jơnau gơtha broă do taih?”

¹³Mơya gơs cau ndai dơñŏ tơnhial lah: “Bol khai bơñul tơrnòm pa gơ dê gen.”

¹⁴Mơya Pier ntào bal mơ jơt dùl nă cau gơnoar bơto dờng, ai jơnau đơs mơ ală làng bol lah: “Ơ ală cau Juda mơ jơh tơl nă cau ơm tòm Jerusalem, git tĕ loh bơta do mơ wèt tồr iat jơnau añ.

¹⁵Ală cau do ò di bơñul ñô be ală oh mi pin hơ̆ ò, tài bơh tŭ do la sin jơ àng drim.

¹⁶Mơya do la bơta Yàng kơnòm cau gơnoar hwơr Jôel đơs lah:

¹⁷‘Yàng Tom Trồ đơs lah: Tòm ală ngai lồi dut, Añ rơp tuh Hwềng Añ hơđang jơh ală poac să; Kòn klau mơ kòn ùr bol mê dê rơp đơs hwơr, Ală cau pơnu bol mê dê rơp gơs bơta gơtơnggŏ, Mơ ală cau kra bol mê dê rơp gơs bơta mpau.

¹⁸Di ngan, tòm ală ngai hơ̆ Añ rơp tuh Hwềng Goh Añ hơđang ală dĭ klau mơ dĭ ùr Añ jê, Bol khai rơp đơs hwơr.

¹⁹Mơ tai, Añ rơp tơlik bơta krơi hơđang trồ, Mơ tềl is tòm ù; hơ̆ la mhàm, ồs mơ ñhŭ;

²⁰Mattơngai rơp gơlik gơs klam jơngo, Kơnhai rơp gơlik gơs mhàm lơm, Lài mơ tŭ tus ngai dờng mơ gơklŏ Yàng dê.

²¹Mơ tai, cau lơi hòi dan di sơnđan Yàng gen rơp geh dong klàs.’

²²Ơ ală cau Israel, iat tĕ jơnau añ đơs do: Yàng Jesu Cau Nasaret la Cau neh geh Yàng Tom Trồ lơh cơng nền nàng lơh ală broă gơnap gơnoar, ală bơta krơi mơ ală tềl is. Kơnòm di Kơnràñ, Yàng Tom Trồ neh lơh ală bơta hơ̆ digùl oh mi, be să tòm ală oh mi neh git loh.

²³Yàng Jesu neh kòl bơtào jat bơta lơh nền mơ bơta git lài Yàng Tom Trồ dê, mơ ală oh mi neh jồm tê cau iơh bơsak nàng pơng Yàng Jesu hơđang chi pơng mơ tơnchơt tơn.

²⁴Mơya Yàng Tom Trồ neh dong tă Kơnràñ bơh bơta jê sồt bơta chơt dê mơ lơh Kơnràñ in kis wơl, tài bơh bơta chơt ò rgơi kup Kơnràñ.

²⁵Bơh Dabit neh đơs bơh Kơnràñ lah: ‘Añ òs gŏ Yàng sùm di đap añ, Bơh Kơnràñ ơm đah ma añ, tồ añ in ò wañ lơnggơh dô êt lơi.

²⁶Bơh hơ̆, nùs añ chò hòp, lơmpiat añ hòn chò, Mơ Poac să añ kung rơp ơm lơngai tòm bơta gơn kơnòm.

²⁷Tài bơh Yàng ò sang hwềng soàn añ tòm lơgar Làng ƀồc, Kung ò ai Bơtau sàng goh Kơnràñ dê gŏ bơta ồm lề ò.

²⁸Yàng neh ai añ in git ală gùng bơta kis dê, Mơ kung rơp ai añ in bềng nùs hòn chò di đap Kơnràñ.’

²⁹Ơ jơh ală cau Israel, añ rgơi đơs dô bă nền cê mơ oh mi bơh ồng pàng bol he dê la bơtau Dabit lah khai neh chơt mơ tơp rau, bơtô ƀồc khai gam ơm digùl bol he jơl tus di ngai do.

³⁰Mơ bơh khai la cau gơnoar hwơr, mơ git Yàng Tom Trồ neh ho nền lah rơp ai dô Bơtau tòm jơi bơtiàn khai nggui hơđang sơbàn khai dê,

³¹Tài bơh Dabit neh gŏ lài mơ đơs bơh bơta kis wơl Bơtau Krist dê lah Kơnràñ ò kòl sang tòm lơgar làng ƀồc mơ poac să Kơnràñ kung ò gŏ bơta ồm lề sơl.

³²Jesu do mơ Yàng Tom Trồ neh lơh kis wơl, mơ jơh tơl nă bol hi la cau lơh cơng bơh bơta hơ̆.

³³Behơ̆, tơnơ̆ mơ tŭ Kơnràñ neh geh yò tơngguh đah ma Yàng Tom Trồ, mơ neh dòp geh jơnau ho ai Yàng Hwềng Goh bơh di Bèp, gen Kơnràñ tuh tơlik Yàng Hwềng Goh be ală oh mi gŏ mơ kơno.

³⁴Bơh Dabit ò guh hơđang trồ, mơya să tòm khai neh đơs lah: ‘Yàng neh đơs mơ Yàng añ lah: Nggui tĕ đah ma Añ,

³⁵jơl tus di tŭ Añ ơn ală cau sò tơm mê dê lơh gơs kơrnòl jơng mê in.’

³⁶Behơ̆, jơh hìu Israel git tĕ nền lah Jesu do, la Bơtau ală oh mi neh pơng di chi pơng, gen Yàng Tom Trồ neh bơtào lơh gơs Yàng mơ Bơtau Krist.”

³⁷Tòm tŭ kơno ală jơnau hơ̆ gen nùs bol khai jê sồt ngan, bol khai lùp mo Pier mơ ală cau gơnoar bơto dờng ndai lah: “Ơ oh mi, mbe bol hi pal lơh taih?”

³⁸Pier ho lah: “Gơjrañ sang glài tĕ, mơ kòp nă ai tĕ sơnđan Yàng Jesu Krist mơ gơs ƀaptem tồ geh toh glài he, lồc behơ̆ rơp dòp geh bơta ai gòi la Yàng Hwềng Goh.

³⁹Bơh jơnau ho pơgon hơ̆ gơrê bal mơ ală oh mi mơ kòn sau ală oh mi dê, mơ gơrê bal mơ jơh tơl nă cau ơm ngài sơl, hơ̆ la ală cau mơ Yàng la Yàng Tom Trồ bol he dê rơp hòi sac.”

⁴⁰Pier ai tai oă jơnau ndai nàng lơh cơng mơ bơto pơndòm bol khai lah: “Ală oh mi dong tĕ să he klàs bơh jơi bơtiàn iơh bơsak do!”

⁴¹Behơ̆ ală cau dòn jơnau hơ̆ gen gơs ƀaptem; mơ tòm ngai hơ̆ gơs pơgap pe rbô nă cau bơtơl tai tòm mpồl bol khai.

⁴²Ală cau hơ̆ kư̆ kơ̆ nùs prap bơta bơto sồr ală cau gơnoar bơto dờng dê, bơta gơtòmklac mơ oh mi, bơta dơrkă piang lă, mơ bơta hòi dan.

⁴³Kòp nă cau duh rngòt lơm, ală cau gơnoar bơto dờng lơh oă bơta krơi mơ tềl is.

⁴⁴Mơ jơh tơl nă cau dòn Yàng dô nùs dô bă bal, mơ ai jơh ală phan ngui sa bal.

⁴⁵Bol khai tac jơh phan mơna sre brê bol khai dê nàng tòmpà bal jat be bơta ngui sa kòp nă cau dê.

⁴⁶Kòp ngai bol khai ngac ngar mơ kơ̆ nùs pơjum sùm tòm hìu duh khoai; bơh hìu do tus hìu ne, bol khai dơrkă piang lă, mơ sào bal dô bă chò hòp mơ nùs song ngan,

⁴⁷jòng ro Yàng Tom Trồ mơ geh niam nùs jơh làng bol. Kòp ngai Yàng bơtơl tai tòm bol khai ală cau geh dong klàs.